1, 2. (1) ¿Pikunachötaq cumplikarqan Mateu 24:12 textu ninqan? (2) ¿Imanötaq mëtsikaq cristiänukuna kuyakïninkunata rikätsikuyarqan? (Rikäri kë yachatsikïpa qallananchö këkaq dibüjuta).

JESUS kë Patsachö këkarmi, ‘imëkapis imanö këkanqampa ushënin’ witsan ima pasakunampaq kaqta willakurqan. Nirqanmi ‘cäsi llapan nunakunapa kuyakoq këninkuna ushakärinampaq’ kaqta (Mateu 24:3, 12) (rikäri “Maslla entiendinapaq” neq recuadruta). Tsënö ninqanqa, puntataqa cumplikar qallarqan apostolkuna kawayanqan witsan judïukunachömi. Pëkunaqa, Diospa markan kayanqantam niyaq, peru Diostaqa mananam kuyayarqannatsu.

² Peru tsë witsan mëtsikaq cristiänukunaqa manam tsënötsu kayarqan. Pëkunaqa “Cristu Jesuspita alli willakïkunata” gänas gänasllam yachatsikuyaq. Jina Diosta, cristiänu mayinkunata y wakin nunakunata kuyayanqantam rikätsikuyaq. Tsënömi kë cristiänukunaqa Diosta kuyayanqan ushakänanta jaqiyarqantsu (Hëchus 2:44-47; 5:42). Peru llakinëpaqqa, wakin kaq cristiänukuna Diosta kuyayanqan ushakänanta jaqiyanqanmi. ¿Imanirtaq tsëta nintsik? Rikärishun.

3. ¿Imanirtaq wakin cristiänukunapa kuyakïninkunaqa ushakëkarqan?

 ³ Ëfesu markachö täraq cristiänukunatam Jesusqa nirqan, qallananchönö kuyakïninkuna manana kanqanta (Revelacion 2:4). Kikinkunallapaq imatapis asheq nunakunawan tsë markachö juntu tärarnin, tsë cristiänukunaqa itsa tsënö tikrakuriyarqan (Efesius 2:2, 3). Porqui Ëfesu markachö täraq nunakunaqa alläpa kapoqyoqmi kayaq. Tsëmi, imëkayoq karnin alli kawakïllata mas precisaqpaq churayaq. Jinamampis, mëtsikaq nunakunam imëka rakchakunata rurayaq y Diospa leyninkunataqa manam respetayaqtsu. Diosta y nuna mayinkunata kuyayänampa rantinmi, gozakïllata masqa ashiyaq.

4. (1) ¿Imanirtaq kanan witsan nunakunapa kuyakïninkunaqa ushakärishqa? (2) ¿Imapitataq kë yachatsikïchö yachakushun?

⁴ Nunakunapa kuyakïninwan ima pasanampaq kaqta Jesus willakunqanqa, kanan witsampis cumplikëkanmi. Nunakunaqa mananam Diosta kuyayannatsu. Y imëka problëmakunata altsayänampaq Diosta ashiyänampa rantinmi, mëtsikaq nunakunaqa nuna mayinkunapa yanapakïninta ashiyan. Tsëmi kuyakïninkunaqa ushakëkan. Unë Ëfesu markachö täraq cristiänukunata pasanqannöllam, kanan witsan Jehoväta sirweqkunatapis pasaramashwan. Tsëmi Jehoväta, Palabranta y cristiänu mayintsikkunata kuyanqantsik mana ushakänampaq imata ruranapaq kaqta yachakurishun.

5. ¿Imanirtaq Diosta kuyashwan?

⁵ ¿Pitataq imëkapitapis masqa kuyanantsik? Jesusmi kënö nirqan: “‘Jehovä Diosnikitam llapan shonqïkiwan, llapan kawënikiwan y llapan yarpënikiwan kuyanëki’. Tsëmi mas precisaq y punta kaq mandakï” (Mateu 22:37, 38). Jehoväta kuyanqantsikqa, mandamanqantsikta cäsukunapaq, problëmakuna chämuptin alli tsarakunapaq y mana alli rurëkunata chikinapaqmi yanapamantsik (leyi Salmus 97:10 *). Peru Satanasqa y makinchö këkaq mana alli nunakunaqa, Diosta kuyanqantsiktam ushakätsita tïrayan.

6. ¿Imataq pasakun Diosta kuyëta jaqireq nunakunawan?

