KAWËNIN
Sordu këkarpis yachatsikïtaqa puëdirqömi
12 watayoq këkarmi, 1941 watachö bautizakurqä. Peru Bibliapa willakïninkunataqa 1946 watachöraqmi entiendirqä, ¿imanirtaq tsënö nï? Willariyashqëki.
TEYTÄKUNAQA 1910 watachömi Georgia Nacionpa Tiflis markampita ëwakuyarqan; y Canadä nacionpa Pelly markapa amänunchö këkaq, animalkunata wätayänan chakra wayichömi täräyarqan. 1928 watachömi yurikurqä, joqtam kayä y noqam menor kaq kä. Yurinäpaq joqta killa pishikaptinmi, teytäqa wanukurqan y mamänïnam, wamrallaraq këkaptï. Tsëpita ichik tiempullatanam 17 watayoq këkar panï Lucy wanurirqan. Tsëmi, tiyükuna Nick llapäkunata wätayämarqan.
Ishkë watayoqllaraq këkaptïmi, juk junaq, juk bestiäkunapa chupanta sutëkaqta familiäkuna rikäyämarqan. Tsëmi, jëtëkamänanta mantsar witikunäpaq sinchipa niyämarqan. Juk läduta rikarëkarmi pëkunata wiyarqätsu. Tsëchömi cuentata qokuriyarqan sordu kanqäta.
Familiäkunawan juk reqinakoqmi nirqan, sordu wamrakunapaq escuëlaman ëwanä mas alli kanqanta. Tsëmi, Saskatoon markachö këkaq sordukunapaq escuëlaman tiyü Nickqa kachamarqan. Pitsqa watayoq karmi alläpa mantsakashqa këkarqä, porqui tsë escuëlaqa täräyanqä markapita karuchöraqmi karqan. Usya witsan y fiesta witsankunallam familiätaqa watukëta puëdeq kä. Tiempuwannam, sëñas idiömata yachakurirqä y wamra mayïkunawanmi kushishqa pukllaq kä.
BIBLIAPITA YACHAKÜ
Mayor kaq panï Marionmi, Bill Danylchuck nunawan 1939 watachö casakurirqan; y pëkunam panï Francestawan noqata wätayämarqan. Familiäkunapitaqa, pëkunam Jehoväpa testïgunkunawan Bibliapita yachakur qallayarqan. Vacacionkunachömi, Bibliapita yachatsiyämänampaq kallpachakuyaq. Peru sëñas idiömata mana yachayaptinmi, pëkunawan parlakuriqa fäciltsu karqan. Tsënö karpis, Jehoväpita yachakunqä alläpa gustamanqantam cuentata qokuriyarqan. Pëkunaqa Biblia yachatsikunqannöllam kawayaq, tsëmi pëkunawan yachatsikoq yarqunäpaq decidirirqä. Ichik tiempullatam bautizakïtana munarirqä, tsëmi 1941 wata 5 de septiembri killa cuñädü Bill yaku junta cilindruchö bautizaramarqan. ¡Yakuqa alläpam alalëkorqan!
1946 watam Ohiopa Cleveland markanchö juk grüpu sordukunawan asamblëachö këkäyä
1946 wata usya witsanmi, wayïman kutirirqä y Estädus Unïdus nacionpa Cleveland markanchö juk asamblëamanmi ëwayarqä. Asamblëapa qallanan junaqqa panïkunam yachatsikayämunqanta entiendinäpaq qellqayämurqan. Peru waräninnam, juk grüpu sordukunapaq sëñas idiömachö yachatsikïkäyanqanta musyarirqa, alläpam kushikurqä. Porqui Bibliapita yachatsikïkäyämunqantam entiendita puëdirqä. ¡Alläpam gustamarqan!
