1-3. (1) ¿Ima problëmaraq itsa pasakurqan Evodiawan y Sintiquiwan? (Rikäri kë yachatsikïpa qallananchö këkaq dibüjuta). (2) ¿Imatataq rurashwan cristiänu mayintsikkunawan mana piñatsinakunapaq?

DIOSPA PALABRAN kanqanta musyarninmi cristiänukunaqa Bibliata precisaqpaq churantsik. Problëmakunaman mana chänapaq y imatapis pantarnin altsanapaqmi consëjunkunaqa yanapamantsik. ¿Tsë consëjukunata chaskikuntsikku? Pensarishun apostolkuna kawayanqan witsanchö Evodia y Sintiqui jutiyoq panikunaman. Bibliam nimantsik piñatsinakushqa kayanqanta, peru manam nimantsiktsu imarëkur piñatsinakuyanqanta.

² Itsachi Evodiaqa wakin cristiänu mayinkunata wayinman mikoq invitarnin Sintiquitaqa invitarqantsu. Tsëpitanachi Evodia invitanqan cristiänukunaqa parlayarqan shumaq juntaräriyanqanta, y tsëta musyarirchi Sintiquiqa mana invitanqampita piñakurqan. Itsa kënö pensarqan: “Manam creiritsu Evodia imanir mana invitamanqanta. ¡Noqaqa pensarqä yanasa kayanqätam!”. Itsa Sintiquiqa pensarqan imapita  karpis Evodia piñashqa këkanqanta y pëwan juntakïta manana munanqanta. Tsënö pensarchi Sintiquiqa Evodia invitanqan cristiänukunallata wayinman invitarqan, peru Evodiataqa mana. Tsënö rurayanqanqa wakin cristiänukunatam piñatsirqan. Bibliaqa willamantsik tsë ishkan panikunata Pablu consejanqanta y amishtayänampaq ninqantam. Pëkunaqa tsë consëjuta wiyakuyarqanmi, tsënöpam Jehoväta kushishqa sirwir sïguiyarqan (Filipensis 4:2, 3).

³ Itsa noqantsikpis congregacionchö mëqan cristiänu mayintsikllawampis piñashqa këkantsik. Tsënö kaptinqa rasllam altsanantsik o tsënö problëmaman mana ishkitam procuranantsik. Peru tsëpaqqa Biblia consejamanqantsiktam cäsukunantsik. Tsë consëjukunata cäsukurninqa Diospa Palabranta precisaqpaq churanqantsiktam rikätsikuntsik (Salmus 27:11).

4, 5. ¿Ima consëjukunatataq Diospa Palabran qomantsik geniuntsikta tsaränapaq?

⁴ Höraqa alläpa sasam geniuntsikta tsarëqa. Tantiyarinapaq, itsa alläpa llakikushwan o piñakushwan costumbrintsikpita, ima color kanqantsikpita o imanö kënintsikpita pillapis ofendiramashqa. Cristiänu mayintsikkuna tsënö ofendïkamashqanäqa masran nanëkamashwan. Tsënö pasamashqaqa, ¿Bibliapa mëqan consëjuntaq yanapamashwan?

⁵ Jehoväqa alleqmi musyan geniuntsikta mana tsarashqaqa ima pasakunampaq kaqta. Piñashqa këkarninqa imëkatapis rurarishwan o parlarishwanmi, peru tsëpitaqa itsa llakikushwan. Tsëmi Jehoväqa Palabranchö nimantsik geniuntsikta alleq tsaränapaq. Kënömi nimantsik: “Ama rasllaqa piñakïtsu”. Kë consëjuta wiyakurqa manam rasllaqa piñakushuntsu y imëka problëmaman chänapaq kaqpitam librakäshun (leyi Eclesiastes 7:9 * y Proverbius 16:32 *). Jina Bibliaqa nimantsik wakinkunata perdonëkunapaqmi. Jesusmi nirqan wakinkunata mana perdonashqaqa, Jehoväpis mana perdonamänapaq kaqta (Mateu 6:14, 15). ¿Wanantsikku geniuntsikta tsarëta y wakinkunata perdonëta?

