1. ¿Imataraq Jesus ichik tiempullachöna ruramunqa?

 ICHIK tiempullachönam Jesusqa Patsachö llapan nunakunata juzganqa. ¿Imanötan tsëta musyantsik? Jesusmi discïpulunkunata willarqan ‘ushanan tiempuna’ kanqanta y ‘këkämunqantana’ musyayänampaq imakuna pasakunampaq kaqta (Mat. 24:3). Jesus tsënö ninqanqa qellqarëkan Mateu 24 y 25, Marcus 13 y Lücas 21 capïtulukunachömi.

2. ¿Imatataq këchö yachakushun, y imanötan yanapamäshun?

² Listu këkänantsikta munarmi Jesusqa willakurqan üshakunapaqwan cabrakunapaq, diez shipashkunapaq y talentukunapaq. Cada ünupita yachakurmi cuentata qokushun nunakunata Jesus juzgarqa, imakunata rurayanqanta cuentachö katsinampaq kaqta. ¿Imanötan tsëkunapita yachakunqantsik yanapamäshun? Üshakunapaq y cabrakunapaq Jesus parlanqampita yachakur qallëkushun.

ÜSHAKUNA Y CABRAKUNA

3. ¿Imëtan Jesusqa nunakunata juzganqa?

³ ¿Imataraq Jesusqa cuentachö katsinqa nunakunata juzgarnin? Alli noticiakunata chaskikuyanqanta y ciëlupaq akrashqakunata yanapayanqantam (Mat. 25:31-46). ¿Y imëraq Jesusqa decidinqa üshanö o cabranö kayanqanta? Tsëtaqa decidinqa ‘alläpa sufrimientu’ witsanmi, tsëqa kanqa Armagedon guërra qallananna këkaptinmi (Mat. 24:21). Imanömi juk mitsikoq üshakunata cabrakunapita rakin, tsënömi Jesuspis ciëlupaq kaqkunata yanapashqakunata, mana yanapashqa kaqkunapita rakinqa.

4. Isaïas 11:3 y 4 ninqannö, ¿imanirtan següru këkantsik nunakunata Jesus juzgarqa alli kaqllata ruranampaq kaqta? (Rikäri dibüjutawan fötukunata).

 ⁴ Jehoväqa Jesustam juez kanampaq churashqa, y Bibliachöqa nin Jesusqa alli juez kanqantam (leyi Isaïas 11:3, 4). Jesusqa nunakuna pensayanqanta, niyanqanta y rurayanqantam musyëkan. Y rikëkanmi ciëlupaq akrashqakunata yanapëkäyanqanta o mana yanapëkäyanqantapis (Mat. 12:36, 37; 25:40). Pëqa clärum musyanqa ciëlupaq akrashqakunata trabäjunkunachö pï yanapanqanta. a ¿Y imanötan ciëlupaq akrashqakunataqa yanapashwan? Juknöpaqa Diosnintsikpita yachatsikurninmi. Pëkunata yanapaqkunataqa alli ruraqtanömi Jesusqa rikanqa y imëyaqpis kë Patsachö kawakuyänantam permitinqa (Mat. 25:46; Apo. 7:16, 17). Tsëqa, ¡shumaq bendicionmi kanqa! Alläpa sufrimientu witsanchö y tsëpita pasarirpis Jehovä Diosnintsikta mana dejayaptinqa, ‘kawayänampaq kaqta rikätsikoq libruchömi’ jutinkuna qellqarëkanqa (Apo. 20:15).

5. Üshakunapaq y cabrakunapaq Jesus parlanqanqa, ¿imata ruranapaqtan yanapamantsik, y pikuna mastan cäsukuyänan?

⁵ Diosnintsikta mana dejëpa sirwi y cäsukoq kë. Üshakunapaq y cabrakunapaq parlarqa, Jesusqa Patsachö imëyaqpis kawaqpaq kaqkunapaqmi parlëkarqan. Pëkunaqa, ¿imanötan Jehovä Diosnintsikta mana dejëpa sirwiyanqanta y cäsukoq kayanqanta rikätsikuyan? Ciëlupaq akrashqakunata Diosnintsikpita yachatsikuychö yanaparnin y dirigimänantsikpaq “alli juiciuyoq y confiakuypaq sirwipakoq” niyämunqankunata cäsukurninmi (Mat. 24:45). Peru Jesus ninqankunataqa ciëlupaq akrashqa kaqkunapis cäsukuyänanmi. ¿Imanirtan tsënö nintsik? Pëkunatapis Jesusqa imata rurayanqanta, pensayanqanta y niyanqankunatam rikëkan. Tsëmi pëkunapis cäsukoq kayänan. Tsënö kanqantaqa maslla entiendirintsik Mateu librupa 25 kaq capïtulunta yachakurninmi. Tsëchömi Jesusqa parlarqan ciëlupaq akrashqa kaqkunapaq. Kananqa yachakurishun diez shipashkunapaq.