BIBLIAPITAM WAKINKUNATA YACHATSÏ
Ishkë kaq Jatun Guërram usharirqan y nunakunaqa nacionninkunallapaq kayanqantam rikätsikïta munayarqan. Peru noqataqa asamblëachö yachakunqämi yanapamarqan, escuëläman kutirnin Jehovällata sirwinqäta rikätsikunapaq. Tsëmi bandërata saludarqänatsu, himnu nacionalta cantarqänatsu nï fiestakunamampis ëwarqänatsu. Jina manam iglesiamampis ëwarqänatsu. Tsëta ruranqäqa manam escuëlachö trabajaq nunata gustarqantsu, tsëmi tukïnöpa ulipämarqan tsëkunata ruranäpaq. Estudiaq mayïkunaqa tsëtam rikäyarqan, y tsëmi pëkunatapis Bibliapita yachatsirqä. Wakinqa Jehoväpa testïgunmi tikrayarqan. Larry Androsoff, Norman Dittrick y Emil Schneiderqa kananyaqmi Jehoväta sirwikäyan.
Juk markakunata ëwarpis, noqanö sordukunatam Diospita yachatsita procurarqä. Montreal markachö këkarmi, sordukuna juntakäyanqan sitiuman ëwarqä. Tsëchömi, Eddie Tager jutiyoq mana allita ruraq jövinta Bibliapita yacharatsirqä. Quebecpa Laval markanchömi, sëñas idiöma congregacionchö yanapakurqan pasaq wata wanunqanyaq. Jina Juan Ardanez jövintapis reqirirqämi, pëqa punta cristiänukunapa tiempunchö Berëa nunakuna rurayanqannöllam, Bibliapita rasumpa kaqta yachakïkanqanta cuentata qokunampaq, alleq estudiarqan (Hëchus 17:10, 11). Juanqa Testïgum tikrarirqan y Ottawa markachömi, wanukunqanyaq anciänunö yanapakurqan.
1950 wata witsan cällikunachö yachatsikïkar
Vancouver nishqan markamanmi, 1950 watachö täraq ëwakurqä. Sordukunata Bibliapita yachatsita gustamaptimpis, manam imëpis qonqashaqtsu cällichö yachatsikïkaptï pasamanqanta. Chris Spicer jutiyoq warmitam yacharatsirqä y llapan killakuna revistata apapuyänantam munarqan, jinamampis qowan Garytam reqitsimëta munarqan. Wayinmanmi ëwarqä y sordu kaptïmi papelchö qellqar shumaq parlakuriyarqä. Unëpam tinkuyarqätsu, peru Toronto markachö juk asamblëachömi
saludayämaqnï witirayämurqan. ¡Alläpam kushikurqä! Porqui qowan Garym tsë junaq bautizakurqan. Tsë warmita parlapanqäqa, yachatsikur sïguinantsikqa alläpa precisaq kanqantam yarpätsimarqan. Porqui pillapis Testïgu kanampaq kaqtaqa manam musyantsiktsu.Tsëpitanam, Saskatoon markaman kutirqä. Tsëchömi juk warmita reqirirqä, pëqa ishkan sorda millish wamrankunata Bibliapita yachatsinäpaqmi nimarqan. Jutinkunaqa Jean y Joan Rothenbergermi karqan. Ishkanmi noqa ëwanqä escuëlallachö estudiayaq. Pëkunaqa estudiaq mayinkunatam Bibliapita yachakuyanqanta yachatsiyaq, y pitsqaqmi Testïgu tikrariyarqan. Jukqa Eunïci Colin shipashmi karqan, pëwanqa estudiar ushëkarnam reqinakuyarqä. Juk kutin caramëluta qaramarqan y amïgun kanäpaqmi nimarqan. Eunïciqa kawënïchö alläpam precisarqan, porqui pëwanmi casakurqä.
1960 wata, y 1989 watachö Eunïciwan këkäyä
Bibliapita yachakïkanqanta musyarirmi, Eunïcipa mamäninqa directorta nirirqan imëkanöpapis yachakïkanqanta jaqiratsinampaq. Directorqa imëkatam rurarqan Bibliapita yachakïkanqanta jaqiratsinampaq, hasta publicacionninkunatam qochirirqan. Peru Eunïciqa, Jehovällata sirwinampaqmi churapakarqan. Bautizakïta munaptinmi teytankunaqa kënö niyarqan: “Jehoväpa testïgun tikrarqa wayïkunapitam ëwakunki”. Tsëmi, Eunïciqa 17 watayoq këkar juk Testïgu familiaman täraq ëwakurqan. Yachakurmi sïguirqan y bautizakurqanmi. 1960 watachömi casakuriyarqä, peru teytankunaqa manam shayämurqantsu. Watakuna pasanqanmannömi, teytankunaqa imanö kawayanqäpita y wamräkunata imanö wätayanqäpita respetayämarqanna.