⁶ Mana alli nunakunaqa, kuyakïtaqa juknöpam rikäyan. Mëtsikaqmi Diosta kuyayänampa rantin, “kikinkunallata kuyakoq” kayan (2 Timoteu 3:2). Tsëmi, jutsasapa ëtsapa munëninta, nawi rikanqan munëta, y kayäpunqankunapita gälakïllata ashiyan (1 Juan 2:16). Kikintsikpa munënintsikllata ashi imaman chätsikunqantam Pabluqa willakurqan. Kënömi nirqan: “Jutsasapa ëtsapa munëninman yarparäkïqa wanïmanmi chätsikun”. ¿Imanirtaq wanïman chätsikun? Porqui munëninkunata rurakoqkunaqa Diospa chikeqninmanmi tikrariyan (Romänus 8:6, 7). Qellëllata asheq o rakcha munëninkunata rurakoq nunakunaqa alläpa mana allichömi ushayan (1 Corintius 6:18; 1 Timoteu 6:9, 10).

7. ¿Imanö pensëkunataq kanan witsan cristiänukunata mana alliman chäratsinman?

⁷ Diosman mëtsikaq mana creeqkuna y imëkapis kikinlla rurakashqa kanqanman creeqkunaqa, Diosta kuyëta jaqiriyänampaqmi wakinkunata creitsita tïrayan. Upakunalla o mana estudiashqa kaqkunalla juk Kamakoq kanqanman creiyanqantam niyan. Jinamampis mëtsikaq nunakunam, llapanta kamaq Jehoväta respetayänampa  rantin, cientïficukunata masqa respetayan (Romänus 1:25). Noqantsikpis tsënö pensar qallëkushqaqa, Jehoväwan amïgu kënintsik y pëta kuyanqantsikmi ushakar qallëkunman (Hebrëus 3:12).

8. (1) ¿Imanirtaq Jehoväpa sirweqninkunaqa qelanäkuriyanman? (2) ¿Imanötaq Salmus librupa 136 kaq capïtulun shoqamantsik?

⁸ Imëkapis Satanaspa makinchö kaptinmi, höraqa qelanärishwan (1 Juan 5:19). Peru qelanë vencimänata jaqishqaqa, markäkïnintsik y Diosta kuyanqantsikmi ushakärinman. Itsa problëmapa pasëkantsik qellëta pishipakurnin, qeshyarnin o edäna karnin. O itsa llakikuntsik imatapis rurar alli mana yarqupakurnin o pensanqantsiknö mana kaptin. Ima problëmakunapa pasarpis, Jehovä qonqaramanqantsiktaqa ama imëpis pensashuntsu. Salmus 136:23 textu ninqantam yarpänantsik, kënömi nin: “Alläpa llakishqa këkashqam pëqa [Jehoväqa] yarpäramarqantsik, porqui kuyakoq këninqa manam ni imëpis ushakantsu”. Yanapamänapaq rogakushqa Jehovä wiyamänantsikpaq kaqtaqa segürum kanantsik (Salmus 116:1; 136:24-26).

9. ¿Imataq Pabluta yanaparqan Diosta kuyanqan mana ushakänampaq?

⁹ Jehovä imanö yanapanqanman pensanqanmi, apostol Pablutaqa kallpata qorqan. Tsëmi kënö qellqarqan: “Jehovämi yanapamaqnï; manam mantsakäshaqtsu. ¿Imataraq nuna ruramanman?” (Hebrëus 13:6). Y Jehoväman confiakunqanmi problëmakunapa pasarnimpis alli tsarakunampaq yanaparqan, y Jehoväman confiakïtaqa manam ni imëpis jaqirqantsu. Hasta carcelchö prësurëkarpis cristiänu mayinkunatam cartakunawan animarqan (Efesius 4:1; Filipensis 1:7; Filemon 1). Awmi, problëmakunapa pasëkarpis llapan shonqunwanmi Jehovätaqa kuyëkarqanlla. Y llapan pruëbakunachö shoqakoq Diosmanmi confiakurqan (2 Corintius 1:3, 4). Y noqantsikqa, ¿imanötaq Pablunö kashwan?

10. ¿Imataraq rurashwan Jehoväta kuyarnin sïguinapaq?

