1, 2. (1) ¿Imanötaq Diosta kuyanqantsik markäkïnintsikchö yanapamantsik? (2) ¿Ima tapukïkunapitataq yachakushun?

JEHOVÄQA kuyakoq Teytantsikmi, y mana jaqipa sirweqnin kaqkunataqa bendicinampaqmi änikushqa. Tsënömi Jehoväqa kuyamanqantsikta rikätsimantsik. “Puntata pë kuyamashqantsik kaptinmi” noqantsikpis pëta kuyantsik (1 Juan 4:19). Pëta kuyanqantsikqa markäkïnintsikchömi (yärakuynintsikchömi) yanapamäshun. Jehoväta mas kuyanqantsikmannömi markäkïnintsikpis mas miranqa, y mas segürum kashun bendicimänapaq kaqta (leyi Hebrëus 11:6).

² Jehoväqa alläpam munan sirweqninkunata bendicita. Tsëqa kikimpitam yarqun y rurëninkunachömi imëpis rikakun. Tsëmi noqantsikqa següru kanantsik shonqupita patsë asheqninkunataqa Jehovä bendicinampaq kaqta. Y ¿imanirtaq tsëtaqa nintsik? Porqui “markäkïqa, imatapis shuyanqantsikta chaskinantsikpaq kaqta següru këmi” (Hebrëus 11:1). Markäkunqantsiktaqa rikätsikuntsik, mana jaqeqnin kaqkunata Dios bendicinampaq kaqman shonqupita patsë confiakurmi. ¿Imanötaq  yanapamantsik bendicionta chaskinapaq kaqta shuyaranqantsik? ¿Imanötaq unë witsan sirweqninkunata Jehovä bendicirqan? Y, ¿imanötaq kanan witsan bendicimantsik? Tsëkunata rikärishun.

3. ¿Imatataq Malaquïas 3:10 textuchö Jehovä änimantsik?

³ Mana jaqipa sirweqninkunataqa bendicinampaqmi Jehoväqa änikushqa. Llapan puëdinqantsikmannö sirwishqaqa bendicimänapaqmi pëqa änimantsik. Jehoväqa, “probaralläyämë” nimantsikmi. Nïkurnam kënö nimantsik: “Mä manakush ciëlupa punkunkunata kichar mana imapis pishipuyäshunqëkiyaq qamkunaman bendicionta ramamushaq” (Malaquïas 3:10). ‘Probanapaq’ nimanqantsikta wiyakurqa, pëta agradecikunqantsiktam rikätsikuntsik.

4. ¿Imanirtaq Mateu 6:33 textuchö Jesus ninqanman confiakushwan?

⁴ Diospa Gobiernunta puntaman churayaptinqa, llapan wanayanqanta Dios qonampaq kaqtam Jesusqa qateqninkunata nirqan (leyi Mateu 6:33). Pëqa musyarqanmi Diosqa änikunqankunata imëpis cumplinqanta, tsëmi tsënö nirqan (Isaïas 55:11). Y noqantsikpis pënömi Diosman confiakunantsik. Shonqupita patsë Jehoväman markäkunqantsikta rikätsikushqaqa, kikin kënö ninqantam cumplimunqa: “Manam ni imëpis jaqirishqëkitsu, y manam ni imëpis qampita witikurishaqtsu” (Hebrëus 13:5). Tsënö änikunqanmi yanapamantsik Mateu 6:33 textuchö Jesus ninqanman confiakunapaq.

5. ¿Imanirtaq Pëdruta Jesus ninqanqa valorta qomantsik?

