1, 2. ¿Imanötaq Pablu rikätsikurqan Diospa alläpa alli kënimpita agradecikunqanta?

APOSTOL Pabluqa Jesuspa qateqninkunatam qatikachar wanutsirqan. Tsëmi alleq musyarqan Dios ankupänanta mana merecinqanta. Y alläpa alli këninta Dios rikätsinqanqa, envänu mana kanqantam nirqan (leyi 1 Corintius 15:9, 10).

² Wanunampaq ichikllana pishikaptinmi, Timoteuman Pablu kënö qellqarqan: “Tsaynöllam payta alläpa agradëcicu Alli Willacuyninta confiacamar acramarnï, willacunäpag cachamanganpita” (1 Timoteu 1:12-14, NTCN). ¿Imataq tsë chaskinqan alli willakïqa karqan? Ëfesuchö këkaq anciänukunamanmi Pablu kënö nir qellqarqan: “Peru wanuratsiyämänan captinpis, noqataqa manam ni ima qocamantsu, antis Dios alli queninwan cuyamanqantsictam ushanqäyaq willacur  siguishaq, porqui alli willaquininta willacunanpaqmi Teyta Jesus acramashqa” (Hëchus 20:24, noqakunam yanayätsiyarqü).

3. ¿Ima precisaq rurëtataq Pablu chaskirqan? (Rikäri kë yachatsikïpa qallananchö këkaq dibüjuta).

³ ¿Ima alli willakïkunatataq Pablu willakurqan? ¿Imanirtaq tsë alli willakïkuna Jehoväpa alläpa alli këninta rikätsikoq? Ëfesu cristiänukunatam Pablu kënö nirqan: “¿Manacu musyayanqui Teyta Diospa alli queninta willayänaqpaq pe acramar cachamashqanta!” (Efesius 3:1, 2). Jesusqa Pablutam encargarqan mana judïu kaqkunata Diospa alli willakïninta yachatsinampaq. Pëkunapis, Diospa Gobiernunchö kayänampaq (leyi Efesius 3:5-8). Pabluqa alläpa kushikïwanmi tsë willakïta willakurqan, y tsënömi rikätsikurqan Dios alläpa alli këninta rikätsinqanqa, envänu mana kanqanta. Noqantsikpis tsënöllam ruranantsik.

4, 5. ¿Imanirtaq nintsik Jehoväpa ‘gobiernumpa alli willakïninqa’, “Diospa alläpa alli këninwan” igual-lla kayanqanta?

⁴ Kë ushanan junaqkunachömi, ‘gobiernumpita alli willakïta’ willakunapaq Jehovä carguta qomarquntsik. Tsë willakïtaqa “llapan markachö nunakuna” musyayänampaqmi yachatsikunantsik (Mateu 24:14, NM). ‘Gobiernumpita alli willakïqa’, “Diospa alläpa alli këninwan” igual-llam. ¿Imanirtaq tsëtaqa nintsik? Porqui Diospa Gobiernun apamunqan bendicionkunataqa chaskishun, Diospa alläpa alli këninrëkurllam (Efesius 1:3). Y tsëpita agradecïdu kanqanta rikätsikurmi, Pabluqa kushi kushilla Diospita yachatsikurqan. ¿Tsënöllaku noqantsikpis rurëkantsik? (Leyi Romänus 1:14-16).

⁵ Qepa yachatsikïchömi yachakurquntsik jutsasapa këkashqapis, Diospa alläpa alli kënimpita mëtsika yanapakïkunata y bendicionkunata chaskita puëdinqantsikta. Tsëmi wakin nunakunatapis alleq musyatsinantsik, Jehoväpa kuyakïnimpita y tsë kuyakïrëkur yanapakïninta chaskiyänampaq imata rurayänampaq kaqta. ¿Imanötaq yanapashwan Diospa alläpa alli kënimpita agradecikuyänampaq?

6, 7. ¿Imanirtaq nintsik Jesus wanunqampita entienditsikïqa Diospa alläpa alli kënimpita yachatsikï kanqanta?