6. ¿Imaraq pasakunman geniuntsikta mana tsarashqaqa?

⁶ Geniuntsikta mana tsararqa, piñashqallam imëpis kashun y pitapis chikirmi qallëkushwan. Tsënö kashqaqa wakin cristiänu mayintsikkunapis noqantsiknömi rurar qallëkuyanqa. Itsa mana alli geniuntsikta rikätsikïta munashuntsu, peru imë höra karpis cuentatam qokuriyanqa. Tsëqa itsa amïguntsik këtapis munayanqanatsu (Proverbius 26:24-26). Tsënö kashqaqa anciänukunam Bibliawan yanapamäshun mana alli geniuntsikta cambianapaq y wakinkunata perdonëkunapaq (Levïticu 19:17, 18; Romänus 3:11-18). Y tsënö consejaramashqaqa, ¿cäsukushuntsuraq Bibliapa consëjunkunata?

7, 8. (1) ¿Imanötaq Jehoväqa markanta dirigin? (2) ¿Imakunatataq Biblia mandamantsik, y imanirtaq cäsukunatsik?

⁷ Kanan witsanqa, kë Patsachö këkaq markantam Jehoväqa dirigin y yachatsin. Tsëpaqqa Cristutam churashqa “creikoqkunapa dirigeqnin” kanampaq (Efesius  5:23). Y Cristunam Diospa markanta diriginampaq y yachatsinampaq ‘alli juiciuyoq y markäkïpaq sirwipakoqta’ churashqa (Mateu 24:45-47). Diospa Palabran kaptinmi, ‘alli juiciuyoq y markäkïpaq sirwipakoqqa’ Bibliata alläpa respetan. Jina tsënöllam punta cristiänukunapa pushaqninkunapis respetayarqan (leyi 1 Tesalonicensis 2:13). ¿Imakunatataq Biblia mandamantsik?

⁸ Bibliaqa këkunatam mandamantsik: reunionkunaman ëwëta mana jaqinapaq (Hebrëus 10:24, 25). Llapan cristiänukuna tsë creikïyoqlla kanapaq (1 Corintius 1:10). “Diospa Gobiernunta” puntaman churanapaq (Mateu 6:33). Wayin wayin, cällikunachö y mëchöpis nunakuna kaqchö yachatsikunapaq (Mateu 28:19, 20; Hëchus 5:42; 17:17; 20:20). Y anciänukunatam mandakïkunata qon congregacionkunata limpiuta katsiyänampaq (1 Corintius 5:1-5, 13; 1 Timoteu 5:19-21). Jina mandamantsikmi cuerpuntsikta limpiuta katsinapaq, Jehovä chikinqan mana alli pensëkunata y costumbrikunata jaqinantsikpaq (2 Corintius 7:1).

9. ¿Pitataq Jesus utilicëkan Diospa Palabranta entienditsimänapaq?

⁹ Wakin nunakunaqa itsa pensayanman Bibliapa yachatsikïninta entienditsiyänanta mana wanayanqanta. Peru 1919 watapita patsëmi, ‘alli juiciuyoq y markäkïpaq sirwipakoqta’ Jesusqa utilicëkan. Pëkunam Diospa markanta yanapëkäyan Bibliata entiendiyänampaq y cäsukuyänampaq. Bibliapa consëjunkunata wiyakurninqa limpiuta, juknöllata y yamëtam congregacionta katsishun. Tsëmi kënö tapukunantsik: “¿Wiyakushaqtsuraq Jesus y alli juiciuyoq y markäkïpaq sirwipakoq mandakunqanta?”.

10. ¿Imanötataq Ezequiel rikarqan Jehoväpa ciëluchö këkaq markanta?

