1. ¿Ima cargutataq anciänukuna chaskiyashqa 1 Pëdru 5:2 ninqannö?

 JEHOVÄQA anciänukunatam churashqa sirweqninkunata cuidayänampaq. Y anciänukunaqa kushishqam wawqi paninkunata yanapayan y alli cuidayänampaqmi kallpachakuyan (Jer. 23:4; leyi 1 Pëdru 5:2). Congregacionchö tsënö trabajaq wawqikuna kayanqampitaqa, ¡alläpam kushikuntsik!

2. ¿Imakunapatan anciänukuna pasayan?

² Congregacionchö anciänukuna imëkata rurayänanqa manam fäciltsu, alliran trabajayänan. Estädus Unïduspita Tony jutiyoq anciänuta pasanqanman pensarishun. Pëqa cuentatam qokurqan imata ruranampaq niyaptimpis llapanta rurëta mana puëdinqanta. Kënömi nin: “COVID-19 qeshya qallëkuptinqa, reunionkunapaq y Diospita yachatsikuyänäpaqmi imëkata patsätsipakuyänä karqan, y noqaqa imatapis ruranäpaq niyämaptin chaskikoqllam kä. Peru mëläya trabajarpis manam ushaqtsu kä. Tsëkunachö ocupädu karmi Bibliata leyita, estudiëta y Diosnintsikman mañakuyta ichikllapa ichikllapa dejar qallëkurqä”. Kosövu markapita Ilir jutiyoq anciänupaqpis markanchö guërra kaptinmi, Jehoväpa sirweqninkunata dirigeqkuna niyämunqanta cäsukunanqa fäciltsu karqan. Kikinmi kënö nin: “Peligrösu sitiuchö täkoq wawqi panikunata yanapanäpaq sucursalpita niyämuptinqa mantsarqämi. Valienti kanäqa manam fäciltsu karqan, y imanö ruranäpaq niyämanqankunataqa mana yanapakunqantanömi rikarqä”. Asiachö Tim jutiyoq misionërunam ruranampaq kaqkunataqa llapanta rurëta puëdeqtsu. Kikinmi kënö nin: “Alläpa pishipashqa o utishqam sientikurqä”. Tsëkunapa pasaq anciänukunaqa, ¿imakunatataq rurayanman?

3. ¿Imanirtan Gedeonpita yachakunantsik?

³ Anciänukunaqa juez Gedeonpitam yachakuyta puëdiyan (Heb. 6:12; 11:32). Gedeonqa Jehoväpa sirweqninkunatam cuidarqan y yanaparqan (Juëc. 2:16; 1 Crön. 17:6). Kanan witsanqa  imëka mana allikunam pasakun, tsëmi anciänukunaqa Gedeonnölla Diospa sirweqninkunata cuidayänan (Hëch. 20:28; 2 Tim. 3:1). Gedeonnömi puëdiyanqankunallata rurayänan, humildi, cäsukoq kayänan y alli tsarakuyänan. Gedeonpitaqa llapantsikmi yachakuyta puëdintsik, anciänukuna rurayanqanta valoranantsikpaq y llapan rurayanqanchö yanapanantsikpaq (Heb. 13:17).

4. ¿Imanö nunatan Gedeonqa karqan?

⁴ Gedeonqa Jehovä mandanqanta rurëta mana puëdinampaq kaqtam pensarqan y humildim karqan. b Juk angelmi Gedeonta willarqan madianïtakunapa podernimpita israelïtakunata libranampaq pëta Jehovä akrashqa kanqanta. Y Gedeonqa humildi karmi kënö nirqan: “Familiäqa Manasespa kastanchö mana kaqllam; y papänïpa familianchöqa noqalläpis mana kaqllam kallä” (Juëc. 6:15). Gedeonqa pensarqan Jehovä mandanqanta rurëta mana puëdinampaq kaqtam. Peru Jehoväqa musyarqanmi rurëta puëdinampaq kaqta, y yanapaptinmi Gedeonqa mandanqanta rurarqan.

5. ¿Imakunapa pasartan anciänukunaqa llapantapis rurëta puëdiyanqanta pensayanman y humildi kayänanqa fäciltsu kanman?