 ⁵ Juk kutim Jesusta apostol Pëdru kënö tapurqan: “Noqakunaqa llapan imëkakunatam jaqiyarqö y qamta qatiyarqoq; tsëqa, ¿imataq noqakunapaq kanqa?” (Mateu 19:27). Jesusqa manam piñaparqantsu tsënö tapunqampita. Tsëpa rantinqa, llapan qateqninkunatam nirqan Jehovärëkur imëkata rurayanqampita bendicionta chaskiyänampaq kaqta. Musyanqantsiknöpis, apostolkuna y Diosta mana jaqeq wakin cristiänukunaqa Jesuswan juntum ciëlupita gobernayämunqa. Peru Patsachö kawayanqan witsampis pëkunaqa bendicionkunatam chaskiyänan karqan. Tsëmi Jesusqa kënö nirqan: “Pipis wayinkunata, o wawqinkunata, o paninkunata, o teytanta, o mamäninta, o wamrankunata, o chakrankunata jutïrëkur jaqishqa kaqqa, pachak (100) kuti mastam chaskinqa y imëyaqpis kawakïmi herencian kanqa” (Mateu 19:29). Kanan witsanqa llapan cristiänukunam congregacionkunachö tarintsik mëtsika teytantsik, mamantsik, wamrantsik, wawqintsik y panintsikkuna. Clärum këkan, tsë bendicionkunaqa Diospa Gobiernunrëkur imëkata jaqinqantsikpitapis mas väleqmi.

6. ¿Imanötaq yanapamantsik mana jaqipa sirweqninkunata Jehovä bendicinampaq kaqta musyanqantsik?

⁶ Mana jaqipa sirweqninkunata Jehovä bendicinampaq kaqta musyanqantsikqa, problëmakunapa pasar alleq tsarakunapaqmi yanapamantsik. Manam kanankunallatsu bendicionta chaskintsik, sinöqa shamoq tiempuchö mëtsika bendicionkunata chaskinapaq kaqtam shuyarantsik (1 Timoteu 4:8). Shonqupita patsë asheqninkunata Jehovä bendicinampaq kaqta següru kanqantsikqa, mana jaqipa sirwinapaqmi yanapamantsik (Hebrëus 11:6).

7. ¿Imanirtaq nintsik shuyäkunqantsikqa barcu ëwakunanta tsaraqnö noqantsikpaq kanqanta?

⁷ Jirkapita Yachatsikunqanchömi Jesusqa kënö nirqan: “Alläpa kushikuyë y chipyëpa kushishqa kayë, porqui ciëluchö premyïkikunaqa alläpa jatunmi, porqui tsënöllam qamkunapa mas puntëkikunatapis Diospa willakoqninkunata chikir sufritsiyarqan” (Mateu 5:12). Diospa wakin sirweqninkunaqa ciëluchömi premiunkuna chaskiyanqa. Y wakin kaqpanam, shumaq patsachö imëyaqpis kawakï bendicionninkuna kanqa. Tsëmi pëkunapis alläpa kushikuyan (Salmus 37:11; Lücas 18:30). Awmi, Diosnintsik änimanqantsikta shuyaranqantsiktaqa, “imëka barcu ëwakunanta tsaraqtanömi kawënintsikpaq katsintsik, següruta y mana kuyoqta” (Hebrëus 6:17-20). Imanömi lamarchö yaku feyupa laqcheqsaptin barcu lluta mana ëwakunampaq tsaraqnin yanapan, tsënöllam Diosnintsik änimanqantsikta shuyäkunqantsikpis, problëmakunapa pasashqa valorta tsarinapaq y alleq tsarakunapaq yanapamantsik.

8. ¿Imanötaq shuyäkunqantsikqa alläpa llakikushqapis yanapamantsik?

⁸ Diosnintsik änimanqantsikkunata shuyäkunqantsikqa, shonquntsikchö alläpa llakikushqapis yanapamënintsikta puëdinmi. Imanömi pipis pomädawan llushiramashqaqa ima nanamaqnintsikpis alliyärin, tsënöllam Diosnintsikpa änikïninkunapis shonquntsikta alliyäratsin. Nitimaqnintsik yarpachakïnintsikkunata Jehoväman churashqa pë cuidamänapaq kaqta musyanqantsikqa, ¡alläpam yanapamantsik! (Salmus 55:22). Segürum kashwan Jehoväqa ‘llapan mañakunqantsik cösaskunapitapis  masta rurëta puëdinqanta’ (Efesius 3:20). Tsëqa rikätsimantsik Jehoväqa mañakunqantsikpitapis masta ruramunampaq kaqtam.

