1, 2. (1) ¿Imanötaq kë ushanan witsankunachö Isaïas 60:22 textu ninqan cumplikashqa? (2) ¿Imatataq kë Patsachö Jehoväpa markan alläpa wanëkun?

BIBLIAM kënö nin: “Wallka kaqmi waranqa këman chanqa, y ichikllan kaqmi alläpa puëdeq nacionman tikranqa” (Isaïas 60:22). Biblia kënö ninqanqa kë ushanan witsankunachömi cumplikëkan. Tantiyarinapaq, 2015 watapaqqa 8.220.105 Testïgukunanam entëru Patsapa yachatsikïkäyashqa. Jehovämi markampaq kënö nirqan: “Kikï Jehovämi tiempunchö raslla rurarishaq”. Këqa rikätsimantsik mas trabäju kanampaq kaqtam. ¿Llapan puëdinqantsikmannöku Diospa Gobiernumpita yachatsikïkantsik? Mëtsikaq wawqintsikkuna y panintsikkunam precursor regular o auxiliar kayan. Wakinkunanam Bibliapita yachatsikuyänanrëkur juk markakunapa ëwakuyashqa y wakinkunanam Jehoväpa Testïgunkuna Yachatsikuyänan Wayita rurëchö alläpa ocupädu këkäyan.

² Cada watam cäsi 2.000 congregacionkuna patsakan, tsë congregacionkunam anciänukunata y siervu ministerialkunata wanayan. Tsëmi cada wata wanantsik, mëtsika waranqa  wawqikuna siervu ministerial tikrayänanta y mëtsika waranqa siervu ministerialkuna anciänu tikrayänanta. Rikanqantsiknömi, warmipaq y ollqupaqpis Jehoväpa markanchöqa mëtsika trabäju kan (1 Corintius 15:58).

3, 4. Diospa kaqchö, ¿imakunata ruranapaqtaq sinchikushwan?

³ (Leyi 1 Timoteu 3:1 *). Apostol Pablum congregacionchö carguta chaskiyänampaq kallpachakïkaqkunata felicitarqan. Tsënö ninqanqa yarpätsimantsik imapis karuchö këkaptin tsarita munar pipis kallpachakunqanta o rikranta sutëkanqantam. Pensarishun siervu ministerial kanampaq juk wawqi kallpachakïkanqanman. Itsa cuentata qokurin kawëninchö cambiukuna ruranan precisanqanta. Y cambiukunata rurarir siervu ministerialman chärirqa, anciänu kanampaqnam kallpachakunqa.

⁴ Wakin wawqikunaqa Jehoväta mas sirwiyänanrëkurmi kawëninkunachö cambiukunata rurëkäyan. Itsa precursor këta, Betelchö yanapakïta o Jehoväpa Testïgunkuna Yachatsikuyänan Wayikunata rurëchö yanapakïta munayan. Rikärishun Diospa kaqchö poqur sïguinapaq Biblia imanö yanapamanqantsikta.

5. ¿Imanötaq jövinkunaqa kallpankunata provechayanman Diospa kaqchö yanapakuyänampaq?

⁵ Jövinkunaqa alli saloryoq y alli kallpayoqmi kayan, tsëmi imëkachö yanapakïta puëdiyan (leyi Proverbius 20:29 *). Betelchö këkaq wakin jövinkunaqa librukunata imprimichö y rurëchömi yanapakuyan. Wakin jövinkunanam Jehoväpa Testïgunkuna Yachatsikuyänan Wayikunata rurëchö o altsëchö yanapakuyan. Y mëtsikaqmi precursor kayan y juk idiömakunata yachakuyan o Diospita yachatsikoqkunata mas wanayanqan markakunaman ëwayan.

6-8. (1) ¿Imataq yanaparqan juk jövinta Diosta sirwita juknöpana rikänampaq, y imanötaq sientikurqan? (2) ¿Imatataq rurashwan “Jehovä alli” kanqanta rikëta munarqa?

⁶ Jehoväta kuyarnin o alleq yanapakïta munëkarpis, höraqa wawqi Aaronnömi sientikushwan. Pëqa Jehoväpa kaqchömi kushishqa yanapakïta munaq, peru manam kushishqatsu kaq. Reunionkunaman y yachatsikoqpis wamra kanqampitam ëwaq, peru rasllam qelanäreq. ¿Imatataq rurarqan?

