1, 2. ¿Imanirtan qarakoq karnin kushishqa kanantsikpaq Jehovä kamamanqantsikqa alläpa shumaq?

 JEHOVÄ Diosnintsikqa kamamarquntsik qarakoq karnin kushishqa kanantsikpaqmi (Hëch. 20:35). Rasunmi, pillapis imallatapis qarëkamashqaqa kushikuntsikmi. Peru mas kushishqaqa kantsik wakinkunata yanaparnin o qarakoq karninmi. Y tsënö kanantsikpaq Jehovä kamamanqantsikqa alläpa shumaqmi. ¿Imanirtan tsënö nintsik?

² Këman pensarishun: juk shumaq wayiman yëkunëkipaq llävita entreguëkuyäshuptikiqa, ¿manatsuraq kushishqa yëkurinkiman? Tsënöllam Jehoväqa tsë llävita entregamaqnintsik cuenta, kikintsik ruranqantsikkunapita kushishqa kanapaq permitimarquntsik. Tsëmi wakinkunata yanapanantsikpaq kallpachakurqa, mas kushishqa kashun. ¿Manaku tsënö kanantsikpaq Jehovä kamamanqantsikqa alläpa shumaq? (Sal. 139:14).

3. ¿Imanirtan Bibliachöqa Jehoväpaq nin kushishqa Dios kanqanta?

³ Bibliachöqa nin, qarakoq nunaqa mas kushishqa kanqantam, tsëchi Jehovä Diosnintsikqa “kushishqa” Dios (1 Tim. 1:11). Pëmi puntataqa qarakoq karqan, y pënö qarakoqqa manam pipis kantsu. Tsëmi apostol Pabluqa kënö nirqan: “Pë permitiptinmi kawëkantsik, kuyukuntsik y kë munduchö këkantsik” (Hëch. 17:28). Y manam tsëllatsu, “llapan alli qarëkuna y imëka allikunaqa” ciëluchö këkaq Diospitam shamun (Sant. 1:17).

4. ¿Imaraq yanapamäshun mas kushishqa kanapaq?

 ⁴ ¿Imatataq rurashwan qarakoq karnin mas kushishqa kanapaq? Jehovänömi qarakoq kanantsik; tsëtam këchö yachakushun (Efes. 5:1). Peru ¿imatataq rurashwan qarakoq kanqantsikta o yanapanqantsikta mana valorayanqanta cuentata qokurqa? Tsëkunapita yachakunqantsikmi yanapamäshun qarakoq karnin sïguinapaq y mas kushishqa kanapaq.

JEHOVÄNÖ QARAKOQ KASHUN

5. ¿Ima wananqantsikkunatataq Jehovä faltatsimuntsu?

⁵ Jehovä alli kanqanta juk ishkëllata rikärishun. Jehoväqa alli karmi wananqantsikkunata faltatsimuntsu. Tsëmi mëtsikata mana bendicimarnintsikpis mikuyta, röpata y wayitaqa faltatsimuntsu (Sal. 4:8; Mat. 6:31-33; 1 Tim. 6:6-8). Peru ¿imanirtan Jehoväqa tsënö cuidamantsik?

6. ¿Imatataq yachakuntsik Mateu 6:25 y 26 textupita?

⁶ Jehoväqa cuidamantsik kuyamarnintsikmi. Yachakurishun Mateu 6:25 y 26 (leyi) textuchö Jesus parlanqampita. Tsë versïculukunachömi Jesus parlarqan pishqukunapaq y kënömi nirqan: “Manam murukuyantsu ni cosechayantsu, y manam gränukunata guardayantsu, tsënö kaptimpis, ciëluchö Teytankunaqa pacha juntatam katsin”. Tsëpitanam kënö nirqan: “¿Manaku qamkunaqa pishqukunapitapis mas väliyanki?”. Tsënö nirqa Jesus entiendikätsimantsik, animalkunapitapis masqa sirweqninkunata Jehovä valoranqantam. Animalkunatapis cuidëkarqa, ¿manatsuraq Jehoväqa masraq noqantsikta cuidamäshun? Jehoväqa Teytantsikmi y kuyamantsikmi; manam wananqantsikkunata faltatsimuntsu (Sal. 145:16; Mat. 6:32).

7. ¿Imakunata rurartan Jehovänöpis alli kanqantsikta rikätsikushwan? (Rikäri fötukunata).

