Noqaqa 1934 watam yurikurqä. Papänïkunaqa Suïza nacionpitam kayarqan, peru tsëpitam Canadä nacionpa Ontariu provinciachö këkaq Timmins markanman ëwakuyarqan. Tsë markachöqa minërukunam kayaq. Mamänïqa 1939 watam La Atalaya revistata yachakur y Testïgukunapa reunionninkunaman ëwar qallëkurqan. Tsëmanmi wawqïkunata, panïkunata y noqatapis pushayämaq. Bibliata yachakur qallanqampitaqa ichik tiempullatam bautizakurqan.

Mamänï Testïgu kanqantaqa manam papänïta gustarqantsu, peru mamänïqa Testïgu këta mana dejanampaqmi decidishqa karqan. Tsëmi Canadä nacionchö Testïgukuna yachatsikuyänanta 1940 watachö autoridäkuna prohibiyaptimpis, Jehovätaqa dejarqantsu. Papänï mana alli tratëkaptimpis mamänïqa respëtuwanmi trataq. Tsëta rikarmi panïkuna, wawqïkuna y noqapis bautizakuyarqä. Tiempuwanqa papänï jukläyanam karqan y llapäkunatam shumaqna tratayämaq.

“Aumento de la Teocracia” neq asamblëachö kanäpaqmi, 1950 wata agostu killachö Nueva York markaman viajarqä. Tsëchömi mëtsë nacionpita wawqi panikunata reqirqä, y Galaad Escuëlaman ëwashqakunam imakunapa pasayanqankunata willakayämurqan. Noqaqa puntallapitanam llapan tiempüwan Jehoväta sirwita munarqä, peru tsë asamblëachö karirqa masran munarqä. Tsëmi wayïman chärirqa, precursor regular kanäpaq solicitudta mandarqä. Y Canadä sucursalpitam niyämarqan bautizakunäraq pishinqanta. Tsëmi 1950 wata 1 de octubri bautizakurqä. Y tsëpita juk killallatam precursor regular karqä y Kapuskasing markamanmi mandayämarqan.  Tsë markaqa wayïpita alläpa karuchömi këkan.

1951 watam, frances idiömata parlaqkunata sucursalpita animayämurqan Quebec provinciata yanapakoq ëwayänampaq. Tsë markachöqa tsë idiömatam parlayaq y Testïgukunaqa wallkaqllam kayaq. Noqaqa frances y ingles idiömata yacharmi ëwanäpaq änikurqä, tsëmi Rouyn niyanqan markaman mandayämarqan. Tsëchöqa manam pitapis reqirqätsu, y qallananchö willakunqänöpis juk wayiman chänäpaqmi niyämarqan. Marcel jutiyoq wawqiwanqa alli amïgum tikrayarqä y chusku watapam Quebec markachö kushishqa yanapakurqä. Tsëchö këkaptïmi, precursor especial kanäpaq churayämarqan.

Quebec markachö yanapakuykaptïmi, Galaad Escuëlapa 26 kaq cläsinman invitayämarqan; tsë escuëlaqa kanan karqan Nueva Yorkpa South Lansing markanchömi. Invitayämanqampitaqa alläpam kushikurqä. Y 1956 wata 12 de febrërum graduakurqä, y kanan witsan Ghäna b nir reqiyanqan naciontam mandayämarqan, tsëqa këkan Africa Occidentalchömi. Peru Ghäna nacionta manaraq ëwarmi, Canadä markata kutikurqä papelnïkuna listu kanqanyaq. Y juk ishkë semänakunalla shuyänäpaq kaqtam pensarqä.

Peru papelnïkuna mana yarqamuptinmi, Cripps familiapa wayinchö siëti killapa Torontuchö quedakurqä. Tsëchömi wawqi Crippspa wamran Sheilawan reqinakuyarqä y noviu tikrariyarqä. Y casakuyänäpaq ninä këkaptinmi, papelnïkuna yarqaramurqan. Tsëmi Jehoväman alli mañakurirnin decidiyarqä Ghäna nacionta yanapakoq ëwakunäpaq, cartanakurlla kayänäpaq y tiempuwanqa casakuyänäpaq. Tsëta decidiyänä mana fäcil kashqa kaptimpis, tiempuwanqa cuentatam qokuriyarqä allita decidishqa kayanqäta.

Juk killapa trenwan, barcuwan y avionwan viajarirmi Ghäna nacionpa Accra markanman chärirqä. Tsëchömi congregacionkunata  watukanäpaq churayämarqan, y entëru Ghänachö, Costa de Marfilchö y kanan witsan Tögo nir reqiyanqan Togolandiachö congregacionkunatam watukanä karqan. Viajanäpaqqa sucursalpitam juk alli cärruta mañayämarqan. Imëpis japallämi viajaq kä, y kushishqam congregacionkunata watukaq kä.