⁶ Mëtsikaq nunakunam rurayanqan jutsata allitanö rikäyan. Tsëmi, entiendiyantsu Jesus wanunqan imachö yanapanqanta. Peru mëtsikaq nunakunam cuentata qokuyan, imanö kawayanqanwan kushikïta mana tariyanqanta. Wakinkunaqa Jehoväpa testïgunkunawan parlarirmi cuentata qokuriyan jutsa ima kanqanta, imaman chätsinqanta y jutsapa esclävun këta imanö jaqiyänampaq kaqta. Alli shonquyoq karninmi, Tsurinta Dios kachamunqanrëkur wanïpita y jutsapita librashqa kayanqanta yachakurir alläpa agradecikuyan. Jinamampis, yachakuyanmi alläpa kuyakoq y alli kanqanrëkur tsëta ruranqanta (1 Juan 4:9, 10).

⁷ Jehoväpa kuyë Tsurimpita Pablu kënö ninqanta rikärishun: “Jesucristupa yawarninrecurmi jutsantsicpita rescatamarnintsic perdonamarqontsic”. Jina tsëqa Diospa alläpa alli kënimpita kanqantam nirqan (Efesius 1:7). Jesus wanunqanmi Diospa mas jatun kuyakïninqa  y tsëmi rikätsimantsik alli kënin alläpa jatun kanqanta. Jesus wanunqanman markäkunqantsikrëkur, jutsantsikkunapita perdonashqa y limpiu concienciayoqna kanqantsikta musyëqa alläpam kushitsimantsik (Hebrëus 9:14). ¡Alläpa shumaq willakïkunam tsëqa! ¿Manaku munantsik pï mëta tsëkunapita willëta?

8. ¿Imanirtaq nunakunaqa Dioswan amishtëta wanayan?

⁸ Jesus wanunqanman mana markäkoqkunaqa Diospa chikeqninkunam kayan. Tsëmi Dioswan amïgu kayänampaq yachatsinantsik. Juanmi kënö nirqan: “Diospa tsurinman marcäcurnenqa wiñe cawayoqmi cayanqa. Peru peman mana marcäcurnenqa, wiñe caweta manam tarenqatsu antis pecunata Dios allapa feyupa castigananpaqmi quecan” (Juan 3:36). Jesus wanunqanrëkur Dioswan amishtëta puëdinqantsikmi alläpa kushitsimantsik (rikäri “Maslla entiendinapaq” neq recuadruta). Tsëpaqmi Pablu kënö nirqan: “Puntatam mana allicunata rurar, llutata pensar Diosta chiquirnin, pepita raquicashqa caquicayarqequi. Peru cananqa Dioswan amishtayarqonquim. Dioswan tseno amishtayänequipaqmi Jesucristu wanorqan” (Colosensis 1:21, 22).

9, 10. (1) ¿Ima cargutataq Jesus qorqan ciëlupaq akrashqakunata? (2) ¿Imanötaq ‘juk kaq üshäkuna’ yanapayan ciëlupaq akrashqakunata?

⁹ Jesucristum kë Patsachö këkaq ciëlupaq akrashqakunata nirqan, Dioswan amishtayänampaq ‘llapan nunacunatapis willapäcuyanampaq’ (rikäri “Maslla entiendinapaq” neq recuadruta). Pablum kënö nirqan: “Pemi Jesucristurecur chasquimarqontsic pewan jucnolla canantsicpaq, y tsenollam mandamantsic pewan jucnolla cayänanpaq llapan nunacunatapis willapäcunantsicpaq. Teyta Jesucristum wanininwan llapan nunacunapa jutsanta mana caqpaq churarïcur Teyta Diosnintsictawan amishtatsimarqontsic. Tsemi noqacunata encargayämashqa tse willaquita pitapis metapis willapäyänäpaq. Noqacunam Teyta Jesucristupa cachancuna cayä, y quiquin Teyta Diosmi permitin willapäyänaqpaq. Tsemi Teyta Jesucristupa jutincho roguecuyaq, Dioswan amishtayänequipaq” (2 Corintius 5:18-20).