9. ¿Imatataq ruranantsik Jehoväpa bendicionninta chaskinapaq?

⁹ Jehoväpa bendicionninta chaskinapaqqa, shonqupita patsëmi pëman markäkunantsik (yärakunantsik) y nimanqantsiktam wiyakunantsik. Israelïtakunatam Moises kënö nirqan: “Qampa kanampaq herenciatanö Jehovä Diosniki qoshunëkipaq kaq markachömi Jehoväqa bendicishunki, peru qamqa kanan mandëkanqaq llapan mandakïkunata chipyëpa cäsukunëkipaqmi Jehovä Diosniki nishunqëkita alleq wiyakunëki. Porqui Jehovä Diosnikiqa änishunqëkita cumplirmi rasumpa bendicishunki” (Deuteronomiu 15:4-6). Tsëqa, ¿rasumpëpaku següru këkantsik mana jaqirishqaqa Dios bendicimänapaq kaqta? Imëkam rikätsimantsik pëqa rasumpa bendicimänapaq kaqta.

10, 11. ¿Imanötaq Josëta Jehovä bendicirqan?

¹⁰ Bibliataqa yanapamänapaqmi qellqayarqan. Leyirninmi rikantsik unë witsan sirweqninkunata Jehovä imanö bendicinqanta (Romänus 15:4). Tsënömi Josëwan pasakurqan. Pëtaqa esclävu kanampaqmi wawqinkuna rantikïkuyarqan. Tsëpitanam patronnimpa warmin mana kaqpita tumparqan, tsënöpam Josëqa Egiptu carcelchö llawirarqan. ¿Y Jehoväqa pëta jaqirirqanku? Manam. Bibliaqa kënömi nimantsik: “Jehoväqa Josëwanmi këkarqan y sïguirqanllam alläpa kuyakïninta rikätsir”. Nïkurnam kënö nin: “Jehovä Josëwan kaptinmi ima rurashqampis alli yarqapoq” (Genesis 39:21, 23). Tsëläya sasakunapa pasëkarpis, Josëqa Jehovä yanapanantam pacienciawan shuyararqan.

¹¹ ¿Imanötaq Jehoväqa Josëta bendicirqan? Juk ishkë watakuna pasariptinmi carcelpita Faraon jorqaramurqan. Tsënam esclävu kanqampita Egiptu nacionchö ishkë kaq mas precisaq nuna këman charqan (Genesis 41:1, 37-43). Pëwan warminqa ishkë wamrayoqmi kayarqan. Punta kaq tsurintam Manases nir jutin churarqan, “porqui kënömi nirqan: ‘Diosqa llapan mana alli pasamanqankunatam qonqaratsimashqa, y teytäpa wayinchö llapan këkaqkunatapis’”. Y juknin kaqtanam Efrain nir jutin churarqan, “porqui kënömi nirqan: ‘Ni imannaq kanqä markächömi Diosqa mirëyoqta tikratsimashqa’” (Genesis 41:51, 52). Mana jaqirinqanrëkurmi Jehoväqa Josëta bendicirqan. Tsënöpam Josëqa israelïtakunata y Egiptu nunakunata mallaqë tiempuchö salvarqan. Awmi, pëqa alleqmi musyarqan tsë llapan chaskinqankunaqa Jehoväpa bendicionnin kanqanta (Genesis 45:5-9).

12. ¿Imataq Jesusta yanaparqan Diosta mana jaqirinampaq?

¹² Jesucristupis imëka pruëbakunachömi Teytanta wiyakurqan. Tsënöpam Jehoväqa premiun qorqan. ¿Imataq Jesustaqa yanaparqan Diosta mana jaqirinampaq? Bibliam kënö nimantsik: “Puntanman churashqa këkaq kushikïrëkurmi, sufritsikoq  qeruchö wanïta aguantarqan, penqakïtapis mana kaqpaq churëkur” (Hebrëus 12:2). Clärum këkan, Diospa jutin alläpa respëtuwan rikashqa kanampaq yanapakurmi Jesusqa alläpa kushikurqan. Pëqa Teytantam kushitsirqan y atska premiutam chaskirqan. Tsëmi Bibliaqa kënö nin: “Diospa gobernar täkunampa derëcha kaq lädunmanmi täkurishqa”. Jina kënöpis ninmi: “Tsërëkurmi Diosqa, juk precisaq carguman churarqan y kuyarmi wakin jutikunapa janampa këkaq jutita qorqan” (Filipensis 2:9).