Semäna ushëkunaqa asamblëakunachömi yanapakoq kä. Asamblëata rurayänampaq localninkuna mana kaptinmi, alläpa achachaptin wawqikunaqa bambüwan y palmërapa yuranwan carpata rurayaq arwachö o llantuchö kayänampaq. Y refrigeradörankuna mana kaptinmi, asamblëaman ëwaqkunapaqqa, cocinayänan hörallana animalkunata pishtayaq.

Asamblëakunachöqa höraqa imëkam pasakoq. Juk kutim Herb Jennings c jutiyoq misionëru discursëkaptin, juk töru qeshpirnin puntampa cörripa yëkaramurqan. Töruqa manam mëpa ëwëta puëdirqantsu y wawqi Herbpis manam ni ima rurëta puëdirqantsu. Tsëpitanam chusku wawqikuna töruta jancharkur apakuyarqan, peru apakuyanqan höram llapan asamblëachö këkaqkuna kushishqa paqchiyarqan o taqllayarqan.

Ishkë postikunaman yuraq tëlata warkuykurmi, La Sociedad del Nuevo Mundo en acción neq pelïculata amänu markakunachö nunakunata cada semäna rikätseq kä. Nunakunataqa, ¡alläpam gustaq! Wakinkunaqa tsë kutillaran pelïculata rikäyarqan. Tsëmi bautizakoqkunata rikarqa kushikurnin alläpa paqchiyaq o taqllayaq. Tsë pelïculata rikarmi nunakunaqa cuentata qokuyarqan entëru Patsachö Testïgukunaqa juknölla kanqantsikta.

Africachö ishkë watapana yanapakuykarmi, 1958 watachö Nueva York markata viajarqä atska nacionkunapaq rurakaq asamblëaman. Y tsëchömi Sheilawan yapë tinkuriyarqä. Pëqa Quebec markachömi precursöra especialnö yanapakuykarqan. Sheilawanqa cartanakurllam kayarqä; peru tinkurirqa, casakuyänäpaqmi parlaparqä y äniramarqanmi. Tsënam wawqi Knorrman d cartakurqä Galaad Escuëlaman invitayänampaq y tsëpita Africaman mandayämunampaq tapukurnin, y wawqi Knorrqa äniramarqanmi. Ghäna nacionman Sheila chäramuptinqa, 1959 wata 3 de octubrim Accra markachö  casakuyarqä. Jehovämi pëta sirwir ocupädu kayanqäpita bendiciyämarqan.

1961 watachömi Camerun nacionta mandayämarqan, y tsëchömi sucursalta patsätsiyaptin yanapakunä karqan. Imëka rurëyoqmi karqä, y sucursalta rikänäpaq churayämashqa kayaptinmi, imëkataraq yachakunä karqan. Peru 1965 watachömi warmï Sheila qeshyaq tikrarirqan, y wamrayoq kayänäpaq kaqtaqa manam pensayarqätsu. Tsënö kaptimpis kushikuyarqämi. Y Canadä naciontam kutikuyta pensayarqä. Tsënö pensëkäyaptïmi, wamräkunaqa wanushqa yurikurqan.

Y doctorqa niyämarqan wamräkuna ollqu kashqa kanqantam. 50 watana pasakushqa kaptimpis, wamräkunataqa llakiyäraqmi. Peru llakishqa këkarpis, Camerun nacionchömi quedakuyarqä.

Camerunchö wawqi panikunataqa polïticaman mana mëtikuyanqampitam alläpa chikiyaq. Y presidentipaq votayanqan tiempukunam mas peligrösu tikrakurirqan. 1970 wata 13 de mäyum, Gobiernuqa Jehoväpa testïgunkuna yachatsikuyänanta prohibirirqan. Y pitsqa killallaraq utilicëkäyanqä shumaq Betel wayitam duëñu tukurqan. Y juk semänallachömi misionërukunata tsë nacionpita llapäkunata qarqayämarqan. Camerunchö wawqi panikunata dejëqa manam fäciltsu karqan y pëkunapaqmi alläpa yarpachakoq kayä.

Francia sucursalpitam, Camerunchö wawqi panikunata yanaparnin joqta killapa trabajarqä. Y tsë watallam diciembri killachö Nigeria sucursalmanna mandayämarqan, y tsëpitam Camerunchö këkaq wawqi panikunata yanapayarqä. Nigeriachö wawqi panikunaqa kushishqam chaskiyämarqan, y tsëchö yanapakuyanqä watakunaqa alläpa shumaqmi karqan.

