1. ¿Imanötan kawakuntsik Jehoväta adorarnin, y ima pasakuptimpis ima rurëtataq munantsiktsu?

 KANAN witsanqa mëtsika millon nunakunam shumaq patsachönöna rasumpa kushishqa kawakuykantsik. Tsënö kawakuytaqa manam ima pasakuptimpis dejëta munantsiktsu. Wakin nunakunatapis tsënö kawakuyänampaqmi yanapëta munantsik. ¿Imanö kawakuypaqtan parlëkantsik? Sirweqninkunawan juntu Jehoväta adoranqantsikpita kushishqa kawakunqantsikpaqmi.

2. ¿Imanö kawakunatataq Jehovä permitimarquntsik?

² Kë munduchö nunakuna mana allikunata rurarlla y chikinakurlla kawakuyaptimpis, Jehovä Diosnintsikmi permitishqa pëta sirweqkunaqa tranquïlu kawakuyänampaq (1 Juan 5:19; Apoc. 12:12). Jehoväqa musyanmi Satanas gobernanqan tiempuchö kawëqa mana fäcil kanqanta. Peru kuyamarnintsikmi, pëpita yachakurnin y pëta sirwirnin kushishqa kanata permitimantsik. Palabranchömi nimantsik pëta sirwirnin kushishqa kanqantsikqa imëka peligrupita “tsapämanqantsikta” y “alli regashqa huertachö kawënö kanqanta” (Is. 4:6; 58:11). Jehovä bendicimashqallam, kë ushanan tiempukunachö kushishqa y següru sientikuyta puëdintsik (Is. 54:14; 2 Tim. 3:1).

3. ¿Puntataqa imëtan cumplikarqan Isaïas librupa 65 kaq capïtulunchö willakunqan?

³ Isaïas librupa 65 kaq capïtulunchömi Jehovä willakurqan sirweqninkuna imanö kawakuyänampaq kaqta. Tsë willakunqanqa puntataqa cumplikarqan Jesus manaraq shamuptin 537 watachömi. Tsë watachömi, Babiloniachö këkaq arrepentikoq judïukunaqa libri tikrarir markankunata kutikuyarqan. Y Jehovä yanapaptin y bendiciptinmi, ushakashqa  këkaq Jerusalen markata shumaqta yapë shäritsiyarqan. Tsënöllam, Jehovä munanqannö llapan israelïtakuna adorayänampaq templutapis yapë shäritsiyarqan (Is. 51:11; Zac. 8:3).

4. ¿Imanötan Isaïas librupa 65 kaq capïtulun willakunqan kanan witsan cumplikëkan?

⁴ Isaïas willakunqanqa kanan witsampis cumplikëkanmi. 1919 watachömi alläpa puëdeq Babiloniapita Jehoväpa sirweqninkuna librakäriyarqan. Tsëpita patsëqa Jehoväpa sirweqninkunaqa, mëtsë nacionkunapa ëwarninmi nunakunata Diospita yachatsiyashqa y mëtsika congregacionkunata patsätsiyashqa. Maqakoq y mana alli kawakoq mëtsika ollqukuna y warmikunam Bibliapita yachakurirnin Diosnintsik ‘munanqannöna kawakur qallayashqa’ (Efes. 4:24). Isaïas willakunqanqa shamoq tiempuchöran masqa cumplikanqa. Peru kanan witsampis Jehovä bendicimashqam kushishqa kawakuntsik. ¿Ima bendicionkunatataq chaskintsik sirweqninkunawan juntu Jehoväta adoranqantsikpita y imanirtan tsënö adorëta dejashwantsu?

IMA BENDICIONTATAQ CHASKINTSIK SIRWEQNINKUNAWAN JEHOVÄTA ADORANQANTSIKPITA

5. Isaïas 65:13 ninqannö, ¿ima bendiciontataq Jehoväta adoranqantsikpita chaskintsik?

⁵ Alli mikurir kallpayoq sientikoqnömi kushishqa kantsik. Isaïas librum willakurqan, Jehoväta sirweqkuna y mana sirweq kaqkuna imanö kawakuyanqanta (leyi Isaïas 65:13). Jehoväqa allim yachatsimantsik y santu espïritunwanmi yanapamantsik alli mikoq y alli upoq cuenta kanantsikpaq. Palabranwan y mëtsika publicacionkunawanmi yanapamantsik (igualaratsi Apocalipsis 22:17 textutawan). Peru Jehoväta mana sirweq kaqkunaqa “mallaqaq cuenta” y “yakunaq cuentam kawakuyan y penqakuychömi” ushayan. Pëkunaqa Diosta wanarpis, manam pëpita yachakuyta puëdiyantsu (Amos 8:11).