⁵ Anciänukunaqa humildim kayan y manam pensayantsu llapantapis rurëta puëdiyanqanta (Miq. 6:8; Hëch. 20:18, 19). Manam rurayanqankunapita alabakuyantsu, ni manam rurayanqankuna mana alli yarquptin o rurayanqankunachö pantarnin alläpaqa llakikuyantsu. Peru höraqa llapantapis rurëta puëdiyanqantam pensayanman y humildi këqa manam fäciltsu kanman. Këllaman pensarishun: capaz juk anciänu imata ruranampaq niyaptimpis chaskikunman, peru tsëpitaqa cuentata qokurinman rurëta mana puëdinampaq kaqta. O capazchi ruranqankunapita alabapäyanman o ruranqankunata mana gustar mana allita parlayanman. Tsëkunapa juk anciänu pasarqa, ¿imatataq Gedeonpita yachakunman?

6. ¿Imanötan anciänukunaqa Gedeonnölla llapanta rurëta mana puëdiyanqanta cuentachö katsiyanman? (Rikäri fötuta).

⁶ Yanapayäshunëkipaq mañakuy. Imakunallata rurëta puëdinqanta musyaq nunaqa, wakinkuna yanapayänampaqmi mañakun. Tsëtam Gedeonpis rurarqan (Juëc. 6:27, 35; 7:24). Y anciänukunapis tsëtam rurayan. Ishkë kaq  pärrafuchö Tony jutiyoq anciänum kënö nin: “Noqaqa wamra kanqäpitam imatapis ruranäpaq niyämaptinqa rurëta mana puëdikarpis chaskikoqlla kä. Tsëmi Diosta Adorana Hörachö tsë asuntupaq warmïwan parlayarqä. Tsënöllam Jesusnölla wakinkunata yachatsishun y pëkunaman markäkushun neq videutapis jw.org päginachö rikarqä”. Tsëmi Tonytaqa yanaparqan yanapayänampaq wakinkunata mañakunampaq, kënömi nin: “Congregacionchöqa llapan trabäjukunam alli rurakëkan, y Jehoväpita mas yachakunäpaqpis kananqa tiempü kanmi”.

7. ¿Imanötan Gedeon ruranqampita anciänukuna yachakuyanman rurayanqankunata mana gustar mana alli parlayaptin? (Santiägu 3:13).

⁷ Rurayanqëkikunata mana gustar mana alli parlayäshuptiki ama cölerakuyëtsu. Tsëkuna pasakuptimpis, anciänukunaqa Gedeonpitam yachakuyta puëdiyan. Gedeonqa jutsa ruraq kanqanta cuentachö katsirmi Efrain kastapita nunakuna cölerashqa qayapäyaptimpis cölerakurqantsu (Juëc. 8:1-3). Cölerakunampa rantinmi humildi karqan, parlapäyanqanta shumaq wiyarqan y respëtuwan parlaparqan. Yachaq anciänukunaqa Gedeonnömi kayan. Rurayanqankunata mana gustar pipis cölerëpa parlapaptinqa, shumaqmi wiyayan y respëtuwanmi parlapäyan (leyi Santiägu 3:13). Tsëta rurayaptinmi, congregacionchöqa llapankunapis tranquïlu kawakuyanqa.

8. ¿Imatataq anciänukuna rurayanman alabapäyaptin? Juk pasakunqanwan willakaramuy.