⁷ Noqantsikpis Jehovänömi nuna mayintsikkunata kuyantsik, tsëmi puëdinqantsikmannö imallawampis yanaparinapaq kallpachakuntsik. Pensari, ¿mëqan wawqita o panitapis reqinkiku röpata o mikuyta faltapakuykaqta? Jehoväqa qamtam utilizäshuynikita puëdin tsë wawqita o panita yanaparinëkipaq. Jehoväpa sirweqninkunataqa reqimantsik, desgraciakunapa pasaqkunata yanapanqantsikpitam. Pensarishun COVID-19 qeshya kanqan witsan pasakunqanman. Wakin wawqi panikunaqa mikuywan, röpawan y mas cösaskunawanmi wanëkaq wawqi panikunata yanapayarqan. Y wakinkunanam Entëru Patsachö yachatsikuyta yanapakunapaq neq cäjaman qellëninkunata winayarqan juk nacionkunachö  desgraciakunapa pasëkaq wawqi panikunata yanapayänampaq. Tsë wawqi panikunaqa Hebrëus 13:16 ninqantam cumpliyarqan. Tsë textum kënö nin: “Ama qonqayëtsu alli kaqta rurëta y kapuyäshunqëkita wakinkunata rakipëta. Tsënö rurayanqëki qarëkunawanqa Teyta Dios alläpam kushikun”.

8. ¿Imakunatataq rurëta puëdintsik kallpanwan Jehovä yanapamashqa? (Filipensis 2:13).

⁸ Jehoväqa kallpanwanmi yanapamantsik. Jehoväqa alläpa poderösum y sirweqninkunataqa kushishqam kallpanwan yanapan (leyi Filipensis 2:13). ¿Imëllapis tentacionkunapa pasar, mana allikunapa pasar o cada junaq rurëkunachö yanapashunëkipaq Jehoväta mañakurqunkiku? Kallpanwan yanaparishuptikiqa, capazchi apostol Pablunö sientikurqëki. Pëmi kënö nirqan: “Teyta Dios poderninwan yanapamaptinmi, imata ruranäpaqpis kallpä kan” (Filip. 4:13).

9. ¿Imakunata rurartan Jehovänö alli kanqantsikta rikätsikushwan? (Rikäri fötuta).

⁹ Peru noqantsikqa manam Jehovänötsu poderösu kantsik, y manam wakinkunata kallpayoqta tikratsita puëdintsiktsu. Tsënö kaptimpis, alli kanqantsiktaqa rikätsikushwan puëdinqantsikmannö yanapakurninmi. Këllaman pensarishun: juk wawqi o juk pani awkin o chakwanna kar o qeshyapäkurnin ima rurëtapis mana puëdiptinqa, allichi yanaparishwan rantipakuyninkunawan o wayinchö rurëkunawan. Y puëdirninqa, Diosta adoranantsik wayichö limpiapakunapaq o altsapakuychö yanapakunapaqmi änikushwan. Kallpantsikta tsë rurëkunachö utilizarqa, wawqi panintsikkunatam yanapëkantsik.

10. ¿Imanötan wakinkunata parlakunqantsikwan animarishwan?

¹⁰ Parlakunqantsikwampis wakinkunataqa yanaparita o kallpayoq kayänampaq yanaparita puëdintsikmi. Musyankiku, ¿pillaraq shumaq parlapäriyänanta o consolariyänanta wanëkan? Musyarninqa, allichi kanman visitarinqëki, telëfunupa qayarinqëki o juk tarjëtata o mensäjita aparatsinqëki. Manam mëtsikataraqqa qellqanëkitsu, tsëpa rantinqa ichikllatapis llapan shonquykiwanmi ninëki. Llakishqa këkaq wawqi o paniqa shuyarëkan kuyayanqanta y valorayanqanta llapan shonqunkunawan niyänantam, tsëllam yanaparinqa Jehoväta sirwir sïguinampaq (Prov. 12:25; Efes. 4:29).

11. ¿Imanötan Jehoväqa yanapamantsik?

