1. ¿Imanö kanatataq Jehoväqa shuyaran?

 WAMRANKUNA kariptinqa, casädukunaqa alläpam kushikuyan. Peru tsënö kushikurpis, manam wamrankuna imëpis llullulla kanantaqa munayantsu. Y mana winaptinqa, alläpachi yarpachakuyanman. Tsënöllam Jehovä Diosnintsikpis alläpa kushikun juk nuna sirwirnin qallëkuptin, peru manam munantsu ‘llullu wamranölla’ kakuyänantaqa (1 Cor. 3:1). Tsëpa rantinqa, llapan sirweqninkuna ‘poqu nunanöna’ o poqu cristiänuna kayänantam shuyaran (1 Cor. 14:20).

2. ¿Ima tapukuykunapa respuestantataq yachakushun?

² Këchömi yachakushun kë tapukuykunapa respuestanta: ¿imanötan poqu cristiänuqa? Poqu cristiänu këta munarqa, ¿imatataq ruranantsik? ¿Imanirtan poqu cristiänu kanantsik? Y poqu cristiänu tikrarirqa, ¿imapitataq cuidakunantsik?

¿IMANÖTAN POQU CRISTIÄNUQA?

3. ¿Imanötan poqu cristiänuqa?

³ Bibliachö poqu nirqa, manam edäninkunapaqtsu parlëkan. Griëgu idiömachö “poqu” ninqan palabrataqa, “allillata ruraq” y “complëtu” nirpis traduciyanmanmi (1 Cor. 2:6). a Tsëmi poqu cristiänu kanapaqqa, Dios yachatsikunqankunata alli entiendinantsik y wamranöqa portakunantsiknatsu. Y poqu cristiänu tikrarirqa, ¿imata rurartan sïguinantsik? Poqu cristiänu sïguinapaqmi kallpachakunantsik (1 Tim. 4:15). Peru ¿imanötan musyashwan juk jövin o juk mayor nuna poqu cristiänu tikrashqa kanqanta?

4. ¿Imanötan Diospa kaqchö poqu cristiänukunaqa kayan?

 ⁴ ¿Imanötan Diospa kaqchö poqu cristiänukunaqa kayan? Jehovä mandakunqankunata wakin wakinllata cäsukuyänampa rantinmi, llapan mandakunqankunata cäsukuyan. Jutsasapa karpis o imata pantarpis, Dios munanqannö nunanam kayan y imatapis Jehovä Diosnintsik munanqannömi rurayan. Tsënöllam cada junaq kallpachakuyan Diosnintsik munanqannö pensayänampaq (Efes. 4:22-24). Y Diospa leyninkuna y consëjunkuna ninqanman alli pensëkur imatapis alli deciditam yachakuyashqa. Tsëmi cada asuntupaq juk ley kanantaraqqa shuyaräyantsu. Y imatapis decidirqa, tsë decidiyanqanta rurayänampaqmi kallpachakuyan (1 Cor. 9:26, 27).

5. ¿Imatan pasanman Diospa kaqchö mana poqushqa kayaptinqa? (Efesius 4:14, 15).

⁵ Peru Diospa kaqchö mana poqushqa cristiänuqa nunakuna engañakuyanqanta, Bibliapa contran yachatsikuyanqanta y Diospa contran churakashqakuna niyanqankunatam fäcil-lla creirinman (leyi Efesius 4:14, 15). b Y capazchi jukkuna imatapis tariyaptin chikikunman, piwampis pleytuyllata gustanman o imatapis raslla o saslla cölerakunman, o tentacionmampis fäcil-lla ishkirinman (1 Cor. 3:3).

6. ¿Imanötan poqushqa cristiänu këman chashwan? Igualatsikuywan willakaramuy. (Rikäri fötukunatawan dibüjukunata).

⁶ Bibliachöqa, poqu cristiänu këman chanqantsiktam, juk wamra poqu nuna këman imanö chanqantawan igualatsin. Wamrakunaqa imëkakunataran yachakuyänan, tsëmi wanayan poqushqa nunakuna cuidayänanta y rikarëkäyänanta. Këllaman pensarishun: juk mamä, warmi wamranwan cällita pasëta munarqa, makipita jancharkurmi pasatsinqa. Peru mas jatunyaptinqa kikinllana pasëta puëdinqanta musyarmi, kikinlla pasanampaq dejanqa, peru ishkan läduman alli rikëkur-raq pasanampaqmi yarpätsinqa. Y shipashyäriptinqa, mananam yarpätsinan precisanqanatsu, kikinllanam pasëta yachanqa. Tsënömi pasakun Diospa kaqchöpis; mana poqushqa këkaq cristiänukunaqa ima peligrupitapis cuidakuyänampaq y allita decidiyänampaqqa, poqushqa cristiänukuna yanapayänantaran wanayan. Peru poqushqa cristiänukunaqa  Jehovä imata pensanqanta musyayänampaqmi Bibliapa consëjunkunaman alli pensayan y tsënöpam allita decidiyan.