DIEZ SHIPASHKUNA

6. ¿Imanötan alli juiciuyoq kayanqanta rikätsikuyarqan pitsqa shipashkuna? (Mateu 25:6-10).

⁶ Jesusqa nirqan diez shipashkuna noviuta shuyaräyanqantam (Mat. 25:1-4). Llapankunam casakuy fiestaman yëkuyta munayarqan. Jesusqa nirqan pitsqa kaq shipashkunaqa “alli juiciuyoq” kayanqantam, peru pitsqa kaq shipashkunaqa “juiciunnaq” kayanqantam. Alli juiciuyoq kaqkunaqa alli alistapakurirmi noviuta alkäbulla shuyäyarqan; pëkunaqa listum këkäyarqan noviu chämunqanyaq imë hörayaqpis shuyäyänampaq. Tsëmi chiwchinkunawan ëwayarqan, y alläpa shuyaräyaptin chiwchinkuna mana upinampaqmi mas aceititapis apayarqan (leyi Mateu 25:6-10). Y noviu chäriptinqa, alli juiciuyoq shipashkunaqa pëwan juntum casakuy fiestaman yëkuyarqan. Tsënömi pasanqa ciëlupaq akrashqakunawampis. Cäsukoq karqa y noviuta o Jesusta alkäbu alkäbulla shuyararqa, pëwan juntum gobernamuyta puëdiyanqa (Apo. 7:1-3). b Peru ¿imatan pasakurqan juiciunnaq shipashkunawanqa?

7. ¿Imatan pasarqan juiciunnaq shipashkunata?

⁷ Jesusqa nirqan juiciunnaq shipashkunaqa noviuta shuyäyänampaq mana alistakushqa kayanqantam. Pëkunaqa, noviu  chänampaqna këkaptinmi cuentata qokuriyarqan chiwchinkunapa o mechërunkunapa aceitin ushakëkanqanta. Y mas aceitita mana apashqa karmi ranteqraq ëwayarqan. Peru ranteq ëwariyaptinmi noviuqa chärirqan. Y pëwan juntum alli juiciuyoq pitsqa shipashkunaqa casakuy fiestaman yëkuyarqan, y yëkuriyaptinllam “punkuta wichqarkayämurqan” (Mat. 25:10). Punkuta wichqayanqanchönam, juiciunnaq shipashkunaqa yëkuyta munar tocakuyarqan, peru novium kënö nimurqan: “Qamkunataqa manam reqiyaqtsu” (Mat. 25:11, 12). Juiciunnaq shipashkunaqa, manam atska hörapa noviuta shuyäyänampaq alistakushqatsu kayarqan. ¿Imatataq këpita yachakuyanman ciëlupaq akrashqakuna?

8, 9. ¿Imatataq ciëlupaq akrashqakuna yachakuyanman diez shipashkunapita? (Rikäri fötutawan dibüjuta).

⁸ Alkäbu alkäbu y listu këkäshun. Diez shipashkunapaq parlarqa, Jesusqa manam nikarqantsu ciëlupaq akrashqakuna ishkë grüpu kayanqanta. Manam nirqantsu, ushanan tiempuyaq Jesusta shuyäyänampaq juk kaq grüpu listu këkanqanta y juk kaq grüpu mana listu këkanqanta. Tsëpa rantinqa, ciëlupaq akrashqakunatam cläru willëkarqan ushananyaq mana tsarakurqa, premiunkuna mana chaskiyänampaq kaqta (Juan 14:3, 4). ¡Tsëtaqa manam pöcu cäsupaq churayänantsu! Kë Patsachö kawanantsik kaptin o ciëluchö kawanantsik kaptimpis, llapantsikmi diez shipashkunapaq Jesus parlanqanta cäsukunantsik. Llapantsikmi ushananyaq tsarakunapaq alkäbu alkäbulla listu këkänantsik (Mat. 24:13).

⁹ Këchömi yachakurquntsik, diez shipashkunapaq Jesus parlarqa, imëpis alkäbu alkäbu y listu këkänapaq yachatsimanqantsikta. Tsëpitanam alli trabajaq kanantsikta munarnin talentukunapaq parlarqan.

TALENTUKUNA

10. ¿Imanötan ishkë esclävukunaqa rikätsikuyarqan patronnin munanqanta rurayanqanta? (Mateu 25:19-23).

