1955 watachömi yurikurqä. Noqakunaqa kima wawqim kayä, y noqam menor kaq kä. Finlandia nacionpa sur kaq lädunchömi winarqä, costa lädumampa. Tsë markataqa kananqa Vantaa nirmi reqiyan.

Yurikunäpaq juk ishkë watakuna pishikaptinmi mamänïqa Testïgu tikranaq. Peru papänïqa manam munaqtsu mamänï Bibliapita yachatsiyämänanta ni reunionkunaman apayämänanta. Tsëmi papänï wayichö mana kanqan hörakunalla Jehoväpitaqa yachatsiyämaq.

Noqaqa wamra kanqäpitam Jehovä mandakunqankunata defendirqä. Juk kutim siëti watayoq këkaptï, verilättyjä nir reqiyanqan yawarwan rurashqa tortillata mikuyta mana munaptï profesörä alläpa cölerakurqan. Y amälas mikutsimëta munarmi juk kaq makinwan shimïta kicharkur, juknin kaq makinwan tenedorwan mikutsimëta munarqan. Peru noqaqa tenedortam ishkeqpaq laqyarirqä.

Papänïqa 12 watayoq këkaptïmi wanukurqan, tsëpitaqa librinam reunionkunaman ëwëta puëdeq kä. Wawqi panikunam alläpa yanapayämarqan, tsëmi Diosnintsikpita mas yachakunäpaq yanapamarqan. Bibliatam cada junaq leyeq kä y publicacionkunatapis allim estudiaq kä. Tsëta ruranqämi yanapamarqan 1969 wata 8 de agostuchö, 14 watayoq këkar bautizakunäpaq.

 Secundariäta usharirqa precursor regularmi tikrarirqä, y juk ishkë semänakunallatam Pielavesi markata yanapakoq ëwakurqä. Tsë markaqa Finlandiapa principal markampa amänunchömi këkan.

Pielavesi markachömi Sirkka jutiyoq panita reqirqä. Pëqa sencïllulla kawakoq y Jehoväta kuyaq panim karqan. Manam imachöpis reqishqa këta ni imëkayoq këta munaqtsu. Ishkäkunam mëchöpis Jehoväta sirwita munayarqä y mëchöpis yanapakuyänäpaq niyämaptinqa, rurayänäpaqmi decidïdu kayarqä. 1974 wata 23 de marzum casakuyarqä. Casakuskir juk markakunata pasyaq ëwakuyänäpa rantinmi, Testïgukuna mana kanqan Karttula markata yachatsikoq ëwakuyarqä.

Casakuskirqa clärum rikäyarqä, Gobiernunta puntaman churayaptïqa, llapan wanayanqäta Jehovä mana faltatsimunampaq kaqta (Mat. 6:33). Juk pasakunqanta willariyashqëki. Karttula markachö kayanqa witsanqa manam cärrükuna karqantsu. Qallananchöqa biciclëtawanmi viajayaq kayä. Peru tamya witsanqa alläpam alalaq y manam viajëta puëdiyaqtsu kayä. Y karu markakunata yachatsikoq ëwayänäpaqqa cärrutam wanayaq kayä y rantiyänäpaqqa manam qellënïkuna karqantsu.

Peru juk junaqmi wawqï illaqpita watukayämarqan, y cärruntam dejapayämarqan. Manam imachöpis gastakuyarqätsu, segürumpis pagashqanam karqan. Gasolïnan winayänällapaqnam yarpachakuyarqä. ¡Cärruyoqmi tikrariyarqä!

Jehoväqa clärum rikätsiyämashqa llapan wanayanqäta mana faltatsimunampaq kaqta. Y noqakunaqa Gobiernumpita yachatsikuyllatam puntaman churayänä karqan.