⁸ Rurayanqëkikunapita Jehoväta alabayë. Gedeontaqa madianïtakunata vencinqampitam nunakuna alabapäyarqan, peru Gedeonqa Jehovä yanapashqa kanqantam nirqan (Juëc. 8:22, 23). ¿Imatataq Gedeonpita anciänukuna yachakuyanman? Imata rurarpis Jehoväta alabayänampaqmi (1 Cor. 4:6, 7). Këllaman pensarishun: capaz juk anciänuta shumaq yachatsikunqampita alabapäyanman, tsëqa allichi kanman Diospa Palabranllapita yachatsikushqa kanqanta y Jehoväpa sirweqninkunata dirigeqkuna alli yachatsikoq kanampaq yanapanqampita parlakurinqan. Tsëmi höra höraqa anciänukuna kënö tapukuyänan: “Kë rurëkanqäpitaqa, ¿noqataku o Jehovätaku alabëkäyan?”. Timothy jutiyoq anciänuta pasanqanta rikärishun. Anciänu tikrarirqa, alläpam gustarqan congregacionkunachö discursë. Kënömi willakun: “Discursar qallarqa, alli pensëkurmi shumaq ejemplukunawan yachatsikoq kä, y tsënö yachatsikunqäpitam wawqi panikunaqa alläpa alabapäyämaq. Jehoväta alabayänampa rantin o Biblia yachatsikunqanman pensayänampa rantinmi, noqallata alabapëkayämarqan”. Tsëmi Timothyqa juknöpana yachatsikur qallëkurqan (Prov. 27:21). ¿Y alliku karqan? Kikinmi kënö willakun: “Kananqa wawqi panikuna willayäman mana allikunapa pasayanqan hörakuna o Jehoväpa mas amïgun tikrayänampaq yachatsikunqä imanö yanapashqa kanqantam. Kananqa puntata alabayämanqampitapis tsënö willayämaptinmi masqa kushikü”.

9. ¿Imanötan musyakänan karqan Gedeon cäsukoq y valienti kanqan? (Rikäri jana qaranchö dibüjuta).

⁹ Juez kanampaq Jehovä churariptinqa, ¿Gedeonqa cäsukoqtsuraq y valientitsuraq kanman karqan? Jehovämi Gedeonta mandarqan papänin ruratsinqan Baalpa altarninta ushakätsinampaq (Juëc. 6:25, 26). Tsëpitanam ishkë kutipa mandarqan mas wallkallaman soldädunkunata tikratsinampaq (Juëc. 7:2-7). Y tsëpitanam mandarqan madianïta soldädukunata paqaspa atacanampaq (Juëc. 7:9-11).

10. ¿Imakunapa pasanqantan juk anciänupaqqa cäsukoq kanan fäciltsu kanman?

¹⁰ Anciänukunaqa imëpis cäsukuyänampaqmi listu këkäyänan (Sant. 3:17). Cäsukoq karqa, Biblia ninqankunata y Jehoväpa sirweqninkunata dirigeqkuna niyämunqankunatam kushishqa rurayanqa, y wakinkunapaqpis ejemplum kayanqa. Peru höraqa manam juk anciänupaq fäciltsu  kanqa cäsukoq kanan. Capazchi Jehoväpa sirweqninkunata dirigeqkuna niyämunqankuna seguïdu chämuptin llapanta leyinanqa fäciltsu kanqa. O tsë carta ninqannö rurëqa mana yanapakunampaq kaqta pensanqa. O autoridäkuna michäkuyanqanta imatapis ruranampaq mandayanqa, y tsëta ruranqanrëkur capazchi carcelmampis apayanman. Tsëkunapa pasarqa, ¿imanötan juk anciänuqa Gedeonnö cäsukoq kanman?

11. ¿Imatan anciänukunata yanapanqa cäsukoq kayänampaq?

¹¹ Jehoväpa sirweqninkunata dirigeqkuna niyämunqankunata cäsukuyë. Diosnintsikmi Gedeonta mandarqan teytan ruratsinqan altarta imanö ushakätsinampaq, mëchö juk altarta ruranampaq y ima animalta pishtëkur rupatsinampaq. Y Gedeonqa Jehovä mandanqannöllam cäsukurqan. Kanan witsanqa Jehoväpa sirweqninkunata dirigeqkunam, wawqi panikunata imanö cuidayänampaqpis anciänukunata niyämun. Y anciänukuna tsë niyämunqankunata llapanta cäsukuyaptinmi pëkunataqa alläpa kuyantsik. Pëkuna cäsukoq kayaptinmi, congregacionchöqa llapantsikpis kushishqa kantsik (Sal. 119:112).

12. Jehoväpa sirweqninkunata dirigeqkuna ima cambiutapis rurayämuptinqa, ¿imanötan anciänukuna Hebrëus 13:17 ninqanta cäsukuyanman?