¹⁰ Kë kutichöqa kima esclävukunapaqmi Jesusqa parlarqan. Ishkë kaq esclävukunam  patronnin munanqanta rurayarqan, peru juk kaqqa manam (Mat. 25:14-18). Patronqa juk nacionta manaraq viajarmi, talentukunata o mëtsika qellëta sirweqninkunata dejapurqan. Ishkë kaq sirweqninkunaqa alli trabajador karmi mas qellëta ganayänampaq kallpachakuyarqan. Y patron kutinampaqqa, pitsqa talentuta chaskishqa kaqmi pitsqa masta ganarqan, y ishkëta chaskishqa kaqmi ishkë masta ganarqan. Tsëmi patronninqa kushikurnin kënö nirqan: “Shamuy, patronnikiwan kushikuy” (leyi Mateu 25:19-23). ¿Peru imatataq kima kaq esclävuqa rurarqan chaskinqan qellëwan?

11. ¿Imatan pasarqan qela esclävuta?

¹¹ Juk kaq esclävuntanam patronqa juk talentu qellëta entregarqan. Peru tsë qela esclävuqa masta miratsinampa rantinmi patsaman pampëkurqan. Y patronnin chäriptinqa, kanqantanöllam entreguëkurqan. Masta mana ganatsinqampita disculpata mañakunampa rantinmi, patronninta acusarqan ‘alläpa exigikoq nunam kanki’ nirnin. Tsënam patronqa qayaparqan y dejapunqan qellëta qechurirmi o qochirirmi wayimpita qarqurirqan (Mat. 25:24, 26-30).

12. ¿Pikunatan kayan patronnin munanqanta ruraq esclävukunanö?

¹² Patronnin munanqanta ruraq alli trabajaq esclävukunaqa ciëlupaq akrashqakunatam rikätsikuyan. Pëkunatam patronqa o Jesusqa cada ünuta kënö nin: “Shamuy, patronnikiwan kushikuy”. Tsënö nirqa, puntata kawariyämunampaqmi o ciëluchö kawayänampaqmi änikarqan (Mat. 25:21, 23; Apo. 20:5a). Y qela esclävupaq parlarqa, ciëlupaq akrashqakunatam nikarqan alli cuidakuyänampaq.

13, 14. ¿Imatataq ciëlupaq akrashqakuna yachakuyanman talentukunapaq Jesus parlanqampita? (Rikäri fötutawan dibüjuta).

¹³ Alli trabajador kë. Talentukunapaq Jesus parlarqa, manam nikarqantsu ciëlupaq akrashqakuna qela tikrakuriyänampaq kaqta. Tsëpa rantinqa, diez shipashkunapaq parlanqannöpis cuidakuyänampaqmi nikarqan. ¿Imatan pasanman karqan qelanäkurirnin trabäjunkunata shumaq mana rurayaptinqa? Jesusqa clärum nirqan, “qayashqa y  akrashqa” kayanqan mana següru kanampaq kaqta y ciëlupita Jesuswan gobernamuyta mana puëdiyänampaq kaqta (2 Pëd. 1:10).

¹⁴ Diez shipashkunapaq y talentukunapaq Jesus parlarqa, ciëlupaq akrashqakunatam cläru nikarqan trabajador kayänampaq y imëpis listu y alkäbu alkäbulla këkäyänampaq. Peru manam tsë kutillatsu Jesusqa ciëlupaq akrashqakunata cuidakuyänampaq parlaparqan. Maslla ninqankunataqa tarintsik Mateu 24:40 y 41 versïculukunachömi. Kananqa tsë versïculukunapita yachakurishun.

¿PIKUNATARAQ “APAKUYANQA”?

15, 16. Mateu 24:40 y 41 ninqannö, ¿imanirtan ciëlupaq akrashqakunaqa alkäbu alkäbulla këkäyänan?

¹⁵ Üshakunapaqwan cabrakunapaq, diez shipashkunapaq y talentukunapaq manaraq cuentakurmi Jesusqa parlarqan, ishkë nunakuna chakrachö trabajëkäyanqampaq y ishkë warmikuna maki mulinuchö aqarnin këkäyanqampaq. Kënömi nirqan: “Jukninta[m] apakuyanqa, y juknintana[m] dejariyanqa” (leyi Mateu 24:40, 41). Tsëpitanam qateqnin kaq versïculuchö discïpulunkunata kënö nirqan: “Alkäbu alkäbu këkäyë, manam musyayankitsu imë junaq Señornikikuna chämunampaq kaqta” (Mat. 24:42). Jesusqa diez shipashkunapaq cuentakur usharirpis, tsënöllam nirqan (Mat. 25:13). Tsëqa, ¿imatataq Jesusqa tsë ishkan cäsuchö entienditsikuyta munarqan? Tsëwanqa entienditsikuykarqan ciëlupaq akrashqakunapitaqa, pikunalla rasumpa aprobashqa kayänan tiempu chämunampaq kaqtam. Diosnintsik rasumpa akrashqa kaptinlla y pëta ushananyaq sirwishqa karllam, ciëluta ëwayanqa o Diospa Gobiernunchö kayanqa (Juan 14:3).