¹⁰ ‘Juk kaq üshakunapaqqa’ manam imapis igualantsu ciëlupaq kaqkunata yanapëwanqa (Juan 10:16, NM). Pëkunaqa Cristupa willakoqninkunanömi ciëlupaq kaqkunata yanapayan. Y masqa yanapakuyan Diospita yachatsikïchömi. Jinamampis, Dioswan alli amïgu kayänampaqmi nunakunata yanapayan. Këmi, “Jehoväpa alläpa alli kënimpita”, juk kaq mas precisaq yachatsikïqa.

11, 12. ¿Imanirtaq nunakunapaqqa Jehoväman mañakïta puëdiyanqanta musyëqa alläpa alli willakï?

¹¹ Mëtsika nunakunam mañakuyan alli  sientikuyänanllapaq. Peru manam creiyantsu Dios wiyanqantaqa. Pëkunam musyëta wanayan mañakïkunata Jehovä wiyanqanta. Juk kutichömi David Jehoväta kënö nirqan: “Mañakïkuna Wiyaq, qammanmi shayämunqa tukï rikoq nunakuna. Mana alli rurëkunam noqapita mas puëdeq. Jutsäkunatam tsapanki” (Salmu 65:2, 3).

¹² Jesusmi discïpulunkunata kënö nirqan: “Noqaman marcäcur imatapis jutïcho mañacuyaptiqueqa, Dios Yaya qoyäshunquim” (Juan 16:23). Jehoväpa munëninmannö imatapis mañakushqa wiyamänantsikpaq kaqtam Jesusqa nikarqan. Juanpis kënömi nirqan: “Quemi noqantsicpa marcäquinintsic: Sitsun pe munashqanno imatapis mañacushun, wiyamäshunmi” (1 Juan 5:14). Mañakïqa alli sientikunallapaq mana kanqanta nunakunata yachatsiqa alläpa kushikïpaqmi. Jina mañakïqa ‘ancupäcoq Diosllantsicman’ witinapaqmi yanapamantsik (Hebrëus 4:16). Tsëmi nunakunata yachatsinantsik imanö, pita y imakunata mañakuyänampaq kaqta. Tsënöpam Jehoväwan amïgu kayanampaq y shoqakïta tariyänampaq yanapashun (Salmu 4:1; 145:18).

13, 14. (1) ¿Ima shumaq kawakïtataq ciëlupaq akrashqakuna chaskiyanqa? (2) ¿Y imanötaq yanapayanqa llapan nunakunata?

¹³ Satanaspa makinchö këkaq mana alli nunakuna ushakäriptinmi, Jehoväqa alläpa alli këninta masraq rikätsikunqa. ¿Imanötaq tsëta ruranqa? 144.000 ciëlupaq akrashqakunata alläpa shumaq kawëta qorninmi. Tsëpaqmi Pablu kënö nirqan: “Teyta Diosnintsicqa allapa cuyamarnintsicmi ancupëcamarqontsic. Jutsantsicrecur wanushqa cuenta caquicashqam, alli queninwan salbamarnintsic Jesucristurecur juclaya cawenintsic qomarqontsic. Jesucristuwan jucnolla cashqam, peta cawaritsimoq cuenta, noqantsictapis juclaya cawetana qomarqontsic Jesucristuwan juntu Diospa mandaquinincho canantsicpaq. Tsenopam Teyta Diospa espantepaq alli quenin ime carpis musyacashqa canqa, y tseqa Jesucristuwanmi” (Efesius 2:4-7).

¹⁴ Ciëlupaq akrashqakunapaq Jehovä ruranqankunaqa mana creipaqnömi (Lücas 22:28-30; Filipensis 3:20, 21; 1 Juan 3:2, NM). Jehoväqa ciëlupaq akrashqakunatam rikätsinqa ‘espantepaq alli queninta’. Pëkunam kayanqa “mushoq santu Jerusalen” y ‘Achcaspa nobian’ (Apocalipsis 3:12; 17:14; 21:2, 9, 10). Jina Jesucristuwanmi ‘jinantin nasion nunacunapa qeshyeninta’ kachakätsiyanqa. Juk parlakïchöqa wanïpita, jutsapita librakäyänampaq y jutsannaq këman chäyänampaqmi nunakunata yanapayanqa (leyi Apocalipsis 22:1, 2, 17).

