2 Corintius 12:2, 3 textuchömi apostol Pabluqa parlarqan, “kima kaq ciëluyaq illaqpita [juk nuna] apashqa” kanqampaq. ¿Pitaq tsë nuna karqan? Corintu Cristiänukunaman cartakunqanchömi Pabluqa rikätsikurqan apostol kanampaq Dios akrashqa kanqanta (2 Cor. 11:5, 23). Tsëpitanam parlarqan, “suëñuchönö rikëpaq y Señorpita revelacionta chaskipaq”. Tsëchöqa manam wakin cristiänukunapaqtsu parlëkarqan. Tsëmi rikätsimantsik tsë visionkunata y revelacionkunataqa kikin rikashqa kanqanta (2 Cor. 12:1, 5).

Tsëmi “kima kaq ciëluyaq” y ‘shumaq patsaman’ “illaqpita apashqa” nunaqa, apostol Pablum karqan (2 Cor. 12:2-4). Y Señorpita revelacionta chaskinqanqa rikätsikun shamoq tiempuchö ima pasanampaq kaqtam.

¿Imataq karqan apostol Pablu rikanqan ‘kima kaq ciëluqa’?

Bibliachö ciëlupaq parlarqa atska cösaskunatam rikätsikun. Juk kaqqa, rikanqantsik ciëlupaqmi parlan (Gen. 11:4; 27:28; Mat. 6:26). Ishkë kaqnam, nunakunapa gobiernumpaq (Dan. 4:20-22). Y kima kaqnam Diospa Gobiernumpaq parlan (Rev. 21:1).

Tsëqa, ¿ima nitataq Pabluqa munëkarqan ‘kima kaq ciëlu nirqa’? Bibliachö imapaqpis kima kuti parlarqa rikätsikun imapis mas alli y precisaq kanqantam (Is. 6:3; Ezeq. 21:27; Rev. 4:8). Tsëmi ‘kima kaq ciëlupaq’ Pablu parlarqa, rikätsikïkarqan juk mas alli gobiernu kanampaq kaqtam. Tsëqa Dios patsätsinqan Gobiernum. Y tsë gobiernuchöqa Jesucristuwan 144.000 akrashqa nunakunam gobernayanqa (rikäri Perspicacia para comprender las Escrituras, volumen 1, librupa 473 y 476 kaq päginakunata). Jina apostol Pëdrupis Diospa Gobiernumpaqmi parlëkarqan ‘mushoq ciëlukunatam shuyarëkantsik’ nirninqa (2 Pëd. 3:13).

¿Imapaqtaq apostol Pabluqa parlëkarqan ‘shumaq patsa’ nirninqa?

Jina Bibliachö ‘shumaq patsapaq’ parlarqa kima cösaskunatam rikätsikun. Juk, ichik tiempullachöna kë Patsa shumaq huertaman tikranampaq kaqta. Ishkë, kë Patsa shumaq huertaman tikraptin Diospa sirweqninkuna tranquïlu y kushishqa kawakuyänampaq kaqta. Y kima kaqnam Revelacion 2:7 textuchö “Diospa shumaq patsan” nirqa, ciëluchö Jehoväwan shumaq y kushishqa kaqkunapaqmi parlëkan. (Rikäri 2015 wata 15 de Juliu Täpakoq revistapa 5 kaq päginachö 8 kaq pärrafuta).

2 Corintius 12:4 textuchöqa Itsa Pabluqa parlëkarqan tsë kiman cösaskunapaq.

Yarpänapaq:

2 Corintius 12:2 textuchö “kima kaq ciëlu” nirqa, itsa parlëkan Jesucristuwan 144.000 akrashqakuna Diospa gobiernunchö gobernayänampaq kaqta. Y pëkunapaqmi Bibliachöqa “mushoq ciëlukuna” nin (2 Pëd. 3:13).

‘Kima kaq ciëlu’ nirninqa rikätsikun Diospa Gobiernunlla mas alli kaq gobiernu kanqantam.

Suëñïninchö Pablu mushoq patsaman illaqpita apashqa kanqanqa itsa këkunata rikätsikun: 1) ichik tiempullachöna kë Patsa shumaq huertaman tikranampaq kaqta. 2) Kë Patsa shumaq huertaman tikraptin Diospa sirweqninkuna tranquïlu y kushishqa kawakuyänampaq kaqta. Y 3) “Diospa shumaq patsan” o paraïsun nirqa, ciëluchö Jehoväwan shumaq y kushishqa kaqkunapaqmi parlëkan. Shamoq tiempuchöqa tsë llapanmi cumplikanqa.

Shamoq tiempuchöqa ‘mushoq ciëlukuna’ y ‘mushoq patsam’ kanqa. Awmi, tsëchöqa Diospa Gobiernunlla y Jehoväta sirweq nunakunallam kayanqa.