13, 14. ¿Imanötaq Jehoväqa rikan pëta sirwirnin ruranqantsikkunata?

¹³ Pëta sirwirnin llapan ruranqantsikta Jehovä alläpa valoranqantaqa segürum kashwan. Jehoväqa entiendinmi mana següru sientikushqa o imatapis rurëta mana puëdinapaq kaqta pensashqa. Jina mëtsika trabäjuwan nitipakashqa o familiantsikta imanö manteninapaq kaqta mana musyashqapis pëqa ankupämantsikmi (llakipämantsikmi). Pëqa entiendinmi alläpa llakinëwan qeshyarnin o imawampis qeshyarnin puntatanö sirwita manana puëdinqantsikta. Chipyëpam següru këta puëdintsik problëmakunata pasëkarpis mana jaqipa sirwinqantsiktaqa, Jehovä alläpa valoranqanta (leyi Hebrëus 6:10, 11).

¹⁴ Jina yarpäshun Jehoväqa “mañakïkuna Wiyaq” Dios kanqanta. Tsëmi següru këta puëdintsik pëqa mañakïnintsikkunata wiyanqanta (Salmus 65:2). “Shonqupita patsë ankupäkoq Teyta y tukïnöpa shoqakoq” Diosnintsikqa, pëta mana jaqishpa sirwinapaqmi llapan wananqantsikkunata qomäshun. Itsapis cristiänu mayintsikkunapa shonqunta yatarinqa pëkuna yanaparamänapaq (2 Corintius 1:3). Ankupäkoq karnin wakinkunata yanapashqaqa Jehovä alläpam kushikun. Y Bibliaqa kënömi nin: “Waktsa kaqta yanapaq kaqqa, Jehovätam mañëkan, y Pënam tsënö tratanqampita paguëkunqa” (Proverbius 19:17; Mateu 6:3, 4). Awmi, ankupäkoq karnin cristiänu mayintsikkunata yanapanqantsiktaqa pëta mañëkanqantsiktanömi Jehoväqa rikan, y tsërëkur bendicimänapaq kaqtam nimantsik.

15. ¿Ima premiuta chaskinëkipaqtaq shuyarëkanki? (Rikäri kë yachatsikïpa qallananchö këkaq dibüjuta).

¹⁵ Ciëlupaq akrashqa cristiänukunaqa ‘alli kaqta ruraqkunapaq kaq corönata’ chaskitam shuyäyan. Tsë premiutaqa Jesuspitam chaskiyanqa (2 Timoteu 4:7, 8). Peru tsëta mana shuyaq kaqkunapaqpis kanmi bendicionkuna. Millonyëpayan Jesuspa ‘juk üshankunaqa’, shumaq patsachö imëyaqpis kawakï premiutam alläpa kushishqa shuyarëkäyan. “Tsëchömi alläpa alli kawakïta tarirnin kushishqa kawakuyanqa” (Juan 10:16; Salmus 37:11).

16. ¿Imanötaq yanapamantsik 1 Juan 3:19, 20 textu ninqan?

¹⁶ Itsa höraqa pensashwan Jehoväta sirwirnin rurëkanqantsikqa alläpa wallkalla kanqanta. O itsa ruranqantsikkuna kushitsinqanta o mana kushitsinqanta tapukushwan. O itsapis hasta pensashwan bendicionninta mana chaskinapaqnö kanqantsikta. Peru manam ni imëpis këta qonqanantsiktsu: “Diosqa shonquntsikpitapis mas jatunmi y llapantam musyan” (leyi 1 Juan 3:19, 20). Markäkurnin (yärakurnin) y kuyarnin Jehoväta sirwirqa, ruranqantsikkuna mana alläpa välinqanta pensarpis, pë bendicimänapaq kaqtaqa segürum kashun (Marcus 12:41-44).

