¿Shumaq yachakurku leyirqunki tsëllaraq yarqamoq Täpakoq revistakunata? ¿Puëdinkimantsuraq kë tapukïkunata contestëta?

¿Ima pruëbatataq Bibliachö tarintsik Dios llakipäkoq kanqanta?

Israelïtakuna Egiptuchö esclävu kayanqan tiempu imanö sufriyanqantam Diosqa musyarqan (Ex. 3:7; Is. 63:9). Diosnintsik kikin niraqta kamamashqantsik kaptinmi, pënölla llakipäkoq këta puëdintsik. Jina kuyamänapaq mana merecinqantsikta pensashqapis, Jehoväqa entiendinmi imanö sientikunqantsikta (wp18.3, päginakuna 8 y 9).

¿Imanötaq Jesusqa nunakunata yanaparqan mana despreciakoq kayänampaq?

Jesus kë Patsachö kanqan witsanqa alläpam judïukunaqa nunakunata despreciayaq. Tsëmi Jesusqa nirqan humildi kanantsik alläpa alli kanqanta, y juk kastapita o markapita kayanqanrëkur despreciakoqkunatam condenarqan. Tsëmi qateqninkunata nirqan, llapampis wawqi pani kayanqanta (w18.06, päginakuna 9 y 10).

¿Imatataq yachakuntsik Dios Änikunqan Patsaman Moises yëkunanta mana permitinqampita?

Moisesqa Jehoväpa alläpa alli amïgunmi karqan (Deut. 34:10). Tsëpita 40 watakuna pasariptinmi, Dios Änikunqan Patsaman yëkuyänampaqna këkarnin israelïtakunaqa yakunar yapë quejakur qallëkuyarqan. Tsëmi Jehoväqa Moisesta mandarqan qaqata parlapänampaq. Peru Moisesqa manam Jehovä mandanqannötsu rurarqan, sinöqa qaqatam takëkurqan. Jehoväqa alläpam piñakurqan, porqui Moisesqa manam mandanqanta cäsurqantsu, ni manam alabarqantsu tsë milagruta ruranqampita (Nüm. 20:6-12). Këpitaqa yachakuntsik Diosta cäsukï y respetë mas alli kanqantam (w18.07, päginakuna 13 y 14).

¿Rikanqantsikllapita pitapis juzgarninqa ima mana allimantaq ishkirishwan?

Këkunarëkurmi nunakunaqa wakinta juzgayan: ima kastapita o më nacionpita kayanqampita, kapoqyoq o mana kapoqyoq kayanqampita y edäninkunapitam. Tsëmi llapan nunakunata Jehovänö igualpa rikëta yachakunantsik (Hëch. 10:34, 35) (w18.08, päginakuna 8 a 12).

¿Imakunata rurartaq edäyashqa cristiänukunaqa congregacionkunachö yanapakïta puëdiyan?

Edäninkunarëkur cargunkunata jaqishqa cristiänukunaqa, Diospaqqa alläpa valoryoqmi kayan y congregacionchöpis alläpam yanapakïta puëdiyan. Por ejemplu panikunapa mana Testïgu qowankunatam Bibliapita mas yachatsita puëdiyan, Diospa kaqchö qelanashqakunata yanapëta y nunakunatapis Bibliapita mas yachatsitam puëdiyan (w18.09, päginakuna 8 a 11).

¿Ima yanapakïkunataq kan yachatsikunapaq publicacionnintsikkunachö?

Wakin yanapakïkunaqa kayan Diospa markanta reqiyänampaq jw.org tarjëtakuna, invitacionkuna, puwaq tratädukuna y Täpakoqwan ¡Despertad! revistakunam. Jina kanmi follëtukuna, Diospita nunakunata estudiatsinapaq ishkë librukuna y alläpa yanapakoq chusku videukuna. Jukqa ¿Imanirtaq Bibliapita yachakunkiman? nishqan videum (w18.10, pägina 16).

Proverbius 23:23 textu ninqannö, ¿imatataq ruranantsik rasumpa kaqta rantinapaq?

Manam qellëtaraqtsu wanantsik rasumpa kaqta yachakunapaq. Sinöqa tiemputa y kallpachakïtam wanantsik (w18.11, pägina 4).

¿Imatataq yachakuntsik warmin Gömerta Osëas wayinman kutitsinqampita?

Atska kutipa warmin Gömer engañëkaptimpis, Osëasqa manam rakikarqantsu o divorciakurqantsu. Juk cristiänu majanta engañaptinqa mana culpayoq majaqa perdonëta puëdinmi. Engañashqa majanwan yapë oqllanakurqa perdonashqana kanqantam rikätsikun y mananam divorciakïta puëdinnatsu (w18.12, pägina 13).