¹⁰ Bibliaqa yachatsimantsik, Jehoväpa ciëluchö këkaq sirweqninkunapis alli churanakushqa sirwiyanqantam. Tantiyarinapaq, profëta Ezequielmi juk visionchö rikarqan juk cärruchö Jehovä tëkaqta, y pë munanqanmannö mëpapis alläpa ras ëwëkaqta (Ezequiel 1:4-28). Tsë cärruqa, Jehoväpa ciëluchö këkaq markantam rikätsikun. Tsë markaqa imëpis listum këkan Jehovä ninqanta ruranampaq. Jinamampis Jehoväpa Patsachö këkaq markantam dirigin. Musyanqantsiknöpis, kë pasaq chunka watakunachöqa Jehoväpa Patsachö këkaq markanqa atska cambiukunatam rurashqa. Tsë cambiukunata ruranampaqqa Jehovämi dirigishqa. Jehoväpa Tsurin Jesucristu y angelkunam ichikllachöna llapan mana alli nunakunata ushakäratsiyämunqa. Tsënöpam Jehoväta, jutinta y pëlla mandakunampaq derëchuyoq kanqanta llapankuna respetayanqa.

11, 12. ¿Imakunatataq Jehoväpa markan lograshqa kë ushanan junaqkunachö?

¹¹ Jehoväpa markan kë ushanan junaqkunachö imëkakunata ruranqanman pensarishun. Puntataqa rikärishun Jehoväta sirwiyänampaq wayikunata rurëkunachö lograyanqanta. Mëtsikaq wawqikuna y panikunam alläpa trabajayashqa Warwick (Nueva York, Estädus Unïdus) markachö Jehoväpa testïgunkunapa principal oficïnankunata rurëchö. Y mëtsika waranqa wawqikuna y panikunam trabajëkäyan entëru Patsapa Jehoväpa Testïgunkuna Yachatsikuyänan Wayikunata y sucursalkunata rurëchö. Tsë llapan trabäjutaqa rikäyan Nueva Yorkchö këkaq principal oficïnapitam. ¿Manaku  alläpa kushikuntsik tsë trabäjukunachö mëtsikaq wawqinkuna y paninkuna yanapakuyanqampita? Jinamampis, tsë trabäjukunaqa rurakëkan entëru Patsachö këkaq cristiänu mayintsikkuna, shonqunkuna ninqanmannö qellëninkunawan yanapakuyanqampitam. Jehoväqa markanta alläpam bendicin shonqupita patsë yanapakuyaptin (Lücas 21:1-4).

¹² Kananqa rikärishun yachatsikï asuntuchö Jehoväpa markan logranqanta. Jehovätaqa alläpam gustan markanta yachatsi (Isaïas 2:2, 3). Tsëmi, Precursorkunapaq Escuëlata, Diospa Gobiernumpita Yachatsikoqkunapaq Escuëlata, Galaad Escuëlata, Betelman Tsëraq Yëkushqakunapaq Escuëlata, Congregacionkunata Watukaqkunapaqwan Warminkunapaq Escuëlata, Congregacionchö Anciänukunapaq Escuëlata, Anciänukunapaq y Siervu Ministerialkunapaq Escuëlata y Sucursalta Rikaqkunapaqwan Warminkunapaq Escuëlata utilicëkan yachatsimänapaq. Jina Internetchö jw.org päginantsikpis kapamantsikmi, tsëchömi Bibliata y wakin publicacionkunatapis mëtsika idiömanchö tarita puëdintsik. Jina tsë päginachömi wamrakunapaq y familiakunapaq yachatsikïkuna  këkan, y pasakunqankunapita willakïkunapis. ¿Utilicëkantsikku jw.org päginata Diospita yachatsikunqantsikchö, y familiawan juntu Diosta adoranqantsikchö?

13. ¿Imatataq Jehoväpa sirweqninkunaqa rurëta procuranantsik?

