Teytäkunaqa Ishkë kaq Jatun Guërra witsanmi, Estonia nacionpita Alemania nacionta ëwakuyarqan, y tsëchömi yurikurqä. Tsëpitanam Canadä nacionta ëwakuyarqä. Punta kaq wayïkunaqa Ottäwa markapa amänunchömi karqan. Wallpata wätayanqan wayichömi täkuyarqä y juk kuchuntam blanqueayämurqan täkuyänäpaq. Alläpa pobrim kayarqä, peru desayünükunapaqqa runtullapis karqanmi.

Juk kutim, Testïgukuna mamänïta leyipäyarqan Apocalipsis 21:3 y 4 textuta. Tsë textu ninqanta entiendirirqa mamänïqa waqarqanmi, y Bibliapitam yachakur qallëkurqan. Y ichik tiempullachömi papänïwan mamänï bautizakuriyarqan.

Teytäkunaqa manam ingles parlëta yachayaqllatsu, peru Biblia ninqantaqa llapantam cäsukuyaq. Papänïqa Sudbury Ontariu markachö niquel metalta fundirnin entëru paqas trabajashqa këkarpis, cäsi llapan säbadum panï Sylviatawan yachatsikoq apayämaq. Y cada semänam Täpakoq revistata yachakuyaq kayä. Teytäkunam yachatsiyämarqan Diosnintsikta kuyanäpaq, tsëmi 10 watayoqllaraq këkarpis 1956 watachö bautizakurqä. Jehoväta teytäkuna kuyayanqanmi yanapamashqa kananyaqpis Jehovä Diosta kuyanäpaq.

Peru secundariäta usharirqa, juknöpanam pensar qallëkurqä. Precursor karqa, avionwan viajar juk nacionkunata reqipakunäpaq qellëta mana tarinäpaq kaqtam pensarqä. Tsëmi juk radiuchö trabajarqä discuta churarnin, tsë rurëqa alläpam gustamaq. Peru paqasyaq trabajarmi reunionmanqa höra hörallana ëwaq kä, y Diosta mana kuyaq nunakunawanmi mas tiempu juntaraq kä. Peru Bibliapita yachakunqäkunaman pensarmi cambiukunata rurarqä.

Ontariuchö këkaq Oshawa markatam ëwakurqä. Tsëchömi Ray Normanta, panin Leslita y wakin precursorkunata reqirqä. Llapankunam yanapayämarqan. Pëkunataqa imëpis kushishqallatam rikaq kä y pëkunanö këtam munarqä. Pëkunam animayämarqan precursor kanäpaq, tsëmi 1966 wata setiembri killachö precursornö yanapakur qallëkurqä. Llapan ruranqäpis gustamaptinmi kushishqa sientikoq kä. Peru manam pensarqätsu imëkakunachö yanapakunäpaq kaqtaqa.

Secundariäta manaraq usharmi, Canadächö këkar Betelchö yanapakunäpaq solicitüta llenarqä. Tsëmi precursor këkaptïna, Torontu sucursalpita qayarayämarqan chusku watapa Betelchö trabajanäpaq. Peru noqaqa Leslitam alläpa kuyarqä y Betelman ëwarqa manana tinkunäpaq kaqtam pensarqä. Tsënö  kaptimpis, Diosnintsikman mañakurirmi Leslipita llakishqa despidikurir Betelman trabajaq ëwakurqä.

Betelchöqa lavanderïachömi trabajarqä, y tsëpitanam secretariu karqä. Tsë witsankunam, Leslitaqa Gatineau Quebec markachö precursöra especial kanampaq churariyarqan. Noqaqa Leslimanmi alläpa yarparaq kä, “¿imataraq rurëkan? ¿Këman shamurqa allitatsuraq rurarqö?” nirmi yarpachakoq kä. Peru ¡Leslipa turin Raytam Betelman invitarayämurqan!, y tsë cuartullachö kayänapaqmi churarayämurqan. Tsënöpam Lesliwanqa yapë parlar qallëkuyarqä. Y 1971 wata 27 de febrërum casakuyarqä. Betelman chusku watapa invitayämanqanqa, tsë junaqmi ultimu junaq karqan.

Quebec markachö frances idiömata parlaq congregacionmanmi mandayämarqan. Tsëpita ichik tiempullatanam congregacionkunata watukar yanapakunäpaq niyämarqan. Noqaqa 28 watayoqllaran karqä y manam imatapis alläpaqa yacharqäraqtsu. Peru Jeremïas 1:7 y 8 ninqanmi yanapamarqan. Warmï Lesliqa cärruchö atska kuti accidentäkushqa karmi punuyta puëdeqtsu. Tsëmi, “¿congregacionkunata watukar yanapakuyta puëdiyäshaqtsuraq?” nir alläpa yarpachakurqä. Peru Leslim kënö nimarqan: “Jehovä invitëkämashqaqa, ¿manatsuraq ichikllatapis rurarishwanraq?”. Tsënö nimaptinmi congregacionkunata watukayänäpaq änikuriyarqä, y 17 watapam yanapakuyarqä.