6. Joel 2:21-24 ninqannö, ¿imanötan Jehovä bendicimantsik, y tsë bendicimanqantsikqa imanötan yanapamantsik?

⁶ Joelmi willakurqan, Jehoväqa sirweqninkunata llapan wanayanqanwan bendicinampaq kaqta. Nirqanmi gränu mikuyninkuna, vïnunkuna y olïvupita aceitinkuna mana pishitsinampaq kaqta (Joel 2:21-24). Tsënö nirqa nikarqan sirweqninkunata llapan wanayanqanwan bendicinampaq kaqta y hasta yachatsinampaq kaqtam. ¿Imanötan Jehoväqa kanan witsan tsëta cumplikan? Pëqa Palabran Bibliawan, publicacionkunawan, Internetchö päginawan, reunionkunawan y asamblëakunawanmi yachatsimantsik. Tsënöpam alli mikurir kallpayoq sientikoqnö, cada junaq yachakurnin kushishqa sientikuntsik.

7. ¿Imanirtan shonquykichö kushishqa sientikunki? (Isaïas 65:14).

⁷ Alläpa kushishqam sientikuntsik. Cristiänukunaqa Diosnintsik ruramunqankunapitam agradecikurnin kushikuntsik (leyi Isaïas 65:14). ¿Imanirtan “alläpa kushikuntsik”? Bibliata leyirninmi rasumpa kaqta yachakuntsik y änimanqantsikkunatam musyantsik. Tsënöllam noqantsikrëkur Jesus wanushqa kaptin, änimanqantsikkunata cumplimunampaq kaqta següru kantsik. ¡Manaku tsëkunapita wawqi panikunawan parlarninqa alläpa kushishqa sientikuntsik! (Sal. 34:8; 133:1-3).

8. ¿Imanötan Jehoväpa sirweqninkuna kayan?

⁸ Jehoväpa sirweqninkunaqa juknöllam kayan y kuyanakuyanmi (Col. 3:14). Tsëmi rikätsimantsik shumaq patsachö imanö kawakunapaq kaqta. Tsëchöqa, kanampitapis masmi kuyanakushun y “juknölla kashun”. Jehoväpa testïgunkunata reqirirmi juk pani kënö nirqan: “Noqaqa manam kushishqatsu kawakurqä ni manam familiächöpis kushishqaqa  kawarqätsu. Kuyakoq kë imanö kanqantaqa musyarqa, Jehoväpa testïgunkunata reqir-ran”. Sirweqninkunawan juntu Jehoväta adoranqantsikpita nunakuna chikimashqa y parlamashqapis, Jehoväqa kuyamantsikmi (Is. 65:15).

9. ¿Imaraq pasanqa sufritsimaqnintsik cösaskunata? (Isaïas 65:16, 17).

⁹ Tranquïlu y mana yarpachakuypam kawakushun. Isaïas 65:14 textuchömi nimantsik, sirweqninkunawan juntu Jehoväta mana sirweqkunaqa alläpa llakikuyänampaq kaqta y imanö këtapis mana puëdiyänampaq kaqta. Peru Jehoväpa sirweqninkunaqa, ¿sufrirtsuraq kawayanqa? Manam, pëkunatam Jehovä kënö nin: “Unë sufriyanqëkikunataqa manam yarpäyankinatsu; tsëkunataqa manam nawï rikanqanatsu” (leyi Isaïas 65:16, 17). Jehoväqa llapan problëmantsikkunatam ushakäratsinqa y tiempuwanqa manam sufrinqantsikkunatapis yarpäshunnatsu.

10. ¿Imanirtan wawqi panikunawan juntu Jehoväta adoranqëkipita agradecikunki? (Rikäri fötuta).

¹⁰ Kanampis reunionchö kanqantsik hörakunaqa tranquïlum sientikuntsik. Manam imapitapis yarpachakuntsiktsu y problëmantsikkunatapis qonqëkuntsikmi. ¿Imanötan yanapakuntsik imëpis tranquïlu sientikunapaq? Tsepaqqa Diospa Palabran ninqannömi kuyakoq y kushi kushi kanantsik, llapankunawanmi alli kawakunantsik, llapankunatam alli tratanantsik y yachanëpaqmi kanantsik (Gäl. 5:22, 23). ¡Sirweqninkunawan juntu Jehoväta adorëqa alläpa shumaq bendicionmi! Pëkunawan juntu Jehoväta adorëta mana dejarqa, “mushoq ciëlukunata y mushoq patsata” ruramunampaq kaqta änikunqantam rikäshun.