⁷ Llapan junaqkuna Bibliata leyinampaq, reunionkunapaq preparakunampaq y tsëchö parlakunampaqmi sinchikurqan. Jinamampis, Jehovämanmi mas seguïdu mañakurqan. Tsëta ruranqanmi yanaparqan Diospa kaqchö mas poqunampaq. Jehovätam mas alleq reqirirqan, y kuyarmi qallëkurqan. Tsënam mas kushishqa sientikurqan. Precursormi tikrarirqan, desgraciakuna pasakuptin yanapakurqan y juk naciontam Diospita yachatsikoq ëwarqan. Kananqa anciänum y Betelchömi yanapakïkan. ¿Imanötaq sientikun? Jehoväpa alli këninta rikashqa kanqantam nin. Jinamampis, Jehoväpa jaqan kanqantam sientikun, tsëmi pëpaq masta rurëta munan. Pëqa musyanmi  tsënö rurarninqa mas bendicionta chaskinampaq kaqta.

⁸ Salmus libruta qellqaqmi kënö nirqan: “Jehovä alli kanqanta rikäyë y kushikuyë”. Jina nirqanmi: “Jehoväta asheqkunapaqqa manam ni ima allikunapis pishinqatsu” (leyi Salmu 34:8-10 *). Llapan puëdinqantsikmannö Jehoväpaq rurarqa alläpam kushikuntsik, porqui musyantsikmi tsënö ruranqantsikqa pëtapis kushitsinqanta. Y cuidamänapaq änikunqantam cumplinqa.

9, 10. ¿Imanirtaq alläpa precisan pacienciawan shuyarëta yachanantsik?

⁹ Itsa Jehoväpa kaqchö mas yanapakïta munantsik. Peru itsa atska tiempupana shuyarëkantsik ima cargutapis congregacionchö qomänapaq o kawënintsikchö ima cambiullapis karinanta. Tsënö kaptinqa pacienciakoqmi kanantsik (Miquëas 7:7). Itsa Jehoväqa kanqannölla imapis kananta permitikan. Peru markäkushun Jehoväqa imëpis yanapamänapaq kaqman. Abrahan pasanqanman pensarishun. Jehovämi änishqa karqan wamran kanampaq, peru mëtsika watakunaran pasarqan Isaac yurinampaq. Abrahanqa manam Jehoväman markäkïta jaqirirqantsu, tsëpa rantinqa pacienciawanmi shuyararqan (Genesis 15:3, 4; 21:5; Hebrëus 6:12-15).

¹⁰ Rasunmi, shuyaränanqa manam fäciltsu (Proverbius 13:12). Peru pasëkanqantsikman alläpa yarparar y piñakurqa qelanärishwanmi. Tsëpa rantinqa, tsë tiemputam alleq provechanantsik poqu cristiänu tikranantsikpaq, tsënöpam congregacionchö ima cargutapis alleq cumplita puëdishun. Carguta manaraq chaskinqantsikyaq kima rurëta ruranapaq kaqta rikärishun.

11. (1) ¿Imatataq ruranantsik poqu cristiänu kanapaq? (2) ¿Imanirtaq precisan poqu cristiänu këta procuranantsik?

¹¹ Poqu cristiänu kanapaq sinchikushun. Bibliata leyirnin y leyinqantsikman alleq pensarninqa yachaqmi kashun, alleq pensëtam yachakushun y alli rurëtam akrashun. Ollqu kaq cristiänukuna këkunata yachakuyänanqa alläpam precisan, porqui tsënöpam congregacionta shumaq cuidayanqa (Proverbius 1:1-4; Tïtu 1:7-9). Bibliata estudiarninqa, Jehovä imata pensanqantam entiendishun. Y yachakunqantsikmannömi Diosta kushitsinqankunata cada junaq akrëta puëdishun. Tantiyarinapaq, wakinkunata imanö tratëta, qellëta imanö utilicëta, imanö vistikïta y kushikunapaq alli rurëkunata akrëtam yachashun.

12. ¿Imanötaq cristiänukunaqa markäkïpaq kayanqanta rikätsikuyanman?

