1. ¿Rasumpa kaqta yachakunqëkikunata valorankiku?

 JEHOVÄPA sirweqninkunaqa Palabran Bibliawan rasumpa kaqta yachakunqantsikkunatam alläpa valorantsik. Tsëmi ninqankunaman markäkuntsik o yärakuntsik (Rom. 10:17). Y congregaciontapis Jehovä patsätsimushqa kanqantam següru këkantsik (1 Tim. 3:15). Tsënöllam dirigimaqnintsikkunatapis Bibliawan yachatsimashqa y Diosnintsik munanqanta ruranantsikpaq yachatsimashqa kushishqa cäsukuntsik (Heb. 13:17).

2. Santiägu 5:19 ninqannö, ¿imapitataq Jehoväpa sirweqninkuna cuidakunantsik?

² Rasumpa kaqta yachakushqa karpis y dirigimaqnintsikkunata cäsukunantsik alli kanqanta musyarpis, chikimaqnintsikkuna ulikuyanqankunata o llullakuyanqankunata mana creinapaqmi cuidakunantsik (leyi Santiägu 5:19). Satanasqa alläpachi kushikunman Biblia ninqankunaman manana confiakushqa y dirigimaqnintsikkunata manana cäsukushqaqa (Efes. 4:14).

3. ¿Imanirtan nimanqantsikkuna rasumpa o mana rasumpa kanqanta cuentata qokuyta yachakunantsik? (Efesius 6:13, 14).

³ (Leyi Efesius 6:13, 14). Ichik tiempullachönam Satanasqa imëkata ulikunqa o llullakunqa. Tsëta creirmi nacionkunaqa Jehoväpa contran churakäyanqa (Apo. 16:13, 14). Tsënöllam kë ushanan tiempukunachöpis Diospa sirweqninkunata imëkata creitsita munanqa (Apo. 12:9). Tsëmi kananllapitana cuentata qokuyta yachakunantsik wiyanqantsikkuna rasumpa o mana rasumpa kanqanta, y rasumpa kaptinqa cäsukunantsikmi (Rom. 6:17; 1 Pëd. 1:22). Tsëmi yanapamäshun alläpa sufrimientu witsanchö salvakunapaq.

4. ¿Imakunatataq këchö yachakushun?

 ⁴ Pipis imatapis nimashqa rasumpa o mana rasumpa kanqanta cuentata qokunapaq y dirigimaqnintsikkunata cäsukunapaqqa, ¿imanötan Jehoväta alläpa respetanqantsik y humildi kanqantsik yanapamäshun? ¿Imakunata ruranqantsiktan yanapamäshun alli yachatsikuykuna ninqannölla ruranapaq? Tsëkunapitam këchö yachakurishun.

¿IMANÖ KANQANTSIKTAN YANAPAMÄSHUN RASUMPA O MANA RASUMPA KANQANTA MUSYANAPAQ?

5. ¿Imanötan yanapamantsik Jehoväta alläpa respetanqantsik y pï nimanqantsikpis rasumpa o mana rasumpa kanqanta cuentata qokunqantsik?

⁵ Jehovätam alläpa respetanantsik. Jehoväta llapan shonquntsikwan respetarninqa, manam ruranqantsikkunawan llakitsita munashuntsu. Tsënöllam Jehoväpa rikëninchö alli kanapaqqa, pipis nimanqantsikkuna alli o mana alli kanqanta y rasumpa o mana rasumpa kanqanta cuentata qokuyta yachakunantsik (Prov. 2:3-6; Heb. 5:14). Manam nunakunata mantsarninqa Jehoväta kuyëta dejarinantsiktsu. Nunakuna cäsi llapan rurayanqankunam Jehovätaqa gustantsu.

6. ¿Imatataq 10 musyapakoqkuna rurayarqan nunakunata mantsarnin?