Sheilaqa atska tiempupanam qeshyëkarqan. Tsëmi Nueva York markachö asamblëachö këkäyaptï, waqarëkar kënö nimarqan: “Alläpa utishqam o pishipashqam sientikü. Manam aguantänatsu, qeshyarllam kakü”. Tsëmi 1973 watachö markäkunaman kutikuyänäpaq decidiyänä karqan. Sheilawanqa 14 watapanam Africa Occidentalchö yanapakuyarqä. Y yanapamanqampitaqa alläpa kushishqam këkarqä. Tsënö kaptimpis, kutikuyänäpaqmi decidiyänä karqan. Alli parlarirnin y Jehoväman mañakurirmi, Canadäta kutikuyänäpaq decidiriyarqä. Tsëchömi Sheilaqa doctorkunaman mas fäcil-lla ëwëta puëdinan karqan. Llapan tiempükunawan yanapakuyanqäta dejananqa manam fäciltsu karqan, y alläpam llakikuyarqä.

Canadäman chäriyaptïqa, juk amïgum trabäjunman chaskimarqan. Pëqa Torontu markapa norti kaq lädunchömi cärruta rantikur trabajaq. Tsëchömi wayita arrendarir makwa cösaskunata utilizäyänäpaq rantiyarqä. Tsëtaqa rurayarqä jaqa mana yëkuyänäpaq y imëllapis llapan tiempükunawan yapë yanapakuyta munarmi. Peru  munayanqäqa ichik tiempullachömi cumplikärirqan.

Ontariu provinciachö këkaq Norval markachömi asamblëakunata rurayänampaq localta rurayarqan, tsëchömi säbadukunapa yanapakur qallëkurqä. Y tiempuwanqa asamblëa localta rikarnin yanapakunäpaqmi niyämarqan. Y Sheilapa salornin mas allina kaptinmi änikuyarqä. Tsëmi 1974 watachö tsë asamblëata rurayänan localman täkoq ëwakuyarqä. Llapan tiempükunawan yapë yanapakur qallayanqäpitaqa alläpam kushikuyarqä.

Sheilaqa mas allinam salorninchö sientikurqan. Tsëmi ishkë wata pasariptin niyämarqan congregacionkunata watukarnin yanapakunäpaq, y tsëtapis äniyarqämi. Tsëmi Manitoba provinciachö këkaq congregacionkunata watukayarqä; tsë markachöqa alläpam alalan. Tsënö kaptimpis wawqi panikunaqa alläpa kuyakoqmi kayaq. Tsëchömi yachakuyarqä mëchö këkarpis llapan puëdinqantsikmannö Jehoväta sirwiqa mas alli kanqanta.

Atska watapa congregacionkunata watukar yanapakuykaptïmi, 1978 watachö Canadä Betelchö trabajanäpaq niyämarqan. Y tsëpita ichik tiempullatam humildi këta yachakurqä, peru manam fäciltsu karqan. Montreal markachömi juk especial reunionta rurayarqan y tsëchö höra y mediapa frances idiömachö discursanäpaqmi niyämarqan. Peru discursüqa manam shumaqtsu karqan y manam entiendiyämarqantsu, tsëmi Diospita Yachatsikuyta Rikaqkunachö trabajaq wawqi nimarqan discursüta mana entiendishqa kayanqanta. Tsë höraqa manam cuentata qokurqätsu discursëta alläpa mana yachanqäta. Tsëmi tsë wawqi consejamaptinqa mana entiendinakuyanqäta, alläpata mañëkämanqanta y discursüta despreciëkanqanta sientirqä. Tsëmi consejamanqanta chaskikurqätsu.

Tsëpita juk ishkë junaqkuna pasariptinmi, Sucursalta Rikaq juk wawqi parlapämarqan. Y tsëchöqa tsë wawqi consejamanqanta mana chaskikunqäpitam disculpata mañakurqä. Tsëpitanam consejamaq wawqiman disculpa mañakoq ëwarqä, y pëqa kushishqam disculpamarqan. Tsë kuti pasamanqantaqa manam imëpis qonqashaqtsu; tsë kutim humildi këta yachakurqä (Prov. 16:18). Y Jehovätam kutin kutin mañakurqä consejayämaptin mana chaskikunqäpita perdonëkamänampaq.

40 watapitapis masnam Canadä Betelchö yanapakuykä, y 1985 watapitam Sucursalta Rikaqnö yanapakuykä. 2021 wata febrëru killachömi warmï Sheila wanukurqan, y alläpam llakï. Y noqapis kananqa alläpam qeshyapäkü. Peru Jehoväta sirwirmi kushishqa y ocupädu këkä, y diakuna pasanqantaqa manam sientïllatsu (Ecl. 5:20). Imëka mana allikunapa pasashqa karpis, Jehoväta sirwirmi kushishqa kawakurqö. Jehoväpa kaqta puntaman churarnin 70 watapa llapan tiempüwan sirwiqa alläpa shumaqmi kashqa. Tsëmi kanan jövinkunapaqpis Jehoväman mañakü pëta sirwiyänampaq, pëta sirwirllam kushishqa kawakuyanqa.