1. Salmus 18:46 ninqannö, ¿imawantan Davidqa Jehoväta igualatsirqan?

 KANAN tiempuqa imëkam pasarëkan, hasta vïdantsikpis rasllam o sasllam cambiarinman. Peru yanapamänantsikpaq Diosnintsikta mañakuyta puëdinqantsikta musyarmi alläpa kushikuntsik. Punta kaq yachatsikuychömi yachakurqantsik Jehoväqa rasumpa kawaq Dios kanqanta y yanapamänapaq listu këkanqanta. Cada yanapamanqantsikta rikarmi ‘kawaq Dios’ kanqanta maslla següru kantsik, tsëtam Davidpis Salmus 18:46 (leyi) textuchö nirqan. Tsënö nirirmi Diosnintsikpaq kënö nirqan: “Qaqa cuenta tsapämaq Dios Yaya”. Peru ¿imanirtan Davidqa Diospaq nirqan qaqa cuenta kanqanta?

2. ¿Imakunatataq yachakushun?

² ¿Imanirtan Bibliachöqa Jehoväpaq qaqa cuenta kanqanta nin? ¿Imatataq yachakuntsik tsënö ninqampita? ¿Imatataq rurashwan tsapämaqnintsik qaqa cuenta Jehovä kanampaq? ¿Imatataq rurashwan Jehovä Diosnintsiknö kanantsikpaq? Tsëkunatam këchö yachakurishun.

¿IMANIRTAN JEHOVÄQA QAQA CUENTA?

3. Bibliachö qaqa nirqa, ¿pipaqtan parlëkan y imata entiendinapaqtan tsënö nin? (Rikäri jana qaranchö këkaq dibüjuta).

³ Bibliachöqa atska kutichömi qaqapaq parlan, y tsënö nirqa Jehoväpaqmi parlëkan. ¿Y imanirtan tsënöqa nin? Jehovä imanö kanqanta entiendinapaqmi. Mëtsikaq sirweqninkunam Jehovä imanö kanqanta alabarnin qaqa cuenta kanqanta niyarqan. Deuteronomiu 32:4 textuchömi puntataqa Jehoväpaq nin, “qaqa” cuenta kanqanta. Änanam Jehoväman mañakur nirqan, ‘alli fuerti qaqanö’ kanqanta (1 Sam. 2:2). Habacucnam nirqan ‘imëkapita tsapaq qaqanö’ kanqanta (Hab. 1:12, nöta). Salmus 73 textuta qellqaq nunanam nirqan, ‘qaqa cuenta tsapaqnin’ kanqanta (Sal. 73:26). Y kikin Jehoväpis  “qaqa” cuenta kanqantam nirqan (Is. 44:8). Jehovä qaqa cuenta imanir kanqanta kimallata yachakurishun, tsëpitanam rikärishun tsapämaqnintsik “qaqa cuenta” kanampaq imata ruranantsikpaq kaqta (Deut. 32:31).

4. ¿Imanirtan Jehoväpaq nintsik tsapäkoq qaqanö kanqanta? (Salmus 94:22).

⁴ Jehoväqa imëka mana allikunapita tsapäkoq qaqanömi. Imanömi alläpa tamyaptin juk machëman o jatun rumi jawanman tsapämänapaq o llantukunapaq yëkurita puëdintsik, tsënöllam mana allikunapa pasarpis yanapamänapaq Jehoväta ashita puëdintsik (leyi Salmus 94:22). Pëqa mana allikunapitam tsapämäshun y ima mana allipis pasamashqaqa tiempuwanqa altsaramunqam. Y manam tsëllatsu, pëqa änimarquntsik shamoq tiempuchö manana sufrir kushishqa kawakunapaqmi (Ezeq. 34:25, 26).

5. ¿Imatataq rurashwan Jehovä imëka mana allipita tsapämaqnintsik kanampaq?

⁵ ¿Imatataq rurashwan mana allikunapita Jehovä tsapämänapaq? Mañakunantsikmi. Mañakushqaqa, Diosnintsikpita chaskinqantsik yamë këmi tranquïlu kanapaq yanapamäshun (Filip. 4:6, 7). Artiomta pasanqampaq parlarishun. Pëtaqa Diosta adoranqanrëkurmi carcelayarqan y investigaq nunam imëkata tapuparnin mana alli trataq. Artiommi kënö nin: “Cada tapupäyämaptinmi, alläpa mantsakoq kä. […] Tsëmi tranquïlu y yachëyoq kanäpaq Jehoväman yanapëkamänampaq mañakoq kä. Y tsë nuna imëkata rurar tapupämaptimpis, manam Jehoväta dejarqätsu […]. Jehoväqa imëkapita tsapämaq perqanömi karqan”.

