Kapamanqantsikllawan kawarqa mas kushishqam kantsik
DANIELWAN MIRIAMQA 2000 wata septiembri killam, Espäña nacionpa Barcelöna markanchö casakuyarqan y qellëyoqmi kayarqan. Danielmi kënö willakun: “Atska qellëta ganarmi chaniyoq restaurantikunachö mikuyaq kayä, juk nacionkunata ëwayaq kayä y chaniyoq röpäkunam kayäpamaq. Jina seguïdum yachatsikuyaqpis kayä”. Peru kawëninkunaqa cambiarirqanmi.
“Kawëman chätsikoq nänipa ëwayänampaqqa, ¿shonqupita patsëku yanapëkantsik ‘wanïman ishkinëpa ishkinar ëwëkaqkunata’?” nirmi, 2006 wata juk asamblëachö tapukï karqan. Tsë tapukïmi Danielpa shonqunyaq chärirqan (Proverbius 24:11). Tsëchömi Bibliapa willakïninkunata yachatsikunantsik precisanqanta willakuyarqan, tsënöpa llapan nunakuna salvakuyänampaq (Hëchus 20:26, 27). Danielqa tsë höra imanö sientikunqantam kënö yarpan: “Jehovä noqata parlapëkämaq cuentam karqan”. Jehoväta mas sirwinapaq kallpachakushqaqa, mas kushishqa kanapaq kaqtam yachatsikuyarqan. Danielqa tsëta alleqmi musyarqan, porqui Miriamqa precursöranam kaq y alläpa kushishqam sientikoq.
Tsëchö yachatsikuyanqanqa Danielta alläpam yanaparqan, y kawënintam cambiarirqan. Mas wallka tiempullanam trabajarqan, precursormi tikrarirqan. Jina yachatsikoqkunata mas wanayanqan sitiukunaman Mirianwan ëwarninqa mas kushishqa kayänampaq kaqtam pensarqan.
TUKÏPA PASARPIS BENDICIONKUNATAM CHASKIYAN
2007 wata mäyu killam, Danielwan Miriamqa trabäjunkunata jaqirïkur Panamä nacionta täraq ëwakuyarqan, tsë naciontaqa reqiyarqannam. Pëkunaqa Bocas del Töru nishqan islakunachömi yachatsikuyarqan, tsëqa Carïbi nishqan lamarchömi këkan. Tsëchö täraqkunaqa cäsi llapanmi guaymies kasta nunakuna kayan. Danielwan Miriamqa, juntayanqan qellëninkunawanmi puwaq killapa tsëchö këta pensayarqan.
Barcuwan y biciclëtawanmi islakunaman ëwayaq. Alläpa achachanqan junaq jirkakunapa, 30 kilömetrutanö biciclëtawan ëwayanqantaqa yarparëkäyanllam. Alläpa karuta ëwashqa karmi, Danielqa cäsi desmayarirqan. Peru guaymies kasta nunakunaqa pëkunatam shumaq chaskiyarqan, y masran Danielwan Miriam juk ishkë palabrakunata idiömankunachö yachakuriyaptinnäqa. Wallka tiempullaraq tsëchö këkarpis, 23 nunakunatanam Bibliapita yachëkätsiyarqan.
¿Imataq pasarqan qellëninkuna ushariptin? Danielmi kënö willakun: “Espäña nacionta kutiyänäpaq kaqta pensarmi waqanäriyarqä. Jina yachatsiyanqä nunakunata jaqiyänäpaq kaqta pensarpis, alläpam llakikuyarqä”. Juk killa pasariptinmi alläpa kushikïpaq willakïta chaskiriyarqan. Miriammi kënö willakun: “Precursor especialnö yanapakuyänäpaqmi niyämarqan. Manana ëwakuyänäpaq kaqta musyarirqa alläpam kushikuyarqä”.
¿IMAPITATAQ MAS KUSHIKUYAN?
Diospa markanchö cambiukuna kanqanrëkurmi, Danielwan Miriamqa 2015 wata precursor especialnönatsu yanapakuyarqan. ¿Imatataq rurayarqan? Salmus 37:5 textu änikunqanmanmi markäkuyarqan, kënömi nin: “Llapan kawënikita Jehoväpa makinchö jaqiri y pëman markäkï, y yanapashunkim”. Precursor regularnö yanapakuyänampaqmi juk trabäjuta tariyarqan, y kananqa Panamäpa Veraguas markanchö këkaq congregacionchömi yanapakïkäyan.
Danielmi kënö nin: “Espäñapita manaraq ëwakurqä kayäpamanqanllawan alli kawëtaqa manam pensayarqätsu. Peru kananqa rasumpa wanayanqäkunallawanmi alli kawakuyä”. ¿Imapitataq mas kushikuyan? Kënömi niyan: “Jehoväta reqiyänampaq alli shonquyoq nunakunata yanapëqa, alläpa kushikïpaqmi”.