Leyeqkuna tapukuyanqan
¿Imapaqtaq Ezequielpa 37 kaq capïtulunchö parlëkan, ‘ishkë qerukunam juntakar juk qerullaman tikrarinqa’ nirninqa?
Ezequielwanmi Jehoväqa willatsikurqan, Änikunqan Patsaman sirweqninkuna yëkuyänampaq y yapë juk markalla tikrayänampaq kaqta. Jinamampis, willakurqanmi kë ushanan junaqkunachö juk shonqulla y juk markalla kayänampaq kaqta.
Jehovämi profëta Ezequielta nirqan, ishkë qerukunata tsarirkur tsëman qellqanampaq. Juk kaqmanmi kënö qellqanan karqan: “Judäpaq y pëwan këkaq Israelpa tsurinkunapaq”. Y juknin kaqmannam kënö qellqanan karqan: “Josëpaq, Efrainpa qerumpaq y pëwan këkaq llapan Israel kastapaq”. Y ishkan qerukunapaq parlarnam, Ezequielta Dios kënö nirqan: “Makikichömi juk qerullaman tikrariyanqa” (Ezequiel 37:15-17).
¿“Efrain” jutiqa imatataq rikätsikun? Israel markaqa ishkëmanmi rakikärirqan, chunka kastakunam norti kaq läduman y ishkë kastakunam sur kaq läduman. Y norti kaq läduchöqa Efrain kastam mas puëdeqqa karqan. Hasta punta kaq reynimpis Efrain kastapita Jeroboanmi karqan (Deuteronomiu 33:13, 17; 1 Rëyes 11:26). Kë kastaqa Josëpa tsurin Efrainpitam karqan (Nümerus 1:32, 33). Josëqa, teytan Jacobpitam juk precisaq bendicionta chaskirqan. Tsëmi ‘Efrainpa qerunqa’ Israelpa chunka kastankunata rikätsikurqan. Peru tsë willakïta Ezequiel manaraq willakuptinmi, norti kaq läduchö chunka kastakunata asiriukuna prësu apakuyarqan. Këqa pasakurqan 740 wata Jesus manaraq shamunqanchömi (2 Rëyes 17:6). Tsëpita atska watakunanam, asiriukunata babiloniukuna ushakäratsiyarqan. Tsëmi ishkë qerukunapaq Ezequiel willakunqan witsampaqqa, babiloniukuna mandakuyanqan markakunachö cäsi llapan israelïtakuna ramakashqa këkäyarqan.
Jesus manaraq shamuptin 607 watachömi, babiloniukuna sur kaq läduchö ishkë kaq kastakunata ushakätsiyarqan. Jinamampis, nunakunatam Babilonia markaman apakuyarqan. Itsa norti kaq läduchö quedashqa kaqkunatapis apakuyarqan. Y sur kaq läduchö reykunaqa Judä kastapitam kayarqan. Y sacerdötikunapis Judächömi täräyaq, porqui Jerusalen templuchömi Diosta sirwiyaq (2 Crönicas 11:13, 14; 34:30). Tsëmi, Judäpa kaq qeruqa sur kaq läduchö këkaq ishkë kaq kastakunata rikätsikoq.
¿Imëtaq ishkan qerukuna juntakäyarqan? Jesus manaraq shamunqan 537 watachömi. Tsë watachömi, sur kaq läduchö ishkë kastakunapa y norti kaq lädupita chunka kastakunapa mas precisaq nunakuna, Jerusalenchö templuta altsayänampaq ëwayarqan. Tsëpita patsëmi, Israel markaqa juntakäriyarqan y juknöllam Diosta adorar qallëkuyarqan (Ezequiel 37:21, 22). Jinamampis, Ezequiel, Isaïas y Jeremïas profëtakunapis willakuyarqanmi juknölla kayänampaq kaqta (Isaïas 11:12, 13; Jeremïas 31:1, 6, 31).
¿Imatataq willakurqan profëta Ezequiel rasumpa kaq religionpita? Nirqan Jehoväpa llapan sirweqninkuna “juknölla” kayänampaq kaqtam (Ezequiel 37:18, 19). 1919 watachömi kë willakïqa cumplikar qallëkurqan. Kë wata manaraq chaptinmi, Satanasqa imëkanöpa procurarqan Diospa markanta rakikashqata katsinampaq. Peru 1919 watachömi, ichikllapa ichikllapa juntakar y juknöllana yapë kayarqan.
Tsë watachöqa, Diospa cäsi llapan sirweqninkunam ciëluchö Jesuswan mandakïta shuyaräyarqan (Apocalipsis 20:6). Pëkunam Judäpa qerunnö kayarqan. Peru kë Patsachö mana wanushpa kawakïtaqa wallkaqllam shuyaräyaq. Tiempuwannam, mas mirar qallëkurqan (Zacarïas 8:23). Pëkunam kayarqan Josëpa qerunnö.
Kanan witsanqa, ishkan grüpupis juknöllam Jehoväta sirwiyan y juk reyninkunallam kan, Jesucristulla. Ezequiel willakunqanchöqa, kë reytaqa qayan “sirwimaqnï David” nishpam (Ezequiel 37:24, 25). Qateqninkunapaqmi Jesus teytanta kënö mañakurqan: “Pecuna jucnolla cayätsun, noqawan qam jucnolla canqantsicno” (Juan 17:20, 21). * Jesuspis willakurqanmi, ciëlupaq akrashqakuna y “juk kaq üshakunapis” “juk kanchallachöna” kayänampaq kaqta. Y pëlla “mitseqninkuna” kanampaq kaqta (Juan 10:16, NM). Jesus ninqannömi, ciëlupaq kar o Patsapaq karpis llapankuna juknölla Diosta sirwikäyan.
^ par. 10 Ushanan junaqkunapaq willakurninmi, Jesusqa mëtsika igualatsikïkunawan discïpulunkunata willarqan. Puntataqa parlaparqan, ‘llapanchö wiyakoq y yachëwan sirweqpita’, o Diospa markanta diriginampaq kaq ciëlupaq akrashqa ichiklla grüpupitam (Mateu 24:45-47, NM). Tsëpitanam ciëlupaq akrashqakunapaq parlaq mas igualatsikïkunata nirqan (Mateu 25:1-30). Y ushanampaqnam parlarqan, Cristupa wawqinkunata yanapayänampaq kaqkunapaq y kë Patsachö imëyaqpis kawayänampaq kaqta (Mateu 25:31-46). Jina profëta Ezequiel willakunqampis, tiempuntsikchöqa puntata cumplikarqan ciëlupaq akrashqakunawanmi. Y Israelpa chunka kaq kastakuna kë Patsachö kawaqpaq kaqkunata mana rikätsikuptimpis, ciëlupaq kaqkuna y Patsapaq kaqkuna juknölla këkäyanqantam rikätsimantsik.