JEHOVÄQA IMËPIS YANAPAMASHQAM
Londres markachö tsurï Nicholaswan warmin Deborah Betel wayichö këkäyan
Qanchis wamräkunam kayäpamarqan y noqakunanö sordu mana kayaptinmi, pëkunata wätananqa fäciltsu karqan.
Tsëmi sëñas idiömata yachakuyänampaq procurayarqä, tsënöpa pëkunawan parlakuriyänäpaq y Bibliapita yachatsiyänäpaq. Congregacionnïkunachö cristiänu mayïkunaqa alläpam yanapayämarqan. Juk teytam, Diospita Yachatsikuyänan Wayichö wamräkuna mana allikunata parlëkaqta wiyarir, juk papelman qellqëkur willayämarqan. Tsë hörallam, wamräkunata consejariyarqä. Kananqa James, Jerry, Nicholas y Steven wamräkunam anciänuna kayan, y familiankunawan juntum Jehoväta sirwikäyan. Jinamampis, Nicholaswan warmin Deborahqa Gran Bretäña nacionpa Betel wayichömi, sëñas idiömaman publicacionkunata tikratsir yanapakïkäyan. Y Stevenwan warmin Shannanqa, Estädus Unïdus nacionpa Betel wayichömi, sëñas idiömaman publicacionkunata tikratsir yanapakïkäyan.Wamräkunawan warminkunam, sëñas idiömachö tukïnöpa yachatsikur yanapakïkäyan.
Peru casakuyanqäpita 40 watata cumpliyänäpaq juk killa pishikaptinmi, kuyashqa warmillä Eunïciqa cancer qeshyawan wanukïkurqan. Qeshyanqan witsankunaqa, wanushqakuna kawariyämunampaq kaqman markäkunqanmi (yärakunqanmi) kallpata qoq. Tsë junaq chämunantam shuyarëkä pëwan yapë tinkurinäpaq.
Faye y James, Jerry y Evelyn, Shannan y Steven
Salmus 10:14). Alläpam agradecikü papelman qellqar parlapämaqkunata, sëñas idiömata yachakïta procuraqkunata y imëkanöpa entiendinäpaq yanapamaq kaqkunata.
2012 wata febrëru killam, feyupa ishkïkurqä y tseqllätam pakirirqä. Atiendiyämänantam wanarqä, tsëmi tsurï kaqta täraq ëwakurqä. Tsëchöqa Calgary markachö këkaq sëñas idiöma congregacionmanmi ëwayä, y anciänunömi yanapakïkä. Rasumpa kaqchöqa, kananraqmi sëñas idiöma congregacionchöqa këkä. Tsëqa, ¿imanötaq ingles idiöma congregacionchö këkar Jehoväta sirwirnin alleq tsarakurqö? Jehovä yanapamaptinmi. Pëqa teytannaq wamrakunata cuidanampaq kaqta änikunqantam cumplishqa (79 watayoq këkarmi, sëñas idiömachö precursorkunapaq escuëlachö këkä
Yachatsikayämunqanta mana entiendirnin y sordukunata yanapëta mana puëdiyänampaq kaqta pensarmi, höraqa alläpa yarpachakur Jehoväta sirwita manana puëdinäpaq kaqta pensaq kä. Tsë hörakunam, apostol Pëdru Jesusta kënö ninqanman pensaq kä: “Teytë, ¿pimanraq ëwayäshaq? Qamtaq imëyaqpis kawëta qokoq palabrakunataqa katsinki” (Juan 6:66-68). Mëtsikaq sordukunam atska watapana Jehoväta sirwikäyan, y pëkunanöllam pacienciakoq këta yachakurqö. Jinamampis, Jehoväman y markanman markäkunqämi alläpa yanapamashqa. Kananqa sëñas americänu idiömachömi atska publicacionkuna kan, jina tsë idiömachö reunionkunapita y asamblëakunapitam kushishqa yachakü. Awmi, Diosnintsik Jehoväta sirwirmi alläpa kushishqa kawakurqö y pëqa alläpam bendicimashqa.