¹⁰ Diosta kuyanqantsik mana ushakänampaq consejakurmi Pabluqa kënö nirqan: “Diosman imëpis mañakuyë”. Jina nirqanmi: “Mana jaqita Diosman mañakuyë” (1 Tesalonicensis 5:17; Romänus  12:12). ¿Imanirtaq mañakunqantsikqa Dioswan amïgu kënintsikchö yanapamantsik? Porqui mañakurninqa, Jehoväwanmi parlëkantsik (Salmus 86:3). Y imanö sientikunqantsikta y pensanqantsikta willarninqa, pëmanmi mas witikantsik (Salmus 65:2). Jina mañakïnintsikta contestamoqta rikarqa masmi kuyantsik. Y ‘llapan qayakoqninkunapa lädunchö Jehovä këkanqantam’ cuentata qokurintsik (Salmus 145:18). Jehovä kuyamanqantsikman y yanapamänapaq kaqman confiakunqantsikmi, kanan y shamoq tiempuchöpis alleq tsarakunapaq yanapamäshun.

11, 12. ¿Imataraq rurashwan Bibliachö këkaq rasumpa kaq yachatsikïkunata mas kuyanapaq?

¹¹ Jehoväta sirweqkunaqa Palabranchö këkaq rasumpa kaq yachatsikïtam kuyantsik. Tsëmi Jesusqa Teytanta kënö nirqan: “Palabrëkim rasumpa kaqqa” (Juan 17:17). Y Diospa Palabranchö këkaq rasumpa kaqta kuyanapaqqa, imata yachatsikunqantam musyanantsik (Colosensis 1:10). Peru manam tsëllatatsu ruranantsik. Salmus librupa 119 kaq capïtulunta qellqaqmi imata ruranapaq kaqta entienditsimantsik (leyi Salmus 119:97-100 *). Awmi, cada junaqmi Bibliata leyinqantsikkunaman pensanantsik. Y tsënö ruranqantsik imanö yanapamänapaq kaqta pensarqa, Diospa Palabrantam mas kuyashun.

¹² Salmus librupa 119 kaq capïtulunta qellqaqqa, jina kënöpis nirqanmi: “¡Qam ninqëkikunaqa shimïchö alläpam mishkïkun, mielpitapis masmi mishkin!” (Salmus 119:103). Diospa markan ruramunqan publicacionkunaqa mishki mikï cuentam kayan. Imatapis gustamanqantsikta mikurqa, manam ushëpa ushartsu mikukurkuntsik. Jina tsënöllam, Diospa Palabrantapis ushëpa ushartsu leyinantsik. Sinöqa leyinqantsikmanmi pensanantsik. Tsënöpam, rasumpa kaq ‘kuyëllapaq palabrakunata’ leyinqantsikta yarpäshun y wakinkunata yanapanapaqmi utilizäshun (Eclesiastes 12:10).

13. ¿Imanirtaq Jeremïasqa Diospa yachatsikïninta kuyarqan, y tsëqa imanötaq yanaparqan?

¹³ Profëta Jeremïasqa Diospa yachatsikïnintam kuyarqan. Tsëmi kënö nirqan: “Parlanqëkikunam noqaman chäramurqan, y noqaqa alläpa precisaqpaqmi churarqä; y parlanqëkiqa alläpam kushitsimarqan, shonqütam kushiratsirqan; porqui qampa jutikichömi parlä, tröpakunapa mandaqnin Jehovä Diosllä” (Jeremïas 15:16). Jeremïasqa Diospa Palabrantam kuyaq y tsëmanmi yarparaq. Tsëmi Jehoväpa jutinchö parlakunampaq akrashqa kanqantaqa alläpa valorarqan. Tsënöllam noqantsikpis, Bibliachö këkaq rasumpa kaq yachatsikïta kuyarninqa, Jehoväpa testïgun kanqantsikta y kë ushanan junaqkunachö Gobiernumpita willakunqantsikta alläpa valorashun.