1978 watachömi, Precursorkunapaq Escuëlachö këkäyaptï yachatsiyämaq Raimo Kuokkanen a wawqi niyämarqan Galaad Escuëlaman ëwayänäpaq solicitudta llenayänäpaq. Tsëmi tsë escuëlaman ëwëta munar ingles idiömata yachakur qallëkuyarqä. Peru 1980 watachömi Finlandia sucursalchö yanapakuyänäpaq niyämarqan, tsëmi solicitudta llenayarqänatsu. Tsë witsampaqqa Betelchö yanapakoqkunaqa manam Galaad Escuëlaman ëwëta puëdiyaqtsu. Noqakunaqa  mëchöpis niyämanqanchömi yanapakuyta munayarqä, tsëmi Finlandia sucursalta yanapakoq ëwakuyarqä. Peru imëllapis Galaad Escuëlaman invitayämänampaq kaqta pensarmi ingles idiömataqa yachakur sïguiyarqä.

Tsëpita juk ishkë watakuna pasariptinmi, Jehoväpa testïgunkunata pushaqkunaqa niyarqan, Galaad Escuëlaman betelïtakuna ëwëta puëdiyanqanta. Tsëmi noqakunaqa jinan höra solicitudta llenayarqä. Betelchö yanapakurqa kushishqam kayarqä, peru Galaad escuëlamanmi ëwëta munayarqä y mëmampis mandayämanqanman ëwayänäpaqmi listu këkäyarqä. Y Galaad Escuëlapa 79 kaq cläsinmanmi invitarayämarqan, y 1985 watam graduakuriyarqä. ¿Peru mëmantan mandayämarqan? ¡Colombia nacionmanmi!

Colombia nacionman chäriyaptïqa, sucursalchö trabajayänäpaqmi niyämarqan. Tsëchöqa, llapan puëdinqämannömi trabajarqä. Peru juk watata cumplirirmi juk lädumanna cambiayämänampaq mañakurqä. Llapan niyämanqanchömi yanapakurqö, peru tsë kutillam cambiayämänampaqqa mañakurqö. Tsënam Huila läduchö këkaq Neiva markachö misionërunö yanapakuyänäpaq niyämarqan.

Jehoväpita yachatsikuyqa imëpis alläpam gustamashqa. Finlandia nacionchö soltëru y precursor kanqä witsanqa, patsa waranqampita ampinqanyaqmi yachatsikoq kä. Sirkkawan casakurirpis wakin junaqkunaqa entëru junaqmi yachatsikuyaq kayä. Karu markakunata ëwarqa mananam kutiyämoqnatsu kayä, cärrullachömi punuyaq kayä warannin tempränu yachatsikur qallayänäpaq.

Misionërunö yachatsikuyanqäqa yanapayämashqa, puntatanö kushishqa yapë yachatsikuyänäpaqmi. Yanapakuyanqä congregacionchö wawqi panikunaqa alläpa respetakoq, kuyakoq y agradecikoqmi kayaq.

Neiva markapa amänunchöqa atska markakunam kaq, tsë markakunachöqa manam Testïgukuna kaqtsu y nunakunaqa wanutsinakurllam kayaq. Tsëmi peligrösu kaptin mana reqishqa nunakunaqa, tsë markakunaman ëwëta puëdiyaqtsu. Tsë markakunachö nunakunata Diospita yachatsita alläpa munarmi yarpachakoq kä. Tsëmi Jehoväman kënö mañakurqä: “Tsë markakunapita kë Neiva markachö täraq mëqan nunallapis Bibliapita yachakur bautizakutsun y poqu cristiänu tikrarir markanman kutïkur yachatsikutsun”. Tsënö mañakunqäqa allim karqan, peru Jehoväqa pensanqäpitapis mastam rurarqan.

Tsëpita ichik tiempullatam, Fernandu Gonzalez jutiyoq jövinta Bibliapita yachatsir qallëkurqä. Pëqa Algeciras markapitam karqan y markanchöqa manam Testïgukuna karqantsu, y Neiva markamanmi llapan semänakuna, 50 kilömetrus karuta trabäjunman shamoq. Pëqa yachakuyänäpaq kaqkunata allim preparakoq, y yachakur qallayanqä junaqpitam reunionkunamampis shamoq. Tsënöllam yachakur qallanqan semänachö atskaq nunakunata invitarqan yachakuykanqankunata yachatsinampaq.