7. Poqu cristiänukunaqa, ¿manaku jukkuna yanapayänanta wanayan?

⁷ Poqu cristiänukunapaq tsënö nirqa, ¿jukkuna yanapayänanta manana wanayanqantaku nikantsik? Manam. Pëkunapis höraqa jukkuna yanapayänantam wanayan. Tsë höraqa, ¿imachötan poqu cristiänuwan mana poqushqa cristiänu jukläya? Mana poqushqa cristiänuqa pëpa rantinchö jukkuna decidiyänanta o imatapis ruranampaq kaqta niyänantaraqmi shuyaran. Peru poqu cristiänuqa jukkuna consejayanqanta cuentaman churëkurmi imatapis kikin decidin (Gäl. 6:5).

8. ¿Imanirtan nintsik poqushqa cristiänukuna jukläya jukläya kayanqanta?

⁸ Imanömi mayor nunakunapis igualtsu kayan, tsënöllam Diospa kaqchö poqushqa cristiänukunapis jukläya jukläya kayan. Këllaman pensarishun: wakinmi imatapis mas entiendeq, wakinnam valienti, wakinnam kuyakoq y wakinnam llakipäkoq kayan. Y conciencia asuntuchöpis jukläya jukläyam decidiyan, peru tsë decidiyanqankunaqa Biblia ninqanwan allillam. Tsëmi jukläya decidiyanqampitaqa rimanakuyänantsu, tsëpa rantinqa juknölla kayänampaqmi kallpachakuyänan (Rom. 14:10; 1 Cor. 1:10).

POQU CRISTIÄNU KËTA MUNARQA, ¿IMATATAQ RURANANTSIK?

9. ¿Imanirtan nintsik watakuna pasaptinlla poqu cristiänu këman mana chanqantsikta?

⁹ Wamrakunaqa, watakuna pasanqanmannömi poqu nuna këman chäriyan. Peru poqu cristiänu këmanqa manam watakuna pasaptinllatsu chantsik. ¿Imanötan tsëta musyantsik? Këllaman pensarishun: Corintuchö cristiänukunaqa Diospita yachakurirmi bautizakuyarqan, santu espïrituta chaskiyarqan y Pablu yachatsiptin alli yachakuyarqan (Hëch. 18:8-11). Peru bautizakuyanqampita watakuna pasariptimpis, manam poqu cristiänu këman chäyarqanraqtsu (1 Cor. 3:2). ¿Imatataq rurashwan pëkunatanö mana pasamänapaq?

10. ¿Imatataq ruranantsik poqu cristiänu kanapaq? (Jüdas 20).

¹⁰ Poqu cristiänu këta munar-ran poqu cristiänu këmanqa chanki. Wamranölla kakuyta munaqkunaqa manam poqu cristiänu këman chäyanqatsu (Prov. 1:22). Wakin nunakunaqa mayorna këkarpis, manam kikinkunapa cuentankunapitaqa imatapis rurayantsu, sinöqa papäninkunalla imatapis decidiyänantam shuyaräyan. Tsë nunakunanö këtaqa manam munantsiktsu. Tsëpa rantinqa, kikintsikmi kallpachakunantsik poqu cristiänu kanapaq (leyi Jüdas 20). Poqu cristiänu manaraq kanqëkita cuentata qokurqa, poderninwan yanapashunëkipaq Jehoväta mañakuy. Pëmi yanapashunki poqu cristiänu këta ‘munanëkipaq’ (Filip. 2:13).

11. ¿Imanötan Jehoväqa poqu cristiänu tikranapaq yanapamantsik? (Efesius 4:11-13).