15, 16. ¿Imanötaq Jehoväqa shumaq patsachö alläpa alli këninta ‘juk kaq üshäkunata’ rikätsinqa?

¹⁵ Efesius 2:7 (NM) textum nin, “shamoq tiempuchö” Dios alläpa alli këninta  rikätsikunampaq kaqta. Tsë witsanqa llapan nunakunam,‘Diospa espantepaq alli quenimpita’ alläpa kushikuyanqa (Lücas 18:29, 30). Alläpa alli kënintaqa Jehovä rikätsikunqa, wanushqakunata kawaritsimurninmi (Job 14:13-15; Juan 5:28, 29). ¿Pikunataq kawariyämunqa? Wakinkunaqa kayan, Cristu manaraq wanuptin kawashqa Diospa sirweqninkunam. Jina kawariyämunqam ushanan junaqkunachö wanushqa “juk kaq üshäkunapis”. Llapankunam Jehoväta sirwir sïguiyanqa.

¹⁶ Jina Diosqa kawaritsimunqam, pëta mana reqikarnin wanukushqa mëtsika millon nunakunatapis. Juanmi kënö nirqan: “Jina riquecorqä une tiempu ichicpis jatunpis wanucushqacuna Diospa nopancho shëcayaqtam. Jina ricarerqämi librucuna quichacäreqtapis. Tse librucunacho rurenincuna shimpenqanmannomi nunacuna jusgashqa cayarqan. Jucnin caq librunam carqan wiñe caweyoqcunapa jutincuna apuntaränan libru. Tse öram lamarpis, wanïpis, wanwanyarëcaq sepulturapis pecunacho wanushqacunata entregayarqan, y llapancunam jusgashqa cayarqan rurenincunamanno” (Apocalipsis 20:12, 13). Llapan kawarimoqkunam, Diospita yachakïta puëdiyanqa y pëtam mandakoqnintanö rikäyanqa. Bibliapa willakïninkuna ninqannö y kichakaq mushoq librukuna mandakunqannömi kawakïta yachakuyanqa. Kë librukunapa yachatsikïninkunapis Jehoväpa alläpa alli kënintam rikätsikunqa.

17. ¿Imatataq yarpänantsik yachatsikurnin?

¹⁷ Ushakë junaqqa këllachönam këkan. Tsëmi kananqa alläpa precisan, Diospa Gobiernumpa “alli willaquinïta” yachatsikunantsik (Marcus 13:10). Yachatsikoq yarqurninqa Jehoväta respetë mas precisaq kanqantam imëpis yarpänantsik. ¿Imanötaq tsëtaqa rurantsik? Tsëtaqa rurantsik, Jehoväpa alläpa alli këninrëkurlla shamoq tiempuchö mëtsika bendicionkunata chaskinapaq kaqta yachatsikurninmi.

18, 19. ¿Imanötaq Diospa alläpa alli këninta precisaqpaq churashwan?

¹⁸ Cristu mandakunqan witsankuna ima pasakunampaq kaqtam yachatsikuntsik. Tsë witsanchöqa, Jesus wanunqanrëkurmi nunakuna ichikllapa ichikllapa jutsannaq këman chäyanqa. Bibliam kënö nin: “Dios siemprim yarparëcarqan llapan camashqancunata ushacäyänanpita librequita. Tsemi wamrancunatawan juntu mana ushacäcoqta ticraratsenqa” (Romänus 8:21). Diospa alläpa alli këninrëkurllam, kë llapan bendicionkunataqa chaskishun.

¹⁹ Apocalipsis 21:4, 5 textu shamoq tiempupaq willakunqan bendicionkunapita nunakunata willëqa, alläpa kushikïpaqmi. Tsëchömi kënö nin: “Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam”. Täkunampitam Jehovä kënö nin: “Cananqa llapantapis mushoqmannam tumaratserqö”. Jina ninmi: “Que llapanta escribï. Que nenqäcunataqa llapantam cumplishaq”. Kushi kushilla kë alli willakïkunata yachatsikurninqa, Jehoväpa alläpa alli kënintam precisaqpaq churëkäshun.