⁶ Jehoväta kuyanqantsikpitapis nunakunata mas mantsarqa, Jehoväpa contran niyanqankunatam creir qallëkushwan. Pensarishun Canaan markaman rikapakoq ëwashqa 12 musyapakoqkunaman. 10 musyapakoqkunaqa, Jehoväta kuyayanqampitapis masmi cananeu nunakunata mantsayarqan. Kënömi niyarqan: “Ama pëkunawan pelyaq ëwashuntsu. Pëkunaqa noqantsikpitapis mas kallpasapam kayan” (Nüm. 13:27-31). Cananeu nunakunaqa rasumpam israelïtakunapita mas puëdeq kayarqan. Peru “manam vencita puëdishuntsu” nirqa, Jehovätam qonqëkushqa kayarqan. Tsëpa rantinqa, Jehovä puëdeq kanqanman  y imanö yanapashqa kanqanmanmi pensayänan karqan. Tsëman pensarqa, cananeukunapitapis Jehovä Dios mas puëdeq kanqantam yarpäyanman karqan. Peru Josuëwan Calebqa jukläyam kayarqan, pëkunaqa Jehovämanmi confiakuyarqan y pëpa puntanchömi alli këta munayarqan. Tsëmi israelïta mayinkunata kënö niyarqan: “Teyta Jehoväta cäsukushqaqa, pëmi tsë markakunaman pushamäshun, y tsë markakunatam entregamäshun” (Nüm. 14:6-9).

7. ¿Imaraq yanapamäshun Jehoväta llapan shonquntsikwan respetanapaq? (Rikäri dibüjuta).

⁷ Jehoväta llapan shonquntsikwan respetanapaqqa yanapamäshun imatapis decidinqantsik höra, gustanqanta o mana gustanqanta cuentachö katsinqantsikmi (Sal. 16:8). Pasakunqankunata Bibliachö leyirqa, kënö pensë: “Tsëchö këkarqa, ¿imataraq ruräman karqan?”. Këllaman pensarishun: 10 musyapakoqkuna willakuyanqanta wiyëkankiman. ¿Niyanqantatsuraq creinkiman karqan y nunatatsuraq mantsar qallëkunkiman karqan? ¿O Jehovätatsuraq mas kuyankiman karqan y kushitsitatsuraq munankiman karqan? Mëtsikaq israelïtakunam cuentata qokuyarqantsu Josuëwan Caleb niyanqanqa rasumpa kanqanta. ¿Imatan pasakurqan mana creiyanqampita? Manam Dios Änikunqan Patsaman yëkuyarqantsu (Nüm. 14:10, 22, 23).

8. ¿Imanö kanapaqtan kallpachakunantsik y imanirtan kallpachakunantsik?

⁸ Humildi kashun. Jehoväqa humildikunatam rasumpa kaqta musyatsin (Mat. 11:25). Bibliapita yachakur qallanqantsik witsanqa humildim karqantsik, tsëmi jukkuna yachatsimashqa kushishqa chaskikurqantsik (Hëch. 8:30, 31). Tsënö karpis, allim cuidakunantsik orgullösu mana tikrakurinapaq. Orgullösu karqa kikintsik pensanqantsik mas alli kanqantam pensashun, y Biblia ninqanta y dirigimaqnintsikkuna niyanqantaqa manam valorashuntsu.

9. ¿Imaraq yanapamäshun imëpis humildi kanapaq?

⁹ ¿Imaraq yanapamäshun imëpis humildi kanapaq? Teytantsik Jehovä alläpa poderösu kanqanta yarpanqantsikmi (Sal. 8:3, 4). Tsënöllam humildi kanantsikpaq y dirigimaqnintsikkunawan yachatsimanqantsikkunata chaskikunapaq Jehoväman mañakunantsik. Pëmi yanapamäshun pensanqantsikkunata puntaman churanantsikpa rantin, Bibliawan y dirigimaqnintsikkunawan yachatsimanqantsikkunata puntaman churanapaq. Bibliata leyirninqa, humildikunata Jehovä kuyanqanta y orgullösukunata alläpa chikinqanta entiendita procurë. Y ima cargutapis chaskirqa, orgullösu mana tikrakurinëkipaq alli cuidakuy.

ALLI YACHATSIKUYKUNA NINQANNÖLLA IMËPIS RURASHUN

10. ¿Jehoväqa pikunatataq utilizarqan sirweqninkunata diriginampaq?