Fernanduqa, Bibliapita yachakur qallanqampita joqta killa pasariptinllam, 1990 wata enëru killachö bautizakurqan, tsëpitanam precursor tikrarirqan. Tsënömi Algeciras markachöqa juk Testïgu karqanna, y sucursalpitam precursor  especialkunata tsë markaman mandayarqan. Y 1992 wata febrëru killam tsë markachö juk congregacion patsakärirqan.

Peru Fernanduqa manam Algecira markachö quedakurqantsu, sinöqa casakurirmi warmin Olgawan, Testïgukuna mana kanqan San Vicente del Caguan niyanqan markaman yachatsikoq ëwakuyarqan. Tsëchöpis juk congregacion patsakänampaqmi yanapakuyarqan. Y 2002 watachönam congregacionkunata watukanampaq churariyarqan. Y kananyaqpis congregacionkunata watukarmi yanapakuykäyan.

Tsë pasakunqanwanmi cläru rikarqö yanapakunqantsikchö Jehovä yanapamänata munarqa, imatapis cläru willanantsik precisanqanta. Pëqa mana pensanqantsikkunatam ruraramun, pëllam chakrapa duëñunqa (Mat. 9:38).

1990 watachömi congregacionkunata watukanäpaq churayämarqan y Colombiapa mas jatun kaq markanmanmi mandayämarqan, Bogotäman. Sirkkawan noqaqa jatun markakunachö kawëta mana yachakashqa karmi, tsë markachö yanapakuytaqa mantsapakuyarqä. Peru Jehovämi Filipensis 2:13 textuchö ninqanta cumplirqan, tsë textum kënö nin: “Teyta Diosmi pëpaq alli kanqannö, rurëta munayänëkipaq y rurayänëkipaq kallpayoq kayänëkipaq yanapayäshunki”.

Tiempuwannam punta kaq pärrafuchö parlanqantsik Medellin markaman congregacionkunata watukanäpaq mandayämarqan. Tsë markachö nunakunaqa yachakashqana karmi, cällikunachö pelyayaptin y wanutsinakuyaptimpis mantsakäyaqnatsu. Juk kutim Bibliapita juk nunata yachëkätsiptï cällichö illapanakur qallëkuyarqan, noqaqa mantsakarmi patsaman lätakëta munarqä, peru tsë nunaqa manam mantsakarqantsu. Tsëpa rantinqa leyimurmi sïguirqan y leyir usharirnam, “juk rätu kutiramushaq” nirnin yarqurirqan y ishkan wamrankunawan chäramurnam kënö nimarqan: “Disculpëkamë wamrakuna apamoqmi yarqurqö”.

Y juk kutichönam wayin wayin yachatsikuykäyaptï warmïqa “illapëtam munayämashqa” nirnin noqa kaqman cörrimurqan, tsëmi noqapis alläpa mantsakarqä. Peru tsëpitaqa musyariyarqä warmïta illapëta mana munayashqa kayanqantam, sinöqa lädumpa pasëkaq nunatam.

Tiempuwanqa maqanakuyaptin o wanutsinakuyaptimpis manam alläpaqa mantsakäyaqnatsu kayä. Tsë markachö wawqi panikunaqa tsë problëmakunapa pasar o mas peor problëmakunapa pasarpis allim tsarakuyaq. Tsëta rikarmi noqakunapis kënö niyarqä: “Pëkunatapis Jehovä yanapëkarqa, noqantsiktapis yanapamäshunmi”. Anciänukuna niyämanqankunatam cäsukuyaq kayä, allim cuidakuyaq kayä y rurëta mana puëdiyanqä kaqkunataqa Jehoväpa makinchömi dejariyaq kayä.