11. ¿Imanötan sientikushwan sirweqninkunawan juntu Jehoväta adorarnin? (Isaïas 65:18, 19).

¹¹ Alläpam agradecikuntsik, y nunakunatam gänas gänaslla yachatsita munantsik. Isaïasqa entienditsikurqan sirweqninkunawan juntu Jehoväta adoranapaqqa kikin Jehovä patsätsinqantam. Tsëmi kushishqa sientikuntsik (leyi Isaïas 65:18, 19). Tsëmi Jehoväqa kë mana alli munduchö sufrikaq nunakunata yachatsinantsikta munan, tsënöpa shumaq congregacionninman yëkayämunampaq. Rasumpa kaqta musyanqantsiktaqa ¡alläpam kushikuntsik! Tsëmi tsë bendicionkunapita masraq nunakunata yachatsita munantsik (Jer. 31:12).

12. ¿Imanötan sientikunki Isaïas 65:20-24 textuchö Jehovä änikunqanta leyirnin, y imanirtan tsënö sientikunki?

¹² Sirweqninkunawan juntu Jehoväta adoranqantsikpitam alläpa agradecikuntsik y  ruramunampaq kaqta shuyararmi kushishqa këkantsik. Këllaman pensarishun: Llapan ruramunampaq kaqkunata ruramunqantam, ¡Shumaq Patsachö rikëta puëdishun! Bibliachömi kënö nimantsik: “Tsëchöqa llullukunapis manam juk ishkë junaqllatsu kawayanqa y manaraq tiempunchöqa [manam] awkinkunapis wanuyanqatsu o wañuyanqatsu”. “Kikinkunapaqmi wayikunata rurayanqa y kikinkuna mikuyänampaqmi üvastapis plantayanqa”. “Y manam ardëllatsu alli trabajar afanakuyanqa”. Diosnintsik vendicimashqam kushishqa y següru kawakushun. Manaraqpis mañakushqam Diosnintsikqa imata munanqantsikta musyanqa y llapan munanqantsikkunawanmi bendicimäshun (Is. 65:20-24; Sal. 145:16).

13. Isaïas 65:25 ninqannö, ¿imanötan Jehoväqa nunakunata yanapashqa sirweqnin tikrayänampaq?

¹³ Yamë y segürum kawakuntsik. Santu espïritunwan Jehovä yanapaptinmi, mikukoq animalnö portakoq nunakuna vïdankunachö cambiukunata rurayashqa (leyi Isaïas 65:25). Mana alli geniunkunatam cambiayashqa (Rom. 12:2; Efes. 4:22-24). Rasunmi, Jehovä Diospa sirweqninkunaqa jutsasapam kantsik y mana allikunatam höraqa rurantsik. Tsënö kaptimpis, Jehovä Diosnintsikmi imanö kashqapis yanapamarquntsik “juknölla kuyanakur y yamë kawakunapaq” (Tïtu 2:11). ¡Tsënö kawakunapaqqa Teyta Diosllam yanapamënintsikta puëdin!

14. ¿Imanötan Isaïas 65:25 ninqan cumplikarqan? Pasakunqanwan willakaramuy.

¹⁴ ¿Rasumpaku nunakunaqa mana alli vïdankunata cambiëta puëdiyan? Awmi, juk nuna cambianqampaq parlarishun. Alläpa maqakoq y jukwan jukwan kakoq 20 watayoq nunam, cärruta suwakunqampita y imëka mana allikunata ruranqampita carcelchö kanaq, pëqa pelyata ashirllam imëpis pureq. Peru rasumpa kaqta Bibliachö yachakurir y Jehoväpa testïgunkuna rurayanqan reunionkunaman ëwarirqa cuentatam qokurqan sirweqninkunawan Jehoväta adorëqa, imëkapitapis mas alli kanqanta. Y bautizakurirqa, Isaïas 65:25 textu ninqan pëchö imanö cumplikashqa kanqantam imëpis pensaq. Bibliapita manaraq yachakurqa leonnö mantsëpaqmi karqan, peru kananqa üshanö manshum.

15. ¿Imanirtan nunakunata yanapëta munantsik noqantsikwan juntu Jehoväta adorayänampaq, y imanötan tsëta lograshun?

¹⁵ Isaïas 65:13 textupa qallananchömi kënö nin: “Llapanta Gobernaq Teyta Jehoväqa”. Y 25 kaq versïculupa ushananchönam kënö nin: “Ninmi Teyta Jehovä”. Pëqa änikunqanta imëpis cumplinmi (Is. 55:10, 11). Sirweqninkunawan juntu Jehoväta adorarmi kushishqa kawakuntsik. Jehoväqa änikunqankunata cumplishqam, tsëmi kë mana alli munduchö kawashqapis sirweqninkunawan juntu adorarnin kushishqa kawakunapaq patsätsimushqa (Sal. 72:7). Tsënö kawakurmi, wakin nunakunata yanapëta munantsik noqantsikwan juntu Jehoväta adorar kushishqa kawakuyänampaq. Peru ¿imanötan tsëta lograshun? Pëta sirwiyänampaq yanaparninmi (Mat. 28:19, 20).