¹⁶ Alkäbu alkäbulla kë. Ciëlupaq akrashqa cristiänu Dios ninqankunata mana cumplirqa, manam wakin kaq ‘akrashqakunawan’ juntakëta puëdinqatsu (Mat. 24:31). Tsënöllam Patsachö imëyaqpis kawëta shuyaraq kaqkunapis, Jesus ninqankunata cäsukur Diosnintsikta mana dejëpa sirwiyänan y alkäbu alkäbulla këkäyänan.

17. ¿Imanirtan yarpachakuntsiktsu ciëluta ëwayänampaq wakin sirweqninkunata kë qepa watakuna Jehovä akranqampita?

¹⁷ Noqantsikqa Jehoväta allim reqintsik, y llapan decidinqankunapis allilla kanqanmanmi confiakuntsik. Tsëmi kë qepa watakuna wakin sirweqninkunata ciëluta ëwayänampaq akranqampitaqa yarpachakuntsiktsu. c Üvas chakrachö trabajayänampaq tardina yëkoqkunapaq Jesus parlanqantam yarpantsik (Mat. 20:1-16). Trabäjuman tardina yëkoqkunaqa, tempränu yëkoqkunawan igualmi päguta chaskiyarqan. Tsënömi ciëlupaq akrashqakunawampis pasakunqa. Diosnintsik imë akrashqa kaptimpis puntata akrashqakunanöllam ciëluta ëwayanqa.

JESUS NINQANKUNATA CÄSUKUSHUN

18, 19. ¿Imakunatataq yachakurquntsik, y imatataq ruranantsik?

¹⁸ ¿Imatataq yachakurquntsik üshakunapaq y cabrakunapaq Jesus willakunqampita? Patsachö imëyaqpis kawëta shuyaraqkunam kallpachakuyänan, kanan y alläpa sufrimientu witsampis Diosnintsikta mana dejëpa sirwiyänampaq y cäsukuyänampaq. Alläpa sufrimientu witsanchömi Jesusqa decidinqa Diosta mana dejëpa pikuna sirwishqa kayanqanta y mana wanuypa kawayänampaq kaqta (Mat. 25:46).

¹⁹ Tsënöllam yachakurquntsik diez shipashkunapaq  y talentukunapaq. Diez shipashkunapaq willakunqanchömi Jesusqa nirqan, pitsqa shipashkuna alli alistakushqa y alkäbu alkäbulla këkäyanqanta. Tsëmi noviu chanqanyaq shuyaräyänampaq listu këkäyarqan. Peru juiciunnaq shipashkunataqa, mana alistakushqa kayanqampitam casakuy fiestaman yëkuyänanta noviu permitirqantsu. ¿Imatataq këpita yachakuntsik? Mana alli nunakunata Jesus ushakätsimunqan junaqyaq alli tsarakunapaqmi listu këkänantsik. Talentukunapaq parlanqanchönam Jesus nirqan ishkë esclävukuna alli trabajaq kayanqanta. Pëkunaqa patronnin munanqantam rurayarqan, tsëmi patronnimpa qellëninta miratsiyarqan y pëqa alläpam kushikurqan. Peru qela esclävutaqa mana trabajanqampitam wayimpita qarqurirqan. ¿Imatataq këpita yachakuntsik? Ushanan tiempuyaqmi Jehovä Diosnintsikta sirwirnin ocupädu këkänantsik. Tsëpitanam Jesusqa willakurqan, pëwan gobernamuyta munarqa, ciëlupaq akrashqakuna alkäbu alkäbulla këkäyänampaq. Pëkunaqa llapan shonqunkunawanmi munayan ciëluchö Jesuswan juntu këta. Y Armagedon guërra pasariptinqa, ‘Orqu Üshawanmi’ o Jesuswanmi casakuyanqa (2 Tes. 2:1; Apo. 19:9).

20. ¿Imanöraq Jehovä yanapamäshun Jesus ninqankunata cäsukushqaqa?

²⁰ Ichik tiempullachönam nunakunata Jesus juzganqa, peru manam mantsakänantsiktsu. Jehovä munanqanta rurashqaqa, “Tsurimpa puntanchö” kanantsikpaqmi poderninwan yanapamäshun (2 Cor. 4:7; Lüc. 21:36). Tsëmi ciëluchö o Patsachö kawanantsik kaptimpis, igualatsikuykunawan Jesus yachatsikunqantaqa cäsukunantsik. Tsëta rurashqaqa, Teytantsik Jehovämi alli ruraqtanö rikämäshun, y kuyakoq karmi jutintsikta librunman apuntanqa mana wanuypa kawakunantsikpaq (Dan. 12:1; Apo. 3:5).