Haykanush jutiyoq warmiqa, Armenia nacionchömi qowanwan täräyan. Ishkanmi, manaraq bautizakushqa karpis Diospita yachatsikoqqa yarqïkäyarqanna. Juk junaqmi wayimpa amänunllachö kë warmiqa tarikurqan juk documentuta, bancupita qellëta jorqanapaq tarjëtakunata y atska qellëta. Tsënam qowanta willarirqan.

Pëkunaqa waktsa y alläpa jaqayoqmi kayarqan. Tsënö kaptimpis, documentuchö këkaq direccionmanmi apayarqan. Y chäratsiyaptinqa tsë documentupa duëñun y familianqa alläpam espantakuyarqan. Tsëmi Haykanush y qowan willayarqan Bibliapita yachakuyanqanrëkur honrädu këta yachakushqa kayanqanta. Y provechayarqanmi Jehoväpa testïgunkunapita parlapäyänampaq y publicacionkunata jaqipuyänampaq.

Honrädu kayanqampitam Haykanushta qellëta qoyta munayarqan, peru pëqa manam chaskirqantsu. Waräninnam, tsë nunapa warminqa Haykanuspa wayinman ëwarqan. Y alläpa agradecïdu kanqanta rikätsikunampaqmi juk alläpa chaniyoq diamanti rumipita rurashqa anïlluta qarëkurqan.

Documentunkunata y qellëninkunata chaskirir alläpa espantakoq familianöchi, juk nunakunapis Haykanush y qowan rurayanqampitaqa espantakuyanman karqan. Peru tsënö honrädu kayanqampitaqa, ¿Jehoväqa espantakuntsuraq? ¿Imatataq honrädu kayanqampita pensan? ¿Allipaqtsuraq karqan honrädu kayanqan?

Cristiänukunaqa musyantsikmi örupita, diamanti rumikunapita o imëka cösaskunapitaqa Jehoväpa imanö këninta qatinqantsik, pëpaq mas väleq kanqanta. Cäsi llapan nunakuna mana precisaqpaq churayanqantam Jehoväqa alläpa valoran (Isaïas 55:8, 9). Jehoväqa alläpam valoran sirweqninkuna pënö kayänampaq kallpachakuyanqanta.

Tantiyarinapaq, rikärishun Proverbius 3:13-15 textuchö yachëpaq y entiendipaq Biblia kënö ninqanta: “Alläpam kushikun yachëta tareq nunaqa, y alläpam kushikun alli entiendeq nunaqa, porqui tsëkunata gananciatanö katsiqa qellëta gananciatanö katsipitapis mas allim; jina tsëta katsiqa örupitapis mas allim. Lamarchö këkaq coral nishqampitapis mas shumaqmi y imëka kushitsishoqnikiwampis manam igualantsu”. Clärum këkan, imëka chaniyoq aläjakunapitapis mas väleqpaqmi Jehoväqa tsëkunata churan.

¿Imatataq nishwan honrädu këpita?

Kikin Jehovämi honrädu. Tsëmi Bibliaqa nin “rasompa caqllata parlakoq” Dios kanqanta (Tïtu 1:2). Y Jehovämi munarqan apostol Pablu juk grüpu cristiänukunapaq, kënö qellqananta: “Noqacunapaq Diosnintsicman mañacayämunqui yanapecayämänanpaq. Musyecayämi consensiacunacho allillata rurecayanqäta, y munayä ime equepis alli portacur cawaquitam” (Hebrëus 13:18).

Jesucristuqa ruranqankunachömi honrädu karqan. Juk kutichömi, sacerdötikunapita mas precisaq kaq kënö nirqan: “Cawecaq Diospa jutinchomi neq: Rasonpa caqta willayämë. ¿Qamcu canqui Diospa Acrashqan tsurin?”. Jesusqa honrädu karmi, wanutsiyänampaq kaqta musyëkarnimpis Mesïas kanqanta nirqan (Mateu 26:63-67).

¿Y noqantsikqa? ¿Qellëta gananantsikrëkurtsuraq rasumpa kaqta willakushuntsu o jukmampa tumaratsishun? ¿Honrädullatsuraq këkäshun?

Kë ushanan junaqkunachöqa manam fäciltsu honrädu këqa, porqui mëtsikaq nunakunam kikinkunallaman yarparäkuyan y qellëtam alläpa kuyayan (2 Timoteu 3:2). Qellëta mas wanayanqan hörakunachö o trabäjuta tarinan sasa kanqan hörakunachömi, mëtsikaq nunakunaqa suwakuyan, engañakuyan y imëka mana allikunata rurayan. Wanayanqan hörakunachö tsëkunata rurëqa allilla kanqantam mëtsikaq nunakuna pensayan. Hasta wakin cristiänu mayintsikkunapis tsëmanqa ishkiyashqam. Tsënöpam congregacionchöqa confiakïpaqnatsu kayan (1 Timoteu 3:8; Tïtu 1:7).