6. ¿Imanirtan Jehovämanqa imëpis confiakuyta puëdintsik? (Isaïas 26:3, 4).

⁶ Jehoväqa confiakuypaqmi. Imanömi juk qaqa juk sitiuman kuyukuntsu, tsënöllam Jehoväpis yanapamänantsikpaq këkanqanllachö këkan. Pëqa imëpis “mana ushakaq Qaqanömi” y confiakuypaqmi (leyi Isaïas 26:3, 4). Jehoväqa kawëkaq Diosmi, änikunqankunataqa cumplinqam, mañakunqantsiktapis wiyanmi y yanapamantsikmi. Y sirweqninkunataqa manam imëpis dejantsu (2 Sam. 22:26). Ruranqantsikkunataqa manam qonqantsu y ruranqantsikkunapitam bendicimäshun (Heb. 6:10; 11:6).

7. ¿Imanötan yanapamantsik Jehoväman confiakunqantsik? (Rikäri fötuta).

⁷ ¿Ima mastataq rurashwan tsapämaqnintsik qaqanö Jehovä kanampaq? Llapan shonquntsikwanmi confiakunantsik. Mana allikunapa pasëkarpis, mandakunqankunata cäsukunqantsikqa biennintsikpaqmi (Is. 48:17, 18). Cada yanapamanqantsikta rikarmi pëmanqa maslla confiakuntsik. Tsënöpam, shamoq tiempuchö mana allikunapa pasanapaqpis listu këkantsik. Mana allikunapa pasanqantsik hörakunam rikantsik Jehovä yanapëkämanqantsikta. Vladimir jutiyoq wawqim kënö nin: “Carcelchö kanqä witsankunam Jehoväpa mas lädunchö sientikurqä. Carcelchöqa japallämi karqä y manam ni ima  rurëta musyarqätsu, peru Jehoväman confiakuytam yachakurqä”.

8. (1) ¿Imanirtan Jehoväpaqqa mana cambianqanta nintsik? (2) ¿Imanötan yanapamantsik tsapämaqnintsik qaqanö Jehovä kanqanta musyanqantsik? (Salmus 62:6, 7).

⁸ Jehoväqa manam cambiantsu. Imanömi juk qaqa cambiantsu, tsënöllam Jehoväpis imanö këninta ni decidinqankunata cambiantsu (Mal. 3:6). Adanwan Ëva jutsallakuriyaptinqa, Jehoväqa manam nunakunapaq rurëta munanqanta cambiarqantsu. Tsëmi apostol Pabluqa Diospaq nirqan, “kikinta mana negakuyta” puëdinqanta (2 Tim. 2:13). Tsënöqa nirqan ima pasakuptimpis o jukkuna imata rurayaptimpis, Jehoväqa imanö kanqanta, decidinqankunata y mandakunqankunata mana cambianqantam. Tsëkunata musyarqa, mana allikunapa pasanqantsik hörakuna yanapamänapaq kaqmanmi confiakuntsik, y Jehoväqa llapan änikunqankunatam cumplimunqa (leyi Salmus 62:6, 7).

9. ¿Imatataq yachakunki Tatianata pasanqampita?

⁹ Tsënöllam tsapämaqnintsik qaqa cuenta Jehovä kanqanmanqa confiakushun imanö kanqanman y Patsapaq y nunakunapaq ruramunampaq kaqkunaman pensarnin. Tsëkunaman pensanqantsikmi yanapamäshun mana allikunapa pasanqantsik hörakuna tranquïlu sientikunapaq (Sal. 16:8). Tsënö pensanqanmi panintsik Tatiänatapis yanaparqan. Pëtaqa Jehoväta sirwinqanrëkurmi autoridäkuna niyarqan mana yarquypa wayinllachö kanampaq. Tatiänam kënö nin: “Wayïchö japallä quedakunäpaqmi obligayämarqan. Qallananchöqa manam fäciltsu karqan, y höraqa alläpam llakikoq kä”. Peru kë pani alli tsarakunampaqqa yanaparqan, Jehoväman y ruramunampaq kaqkunata yarpanqanmi. Kënömi nin: “Jehoväta kuyanqärëkur y mandakunqankunata cäsukunqärëkur tsëkunapa pasëkanqätam yarparqä. Tsëmi yanapamarqan kikïllaman mana pensanäpaq”.