Peru höraqa manam pensayanqänö alläpa peligrösutsu kaq. Juk kutim juk familiata wayinman visitaq ëwarqä. Tsëchö këkaptïmi waqtachöqa o jaqchöqa ishkaq warmikuna alläpa discutir qayapänakur qallëkuyarqan, noqaqa manam rikëta munarqätsu. Peru wayiyoq warmiqa ventänallapa rikänäpaqmi nimarqan, y kutin kutin  rikänäpaq nimaptinmi ventänapa rikärirqä, y rikärinäpaqqa ¡ishkë lörukunallam vecïnukunata yachaparnin pleyturnin këkäyänaq!

1997 watachömi Soltërukuna Bibliapita Yachakuyänampaq Escuëlachö yachatsikunäpaq churayämarqan. b Escuëlakunachö yachakuyqa alläpam gustamaq, peru manam pensarqätsu yachatsikoq kanäpaq kaqtaqa.

Tsëpitanam watukakoqkunata rikänapaq churayämarqan, peru tsë cargu manana kaptinmi congregacionkunata watukanäpaq yapë churayämarqan. 30 watakunapitapis masnam escuëlakunachö yachatsikur y congregacionkunata watukar yanapakuykä. Alläpa kushishqam yanapakurqö, y tsë yanapakunqäkunachöqa atska bendicionkunatam chaskirqö, tsënö kaptimpis noqapaqqa höraqa manam fäciltsu karqan.

Mana alli geniuyoq karmi höraqa wawqi panikunata imatapis rurayänampaq alläpa exigeq kä. Juk kutim wawqi panikunata qayapëpa parlaparqä mas kuyakoq kayänampaq, y wawqi panikunaman maslla pensayänampaq. Peru kuyakoq kayänampaq nikarmi noqaqa qayapëpa parlapëkarqä (Rom. 7:21-23).

Höraqa tsënö geniuyoq kanqäpitam alläpa llakikur qelanäreq kä (Rom. 7:24). Juk kutim alläpa mana alli sientikur Jehoväta kënö nirqä: “Misionëru këta dejarirmi Finlandiata kutikuyta munä”. Peru tsë junaqchö reunionta wiyanqämi yanapamarqan, yanapakuykanqächö yanapakur sïguinäpaq y imanö kënïchö mas alliyänapaq kallpachakur sïguinäpaq. Jehovä tsënö contestamanqampitaqa alläpam agradecikü, tsënöllam agradecikü mas alli nuna kanäpaq kuyëpa yanapamanqampita.

Warmï Sirkkawanqa Jehovätam alläpa agradecikuyä llapan tiempükunawan yanapakuyänäta permitiyämanqampita. Tsënöllam alläpa agradecikü kuyakoq y alläpa yanapakoq warmiwan casakunäta permitimanqampita.

Ichikllachönam 70 watayoq kashaq, y mananam escuëlakunachö yachatsikushaqnatsu ni congregacionkunata watukashaqnatsu. Peru manam llakikütsu, ¿imanir? Rasumpa kaqchöqa, Jehoväta sirwinapaqqa manam tsënö carguyoq këtaraqtsu wanantsik, masqa välin humildäwan y llapan shonquntsikwan agradecikurnin Jehoväta adoranqantsikmi (Miq. 6:8; Mar. 12:32-34).

Jehoväta sirwinqächöqa imëkachömi yanapakurqö y alläpa shumaqmi kashqa. Tsë llapankunachöqa yanapakurqö, manam wakinkunapita mas alli karnintsu ni imëkakunata rurëta yachartsu, tsëpa rantinqa, imëkachö pantaq këkaptïpis kuyakoq karnin kikin Jehovä yanapamaptinmi. Pë mana yanapamaptinqa manachi tsë llapankunata rurëta puëdïmantsu karqan. Tsëmi noqaqa pensä imachöpis rurëta mana puëdinqäkunachöqa kikin Jehovä yanapamashqa kanqanta (2 Cor. 12:9).