¹³ Alläpa kushikïpaqmi Jehoväpa markanchö këqa y noqantsikpita imata shuyaranqanta musyëqa. Ima kushitsinqanta musyarninmi nimanqantsikta cäsukïta y alli kaqta rurëta procurantsik. Mëtsikaq nunakunam mana allikunata rurëta gustayan. Peru noqantsikqa mana alli kaq rurëkunataqa Jehovä chikinqannömi chikinantsik (Salmus 97:10). Manam kanantsiktsu, “alli kaqta mana allitanö y mana alli kaqtana allitanö” rikaq nunakunanöqa (Isaïas 5:20). Jehoväta kushitsitam munantsik. Tsëmi limpiu kanantsik cuerpuntsikchö, portakïnintsikchö y pëta adoranqantsikchö (1 Corintius 6:9-11). Alleqmi musyantsik Palabranchö Jehovä nimanqantsikqa biennintsikpaq kanqanta. Jinamampis, Jehoväta kuyarmi llapan nimanqantsikta cäsukïta procurantsik. Jina wayintsikchö këkar, congregacionchö këkar, trabäjuchö këkar, escuëlachö këkar o mëchö këkarpis Jehovä nimanqantsiktam cäsukunantsik (Proverbius 15:3). ¿Imakunachötaq Jehoväta wiyakushwan? Wakinllata rikärishun.

14. ¿Imanötaq teytakuna rikätsikuyanman Jehoväta cäsukuyanqanta?

¹⁴ Wamrakunata yachatsichö. Jehoväqa Palabran Bibliachömi mandakun teytakuna wamrankunata imanö wätayänampaq kaqta. Y teytakunaqa rikätsikuyanqa Jehoväta cäsukuyanqanta tsë mandakïta wiyakurninmi. Tsëmi Diosta mana sirweq nunakunanö pensëpita cuidakuyänan (Efesius 2:2). Tantiyarinapaq, wakin sitiukunachöqa papäkunaqa itsa niyanman warmi kaqlla wamrakunata yachatsinampaq kaqta. Peru Bibliaqa clärum nin ollqu kaqkuna wamrankunata yachatsiyänampaq (Efesius 6:4). Samuelpis wamra kanqampitam Jehoväpa amïgun karqan. Tsënöllam Jehoväta kuyaq teytakunaqa, wamrankunapis Jehoväwan amïgu kayänanta munayan (1 Samuel 3:19).

15. ¿Imanötaq Jehoväta cäsukunqantsikta rikätsikuntsik precisaq rurëkunata akranqantsikchö?

¹⁵ Ima rurëtapis akrëchö. Ima precisaqtapis manaraq akrarninmi, tsë asuntupaq Jehovä imata pensanqantaraq musyëta procuranantsik. Tsëpaqqa Palabran Bibliachö y publicacionkunachö markan ima ninqantam ashita procuranantsik. Tsënöpam Jehoväta cäsukunqantsikta rikätsikuntsik. Këllaman pensarishun, wakin nunakunaqa trabäjunkunarëkurmi juk nacionkunata ëwakuyashqa y tsëchömi wamrayoq kayashqa. Peru trabajar quedakuyänanrëkurmi wamrankunata familiankunaman mandëkuyan pëkuna wätayänampaq. Awmi, tsë rurëta akrayanqanqa kikinkunapitam. Peru teytakunaqa tapukuyänanmi tsë asuntupaq Jehovä imata pensanqanta  (leyi Romänus 14:12). Tsëmi familiapaq y trabäju asuntupaq imatapis manaraq akrarnin Biblia ima ninqanman pensanantsik. Porqui llapan rurënintsikkunachö Jehovä yanapamänatam wanantsik (Jeremïas 10:23).

16. ¿Imatataq juk mama akranan karqan wamran yuririptin? ¿Imataq yanaparqan alli kaqta akranampaq?