¹⁰ Dirigimänapaq Jehovä churanqan nunakunaman confiakushun. Jehovä Diosnintsikqa israelïtakunata diriginampaqmi Moisestawan Josuëta churarqan y pëkunawanmi imata decidinqantapis willatseq (Jos. 1:16, 17). Tsë nunakunata cäsukurqa, israelïtakunaqa allim kawakuyaq. Congregacion patsakanqan tiempuchönam, 12 apostolkunata utilizarqan sirweqninkunata diriginampaq (Hëch. 8:14, 15). Y tsëpita tiempuwannam, tsë 12 apostolkunaman mas anciänukuna Jerusalenchö yapakäyarqan. Anciänukuna y apostolkuna niyanqanta cäsukurmi congregacionchö wawqi panikunaqa Jehoväman mas markäkuyarqan y ‘waran waran mas atskayäyarqan’ (Hëch. 16:4, 5). Kanan witsampis,  Jehoväqa dirigimaqnintsikkunata cäsukushqam bendicimantsik. Peru këman pensari: ¿imanöraq Jehovä Diosnintsik sientikunman dirigimänapaq churanqan nunakunata mana cäsukushqa? Tsëta musyarinapaq Dios Änikunqan Patsaman ëwëkar israelïtakuna imata rurayanqanta yarpärishun.

11. ¿Imatan pasarqan Moisespa contran churakaq israelïtakunata? (Rikäri dibüjuta).

¹¹ Tsunyaq sitiupa viajayanqan tiempuchömi, wakin israelïtakunaqa Moisespaq mana allita parlayarqan y diriginampaq Jehovä churanqanta mana kaqpaq churayarqan. Kënömi niyarqan: “Teyta Jehoväpa rikëninchöqa llapantsikmi limpiu kantsik [manam Moisesllatsu], y pëqa llapantsikwanmi këkan” (Nüm. 16:1-3). Rasumpam llapankuna limpiu kayarqan, peru diriginampaqqa Moisestam Jehovä churashqa karqan (Nüm. 16:28). Tsëmi Moisespa contran parlarqa, israelïtakunaqa Jehoväpa contran churakëkäyarqan. Tsë israelïtakunaqa kikinkuna munayanqanllaman y carguyoq këllamanmi pensayarqan, manam Diosnintsik munanqanmanqa. Tsëmi Jehoväqa, Moisespa contran churakaq dirigentikunata y yanapaq israelïtakunata ushakätsirqan (Nüm. 16:30-35, 41, 49). Kanan witsampis segürum këkantsik dirigimänapaq Jehovä churanqan nunakunata mana respetashqaqa, pëta mana gustanqanta.

12. ¿Imanirtan dirigimänapaq Jehovä churanqan nunakunaman imëpis confiakuntsik?

¹² ¿Imanirtan dirigimaqnintsikkunaman confiakuntsik? Pëkunaqa imapitapis masqa Jehovätam kushitsita munayan. Këllaman pensarishun: ima asuntupaqpis Biblia ninqankunata mas alli entiendirirqa, creinqantsikkunata cambianapaqmi willakayämun. Y imatapis patsätsiyanqankunata juknöpana rurayänan precisaptinqa, manam cambiukunata rurëta mantsapakuyantsu (Prov. 4:18). Tsënöllam imata decidirpis, Diospa Palabran ninqannö kanampaq kallpachakuyan; pëkunapitam noqantsikpis yachakunantsik.

13. ¿Imatan ‘alli yachatsikuykuna’, y imatataq rurashwan yachakunqantsikwan?

 ¹³ “Alli yachatsikuykuna ninqannölla imëpis” rurashun (2 Tim. 1:13). ¿Imatan tsë ‘alli yachatsikuykunaqa’? Jesuspita llapan yachakunqantsikkunam (Juan 17:17). Llapan creinqantsikkunapis tsë yachatsikuykunallapitam. Dirigimänapaq Jehovä churanqan nunakunaqa tsë yachatsikuykuna ninqannölla ruranapaqmi yanapamantsik. Tsëta rurashqaqa, Jehoväqa manam dejamäshuntsu.

14. ¿Imanirtan wakin cristiänukunaqa “alli yachatsikuykuna” ninqannö rurëta dejariyarqan?

