DIÄNAQA 80 watayoq masnam. Qowanmi Alzheimer nishqan qeshyawan qeshyarqan y edäyashqakunata cuidayanqan wayichömi wanunqanyaq karqan. Jinamampis ishkan wamrankunam wanukuyarqan y pëpis cancer qeshyawanmi qeshyarqan. Tsënö kaptimpis congregacionninchö wawqikuna y panikunaqa, reunionchö y Diospita yachatsikunqanchöpis kushishqalla këkaqtam rikäyan.

Johnqa 43 wata masmi congregacionkunata watukar yanapakurqan. Tsë cargunchö kushishqa yanapakurpis juk qeshyëkaq familianta cuidananrëkurmi dejarïkurqan. Unëpitana pëta reqeq wawqikunaqa niyan asamblëakunachö tinkurirnin imëpis kushishqa kanqannölla këkanqanta.

¿Imataq yanapan Diänatawan Johnta imëpis kushishqalla këkäyänampaq? ¿Imanötaq pipis kushishqa kanman sufrimientukunapa pasëkar y kuyanqan carguta dejarirpis? Bibliam kënö nin: “Allita ruraq nunaqa kushishqam kanqa Jehoväta sirwirnin y pëmanmi rasumpa confiakunqa, y limpiu shonquyoq kaqkunaqa kushishqam kayanqa” (Sal. 64:10). Tsëta maslla entiendinapaq yachakurishun, imanir kushishqa kanqantsikta o mana kushishqa kanqantsikta.

Kawë vïdantsikchöqa casakurnin, wamrayoq karnin, Diospa markanchö yanapakunapaq carguta chaskirnin y maskunata rurarmi kushishqa sientikuntsik. Tsënö sientikunqantsikqa allillam, porqui tsëkunaqa Jehoväpa bendicionninmi kayan. Y pëmi patsätsirqan casädu kawakïta y wamrayoq kanantsikpaq. Jina pëllam permitimantsik markanchö imëkakunata rurarnin yanapakunapaq (Gen. 2:18, 22; Sal. 127:3; 1 Tim. 3:1).

Tsënö kaptimpis, juk tiempullapam kushishqa karintsik. Porqui itsa majantsik wanukïkunman o jukwan engañaramashwan (Ezeq. 24:18; Os. 3:1). Itsa wamrakunaqa papäninkunata y Diosta cäsukuyantsu y hasta congregacionpitapis qarqushqa kayanman. Por ejemplu profëta Samuelpa wamrakunapis manam llapan shonqunkunawantsu Jehoväta sirwiyarqan. Y rey Davidpis jutsatam rurarqan y tsërëkurmi pë y familiankuna alläpa sufriyarqan  (1 Sam. 8:1-3; 2 Sam. 12:11). Kënö problëmakunapa pasanqantsikqa kushikïnintsiktam ushakäratsin. Tsëmi alläpa sufrintsik y llakikuntsik.

Jina tsënöllam Diospa markanchö chaskinqantsik cargukunataqa salornintsikrëkur, familiantsikta cuidanantsikrëkur o Diospa markanchö cambiukuna kanqanrëkur dejarishwan. Mëtsikaq wawqi panikunam cargunkunata dejayashqa, y llakikïwanmi yarpäyan cargunkunachö Diosta sirwiyanqanta.

Fäcilmi cuenta qokurintsik wakin ruranqantsik cösaskunaqa juk tiempullapa kushitsimänantsikpaq kaqta. Peru Samuelpa y Davidpa ejemplunmi rikätsimantsik, mana pensanqantsik hörachö cambiukuna kaptin y problëmakuna kaptimpis kushishqalla këkänapaq kaqta.

Jesusqa musyarqanmi rasumpa kushikï imanö kanqanta. Porqui ciëluchö kawë vïdanqa alläpa shumaqmi karqan. Tsëmi Jehoväpa lädunchöqa imëpis kushishqalla karqan (Prov. 8:30). Peru kë patsaman shamurninqa imëka difïcil problëmakunapam pasarqan. Tsënö kaptimpis kushishqam karqan teytampa voluntäninta rurarnin (Juan 4:34). ¿Imataq yanaparqan wanutsiyänampaq alläpa sufrikätsiyaptimpis alleq tsarakunampaq? Bibliam kënö nin: “Pëqa, puntanman churashqa këkaq kushikïrëkurmi, sufritsikoq qeruchö wanïta aguantarqan” (Heb. 12:2). Rasumpa kushishqa kanantsikpaqqa, ishkë cösaskuna yanapakunqantam Jesusqa nirqan. Tsëkunapita yachakurishun.

Juk kutim 70 qateqninkuna Diospita yachatsikurnin milagrukunata rurayanqampita alläpa kushishqa kutiyarqan. Tsë rurayanqan milagrukunachöqa demoniukunatapis qarquyarqanmi. Tsënam Jesusqa kënö nirqan: “Ama kushikuyëtsu mana alli espïritukuna cäsuyäshunqëkipitaqa, sinöqa kushikuyë jutikikuna ciëluchö qellqashqa kanqampita” (Lüc. 10:1-9, 17, 20). Awmi, chaskinqantsik cargukunachö yanapakunqantsikqa alläpam kushitsimantsik, peru masqa precisan Jehoväpa rikëninchö alli kanqantsikmi. Tsëmi sïqa rasumpa kushitsimantsik.