17. ¿Ima bendicionkunatataq kanan tiempu chaskintsik?

 ¹⁷ Kananqa Satanaspa makinchö këkaq mana cäsukoq nunakunapa ushanan junaqninkunachönam këkantsik. Peru Jehoväqa kanan tiempupis sirweqninkunataqa bendicimantsikmi. Y, ¿imanötaq bendicimantsik? Atska mikïta qomaqnintsik cuenta imëkata yachatsimarnintsik y yamë këta qomarnintsikmi. Jinamampis, Jesus änikunqannöllam entëru Patsachö cristiänu mayintsikkuna familiantsik cuenta kayan, y alläpam kuyamantsik, ¡tsëqa juk jatun bendicionmi! (Isaïas 54:13; Marcus 10:29, 30). Jina shonqunkunachö yamë këta y kushishqa këta qorninmi asheqnin kaqkunataqa Dios bendicin (Filipensis 4:4-7).

18, 19. ¿Imanötaq sientikuntsik Jehovä bendicimanqantsikkunata yarpärirqa?

¹⁸ Alläpa espantakïpaqmi entëru Patsachö sirweqninkunata kanan witsan Jehovä imanö bendicinqanqa. Alemania nacionpita Bianca jutiyoq panim kënö nin: “Imëka problëmakunachö Jehovä yanapamanqampita y llapan junaqkuna lädüchö këkämunqampitaqa, manam ni imanöpapis agradecikïta puëdïtsu. Alläpa mana alli y llakikïpaq tiempukunachömi kawantsik. Tsënö kaptimpis, Jehoväpa kaqta rurarninqa pëpa mellqaninchö këkaq cuentam imëkapita tsapashqanö sientikü. Pëta sirwirnin imallatapis ruranqäpitaqa, jukta juktaran bendicionkunata chaskï”.

¹⁹ Kananqa, Canadä nacionpita qanchis chunka (70) watayoq panintsik Paulapaq parlarishun. Pëqa washanchö juk qeshyayoq karmi alläpaqa kuyukïta puëdintsu. Peru Diospita yachatsikunanta tsë qeshyan michänantaqa manam permitintsu. Kënömi nin: “Telëfunupa y imëkanöpam yachatsikü. Y valorta tsarinäpaqmi publicacionnintsikkunachö yarqamoq textukunata y imanö yachatsikunapaq ninqankunata juk cuadernuman qellqä, tsëtam höra höraqa leyipä. ‘Kallpata qomar yanapamaq cuadernü’ nishpam reqï. Jehovä änimanqantsikkunaman yarparashqaqa, llakikïpis rasllam ushakärin. Imapa pasashqapis pëqa yanapamänapaqmi listu këkan”. Itsapis noqantsikqa Biancawan Paula pasayanqankunataqa mana pasantsiktsu. Tsënö kaptimpis, noqantsikta y reqishqantsikkunata Jehovä tukïnöpa bendicimanqantsiktaqa mëraq yarpärintsik. Sirweqnin kaqkunataqa, kanan tiempu Dios imanö bendicinqan y shamoq tiempuchö imanö bendicinampaq kaqman pensanqantsikmi alläpa yanapamantsik.

20. Llapan puëdinqantsikmannö Jehoväta sirwirqa, ¿imamantaq confiakushun?

²⁰ Shonqupita patsë mañakunqantsikta wiyarnin Jehovä bendicimänapaq kaqtaqa, ama imëpis qonqashuntsu. Segürum kanantsik ‘Diospa munëninta rurashqa’ karqa, ‘pë änikunqanta chaskinapaq’ kaqta (Hebrëus 10:35, 36). Tsëqa, Jehoväman mas markäkunapaq y llapan puëdinqantsikmannö sirwinapaq kallpachakur sïguishun. Tsënö rurarqa, pë bendicimänapaq kaqmanmi confiakushun (leyi Colosensis 3:23, 24).