1-3. (1) Bautizakurirninqa, ¿imakunachö cambiëtaq sasaraq kanman? (2) Munanqantsiknö raslla cambiukunata mana rurarninqa, ¿ima tapukïkunatataq rurakushwan? (Rikäri kë yachatsikïpa qallananchö këkaq dibüjuta).

KËVINQA manaraq Jehoväpa testïgun karmi, atska watakunapa qellërëkur pukllaq, cigärruta shoqoq, alläpa machakoq y drogakoq ^[1] (rikäri kë yachatsikïpa ushananchö këkaq willakïta). Jehoväpita yachakurirninmi, amïgun këta munarqan. Peru manaraq bautizakurmi, kawëninchö tsë viciukunata chipyëpa jaqinan karqan. Jehovä y palabran Biblia yanapaptinmi kawëninchö cambiarirqan (Hebrëus 4:12).

² Bautizakunqampitaqa, mas alli cristiänu kanampaqmi Këvinqa kawëninchö mas cambiukunata rurarnin kallpachakunan karqan (Efesius 4:31, 32). Tantiyarinapaq, imapitapis rasllam piñakoq, y alläpam espantakurqan geniunta  tsarëta mana puëdinqanta cuentata qokurir. Jina ninmi manaraq bautizakur mana alli rurëninkunata jaqïpitaqa, geniunta tsarë mas sasa kanqanta. Tsëmi shonqupita patsë Jehoväta rogakurqan yanapanampaq y Bibliata alleq estudianampaqmi decidirqan. Tsëkunata ruranqanmi yanaparqan jukläya nuna kanampaq.

³ Tsënöllam wakintsikpis, bautizakunapaqqa atska cambiukunataraq rurarquntsik. Tsënömi Biblia ninqanta cumplirquntsik. Tsënö kaptimpis, Diosnö y Jesusnö kanapaqqa, itsa mana alli munënintsikkunata cambianapaqqa kallpachakïtaraq wanarqantsik (Efesius 5:1, 2; 1 Pëdru 2:21). Tantiyarinapaq, itsa höraqa wakinkuna pantayanqanllata rikaräkuntsik y mana allita parlar purintsik, o höraqa alli kaqta rurantsiktsu wakinkuna imata niyänampaq o pensayänampaq kaqta mantsarnin. Itsa unëpana alliyëta munëkarnimpis, tsë mana allitaqa rurakïkantsiklla. Tsëmi itsa kënö tapukuntsik: “¿Imanirtaq fäciltsu cambiukunata ruranä? ¿Imatataq ruranä Biblia ninqannö jukläya nuna kanäpaq?”.

4. ¿Imanirtaq Jehovätaqa llapanchö kushitsita puëdintsiktsu?

⁴ Sirweqninkunaqa Diosta alläpam kuyantsik y shonqupita patsëmi kushitsita munantsik. Peru manam munanqantsiknöqa rurëta puëdintsiktsu, porqui jutsasapa nunam kantsik. Tsëmi apostol Pablu ninqannö sientikuntsik, pëmi nirqan allikunata rurëta munanqanta, peru manam munanqannötsu rurëta puëdirqan (Romänus 7:18; Santiägu 3:2).

5. (1) Bautizakunapaqqa, ¿ima rurëkunatataq jaqinantsik karqan? (2) ¿Imatataq jutsasapa kënintsikqa rurëkätsimantsik?

⁵ Bautizakunapaq y Jehoväpa testïgun kanapaqqa, pë chikinqan rurëkunataran jaqinantsik karqan (1 Corintius 6:9, 10). Peru jutsa ruraqllaraq karninmi, atska watapana bautizakushqa karpis, mana allitaqa rurëkantsikllaraq (Colosensis 3:9, 10). Tsëmi höraqa, mana alli munëkuna shonquntsikchö yurin, o imanö kanqantsikta tsarë fäciltsu. Itsa wakintsikqa atska watapana kallpachakïkantsik mana alli munënintsikkunata tsaränapaq.

6, 7. (1) Jutsasapa karnimpis, ¿imarëkurtaq Jehoväpa amïgun këta puëdintsik? (2) ¿Imanirtaq Jehovä perdonëkamänapaq mañakïta jaqishwantsu?

⁶ Jehoväpa amïgun këtaqa y sirwitaqa puëdintsikmi jutsasapa karnimpis. Tsëmi amïgun kanapaqqa, Jehovä noqantsikchö alli rurëta rikanqanta y reqinantsikta munanqantaqa imëpis qonqanantsiktsu (Juan 6:44). Pëqa alleqmi musyan jutsasapa kanqantsikta y tsërëkur mana allikunata ruranqantsikta. Tsënö karpis, Jehoväqa amïgun kanantsiktam munarqan.