¹¹ Jehoväqa yachaqtam tikratsimantsik. Discïpulu Santiägum kënö nirqan: “Qamkunachö pipapis yachënin pishiptinqa, Teyta Diosta kutin kutin mañakutsun, y chaskinqam”. Y tsëpitanam kënö nirqan: “Pëqa llapankunatam mana medipashpa qaran, y manam mana allita parlartsu këkan” (Sant.  1:5; nöta). Jehoväqa manam kikinllatsu yachaq këta munan, tsëpa rantinqa kë versïculu ninqannömi yachaq kanantsikpaq yanapamantsik. Y yanapamarnintsikqa, manam noqantsikpaq “mana allita parlartsu këkan” o manam yanapamanqantsikpita rimamantsiktsu. Tsëpa rantinqa, yanapamänapaq mañakunantsiktam munan (Prov. 2:1-6).

12. ¿Imakunachötan wawqi panikunata yachatsita puëdintsik?

¹² ¿Y noqantsikqa Jehovä ruranqannö jukkunata yachatsita puëdishwantsuraq? (Sal. 32:8). Awmi, tukuynöpam yachatsita puëdintsik. Këllaman pensarishun: mushoq publicadorkunatam yachatsikuyänampaq yachatsita puëdintsik. Anciänu kaqkunanam siervu ministerialkunata y tsëllaraq bautizakushqa ollqukunata congregacionchö yanapakuyänampaq pacienciawan yachatsiyan. Y mëtsikaq wawqi panikunam yachayanqankunata jukkunata yachatsiyan, Diosta adoranantsik wayikunata rurëchö o altsëchö yanapakuyänampaq.

13. ¿Imanötan Jehovä ruranqannö rurashwan pitapis yachatsirnin?

¹³ Jukkunata yachatsirqa, Jehovä ruranqannömi ruranantsik. Yachakurinqantsiknöpis, Jehoväqa allim yachatsimantsik. Noqantsikpis tsëllaraq yachakuykaqkunataqa allim yachatsintsik. Y manam carguntsikta qechumänantsikta o qochimänantsikta mantsarninqa, janan jananllatsu yacharatsintsik. Ni manam kënöpis pensantsiktsu: “Kikillan yachakutsun. Noqatapis manam yachatsiyämarqantsu”. Tsënö pensanqantsiktaqa manam Jehoväta gustanmantsu. Pitapis yachatsirqa, manam imanö ruranampaq kaqta parlapärinantsikllatsu, sinöqa yachatsinapaqmi tiemputa rakinantsik (1 Tes. 2:8). Tsënöpam, “pëkunapis jukkunata yachatsiyänampaq listu këkäyanqa” (2 Tim. 2:1, 2). Llapan puëdinqantsikmannö ichik ichikllapis llapantsik yanapanakurqa, kushishqam kashun.

¿IMATATAQ RURASHWAN RURANQANTSIKTA MANA VALORAYANQANTA SIENTIRQA?

14. ¿Imanötan yanapanqantsikpita agradecikamashwan?

¹⁴ Pitapis yanaparishqaqa alläpam agradecikuyan, y masqa wawqi panintsikkunam agradecikuyan. Tukuynöpam agradecikamashwan: capazchi mensäjikunata o tarjëtakunata mandamashwan (Col. 3:15). Tsënö agradecikamashqaqa alläpam kushikuntsik.

15. ¿Imatataq yarpänantsik yanapanqantsikpita mana agradecikuyaptin?

¹⁵ Tsënö kaptimpis, wakinkunaqa manam yanapanqantsikpita o ruranqantsikkunapita agradecikamantsiktsu. Capazchi pitapis yanapanantsikrëkur tiempuntsikta rakirqantsik o qellënintsikta gastarqantsik. Tsëkunata rurashqapis, wakinkunaqa manam valorayantsu. Tsëqa, ¿imataraq rurashwan mana qelanäkurinapaq y wakinkunata yanapar sïguinapaq? Yarpäshun qallananchö yachakunqantsik Hëchus 20:35 textuman. Tsëchöqa manam nintsu wakinkuna noqantsikpaq rurayanqampita kushishqa kanqantsikta, tsëpa rantinqa mana valorayaptimpis, wakinkunapaq ruranqantsikkunapita kushishqa kanqantsiktam nimantsik. ¿Imanötan rurashwan? Juk ishkëllata rikärishun.