Congregacionkunata watukar alläpa ocupädu kaptïmi Lesliwan juntu kayänäpaqqa tiempu tinkoqtsu. Peru juk lünismi punkuta takakarayämurqan y yarqunäpaqqa manam pipis kanaqtsu, mantelwan tsapashqa canastallam churarëkänaq. Tsë canastachöqa kanaq frütakuna, quësu, tanta, juk botëllachö vïnu, cöpakuna y juk papelchömi kënö nir qellqarëkänaq: “Warmikiwan pasiakoq ëwayë”. Tsë junaqqa shumaqmi achëkamurqan. Peru discursüta preparanä kaptinmi, pasiakoq ëwayänäpaq tiempü mana kanqanta Leslita nirqä. Pëqa entiendimarpis llakishqam sientikurqan. Peru trabajar qallëkurnam yarpachakurqä. Y Efesius 5:25 y 28 ninqantam yarpärirqä. ¿Jehovätsuraq yarpëkätsimarqan Lesli imanö sientikunqanta cuentachö katsinäpaq? Tsëpitam Jehovä Diosnintsikman mañakurir, Leslitaqa “aku, ëwashun” nirqä y alläpam kushikurqan. Cärruwanmi mayu kuchunyaq ëwayarqä, tsë sitiuqa alläpa shumaqmi karqan. Tsëchö mantelta qopïkurmi täkuyarqä y shumaqmi tsë junaq pasayarqä. ¡Y tiempuqa tinkurqanmi discursüta preparanäpaqpis!

Congregacionkunataqa watukaq kä Columbia Britänica markapita qallëkurmi Terranova markayaq, y kushishqam watukarnin yanapakoq kä. Unë viajëta munanqäqa, ¡cumplikëkarqanmi! Höra höraqa Galaad Escuëlamampis ëwëtam munarqä, peru juk nacionchö yanapakuytaqa mantsapakurqämi. Noqaqa misionëru këta mana puëdinäpaq kaqtam pensaq kä. Tsënöllam, Africa nacionman mandayämänanta mantsapakoq kä, tsëchöqa tukuyläya qeshyakuna y guërrakunam kaq. Tsëmi yanapakuykanqällachö kushishqa këkarqä.

Unë Union Soviëtica kanqan nacionkunachöqa, 1992 watachöqa Diospita yachatsikunantsikta autoridäkuna manam michäkuyarqannatsu. Tsëmi Estonia nacionchö misionërunö yanapakuyänäpaq sucursalpita niyämarqan. Tsëchö yanapakuytaqa manam pensashqatsu kayarqä, tsëmi Jehoväman mañakuyarqä. Yapëmi kënö pensayarqä: “Jehovä invitëkämashqaqa, ¿manatsuraq ichikllatapis rurarishwanraq?”. Tsëmi invitayämanqanta chaskikuyarqä, peru kënömi pensayarqä: “Africaman mandamanqantsikpitaqa tsë nacionkunaman ëwanqantsikqa alliran”.

Estoniaman chärirqa, estoniu idiömatam yachakur qallëkuyarqä. Y tsëchö juk ishkë killakuna këkäyaptïmi, congregacionkunata watukayänäpaq nirayämarqan. Watukayänä karqan Balticu lamar kuchunkunachö kima nacionkunachö këkaq congregacionkunata y Rusiachö këkaq Kaliningraduchö congregacionkunatam. 46 congregacionkuna y atska grüpukunam karqan. Tsëmi yachakuyänä karqan leton, lituanu y rüsu idiömata. Mana fäcil këkaptimpis, idiömankunata parlëta kallpachakuyanqäpitaqa wawqi panikuna kushikuyaqmi. Y 1999 watachönam Estoniachö sucursalta patsätsiyarqan y noqata, Toomas Edurta, Lembit Reileta y Tommi Kauko wawqitam sucursalta rikar yanapakuyänäpaq churayämarqan.

Tsëchömi reqiyarqä Siberiaman unë apayanqan Testïgukunata. Imëka mana allikunatam carcelchö pasayänaq y familiankunawampis manam tinkuyänaqtsu. Tsënö këkarpis, Diosnintsiktaqa manam dejayarqantsu y kushishqam yachatsikuyaq. Tsënö kayanqanta rikäyanqämi yanapayämarqan imëkapa pasarpis alli tsarakuyänäpaq y kushishqa kayänäpaq.