⁷ Alläpa kuyamarnintsikmi, Jehoväqa tsurinta kë Patsaman kachamurqan jutsantsikkunapita pagakunampaq. Tsëqa juk alläpa väleq qarëmi karqan (Juan 3:16). Tsëmi, mana allikunata rurarnimpis perdonamänapaqqa Jehoväta mañakïta puëdintsik. Noqantsikrëkur Jesus wanunqampitam Diosqa perdonamantsik jutsantsikkunapita y amïgun kanatapis jaqimantsik (Romänus 7:24, 25; 1 Juan 2:1, 2). Yarpänantsikmi jutsata ruraq nunapaq Jesus kawëninta qonqanta. Tsëmi jutsata ruranqantsik alläpa  mana alli kanqanta pensarninqa, Jehoväta mañakunantsik perdonëkamänapaq. Porqui perdonta mana mañakushqaqa, imëka juk nuna qanra makinta paqakïta mana munanqannömi kanman. Tsëqa, ¿manaku alläpa agradecikuntsik jutsasapa këkashqapis amïgun kanapaq Jehovä jaqimanqantsikta? (Leyi 1 Timoteu 1:15).

8. ¿Imanirtaq mana alli rurënintsikkunata altsanapaq kallpachakunantsik?

⁸ Peru jutsasapa kënintsik mana precisaqpaq kanqantaqa manam pensanantsiktsu. Jehoväqa willakushqam imanö nunakuna amïgun kayänampaq kaqta (Salmu 15:1-5). Tsëmi, Diospa amïgun këta munarqa, rurëninkunata y tsurin ruranqankunata qatinapaq kallpachakunantsik. Jina mana alli munënintsikkunata tsaränapaq y ushakätsinapaqmi kallpachakunantsik. Atska watapana bautizakushqa karnimpis, Diospa kaqchö imanö kënintsiktaqa masmi alliyëkätsinantsik (2 Corintius 13:11).

9. ¿Imanirtaq musyantsik jukläya nunana kanapaqqa cada junaq kallpachakïta puëdinqantsikta?

⁹ Apostol Pablum kënö consejakurqan: “Une tiempu cawacuyanqequino cawaquita jaqiriyëna. Tsepinmi cawacuyarqequi shonqiquicuna munashqanllata llutancunata ruracurnin”. Jina nirqanmi, “cananqa shonqiquicunacho allicunata yarparna, Teyta Diosta cäsucurnin, allicunallatana rurar cawacuyë juclaya nunana cayänequipaq. Tsepaqmi Teyta Diosqa camamashqa cantsic rasonpa caqta cäsucur jutsannaq pe munashqanno cawacunantsicpaq” (Efesius 4:22-24). Këqa rikätsikun, “juclaya nunana” kanapaqqa cada junaq kallpachakur sïguinapaq kaqtam. Tsëmi atska watapana Jehoväta sirwikarnimpis, pë imanö kanqantaqa imëpis yachakïkänantsiklla. Tsëpaqqa imanö kënintsikta mas alliyätsinapaq y Jehovänö kanapaqqa Bibliam yanapamäshun.

10. (1) ¿Imanötaq Biblia yanapamäshun cambiukunata rurar sïguinapaq? (2) ¿Imatataq tapukunantsik?

¹⁰ Llapantsikmi Biblia ninqanta cäsukïtaqa munantsik. Peru cambiukunata rurëta munarninqa kallpachakurmi sïguinantsik. Tsëqa, ¿imanirtaq alläpa kallpachakïtaraq wanantsik? ¿Manaku Jehoväqa yanapamënintsikta puëdin alli kaqta rurë alläpa sasa mana kanampaq?

11-13. ¿Imanirtaq Jehoväqa mana alli rurënintsikta tsaränapaq kallpachakunata shuyaran?

¹¹ Jehovä llapan kamanqankunaman pensarninqa, pë imëkata ruranampaqpis kallpan kanqantam següru kantsik. Intillaman pensarishun, Intiqa cada segundum alläpa fuerti achachëta jitamun. Peru tsë achachëqa ichikllam Patsaman chämun y tsëllawanmi Patsachö  imëkapis kawayan (Salmu 74:16; Isaïas 40:26). Jina sirweqninkuna wanayanqan höram Jehoväqa kallpata qon (Isaïas 40:29). Tsëchi wakinkunaqa itsa niyan, “mana alli munënintsikta fäcil-lla jaqinapaq Jehovä imanir mana yanapamanqantsikta”.

¹² Cäsunapaq o mana cäsunapaq kaqtapis, kikintsik akrakunapaqmi Jehoväqa jaqimarquntsik. Cäsunapaq akrarninqa y munëninta ruranapaq kallpachakushqaqa, kuyanqantsikta y kushitsinqankunata rurëta munanqantsiktam rikätsikuntsik. Jehovä mandamänantsikpaq derëchuyoq mana kanqantam Satanasqa nirqan. Peru Diosta cäsukurninqa, pëlla mandamaqnintsik kanqantam rikätsikuntsik. Y tsë ruranqantsiktaqa alläpa precisaqpaqmi kuyakoq Teytantsikqa churan (Job 2:3-5; Proverbius 27:11). Mana alli rurënintsikkunata tsaränapaq Jehovä mana yanapamashqam, llapan shonquntsikwan sirwinqantsikta y pëlla mandamaqnintsik kananta munanqantsikta rikätsikuntsik.