 ¹² Imatapis ruranapaq nimanqantsikta alleq cumplishun. Templuta altsëchömi Nehemïasqa wanarqan alli yanapaq ollqukunata. ¿Pikunatataq akrarqan? Alli rikashqa kaq ollqukunatam. Nehemïasqa musyarqanmi tsë nunakunaqa Diosta kuyayanqanta y rurëninkunatapis alleq cumpliyänampaq kaqta (Nehemïas 7:2; 13:12, 13). Jina tsënöllam kanampis, juk wawqi markäkïpaq y alli trabajaq karninqa alli rikashqam kanqa y mas cargukunata chaskitam puëdinqa (1 Corintius 4:2). Ollqu kar o warmi karpis imata ruranapaq nimanqantsikkunatam llapan puëdinqantsikmannö alleq ruranantsik (leyi 1 Timoteu 5:25).

13. ¿Imanötaq Josë ruranqanta qatishwan pipis mana allipa tratamashqa?

¹³ Jehovä yanapamänapaq kaqman markäkushun. ¿Imatataq rurashwan mana kaqpita pillapis mana allipa tratamashqaqa? Imanö sientikunqantsiktam willanantsik, peru pë culpayoq kanqanta rikätsita munar tsarakurqa mas problëmamanmi chäshun. Josë ruranqanta rikärishun. Wawqinkunam mana allipa tratayarqan, y Egiptuchönam tumparnin prësutsiyarqan. Peru Josëqa Jehovä yanapanampaq kaqmanmi markäkurqan. Jehovä änikunqankunaman pensarmi alleq tsarakurqan (Salmu 105:19). Problëmakunapa pasanqan höra Dios munanqannö kawëta yachakunqanmi yanaparqan, juk precisaq carguta chaskirnin  shumaq cumplinampaq (Genesis 41:37-44; 45:4-8). Pillapis mana kaqpita mana allipa tratamashqaqa, Jehoväta yachëta mañakushun. Pëmi yanapamäshun alläpa mana piñakunapaq y mana alli tratamaqnintsikta kuyëpa tratanapaq (leyi 1 Pëdru 5:10).

14, 15. (1) ¿Imanirtaq imanö yachatsikïkanqantsikta alleq rikänantsik? (2) ¿Imatataq rurashwan nunakunata tarinapaq? (Rikäri kë yachatsikïpa qallananchö këkaq dibüjuta y “ ¿Juknöpa yachatsikïta puëdintsikku?” neq recuadruta).

¹⁴ Pablum Timoteuta nirqan Diospa palabranta entienditsikïchö mas alli yachatsikoq kanampaq. Jina kënöpis nirqanmi: “Cuidaquï quiquiqui, y allita yachatsiquï” (1 Timoteu 4:13, 16). Timoteuqa atska watapana alli yachatsikoq cristiänum karqan. ¿Tsëqa imanirtaq mas alleq yachatsikoq kanan precisarqan? Porqui nunakuna y imakunapa pasayanqampis cambiarëkanmi. Tsëmi yachatsikïninta nunakuna entiendiyänanta munarqa, Timoteuqa mas alli yachatsikoq kanampaq sinchikunan karqan y imanö yachatsikunqantam cambianan karqan. Tsënöllam noqantsikpis ruranantsik.

¹⁵ Yachatsikoq yarqurninqa itsa wakin nunakunataqa wayinkunachö alläpaqa tarintsiktsu. Peru wakin markakunachöqa itsa wayinkunachö këkäyan, peru edificiukunachö täräyaptinmi yëkïta puëdintsiktsu. Tsënö pasakuptinqa, itsachi alläpa alli kanman juknöpana yachatsikunantsik.

16. ¿Imatataq rurashwan nunakuna mas këkäyanqan sitiukunachö alleq yachatsikunapaq?

¹⁶ Wakin cristiänu mayintsiktaqa yachatsikï gustan trenkuna y cärrukuna chäyänanchö, mercädukunachö y parquikunachömi. ¿Imanötaq parlapar qallayan? Wakinkunaqa noticiachö tsëllaraq rikäyanqampitam parlapäriyan, y wakinkunanam wamrankunapita o trabäjunkunapita parlapäriyan. Parlakïta gustaptinqa, Biblia ninqanwan yacharatsirninmi imata pensanqanta tapuriyan. Tsënömi Bibliapitaqa shumaq parlakuriyan.