Peru cäsi llapan cristiänukunam Jesus ruranqanta qatiyan y honrädu kayan. Musyayanmi Jehoväpa imanö këninta qatiqa, imëkayoq këpita mas precisaq kanqanta. Tsëmi escuëlachö këkaq jövin cristiänukunaqa alli nötata jorqayänanrëkur engañakuyantsu (Proverbius 20:23). Manam Haykanush warminötsu, honrädu kanqantsikrëkur imëpis allikunata chaskishun. Tsënö kaptimpis, Diosqa nimantsik honrädu këqa mas alli kanqantam. Honrädu këqa  yanapamantsik limpiu concienciayoq kanapaqmi, y tsëqa imapitapis mas allim.

Gagik jutiyoq nunata pasanqampis, rikätsikun honrädu këqa mas alli kanqantam. Pëmi willakun manaraq Testïgu karnin juk jatun emprësachö trabajanqanta. Kë emprësapa duëñunqa manam llapan impuestutatsu pagakoq, sinöqa wakin gananqanllatam. Tsë emprësachömi Gagikqa director karqan, tsëmi duëñuqa shuyararqan, llapan impuestunkunata pagakuyänampaq rikaq ëwaq nunata qellëta qonanta, tsënöpa llapan impuestuta mana pagakuyänampaq. Tsëta ruranqampitam mana markäkïpaq nunatanöna rikäyaq. Peru atska qellëta ganëkarnimpis, Bibliapita yachakurirmi munarqannatsu gobiernuta engañëta. Tsëmi kikin juk negociuta kichanampaq decidirirqan. Tsë negociuta kichanqampita patsëmi ley mandakunqannö pëqa impuestunta llapanta pagakurqan (2 Corintius 8:21).

Jina unënöna mana ganarnin familianta manteninan mana fäcil kanqantam Gagikqa willakun. Tsënö kaptimpis, kananqa mas kushishqa y Jehovä Diospa rikëninchö alli concienciayoq kanqantam nin. Y pë ruranqampitam wamrakuna yachakïta puëdiyan y congregacionchöpis cargukunatam chaskishqa. Kananqa honrädu kanqampitam, llapan impuestunkunata pagakuyänampaq rikaq nunakuna y pëwan trabajaq nunakunapis rikäyan markäkïpaq nunatanömi.

Jehoväqa kuyan pë imanö kanqanta qatirnin respetaqkunatam (Tïtu 2:10). Imanö këninta qatishqaqa yanapamänapaq kaqtam änimantsik. Rey Davidqa edäna këkarpis alleqmi rikarqan, Dios munanqannö kawaq nuna ni tsurinkunapis mallaqqa imëpis mana pasashqa kayanqanta, y tsëta qellqanampaqmi Jehoväqa permitirqan (Salmu 37:25).

Sirweqninkunata Jehovä tsënö cuidanqantaqa Rutpa kawëninmi rikätsikun. Rasumpa kuyakoq karmi, edäna suegranta jaqirqantsu. Y suegranwanmi Israel markata täraq ëwakurqan, tsëchö rasumpa kaq Diosta adoranampaq (Rut 1:16, 17). Rutqa honräda warmi karninmi, Moises qellqanqa ley ninqannö waktsakunapaq jaqiyanqanta pallapakurnin alläpa trabajaq. Jehoväqa imëpis cuidarqanmi Rut-ta y suegranta, tsëpita tiempuwan rey Davidta cuidanqannö (Rut 2:2-18). Peru Diosqa manam Rut-ta cuidarqanllatsu ni wananqanllatatsu qorqan, sinöqa rey Davidwan Jesucristu pëpa kastampita yuriyänantapis permitirqanmi (Rut 4:13-17; Mateu 1:5, 16).

Kanan witsanqa, mëtsikaq cristiänu mayintsikpaqmi fäciltsu llapan wanayanqanta rantiyänampaq qellëta tariyänan. Tsënö kaptimpis, manam qellëta fäcil ganayänanrëkurtsu engañakïta tïrayan. Antis Diospa imanö këninta qatirmi honrädu y alli trabajador kayänampaq kallpachakuyan. Tsënömi rikätsikuyan, honrädu këqa imëkayoq këpitapis mas alli kanqanta (Proverbius 12:24; Efesius 4:28).

Entëru Patsapam cristiänukunaqa Rut ruranqanta qatiyan y Jehovä kënö äninqanman markäkuyan: “Manam qonqashqequitsu ni jaqirishqequitsu” (Hebrëus 13:5). Kutin kutinmi Jehoväqa rikätsikushqa, honrädu kaqkunata imëpis wanayanqankunachö yanapanqanta. ¡Änikunqankunataqa imëpis cumplishqam! (Mateu 6:33).

Nunakunaqa alläpa precisaqpaqmi churayan chipapaq rumikunata y imëkayoq këta. Peru ciëluchö Teytantsikqa honrädu kanqantsikta y alli rurënintsikkunatam imëka aläjakunapitapis mas väleqpaq churan.