Juk kutichönam mëtsikaq nunakunata Jesus yachëkätsirqan, tsëchömi juk warmita kënö neqta wiyarqan: “Taqë alli yachatsikoq nunapa mamäninqa alläpa kushishqachi sientikun”. Peru Jesusqa kënömi nirqan: “Manam; antis ¡kushishqaqa kayan Diospa palabranta wiyaqkuna y cäsukoqkunam!” (Lüc. 11:27, 28). Wamrankuna  alli portakuyaptinqa papäninkunaqa alläpa kushishqam sientikuyan. Peru masqa kushikuyanqa, Jehoväta cäsukuyanqampita y pëwan alli amïgu kayanqampitam.

Awmi, rasumpa kushishqa kanantsikpaqqa Jehoväpa rikëninchö mas alli kanqantsikmi precisan. Problëmakunapa pasëqa manam kushikïpaqtsu, peru manam tsërëkurqa llakishqallaqa kakunantsiktsu. Sinöqa alli tsarakur y Jehoväta mana jaqipa sirwirninqa mas kushishqam sientikuntsik (Rom. 5:3-5). Jina yarpänantsikmi, Jehoväqa pëman confiakoq kaqkunata santu espïritunwan yanapanqanta. Y noqantsiktapis tsëmi yanapamantsik kushishqa kanantsikpaq (Gäl. 5:22). Tsëchi Salmus 64:10 textuqa kënö nin: “Allita ruraq nunaqa kushishqam kanqa Jehoväta sirwirnin”.

Kananmi maslla entiendirintsik Diänawan Johnqa, imëka problëmakunapa pasëkarnimpis imanir kushishqalla kayanqanta. Diänam kënö nin: “Imanömi juk wamra teytanman confiakun, tsënöllam noqapis Jehoväman confiakü. Y Diosmi yanapamashqa mana llakikushpa pëpa Gobiernumpita willakur sïguinäpaq”. Johnnam kënö willakun: “1998 watachömi Soltërukuna Bibliapita Yachakuyänampaq Escuëlachö yachatsikoq kanäpaq churarayämarqan, tsëmi Bibliata mas estudiarqä”. Tsëmi yanaparqan tiempuwan congregacionkunata watukakur kanqan cargunta dejarirpis kushishqalla Diospita yachatsikur sïguinampaq. Tsë cambiukunachöqa rasllam yachakäriyarqan. Johnwan warminqa Jehoväpa kaqchö yanapakuyänampami listu këkäyaq. Y ishkanmi niyan tsëkunata rurayanqampitaqa, alläpa kushikuyanqanta.

Mëtsikaq cristiänukunam niyan Salmus 64:10 textuqa, pëkunachö cumplikashqa kanqanta. Kananqa rikärishun juk wawqi warminwan 30 wata maspa Estädus Unïdus Betelchö yanapakuyanqanta, y tsëpita precursor especial kayänampaq carguta chaskiyanqampita. Pëkunam kënö niyarqan: “Imatapis kuyanqantsikta dejarirqa llakikuntsikmi. Peru tsërëkurllaqa manam llakishqaqa imëpis kakushwantsu”. Pëkunaqa yanapakuyanqan congregacionchömi raslla yachakäriyarqan. Jina kënömi niyan: “Cada asuntupaqmi Jehovämanqa imëpis mañakuyaq kayä. Y mañakuyanqäta Jehovä contestamunqanta rikarninqa alläpa kushishqam sientikuyaq kayä. Yanapakuyanqä congregacionchöqa ichik tiempullachömi wakin wawqi panikunaqa precursor tikrariyarqan. Jinamampis Bibliapita yachatsiyanqä ishkaq nunakunam raslla yachakuyanqanmannö kawar qallëkuyarqan”.

Rasumpa kaqchöqa, manam fäciltsu imëpis kushishqalla këqa, porqui höraqa imallapis pasaramashqam llakishqa sientikushun. Peru Jehoväqa, mana llakikunapaqmi Salmus 64:10 textuwan yanapamantsik. Imata mana rurëta puëdeqnö sientikurpis confiakuntsikmi. Porqui “Allita ruraq nunaqa kushishqam kanqa Jehoväta Sirwirnin”. Juk parlakïchöqa ima problëmapa pasarnimpis Jehoväta mana jaqipa sirwirninqa kushishqam sientikushun. Y noqantsikqa shuyarëkantsik änimanqantsik mushoq ciëlukunata y juk mushoq patsatam. Tsëchöqa Diosta sirweqkunaqa jutsannaqnam kayanqa y Jehovä bendicinqankunapitam imëyaqpis kushishqalla kawakuyanqa (Is. 65:17, 18).

¡Imanö shumaqraq tsëqa kanqa! Porqui alli saloryoqnam kashun y cada junaqmi ankash ankashlla shärikushun. Y mana alli pasamanqantsikkunataqa manam yarpäshunnatsu. Porqui Jehovämi kënö nimantsik: “Llapan punta kaqkunaqa qonqashqanam kanqa, y manam pipis shonqunchö yarpanqanatsu”. Jina wanushqakunapis kawariyämunqam, tsëqa kuyashqa familiantsikkunawanmi yapë juntu këta puëdishun. ¿Imanöraq teytankunaqa kushikuyarqan, chunka ishkë watayoq wamrankunata Jesus kawariratsiptin? Tsënöllam millonyëpayan nunakunapis alläpa kushishqa kayanqa (Mar. 5:42). Awmi, tsë mushoq patsachöqa llapan nunakunam alli kaqllatana rurayanqa y para siemprim Jehoväta sirwirnin kushishqa kawakuyanqa.