17, 18. (1) ¿Imaraq yanapamäshun nunakuna mas kayanqan sitiukunachö yachatsikunapaq? (2) ¿Imanirtaq qamqa creinki Davidnöpis Jehoväta alabëta munanqëki yanapashunëkipaq kaqta?

¹⁷ Itsa mana reqishqakunata cällichö parlapëqa fäciltsu kanman. Tsëmi pasarqan Nueva York markapita Eddie jutiyoq precursörata. ¿Imataq yanaparqan mana mantsakunampaq? Pëmi willakun, nunakuna imatapis niyänampaq kaqman pensëkur Diosta Adorayänan Hörachö publicacionkunapita qowanwan yachakuyanqanta. Jinamampis juk Testïgukunatam tapuyaq. Kananqa Eddietaqa alläpam gustëkun nunakuna mas kayanqan sitiukunachö yachatsikïta.

¹⁸ Kushishqa yachatsikushqa y mas alleq yachatsikunapaq sinchikushqaqa, wakinkunam cuentata qokuyanqa mas poqu cristiänu tikrëkanqantsikta (leyi 1 Timoteu 4:15). Itsa wakin nunakunataqa, hasta Jehoväpa testïgun kayänampaqpis yanaparishwan. Rey Davidmi kënö nirqan: “Imë hörapis Jehovätaqa alabëkäshaqmi. Shimïwanqa imëpis pëtaqa alabëkäshaqmi. Jehovächömi kushikushaq. Humildikunam wiyayanqa y kushikuyanqa” (Salmu 34:1, 2).

19. ¿Munanqantsikmannö Jehoväta sirwita mana puëdirpis kushishqa këta puëdintsikku?

¹⁹ Davidmi kënö nirqan: “Llapan rurashqëkim alabayäshunki, Jehovällä, y qamta mana jaqiyäshoqnikikunaqa alabayäshunkim. Rasumpa kaq gobiernïki alläpa shumaq kanqantam niyanqa y puëdeq kanqëkipitam parlayanqa, [...] nunakunata musyatsiyänampaq y llapan janampa këkaq rasumpa kaq alli gobiernumpita” (Salmu 145:10-12). Jehoväta kuyaqkuna y ninqanta ruraqkunaqa shonqupita patsëmi nunakunata parlapëta munayan. Peru mayorna kar o qeshyapäkurninqa itsa wayin wayin yachatsikïta puëdishunnatsu. ¿Tsëqa imatataq rurashwan? Llapan tinkunqantsikkunatam parlapëta procuranantsik; itsa parlapärishwan doctorkunata o enfermërakunata. ¿Y creenciantsikrëkur carcelchö këkarqa? Tsëchöpis pillatapis parlapärishwanmi. Tsëta ruranqantsikmi Jehoväta alläpa kushitsin (Proverbius 27:11). Jina familiantsik Jehoväta mana sirwiptinpis, noqantsik sirwishqaqa alläpam kushikun (1 Pëdru 3:1-4). Imëka mana allikunapa pasëkarpis puëdintsikmi Jehoväta alabëta, amïgun këta y poqu cristiänu këman chëta.

20, 21. ¿Imanötaq wakinkunata yanapanman poqu cristiänu kanqantsik?

²⁰ Jehoväpa kuyë amïgun kanapaq mas sinchikushqa y llapan puëdinqantsikmannö mas sirwishqaqa bendicimäshunmi. Dios änikunqampita nunakunata parlapänantsikrëkur mas tarinantsik hörakunapaq cambiukunata rurarqa, mas nunakunatam parlapëta puëdishun. Y cristiänu mayintsikkunatapis itsa masraq yanaparishwan. Congregacionpaq mas rurëta sinchikushqaqa, pëkunaqa masran kuyamäshun.

²¹ Ëka watapana Jehoväta sirwirpis, llapantsikmi mas alli amïgun këta y mas poqu cristiänu këtaqa puëdintsik. Qateqnin kaq yachatsikïchömi rikärishun, wakinkunapis poqu cristiänu këman chäyänampaq imanö yanapanapaq kaqta.