10. ¿Imatataq rurashwan tsapämaqnintsik qaqatanö Jehoväta rikänapaq?

¹⁰ Ichikllachönam imëka mana allikunapa pasashun y tsë witsanqa Jehoväman confiakuytam masqa wanashun. Tsëmi aguantanapaq Jehovä yanapamänapaq kaqman y imëpis mana dejamänapaq kaqman kananllapitana confiakuyta yachakunantsik. Y tsëpaqqa, Bibliata y sirweqninkuna imakunapa pasayanqankunatam leyinantsik. Y Jehovä Dios imanö yanapashqa kanqanmanmi pensanantsik. Tsënöpam Jehovätaqa tsapämaqnintsik qaqatanö rikäshun.

JEHOVÄ IMANÖ KANQAMPITA YACHAKUSHUN

11. ¿Imanirtan Jehovänö kanantsikpaq kallpachakushwan? (Leyiri “ Jövinkuna kallpachakuyänampaq” neq recuadruta).

¹¹ Këyaqmi yachakurquntsik Jehovä Diosnintsik tsapäkoq qaqanö kanqanta. Y kananqa pënö kanantsikpaq yachakurishun. Pënö kanapaq kallpachakurqa, congregacionchö wawqi panikunatam yanapëta puëdishun.  Këllaman pensarishun: Jesusmi Cëfas nir, Simonta jutin churarqan, tsëqa Pëdru ninanmi, y Cëfas ninanqa “rumi” ninanmi (Juan 1:42). Tsënöqa Pëdruta Jesus jutinta churarqa, congregacionchö wawqi panikunata shoqanampaq y yanapanampaq kaqman confiakurmi. Anciänukunaqa congregacionchö wawqi panikuna llantukuyänampaq ‘jatun qaqanömi’ kayan (Is. 32:2). Y rasumpa kaqchöqa, mana anciänu karpis llapantsikmi Jehovänö këta puëdintsik y congregacionchö wawqi panikunata yanapëta puëdintsik (Efes. 5:1).

12. ¿Imatataq rurashwan wawqi panintsikkunapaq tsapäkoq qaqanö kanantsikpaq?

¹² Mana allikunapita tsapäkoq qaqanö kashun. Huelgakuna, guërrakuna o imëka desgraciakuna kaptin, sufrikaq wawqi panikunata wayintsikman chaskishun. Kë ‘ushanan tiempukunachöqa’ imëkapis pasakunqam. Tsëmi wawqi panintsikkunaqa maslla yanapanantsikta wanayanqa (2 Tim. 3:1). Juknöpaqa wawqi panintsikkunata yanapantsik shumaq parlaparnin y Diospa kaqchö alli kayänampaq animarninmi. Këllaman pensarishun: reunionman chäyämuptinqa, alli sientikuyänampaqmi shumaq parlaparnin chaskirinantsik. Kanan tiempu nunakunaqa manam nuna mayinkunata shumaq parlapäyantsu y mana allim tratayan. Tsëmi wawqi panikuna reunionkunaman chäyämuptin shumaq parlapashqaqa, mantsapakuyanqatsu y kuyanqantsiktam sientiyanqa.

13. ¿Imanötan anciänukunaqa wawqi panikunata yanapayanman? (Rikäri fötuta).

¹³ Anciänukunapis, wawqi panikunatam mana allikunapa pasayanqan hörakuna yanapayan. Tsëmi desgraciakunapa pasayaptin o hospitalman emergencia ëwayaptimpis raslla o saslla yanapayan. Tsënöllam Diospa kaqchö alli kayänampaqpis yanapayan. Anciänukuna yachanëpaq y kuyakoq kayaptin y parlapäyanqanta shumaq wiyayaptinqa imapa  pasarpis confianzam willariyanqa, kuyashqam sientikuyanqa y Bibliawan consejayaptimpis kushishqam chaskikuyanqa (1 Tes. 2:7, 8, 11).

14. ¿Imanötan confiakuypaq kanqantsikta rikätsikushwan?