¿IMANÖTAN NUNAKUNATA YANAPASHWAN JEHOVÄTA NOQANTSIKWAN JUNTU ADORAYÄNAMPAQ?

16. ¿Imanirtan nunakuna noqantsikwan juntu Jehoväta adorëta munayanqa?

¹⁶ Jehoväta adoranqantsik shumaq rikakunampaqmi puëdinqantsikmannö llapantsik yanapakunantsik, tsëta rikarmi nunakunaqa kikinkunalla Jehoväta adorëta munayanqa. ¿Imanötan rurashwan? Jehovänömi alli kanantsik. Jehoväqa nunakunata manam obligantsu pëta sirwiyänampaq. Tsëpa  rantinqa, kuyëllapam yanapan pëta sirwita munayänampaq (Jer. 31:3; Juan 6:44). Jehoväpita yachakoqkuna y alli shonquyoq nunakunaqa, Jehovä imanö kanqanta cuentata qokurirqa kikinkunallam sirwita munayanqa. Tsëqa, nunakuna noqantsikwan juntu Jehoväta adorëta munayänampaq, ¿imanö nunatan kashwan?

17. ¿Imatatan rurashwan noqantsikwan juntu wakin nunakunapis Jehoväta adorëta munayänampaq?

¹⁷ Nunakuna noqantsikwan juntu Jehoväta adorëta munayänampaqqa, wawqi panintsikkunatam kuyëpa y shumaq tratanantsik. Unë Corintu markachö cristiänukuna reunionta rurayaptinqa, capazchi mana creikoq nunakunapis tsë reunionkunaman ëwayarqan, y kuyakoq kayanqanta rikarninchi kënö niyarqan: “Rasumpa[m] Teyta Diosqa qamkunawan këkan” (1 Cor. 14:24, 25; Zac. 8:23). Noqantsikpis, reunionkunaman shamoqkuna tsënö niyänantam munantsik. Y tsëpaqqa kë consëjutam cäsukunantsik: “Jukniki juknikikuna yamë kawakuyë” (1 Tes. 5:13).

18. ¿Imanö kashqatan noqantsikwan juntu Jehoväta adorëta munayanqa?

¹⁸ Tsënöllam wawqi panintsikkunatapis Jehovä rikanqannölla rikänantsik. Pëqa imëpis alli kayanqantam rikan y manam pantayanqankunataqa. Pantayanqankunaqa shamoq tiempunchöqa ushakärinqam. Y piwampis ofendinakushqaqa, kuyakoq kanqantsikmi yanapamäshun shumaq arreglanapaq. Y kë consëjutam cäsukunantsik: “Jukniki juknikikuna alli kayë, shumaq tratanakuyë, llakipänakuyë y perdonanakuyë” (Efes. 4:32). Kuyëpa tratanantsikta munaq nunakunaqa, noqantsikwan juntum Jehoväta adorëta munayanqa. a

 SIRWEQNINKUNAWAN JUNTU JEHOVÄTA IMËPIS ADORËKÄSHUN

19. (1) ¿Ima niyantan wakinkuna sirweqninkunawan juntu Jehovä Diosnintsikta adorëpaq? (Leyiri “ Ëwakuyarqanmi, peru kutiyämushqam” neq recuadruta). (2) ¿Imata ruranapaqtan decidïdu kanantsik? (Rikäri dibüjuta).

¹⁹ ¡Sirweqninkunawan juntu Jehoväta adoranqantsikpitaqa alläpam kushikuntsik! Jehoväta adorëqa alläpa shumaqmi y mëtsikaq nunakunanam kananqa adorantsik. Tsënö adoranapaq Jehovä patsätsimunqampitam agradecikuntsik. Kushishqa y tranquïlu kawakuyta munaqkunaqa Jehovä Diosnintsikta adorëtam imëpis dejayänantsu. Peru Satanas Diabluqa engañamënintsiktam munan y Jehovä Diosnintsikta kushishqa adorëta dejanatam munan (1 Pëd. 5:8; Apoc. 12:9). Ama Satanas munanqanta rurashuntsu. Llapan puëdinqantsikmannö yanapakushun Jehovä Diosnintsikta sirweqninkunawan juntu adoranqantsik shumaq rikakunampaq.