¹⁶ Juk parëjam juk nacionta täraq ëwakurqan, y tsëchömi juk ollqu wamrankuna yurirqan. Tsënam pensayarqan wamrankunata awilunkuna kaqman mandëta. Peru tsë witsankunam warmi kaqqa juk paniwan Bibliapita yachakur qallëkurqan. Tsëchömi yachakurirqan Jehoväpita wamranta yachatsinampaqqa, kikin carguyoq kanqanta (Salmus 127:3; Proverbius 22:6). Tsëmi akranan karqan awilunkuna kaqta wamrata mandëta o quedatsikïta. Biblia ninqannömi kë jövinlla mamaqa Jehoväman mañakurqan alli kaqta akrëchö yanapëkunampaq (Salmus 62:7, 8). Jina yachatseqnin paniwan y congregacionchö wakin cristiänukunawanmi tsë asuntupita parlarqan. Kastankuna y amïgunkunaqa exigiyarqan wamrata awilunkuna kaqman apatsinampaqmi. Peru kë mamaqa entiendirirqanmi tsëta rurëqa mana alli kanqanta. Qowanqa alläpam espantakurqan congregacionpita wawqikuna y panikuna warminta y wamrantapis alläpa yanapayanqanta rikarnin. Tsëmi pëpis Bibliapita yachakur y reunionkunaman familianwan ëwar qallëkurqan. ¡Imanö kushishqam kë mama sientikurqan mañakïninta Jehovä wiyashqa kaptin!

17. ¿Ima mandakïkunatataq cumplinantsik pitapis Bibliapita yachatsirninqa?

¹⁷ Mandakïkunata cäsukïchö. Jina Jehoväta wiyakoq kanqantsiktaqa rikätsikuntsik markan mandamanqantsikkunata cäsukurninmi. Tantiyarinapaq, Yachatsikun libruwan pitapis yachatsita qallarinqantsikpita patsë, imata ruranapaq kaqman pensarishun. Nimarquntsikmi cada yachatsir usharirnin, Jehoväpa markanta maslla reqiyänampaq wallka minütukunallapis yacharatsinantsikpaq. Tsëpaqqa, ¿Imanötaq reunionnïkuna? neq vidëuwan y ¿Pikunataq Jehoväpa munëninta rurëkäyan? neq follëtuwanmi yanaparita puëdintsik. Jina nimarquntsikmi Yachatsikun libruwan yachatsita usharirninqa, bautizakushqana këkäyaptimpis “Dios Yayapa kuyakïninchö imëpis kawakuyë” libruwan yachatsir sïguinapaq kaqta. Tsënöpam yanapashun markäkïninkunachö mas sinchi kayänampaq (Colosensis 2:7). ¿Rurëkantsikku Jehoväpa markan tsënö mandamanqantsikkunata?

18, 19. ¿Imakunarëkurtaq Jehoväta agradecikushwan?

¹⁸ Jehovätaqa këkunapitam agradecikunantsik: 1) përëkur kawëyoq kanqantsikpita (Hëchus 17:27, 28). 2) Palabran Bibliata qomanqantsikpita. Tesalönica markapita cristiänukunanömi, noqantsikpis Diospa Palabrantaqa alläpa kuyantsik (1 Tesalonicensis 2:13).

¹⁹ Y 3) amïgun kanantsikpaq Bibliawan yachatsimanqantsikpita (Santiägu 4:8). Y 4) markanchö kanantsikpaq permitimanqantsikpita. 136 kaq Salmuta qellqaqnömi sientikuntsik, pëmi kënö nirqan: “Jehoväta agradecikuyë, porqui pëqa alläpa allim: porqui rasumpa kuyakïninqa manam imëpis ushakantsu” (Salmus 136:1). Tsë salmuchöqa cada versïculu ushariptinmi kënö neq palabrakuna yurin: “Rasumpa kuyakïninqa manam imëpis ushakantsu”. Jehovä nimanqantsikta wiyakurnin y markanwan mandamanqantsikta cäsukurninqa, rasumpa kuyakïnintam imëyaqpis chaskishun.