¹¹ Jehoväqa manam kikintsikllapita poqu cristiänu këman chänata shuyarantsu. Pëqa yanapamänapaqmi congregacionman alli yachatsikoqkunata y anciänukunata churamushqa. Pëkuna yanapamashqam “poqu nuna tikrashun y Cristu poqu kanqannö kashun” (leyi Efesius 4:11-13). Tsënöllam, santu espïritunwan yanapamantsik ‘Cristu pensanqannö’ pensanapaq (1 Cor. 2:14-16). Y kë Patsachö këkar Jesus imanö kanqanta musyanapaqmi Palabran Bibliaman Mateu, Marcus, Lücas y Juan librukunata qellqatsimushqa. Jesus pensanqannö pensar, ruranqannö rurar y parlanqannö parlarqa, poqu cristiänu këmanmi chäshun.

 ¿IMANIRTAN MASLLA YACHAKUNANTSIK?

12. ¿Imakunatan kayan ‘Cristupita qallanan [kaq] yachatsikuykunaqa’?

¹² Poqu cristiänu këman chänapaqqa, manam ‘Cristupita qallanan yachatsikuykunallatatsu’ musyanantsik. Cristupita yachakur qallarqa, yachakuntsik arrepentikuypaq, markäkuypaq, bautizakuypaq y wanushqakuna kawariyämunampaq kaqtam (Heb. 6:1, 2). Tsë yachatsikuykunataqa llapan cristiänukunam musyayänan. Tsëtam apostol Pëdrupis Pentecostes fiesta junaq mëtsikaq nunakunata yachatsirqan (Hëch. 2:32-35, 38). Cristupa qateqnin kanapaqqa, tsë yachatsikuykunamanqa llapan shonquntsikwanmi creinantsik. Tsëmi apostol Pablupis nirqan wanushqakuna kawariyämunampaq kaqman mana creiqa, Cristuman mana creinö kanqanta (1 Cor. 15:12-14). Tsënö kaptimpis, manam tsëkunata yachakunqantsikkunallawanqa conformakunantsiktsu.

13. Hebrëus 5:14 ninqannöpis, ¿imatataq ruranantsik chukru mikuyta mikoq cuenta? (Rikäri fötukunata).

¹³ Cristupita qallanan yachatsikuykunata yachakurpis, chukru mikuykunata mikoq cuentam Jehoväpa leyninkunata y consëjunkunata alli yachakunantsik, tsëmi yanapamäshun Jehovä pensanqankunata entiendinapaq. Y tsëpaqqa Bibliatam leyinantsik, leyinqantsikmanmi alli pensanantsik y yachakunqantsiknömi kawanantsik. Tsëmi yanapamäshun Jehovä munanqannö imatapis allita decidinapaq (leyi Hebrëus 5:14). c

14. ¿Imanötan apostol Pablu Corintuchö cristiänukunata yanaparqan poqu cristiänu tikrayänampaq?

¹⁴ Wakin cristiänukunaqa Diospa kaqchö mana poqu karninmi, imatapis decidita munayanqampaq Biblia cläru mana niptinqa decidita puëdiyantsu. Y mana precisëkaptinmi tsë asuntupaq juk leytaraq mañakuyan. O wakinkunaqa tsë asuntupaq Bibliachö mana niptinmi munayanqanta rurakuyta puëdiyanqanta niyan. Tsëchi pasarqan Corintuchö cristiänukunawampis. Pëkunaqa santukunapaq cocinayanqanta mikuyta puëdiyanqanta o mana puëdiyanqantam Pabluta tapuyarqan. Peru Pabluqa imata rurayänampaq kaqta ninampa rantinmi, concienciankunata tapuykur imatapis decidikuyänampaq  ‘derëchuyoq kayanqanta’ entienditsirqan. Y Bibliapa atska consëjunkunatam yarpätsirqan tsëkunaman alli pensëkur imatapis decidiyänampaq y wakinkunata mana alli rurëman mana ishkitsiyänampaq (1 Cor. 8:4, 7-9). Tsënömi yanaparqan Diospa consëjunkunaman alli pensëkur imatapis decidiyänampaq y juk leytaraq mana mañakuyänampaq.

15. ¿Imanötan apostol Pabluqa hebreu cristiänukunata poqu cristiänu kayänampaq yanaparqan?

