Diosnintsikpa rikëninchö alli kanapaqqa Pëmanmi markäkunantsik. Tsënö kaptimpis apostol Pabluqa nirqan wakin nunakuna Diosman mana markäkuyanqantam o mana yärakuyanqantam (2 Tes. 3:2). Tsënö nirqa apostol Pabluqa chikeqnin nunakunapaqmi parlëkarqan, tsë nunakunaqa ‘mana allita ruraq y alläpa mana allim kayarqan’. Peru Pablu ninqanqa manam tsë nunakunallapaqtsu karqan, sinöqa Diosman mana markäkoq llapan nunakunapaqwanmi. Wakin nunakunaqa Dios kamanqankunata rikëkarpis manam Diosman creiyantsu (Rom. 1:20). Wakinnam niyan nunapitapis juk mas yachaq y mas puëdeq llapanta kamashqa kanqanta. Peru tsënö niyanqanqa manam Diosman markäkuytsu o yärakuytsu.

Teyta Diospa shonqumpaqnö kanapaqqa pë rasumpa kawanqanta y pëman markäkoqkunata o yärakoqkunata bendicinqantam llapan shonquntsikwan creinantsik (Heb. 11:6). Y Diosman markäkunapaqqa santu espïrituran yanapamänantsik. Tsëmi Diosnintsikta santu espïritunta mañakunantsik (Lüc. 11:9, 10, 13), santu espïritunwan qellqatsinqan Palabran Bibliata leyinantsik, leyinqantsikman alli pensanantsik y Bibliachö ninqannö kawanapaq kallpachakunantsik. Tsënöpam santu espïritu yanapamashqa Dios munanqannö markäkushun o yärakushun.