¹² Cambiukuna kaptin cäsukuyë. Jehovämi Gedeonta mandarqan mëtsika soldädunkuna këkaptimpis, trescientusllawanna quedakunampaq (Juëc. 7:8). Capazchi Gedeonqa kënö pensarqan: “Cäsi llapan soldädukunata kutikuyänampaq ninqäqa, ¿allitsuraq kanqa? ¿Wallkaq soldädukunallawanqa vencita puëdishaqtsuraq?”. Tsënö pensarpis, Gedeonqa cäsukurqanmi. ¿Imatataq anciänukunaqa Gedeonnöpis rurayanman? Cambiukuna kaptin jinan höra cäsukurmi (leyi Hebrëus 13:17). Këllaman pensarishun: 2014 watachömi, Jehoväpa Testïgunkunata Pushaqkuna cambiuta rurayämurqan Diospita Yachatsikunantsik Wayikunata y Asamblëa localkunata juknöpana ruranantsikpaq (2 Cor. 8:12-14). Puntataqa Diospita Yachatsikuna Wayichö juntakaq congregacionmi tsë wayita rurarnin gastayanqan qellëta cada killa kutitsikoq. Peru kananqa manam tsënönatsu. Entëru Patsachö llapan congregacionkunapam fondu qellëninkuna kan y tsë qellëtam gastayan Diospita Yachatsikuna Wayikunata rurayänampaq. Tsë wayichö juntakaq congregacionqa mananam cada killa kutitsikunnatsu, tsëpa rantinqa puëdiyanqanllatanam churayan. Tsë cambiu kanqanta musyarirmi Josë jutiyoq anciänu mana creirnin kënö nirqan: “Tsë cambiukunaqa juk nacionkunachöchi yanapakun, peru këchöqa manam yanapakunqatsu. Diospita Yachatsikunantsik Wayiqa manam ni jukllëllapis rurakanqatsu”. Tsënö pensarpis kë anciänuqa yanapakurqanmi. Kikinmi kënö nin: “Proverbius 3:5 y 6 textuchö ninqantam yarpärirqä, tsëchöqa Jehoväman confiakunäpaqmi nin. Y rurayanqan cambiuqa, ¡alläpam yanapakurqan! Manam Diospita Yachatsikuna Wayillatatsu rurayarqö, sinöqa ichikllawampis mas rurakänampaqmi yanapakuyta yachakuyarqö”.

13. (1) ¿Imatataq Gedeon musyarqan? (2) ¿Imanötan anciänukunaqa Gedeonnö valienti kayanman? (Rikäri fötuta).

 ¹³ Valienti kayë Jehovä mandakunqankunata rurayänëkipaq. Gedeonqa vïdan peligruchö kanan këkaptin y mantsakuykarpis Jehovä mandanqantam cäsukurqan (Juëc. 9:17). Jehovä yanapëkanqanta musyarirqa, Gedeonqa Jehoväpa sirweqninkunataqa mana mantsakushpam yanaparqan. Diosnintsikpita yachatsikunqantsikta michäkuyanqan nacionkunachö anciänukunaqa Gedeonnömi kayan. Prësuyänampaq kaqta, tapupäyänampaq kaqta, trabäjupita qarquyänampaq kaqta o maqayänampaq kaqta musyëkarpis, mana mantsapakuypam reunionkunata rurayan y yachatsikuyänampaq patsätsiyan. c Alläpa sufrimientu kanqan witsanqa, anciänukunaqa valientim kayänan y vïdankuna peligruchö këkaptimpis Jehoväpa sirweqninkunata dirigeqkuna niyämunqankunatam cäsukuyänan. Capazchi pëkunaqa niyämunqa nunakuna ushakäyänampaq kaqta willakunantsikpaq, tsë willakunqantsikkunaqa jatusaq runtu tamyanömi nunakunapaq kanqa. O capazchi niyämunqa Magogpita Gog ushakätsimënintsikta munayaptin imakunata rurarnin salvakunantsikpaq (Ezeq. 38:18; Apoc. 16:21).

