Kërëkur y tukïrëkurmi Jesuspaq y discïpulunkunapaq chikeqninkunaqa mana allita parlayaq. Moisespa Leyninmi rikätsikoq imakunata rurar Diospa kaqchö rakcha kayanqanta. Tsëkunaqa karqan, warmipa yawarnin ëwanqan, ollqukunapa penqëninkunapita lichi niraq yarqunqan, leprayoq kayanqan o juk wanushqa nunata o animalta yatayanqanmi. ¿Imatataq rurayaq yapë limpiu quedayänampaqqa? Leyqa yachatsikoq, sacrificiukunata rurayänampaq o bañakuyänampaqmi (Levïticu 11-15 capïtulukuna; Nümerus 19 kaq capïtulu).

Pushakoq religiösukunaqa, Moisespa Leyninkunamanmi kikinkunapa leyninkunata yapayarqan. Juk librum willakun, tsë pushakoq religiösukuna mas leykunata yapayanqanta y imanö juk nuna rakcha këman tikranqanta y juktapis imanö muyëta puëdinqanta. Jina utilizäyanqan o imakunata yatar rakcha tikrayänampaq kaqtam juk listaman churayarqan. Y tsënöllam, tukïta patsätsiyarqan yapë limpiu quedayänampaqqa imëkata rurayänampaq.

Jesuspa chikeqninkunaqa kënömi tapuyarqan: ‘¿Imanirtaq disipuliquicuna awiluntsiccunapa costumbrincunata cäsuyantsu y maquincunata mana paqacushpa micuyan!’ (Marcus 7:5). Kë pushakoq religiösukunaqa manam makinkuna limpiu kananllapaqtsu paqakuyäq (awikuyaq), sinöqa, mikuyänampaqqa makinkunaman yakutaraq jichayänampaq costumbritam patsätsishqa kayarqan. Y qepa pärrafuchö parlanqantsik librullam jina nin, kë pushakoq religiösukunaqa discutiyaq ima tazonta utilizäyänampaq, ima cläsi yakuta utilizäyänampaq, pï makinkunaman jichanampaq y mëyaq makinkunata paqakuyänampaq kaqrëkurmi.

¿Imatataq tsë patsätsiyanqan leykunapaq Jesusqa pensaq? Pëkunatam Jesus kënö nirqan: “¡Ä, alli tucoq nunacuna! Rasontam profeta Isaiaspis qamcunapaq Dios nishqanta queno escriberqan: ‘Que nunacunaqa shimincunallawanmi respetamaq tucuyan; Peru shonquncunachoqa manam yarpäyämanpistsu. Nunacunapa costumbrincunallata yachatsicuyaptinmi, adorayämanqanpis sirwintsu’, nir. Tsemi Teyta Dios mandacushqancunata jaqirïcur, nunacunapa costumbrincunallata ruracur [...] yarparäquicayanqui” (Marcus 7:6-8).