14. Diospa Palabranta mas kuyanapaqqa, ¿ima mastataq ruranantsik?

¹⁴ ¿Ima mastaraq rurashwan Diospa Palabranta mas kuyanapaq? Llapan reunionkunamanmi ëwanantsik, porqui tsëchömi Jehovä yachatsimantsik. Y yachatsimänapaq Jehovä utilizanqan mas precisaq kaqqa, Bibliapita cada semäna Täpakoq revistawan yachakunqantsikmi. Kë reunionchö alleq yachakïta munarqa, puntataqa alleqmi  preparakunantsik. Tantiyarinapaq, revistachö yureq llapan textukunatam leyinantsik. Kanan witsanqa, mëtsikaq cristiänukunam Täpakoq revistataqa, tabletchö o celularchö karpis leyita y Internetpita fäcil-lla jorqëta puëdiyan. Kë revistaqa mëtsika idiömachömi këkan jw.org nishqan päginachö y JW Library nishqan aplicacionchö. Tabletchö o celularchöqa mas fäcilmi textukunata tarintsik. Peru Täpakoq revistata yachakunapaq imata utilizarpis, textukunataqa alleq leyishun y ninqanman alleq pensashun. Tsënö rurarqa Bibliachö këkaq rasumpa kaq yachatsikïtam mas kuyashun (leyi Salmus 1:2 *).

15, 16. (1) Juan 13:34, 35 textuchöqa, ¿imatataq Jesus mandamantsik? (2) Diosta y Palabranta kuyarninqa, ¿imanirtaq cristiänu mayintsikkunatapis kuyashun?

¹⁵ Wanutsiyänampaqna këkanqan paqasmi, Jesusqa discïpulunkunata kënö nirqan: “Juk mushoq mandakïtam qamkunata qoyaq: jukniki juknikikuna kuyanakuyänëkipaq; imanömi qamkunatapis kuyayarqoq, tsënölla qamkunapis jukniki juknikikuna kuyanakuyë. Këta rurayaptikim llapankuna musyayanqa qateqnïkuna kayanqëkita, jukniki juknikikuna kuyanakuyaptiki” (Juan 13:34, 35).

¹⁶ Cristiänu mayintsikkunataqa kuyantsik, Jehoväta kuyarninmi. Diosta mana kuyarqa, cristiänu mayintsikkunatapis manam kuyëta puëdintsiktsu. Y pëkunata mana kuyarninqa, Diostapis manam kuyantsiktsu. Tsëmi apostol Juan kënö nirqan: “Pipis creikoq mayinta rikashqa këkar mana kuyaq kaqqa, manam mana rikanqan Diosta kuyëta puëdintsu” (1 Juan 4:20). Jina Diosta y cristiänu mayintsikkunataqa kuyantsik Diospa Palabrantapis kuyarninmi. Porqui Diospa Palabranchö yachakunqantsikta kuyarninqa, Diosta y cristiänu mayintsikkunata kuyanapaq mandamanqantsiktam cäsukushun (1 Pëdru 1:22; 1 Juan 4:21).

17. ¿Imanötaq cristiänu mayintsikkunata kuyanqantsikta rikätsikuntsik?

 ¹⁷ (Leyi 1 Tesalonicensis 4:9, 10). ¿Imanötaq congregacionchö cristiänu mayintsikkunata kuyanqantsikta rikätsikushwan? Itsa pipis edäna karnin reunionkunaman ëwanampaq yanapayänanta wanan. O juk viuda pani wanan wayinta altsapuyänanta, tsëkunata rurarmi kuyakoq kanqantsikta rikätsikushun (Santiägu 1:27). Qelanashqa, llakishqa o ima problëmapapis pasëkaq cristiänu mayintsikkunaqa, yanapanata, animanata y shoqanatam wanayan (Proverbius 12:25; Colosensis 4:11). Awmi, ‘creikïchö noqantsikwan juknölla këkaqkunata’ kuyanqantsiktaqa rikätsikuntsik parlakïnintsikwan y rurënintsikkunawanmi (Gälatas 6:10).

18. Cristiänu mayintsikkunawan juk problëmantsik kaptinqa, ¿imaraq yanapamäshun raslla altsarinapaq?

¹⁸ “Ushanan junaqkunachöqa”, nunakuna kikinkunapa munëninllata asheq y imëkayoq këpaq ërayäkoq kayänampaq kaqtam Bibliaqa willakurqan (2 Timoteu 3:1, 2). Tsëmi Jehoväta y Palabranta mas kuyanapaq y juknintsik juknintsik kuyanakunapaq kallpachakunantsik. Jutsasapa karninmi höraqa cristiänu mayintsikkunawan imallachöpis piñatsinakurishwan. Peru ima problëma kaptimpis, kuyanakunqantsikmi yanapamäshun raslla altsarinapaq (Efesius 4:32; Colosensis 3:14). Kuyakïnintsik ushakänantaqa ama jaqishuntsu. Tsëpa rantinqa, Jehoväta, Palabranta y cristiänu mayintsikkunata shonqupita patsë kuyarnin sïguishun.