¹⁴ ¿Imaraq pasakunman “alli yachatsikuykuna” ninqanmannö mana rurashqaqa? Punta cristiänukuna kawayanqan tiempuchö pasakunqampaq parlarishun. Wakin cristiänukunam parlar qallëkuyarqan mana alli nunakunata Jehovä juzganan tiempuchöna kawëkäyanqanta. Capazchi tsënö willakoq cartataqa pï karpis Pablupa jutinchö qellqashqa karqan. Peru Tesalönicachö cristiänukunaqa rasumpa o mana rasumpa kanqanta mana musyapakurmi tsë carta ninqanta willakur qallëkuyarqan. Pablu yachatsinqankunata yarparninqa, manam tsë carta ninqanta creiyanmantsu karqan ni willakuyanmantsu karqan (2 Tes. 2:1-5). Tsëmi apostol Pabluqa consejarqan ima wiyayanqantapis raslla o saslla mana creikurkuyänampaq. Y yapëchöpis tsënö cuentukunata mana creikurkuyänampaqmi tesalonicensis cristiänukunaman ishkë kaq cartata qellqarqan. Tsë cartachömi kënö nirqan: “Noqa Pablum, kikïpa makïwan kë salüdüta qellqamü, tsëmi llapan cartäkunachö señal cuenta. Tsënömi qellqä” (2 Tes. 3:17).

15. ¿Imatataq rurashwan ulikuyanqanta o llullakuyanqanta mana creikurkunapaq? Juk ejempluwan willakaramuy. (Rikäri fötukunata).

¹⁵ ¿Imatataq yachakuntsik tesalonicensis cristiänukunata Pablu ninqampita? Imatapis shumaqtanö o espantakuypaqtanö willamashqa o Bibliawan yachakunqantsikpita jukläya kaptinqa, alläpam cuidakunantsik. Unë Union Soviëticachö pasanqampaq parlarishun. Gobiernupaq trabajaq nunakunam Jehoväpa testïgunkunapa principal oficïnampa jutinchö cartata qellqëkur wawqi panikunata  entregayarqan. Tsë cartachöqa niyarqan Jehoväpa testïgunkunapita rakikärir juk grüputa rurayänampaqmi. Tsë carta rasumpanö kaptimpis, Bibliawan yachakuyanqampita jukläya kanqanta cuentata qokurmi wawqi panikunaqa creiyarqantsu. Kanan witsampis, chikimaqnintsikkunaqa Internet-ta y juk cösaskunatam utilizäyan pantatsimänantsikpaq o rakikätsimänantsikpaq. Tsëkuna pasakuptinqa, alli ‘juiciuyoqmi’ kanantsik y yachakunqantsikkunawan igualanqanta o mana igualanqantam raslla o saslla cuentata qokunantsik (2 Tes. 2:2; 1 Juan 4:1).

16. Romänus 16:17 y 18 ninqannö, pipis Bibliapa contran imatapis willakuptinqa, ¿imatataq rurashwan?

¹⁶ Jehoväta kuyaqkunapita ama rakikäshuntsu. Jehovä Diosnintsikqa munan wawqi panikunawan juntu adoranantsiktam, y tsëta rurëtaqa puëdishun Bibliachö yachakunqantsikkunata cäsukurllam. Biblia yachatsikunqampa contran willakuykunata creeqkunaqa congregacionchö wawqi panikunatam rakikätsiyan. Tsëmi Diosnintsikqa nimantsik tsë nunakunapita rakikäkurinapaq y niyanqankunata mana creinapaq (leyi Romänus 16:17, 18).

17. Willakuyanqankuna rasumpa o mana rasumpa kanqanta cuentata qokur y rasumpa kaqkunata yachakunqantsikkunata mana dejarqa, ¿imatataq lograshun?

¹⁷ Willakuyanqankuna rasumpa o mana rasumpa kanqanta cuentata qokur y rasumpa kaqta yachakunqantsikkunata mana dejarqa, manam imëpis Jehoväpita rakikäkurishuntsu y pëmanmi maslla markäkushun o yärakushun (Efes. 4:15, 16). Manam Satanas engañakunqanta creishuntsu. Tsëqa alläpa sufrimientu witsanchöpis Jehovämi cuidamäshun. Rasumpa kaqta yachakunqantsikkunataqa ama imëpis dejashuntsu, tsënöpam yamë kanantsikpaq yanapamaqnintsik Diosqa imëpis noqantsikwan këkanqa (Filip. 4:8, 9).