¹⁵ Hebreu cristiänukunaman Pablu cartakunqampitapis yachakuyta puëdintsikmi. Hebreu cristiänukunaqa, wakinqa manam poqu cristiänu kayänampaq kallpachakuyarqantsu, tsëmi apostol Pabluqa kënö nirqan: “Yapëran lichita munayanki, y manam chukru mikuytaqa” (Heb. 5:12). Pëkunaqa manam alkäbutsu kayarqan cambiukunata congregacionwan Jehovä yachëkätsinqanta (Prov. 4:18). Këllaman pensarishun: Jesus wanunqanrëkur Moises Qellqanqan Ley manana välikaptimpis, wakin judïu cristiänukunaqa, Moises Qellqanqan Leytam mas välitsiyarqan. Tsëtaqa rurayarqan Jesus wanunqampita 30 watakunana pasashqa këkaptinnam (Rom. 10:4; Tïtu 1:10). 30 watapaqa tsë cambiukunata allinam entiendiyanman karqan, peru manaran entiendiyarqanraqtsu. Tsëmi apostol Pabluqa pëkunata yanapëta munar cartakurqan. Tsëtam pëkunaqa wanayarqan poqu cristiänu tikrayänampaq y tsë witsan Jehoväta adorëkäyanqan, israelïtakuna adorayanqampitapis mas mejor kanqanta entiendiyänampaq. Tsëta alli entiendirmi pëkunaqa judïukuna chikiyaptimpis, yachatsikurnin sïguiyänan karqan y valienti kayänan karqan (Heb. 10:19-23).

POQU CRISTIÄNU TIKRARIRQA, ¿IMAPITATAQ CUIDAKUNANTSIK?

16. Poqu cristiänu tikrarirqa, ¿imatataq rurar sïguinantsik?

¹⁶ Poqu cristiänu tikrarirqa, poqu cristiänu sïguinapaqmi kallpachakunantsik y manam dejarinantsiktsu (1 Cor. 10:12). Tsëmi, yachakuykanqantsikta o mana yachakuykanqantsiktapis seguïdu rikäkunantsik (2 Cor. 13:5).

17. ¿Imatataq yachakuntsik Colösas cristiänukunaman Pablu cartakunqampita?

¹⁷ Colösaschö cristiänukunaqa poqu cristiänunam kayarqan, tsënö karpis Diosta mana sirweq nunakuna yachatsikuyanqampitam  cuidakuyänan karqan. Tsëmi pëkunaman cartakurnin apostol Pablu cläru nirqan poqu cristiänu kayänan y poqu cristiänu sïguiyänampaq kallpachakuyänan alläpa precisanqanta (Col. 2:6-10). Tsënöllam Epafraspis Colösaschö cristiänukunataqa alli reqeq, tsëmi “poqu” cristiänu sïguiyänampaq o “complëtu” kayänampaq Diosnintsikman imëpis mañakoq (Col. 4:12; nöta). Tsëqa, Pabluwan Epafras niyanqannöpis, ¿imatataq rurashwan poqu cristiänu sïguinapaq? Alliran kallpachakunantsik y yanapamänapaqmi Jehoväman mañakunantsik. Pabluwan Epafrasqa, Colösaschö cristiänukuna mana allikunapa pasëkarpis, poqu cristiänu sïguiyänantam munayarqan.

18. ¿Imaraq juk poqu cristiänuta pasarinman? (Rikäri fötuta).

¹⁸ Apostol Pabluqa clärum hebreu cristiänukunata nirqan, poqu cristiänu këta dejarqa Diospa amïgun manana kayänampaq kaqta. Shonqunkunachö Diosta mana kuyarqa, manam jutsata rurayanqankunapita arrepentikuyanmantsu karqan, ni Diosnintsikpita perdonta chaskiyanmantsu karqan. Peru kushikuypaqqa karqan, hebreu cristiänukuna tsënö mana tikrakuriyanqanmi (Heb. 6:4-9). ¿Imatan pasan kanan witsan Diosnintsikta sirwita dejashqakuna o congregacionpita qarqushqakuna arrepentikur yapë Jehoväta sirwir qallëkuyaptin? Pëkunaqa humildi karnin y arrepentikurninmi Pablu parlanqan nunakunanö mana kayanqanta rikätsikuyan. Peru Jehoväta yapë sirwita qallarqa, Jehovä yanapanantaran wanayan (Ezeq. 34:15, 16). Tsëmi anciänukunaqa pëkunata yanapayänampaq poqu cristiänukunataraq niyan, tsënöpa Diosnintsikwan yapë amïgu kayänampaq.

19. ¿Imanö këtataq llapantsikpis munantsik?

¹⁹ Poqu cristiänu kanëkipaq kallpachakuykarqa, ama qelanäkuritsu. Tsëpa rantinqa, chukru mikuykunata mikoq cuenta Diosnintsikpita maslla yachakuy y pë munanqannö pensanëkipaq cada junaq kallpachakuy. Y poqu cristiänuna karqa, poqu cristiänu këta mana dejanëkipaq cada junaq kallpachakuy.