Atska watakunapanam yanapakuyarqä y jamayänäpaqqa manam tiemputa rakikäyaqtsu kayä, tsëmi Lesliqa alläpa utishqa o pishipashqa sientikur qallëkurqan. Manam musyayarqätsu fibromialgia qeshya tsarikanqanta, tsë qeshyawanqa entëru cuerpum nanan. Tsëmi Canadäta kutikuyta pensayarqä. Peru tsë witsankunam, Nueva Yorkchö Patterson niyanqanchö Sucursalta Rikaqkunapaq escuëla kanan karqan, y tsëmanmi invitayämarqan. Noqakunaqa pensayarqä ëwëta mana puëdiyänäpaq kaqtam. Peru Diosnintsikman alli mañakurirmi tsë invitacionta chaskikuyarqä. Tsëman ëwayanqäqa allipaqmi karqan. Tsë escuëlachö këkäyaptïmi, Leslita doctorkuna atiendiyarqan, y alliyärirqanmi. Tsënöpam yanapakurnin sïguiyarqä.

2008 watachömi Estoniachöna këkäyaptï, Principal Oficïnapita qayarayämarqan Republica Democrätica del Congu nacionman ëwayänäpaq. ¡Manam ima nita puëdirqätsu! Ëwëta munayanqäta o mana munayanqäta waräninlla willakunäpaqmi niyämarqan. Yarpachakurnin punuyta mana puëdinampaq kaqta musyarmi tsë paqasqa Leslita willarqätsu. Peru noqaqa Africaman ëwëta mantsapakurmi entëru paqas Jehoväman mañakurqä.

Waräninnam Leslita willarirqä, tsënam kënö niyarqä: “Africata ëwanantsikpaqmi Jehovä invitëkämantsik. Y ¿imanötan mana ëwarninqa musyashun tsëchö yanapakuyta puëdinqantsikta o mana puëdinqantsiktapis?”. Tsënö nirmi 16 watapana Estoniachö yanapakushqa këkarpis, Republica Democrätica del Congo nacionpa Kinsasa markanman avionwan chäriyarqä. Tsëchö Betel wayiqa shumaq  jardinyoq y yachanëpaqmi karqan. Y cuartükunamanqa puntata Lesli churarqan Canadächö qarayämanqan tarjëtatam. Tsë tarjëtachöqa kënömi neq: “Mëchöpis mandayäshunqëkichöqa shumaq plantanömi wëtanëki”. Tsë nacionchömi rikäyarqä nunakunata Bibliapita yachatsirnin wawqikuna kushishqa kayaqta, tsëmi cuentata qokuyarqä juk nacionchö këkarpis kushishqa këta puëdiyänäpaq kaqta. Y tiempuwanqa, Africapa 13 nacionninkunachö sucursalkunata watukayänäpaqmi niyämarqan. Tsë sucursalkunata watukarmi rikäyarqä tsë markakuna jukläya jukläya karpis, alläpa shumaq kanqanta. Africachö yanapakuytaqa manam mantsayarqänatsu, y tsëman mandayämanqampitam Jehoväta agradecikuyarqä.

Conguchö-Kinsasa markachöqa hasta kurukunatapis mikuyaqmi. Manam pensayarqätsu tsëkunata mikuyänäpaq kaqtaqa. Peru wawqi panikuna kushishqa mikuyaptinmi probayarqä y gustayämarqanmi.

Tsë nacionchöqa wakin markakunachömi nunakunaqa grüpu grüpu pelyayaq, warmikunata y wamrakunatam mana alli tratayaq. Tsëchö täkoq wawqi panikunapaqmi vïvirisninkuna apayarqä y Diospita yachatsirnin yanapayänäpaqmi ëwayarqä. Wakin wawqi panikunaqa alläpa pobrim kayaq. Peru wanushqakuna kawariyämunampaq kaqman y Diosnintsik kuyamanqantsikmanqa allim markäkuyaq o yärakuyaq y Jehoväpa sirweqninkuna niyämunqankunatapis kushishqam cäsukuyaq. Tsëkunata rikäyanqämi yanapayämarqan Diosnintsikta mana dejëpa sirwiyänäpaq. Wakin wawqi panikunaqa wayinnaqmi quedashqa kayänaq y cosëchankunatapis suwarmi apakushqa kayänaq. Tsëmi pensariyarqä Diosnintsikwan amïgu kanqantsik mas alli kanqanta y imëka kapamanqantsikkunaqa raslla o saslla ushakärinqanta. Tsëkunapa pasëkarpis, wawqi panikunaqa manam quejakuyaqllatsu. Tsënö kayanqanta rikäyanqämi yanapayämarqan imëka mana allikunapa pasarpis y qeshyapäkurpis alli tsarakuyänäpaq.