¹³ Jehoväqa imanö këninta qatinapaq kallpachakunatam nimantsik (Colosensis 3:12; leyi 2 Pëdru 1:5-7). Pëqa mana alli pensënintsikta y munënintsikta tsararnin kallpachakunatam munan (Romänus 8:5; 12:9). Tsëkunata rurarninqa, kawënintsikta cambiashunmi y mas kushishqam sientikushun.

14, 15. ¿Imatataq rurashwan Diospa kaqchö imanö kënintsikta mas alliyätsinapaq? (Rikäri “ Bibliawan mañakïqa imanö këninkunata cambiashqa” neq recuadruta).

¹⁴ Jehoväta kushitsinqankunata ruranapaqqa, ¿ima alli rurëkunatataq ruranantsik?  Manam kikintsikllaqa imanö kawënintsikta cambianapaq kaqta decidinantsiktsu, sinöqa Jehovä yanapamänatam jaqinantsik. Romänus 12:2 textum kënö nin: “Amana que tiempu mana alli ruraq nunacunanoqa qamcunaqa llutanta rurar cacuyëtsu; antis jucnopa yarpacachëta yachacuyë. Tsenopam llapancho Dios munashqanno cushiquipaq alli cawaquita musyariyanqui”. Jehoväta kushitsinqan rurëta munarninqa, llapan junaqkunam Bibliata leyinantsik, leyinqantsikman yarpachakunantsik y santu espïrituta mañakunantsik (Lücas 11:13; Gälatas 5:22, 23). Tsëqa, Jehovämi yanapamäshun ima rurëkuna kushitsinqanta entiendinapaq y pënö pensëta yachakunapaq. Tsënö rurashqaqa, pensanqantsik, parlanqantsik y ruranqantsikmi Jehoväta kushitsinqa. Peru mana alli munënintsikta tsaränapaqqa kallpachakïkänantsikllam (Proverbius 4:23).

¹⁵ Cada junaq Bibliata leyirnimpis, Täpakoq y ¡Despertad! nishqan publicacionnintsikkunapa yanapakïninwanmi alleq estudianantsik. Kë revistakunapa atska yachatsikïninkunam yanapamantsik Jehoväpa imanö këninta qatinapaq y mana alli munënintsikkunata tsaränapaq. Jina höraqa, wakin yachatsikïninkuna o Bibliachö mëqan textuta leyinqantsikmi wananqantsikchö yanapamantsik. Y tsëtaqa churanantsikmi juk kutikunachöpis leyikunapaq.

16. ¿Imanirtaq qelanäkurishwantsu munanqantsiknö raslla cambiukunata mana rurarninqa?

 ¹⁶ Jehoväpa imanö këninta yachakunapaqqa, tiemputaran wanantsik. Tsëmi, munanqantsiknö kawënintsik y imanö kënintsik mana cambiaptinqa, pacienciakoq kanantsik. Höraqa, itsa Biblia ninqanta ruranapaq sasa kanqa. Peru Jehovä munanqannö pensar y rurar kallpachakushqaqa mas fäcilmi kanqa pënö kanantsik y allikunata ruranantsik (Salmu 37:31; Proverbius 23:12; Gälatas 5:16, 17).

17. Jehoväta mana jaqipa sirwishqaqa, ¿imanötaq shamoq tiempuchö kawënintsik kanqa?

¹⁷ Alläpam munëkuntsik, jutsannaqna Jehoväta imëpis sirwinapaq junaq chämunanta. Tsë witsankunaqa manam mana alli rurëkunata rurashunnatsu, y Jehovänö këpis mas fäcilmi kanqa. Peru kanan witsampis, Jesus jutsantsikpita wanunqanrëkurmi Jehoväta adorëta puëdintsik. Tsëmi, Jehoväta kushitsinapaqqa, Biblia yachatsikunqannö mas alliyänapaq y cäsukunapaq kallpachakunantsik.

18, 19. ¿Imataq rikätsikun Bibliaqa imanö kënintsikta cambiëta puëdinqanta?

¹⁸ Qallananchö Këvin wawqipaq parlanqantsikqa, mana alli geniunta tsaränampaqmi kallpachakïkarqan. Tsëpaqqa, Biblia ninqanmanmi yarpachakurqan y jukläya nuna kanampaqmi kallpachakurqan. Jinamampis, cristiänu mayinkuna consejayanqantam wiyakurqan. Mas alli cristiänu kanampaq atska wataraq pasashqa kaptimpis, tiempuwanqa siervu ministerialnömi yanapakurqan. Y kanan witsanqa 20 watapanam anciänunö yanapakïkan. Tsënö kaptimpis, imanö këninchö alliyänampaq kaqtaran sientin.

¹⁹ Noqantsikpis, Këvin ruranqannömi imanö kënintsikta mas alliyätsita puëdintsik. Y tsënö rurashqaqa Jehoväpa mas alli amïgunmi kashun (Salmu 25:14). Llapan puëdinqantsikmannö Jehoväta kushitsinapaq cambiukunata rurashqaqa, pëqa yanapamäshunmi. Segürum kanantsik imanö kënintsikta Biblia cambianampaq yanapamënintsikta puëdinqanta (Salmu 34:8).