¹⁴ Confiakuypaq kashun. Mana allikunapa pasayanqan hörakuna noqantsikman confiakayämunantaqa llapantsikmi munantsik (Prov. 17:17). Peru noqantsikman confiakuyänampaqqa, ¿imanötan kanantsik? Tsëpaqqa Jehovänö kanapaqmi cada junaq kallpachakunantsik, änikunqantsikkunatam cumplinantsik y imatapis höranchömi ruranantsik (Mat. 5:37). Tsënöllam, yanapanantsikta wanëkaqkunata yanapanantsik. Y imatapis ruranantsikpaq mandakamashqaqa, nimanqantsiknöllam llapanta ruranantsik.

15. ¿Imanötan congregacionchö wawqi panikuna sientikuyan anciänukuna confiakuypaq kayaptin?

¹⁵ Confiakuypaq anciänukunaqa allipam congregacionchö yanapakuyan. Këllaman pensarishun: juk anciänu confiakuypaq kaptin grüpumpita wawqi panikuna confianza imallapaqpis qayarninqa, alli atiendishqa këkäyanqantam sientiyanqa. Imë hörapis yanapariyänampaq anciänukuna listu këkäyanqanta musyarqa, kuyashqa kayanqantam sientiyanqa. Bibliawan y dirigimaqnintsikkuna rurayämunqan publicacionkunawan consejayaptinqa, pëkunamanmi maslla confiakuyanqa. Tsënöllam imatapis willayanqanta anciänukuna jukkunata mana cuentayaptin y parlayanqanta cumpliyaptinqa, pëkunaman maslla confiakuyanqa.

16. ¿Imanötan yanapamantsik Dios munanqannö kawakunqantsik y imanötan wakinkunata yanapashwan?

 ¹⁶ Jehovä munanqannö kawakushun y ama cambiashuntsu. Jehovä mandakunqankunata cäsukunqantsikta y Biblia ninqannö imatapis decidinqantsikta rikämarnintsikqa, wakinkunapis noqantsikpitam yachakuyanqa. Tsënö firmi kanapaqqa, Bibliatam alli estudianantsik y Diosmanmi maslla markäkunantsik o yärakunantsik. Tsëta rurarqa, masmi Jehovä Diosnintsikman markäkushun, manam alli kaqkunata deciditapis mantsashuntsu, ni manam Diospa contran yachatsikuyanqantapis creishuntsu (Efes. 4:14; Sant. 1:6-8). Mana alli noticiakunata pipis willamashqaqa Jehoväman y änikunqankuna cumplikänampaq kaqman markäkurmi alli firmi tsarakushun (Sal. 112:7, 8). Y mana allipa pasëkaqkunatapis yanapëtam puëdishun (1 Tes. 3:2, 3).

17. ¿Imatan anciänukunata yanapanqa wawqi panikunata shumaq yanapayänampaq?

¹⁷ Anciänukunaqa imëkachöpis controlakuytam yachayänan, alli juiciuyoqmi kayänan, ordenädum kayänan y manam pensayanqanllachöqa tsarakuyänantsu. Anciänukuna Biblia ninqannö yachatsikuyaptinqa, wawqi panikunaqa masmi Jehoväman confiakuyanqa (Tïtu 1:9; 1 Tim. 3:1-3). Wawqi panikunata seguïdu watukayaptin y pëkunapaq ejemplu kayaptinqa, manam reunionkunaman asïllaqa faltayanqatsu, seguïdum yachatsikoq yarquyanqa y Bibliatapis seguïdum leyiyanqa. Y wawqi panikuna mana allikunapa pasarnin yarpachakuyaptinqa, Jehoväman y ruramunampaq kaqkunaman yarpäyänampaqmi yanapayanqa.

18. ¿Imanirtan Jehoväta alabëta y imëpis amïgun këta munantsik? (Leyiri “ ¿Imatataq rurashwan Jehoväpa amïgun kanapaq?” neq recuadruta).

¹⁸ Jehovä imanö kanqanta yachakurirqa, Davidnömi sientikuntsik. Pëmi kënö nirqan: “Teyta Jehoväqa, noqapaqqa tsapämaq qaqanömi, alabashqa katsun” (Sal. 144:1). Jehovämanqa imëpis confiakuytam puëdintsik. Pëqa manam ni imëpis dejamäshuntsu. Chakwanna o awkinna kashqapis, pëta mana dejanapaqmi yanapamäshun. Tsëmi Jehoväman confiakurnin kënö nita puëdintsik: “Pëmi noqapaqqa qaqa cuenta” (Sal. 92:14, 15).