Mana pensayanqä höram Hong Kong sucursalchöna yanapakuyänäpaq nirayämarqan. Tsëchö yanapakuytaqa manam pensashqatsu kayarqä. Peru juk nacionkunachö Jehovä imanö  yanapayämashqanta yarparmi alläpa mana pensëllapa ëwakuyarqä. 2013 watachömi, Africachö shumaq sitiukunata dejëkur y amïgükunapita despidikurir Hong Kongta ëwakuyarqä.

Hong Kongchö yachakäyänäqa manam fäciltsu karqan. Alläpam bülla kaq y mëtsë nacionpita tukuy costumbriyoq nunakunam kayaq, y chïnu cantones idiömata yachakunampis manam fäciltsu karqan. Peru wawqi panikunaqa kushishqam chaskiyämarqan y mikuyninkunapis gustayämarqanmi. Tsëchöqa mëtsikaqmi bautizakuyaq, peru lötikunaqa alläpam cuestaq. Tsëmi Jehoväpa Testïgunkunata Pushaqkunaqa decidiyarqan Corëa del Surchöna sucursal kanampaq y Hong Kongchö këkaq lötinkunataqa cäsi llapantam rantikuyarqan. Tsëmi 2015 watachö Corëa del Surta ëwakuyarqä, tsëchömi kananyaq yanapakuykäyä. Coreänu idiömata yachakunampis manam fäciltsu. Peru wawqi panikunaqa niyäman coreänu idiömachö parlayaptï alli entiendiyämanqantam, tsëmi kushikuyä.

Mushoq amïgukunata rurananqa manam fäciltsu. Peru cuentatam qokuyarqö qarakoq karnin y wawqi panikunata reqinantsikpaq kallpachakurninqa wallka tiempullachö reqinakur qallëkunqantsikta. Y llapan wawqi panikunapis cäsi igual-llam kayan. Jehovä Diosnintsik alläpa shumaqta kamamashqantsik kaptinmi, llapankunata kuyëta y amïgu këta puëdintsik (2 Cor. 6:11).

Jehovä kuyanqannömi llapan nunakunata kuyëta yachakuyarqö y kuyayämarnin Jehovä noqakunapaq imata rurëkämunqanta y imanö dirigikäyämanqantam alli rikëta yachakuyarqö. Qelanäyanqä hörakuna y wakinkunapaq mana yachanëpaq kayanqäta pensayanqä hörakunam amïgükuna mandayämanqan tarjëtakunata y animayämarnin mandayämanqan cartakunata leyiyaq kayä. Y clärum rikäyarqä mañakuyanqäta Jehovä contestamunqanta, animayämanqanta y wanayanqä hörakuna kallpayoqta tikratsiyämanqanta.

Watakuna pasanqanmannömi, Lesliwan cuentata qokuyarqö alläpa ocupädu këkarpis juntu kayänäpaq tiemputa rakiyänä precisanqanta. Tsënöllam rikäyarqö juk idiömata yachakurnin pantarninqa cölerakunantsikpa rantin, asikunantsik mas alli kanqanta. Llapan paqaskunam tsë junaq gustayämanqankunaman pensayä y Jehovätam agradecikuyä.

Rasumpa kaqchöqa, manam misionëru këta ni juk nacionkunachö täkuytaqa pensashqatsu karqä. Peru Jehovä yanapamaptinmi juk nacionkunachö kushishqa yanapakuyarqö. Diospa willakoqnin Jeremïas ninqannömi noqapis nï: “Juknöpa pensëkaptïmi Teyta Jehovä, qamnö pensanäpaq imëkata rurarqunki” (Jer. 20:7). Jehoväqa mana pensëkäyaptïmi, juk nacionkunachö yanapakuyänäta permitishqa y bendiciyämashqam. ¡Hasta avionwan viajanätapis permitishqam! Diosnintsik munaptinmi mëtsika nacionkunachö sucursalkunata visitayarqö. Tsënöllam warmï Leslitapis alläpa agradecikü, pëqa mëchöpis yanapakunqächöqa allipam yanapamashqa y kushishqam sientikushqa.

Imëpis yarpäyä Diosnintsikta kuyarnin yanapakuykäyanqätam. Kanan tiempu chaskinqantsik bendicionqa manam shamoq tiempuchö Jehovä bendicimänapaq kaqwan igualantsu. Tsë tiempuchöqa llapan kawaqkunatam Teyta Jehoväqa llapan munayanqanwan bendicinqa (Sal. 145:16).