14. Gedeonpaqqa, ¿fäcilku karqan chikeqninkunata qatipë?

¹⁴ Israelïtakunapa jueznin karnin chikeqninkunawan pelyananqa Gedeonpaq manam fäciltsu karqan. Madianïtakunaqa paqaspam qeshpir ëwakuyarqan, tsëmi Gedeonqa Jezreel pampapita qallëkur Jordan mayuyaq qatiparqan. Tsë mayu kuchunkunachöqa capazchi mëtsika kashayoq plantakuna karqan (Juëc. 7:22). Tsënö kaptimpis, Gedeonqa manam qatipëta dejarqantsu. Alläpa pishipashqa o utishqa këkarpis, trescientus soldädunkunawanmi Jordan mayuta tsimpayarqan y madianïtakunata taripärirmi llapanta venciriyarqan (Juëc. 8:4-12).

15. ¿Imanirtan anciänukunaqa pishipashqa o utishqa sientikuyanman?

¹⁵ Congregacionchö wawqi panikunata cuidar  y familiankunata cuidarmi anciänukunaqa pishipashqa o utishqa sientikuyanqa. ¿Imatataq Gedeonpita anciänukuna yachakuyanman?

16, 17. (1) ¿Imatan Gedeonta yanaparqan alli tsarakunampaq? (2) ¿Imapitataq anciänukunaqa següru kayanman? (Isaïas 40:28-31; rikäri fötuta).

¹⁶ Jehoväman confiakuyë, pëmi kallpayoqta tikratsiyäshunki. Tsëtam Gedeonpis rurarqan, y Jehoväqa yanaparqanmi (Juëc. 6:14, 34). Juk kutim Gedeonwan soldädunkunaqa chakipa qatipayarqan ishkaq madianïta gobernantikunata, capazchi camëllunkuna montakurkur qeshpir ëwëkäyarqan (Juëc. 8:12, 21). Y Jehovä yanapaptinmi taripäriyarqan y venciriyarqan. Tsënöllam qamkuna anciänukunapis Jehoväman confiakuyänëki. Pëqa, ‘imëpis kallpanwanmi’ yanapayäshunki (leyi Isaïas 40:28-31).

¹⁷ Rikärishun Matthew jutiyoq anciänuta pasanqanta. Pëqa Hospitalkunachö Yawarta mana Churamänapaq Yanapakoq grüpuchömi yanapakun. Pëtaqa, ¿imatan yanapan alläpa pishipashqa o utishqa këkaptin? Kikinmi kënö nin: “Clärum rikarqö Filipensis 4:13 ninqan noqachö imanö cumplikanqanta. Alläpa pishipashqa o utishqa sientikunqä hörakunam yanapëkamänampaq Jehoväman mañakü, tsënöpa wawqi panikunata shumaq yanaparinäpaq. Y tsë hörakunam sientirï kallpanwan Jehovä imanö yanapamanqanta”. Gedeonnöpis, anciänukunaqa wawqi panikunatam mana fäcil këkaptimpis imëkanöpa yanapayan. Y confiakuyanmi mañakuyaptin Jehovä yanapanqanta y kallpayoqta tikratsinqanta. Peru ima pasakuptimpis, mañakuyanqanta Jehovä wiyanampaq kaqta y kallpayoqta tikratsinampaq kaqtam confiakuyan (Sal. 116:1; Filip. 2:13).

18. Këchö yachakurinqantsiknö, ¿imanötan anciänukunaqa Gedeon ruranqannö rurayanman?

¹⁸ Rikärinqantsiknömi, anciänukunaqa Gedeonpita imëkata yachakuyta puëdiyan. Cuentachömi katsiyänan imakunata rurëta puëdiyanqanta y mana puëdiyanqanta, humildim kayänan y cuidakuyänanmi alabapäyaptin, rurayanqankunapita mana allita parlayaptimpis. Tsënöllam kë ushanan tiempukunachö cäsukoq y valienti kayänan. Y imëka mana allikunapa pasarpis, kallpanwan Jehovä yanapanampaq kaqtam següru kayänan. Anciänukunataqa alli trabajayanqampitam alläpa valorantsik (Filip. 2:29).