16. Pitapis yanaparqa, ¿imamantan yarpänantsik?

¹⁶ Pitapis yanaparqa, Jehovä ruranqannö rurëkanqantsikta yarpäshun. Jehovä Diosnintsikqa mana agradecikoqkunatapis yanapanmi (Mat. 5:43-48). Y Jehoväqa sirweqninkunatam änin, ‘kutitsiyänanta mana shuyarëpa pitapis’ yanapaqkunataqa alläpa väleq premiuwan bendicinampaq (Lüc. 6:35). Tsëmi pitapis yanapanqëkipita mana agradecikuyäshuptikiqa llakikunëkitsu.  Jehovä Diosnintsikqa pitapis kushishqa yanapanqëkipitam bendicishunki (2 Cor. 9:7; Prov. 19:17).

17. ¿Imaraq yanapamäshun Jehovänö pitapis kushishqa yanapanapaq? (Lücas 14:12-14).

¹⁷ Tsënöllam pitapis kushishqa yanapanapaqqa, Lücas 14:12 a 14 (leyi) textuchö ninqanta yarpanqantsik yanapamäshun. Kutitsimënintsikta puëdeqkunata yanapanqantsikqa allillam. Peru ¿imatataq rurashwan kutitsimänata munarnin pitapis yanapashqa karqa? Tsënö kaptinqa, Jesus consejamanqantsiktam cäsukunantsik. Pëqa nirqan kutitsimënintsikta mana puëdeqkunata kushishqa yanapanapaqmi. Tsëta rurarqa, Jehovä ruranqannömi rurëkäshun y kushishqam kashun. Tsënöllam kutitsimänata mana shuyarëpa pitapis yanaparqa, mana agradecikamashqapis kushishqalla yanapar sïguishun.

18. ¿Imaraq yanapamäshun wakinkunapaq mana allita mana pensanapaq?

¹⁸ Ama wakinkunapaq mana allita pensashuntsu (1 Cor. 13:7). Pitapis yanaparqa y mana agradecikamashqaqa, kënö pensashun: “¿Rasumpaku ruranqäta valorantsu, o qonqëkushqatsuraq agradecikamëta?”. Capaz wakinkunaqa imapapis pasarnin agradecikamënintsikta puëdiyashqatsu. O wakinkunapaqqa capazchi agradecikoq këqa fäciltsu. O wakinkunaqa capazchi jukkunata puntakunata yanapashqa karnin, pëkunata yanapayaptinqa penqakuyan. Imanö kaptimpis, kuyakoq karninmi mana allita pensanantsiktsu, tsëpa rantinqa kushishqam yanapar sïguinantsik (Efes. 4:2).

19, 20. ¿Imanirtan pacienciayoq kanantsik? (Rikäri fötukunata).

¹⁹ Pacienciakoq kashun. Gobernanti Salomonmi alli këpaq parlarnin kënö nirqan: “Ëwëkaq yakuman tantëkita jitarkuy, y tsëpita atska junaqkuna pasariptinmi tarinki” (Ecl. 11:1). ¿Imatataq tsënö ninqanwan entiendintsik? Capazchi wakinkunaqa yanapanqantsikpita atska tiempu pasariptinraq agradecikamäshun. Tsënö pasakunqanta rikärishun.

²⁰ Congregacionkunata watukaq wawqipa  warminmi tsëllaraq bautizakushqa paniman qellqarqan Jehoväta imëpis mana dejanampaq animarnin. Y tsëpita öchu watakuna pasariptinran tsë paniqa congregacionkunata watukaq wawqipa warminman cartakurqan. Kënömi nirqan: “Cartakëkämü tsë qellqamanqëki alläpa yanapamashqa kanqanta musyanëkipaqmi, y alläpam agradecikü. Qellqamunqëkiqa alläpa shumaqmi karqan, peru masqa shonqüyaq chärirqan churamunqëki textum, y tsëtaqa manam imëpis qonqarqötsu”. a Y tsëpitanam imëka mana allikunapa pasashqa kanqanta willarirnin kënö nirqan: “Höraqa Jehovätapis y llapan ruranäpaq kaqkunatapis dejëkuytam munarqä. Peru qellqamunqëki textuman yarparanqämi yanapamarqan mana dejanäpaq. Kë öchu watakunapam tsë qellqamanqëkiqa alläpa yanapamashqa”. Congregacionkunata watukaq wawqipa warminqa, ¡alläpachi kushikurqan tsë cartata chaskirir! Noqantsikpis capaz pillatapis yanaparquntsik, tsënö kaptinqa capazchi mëtsika tiempu pasariptinraq agradecikamäshun.

21. ¿Imanirtan Jehovä Diosnintsiknö wakinkunata yanapanantsikpaq kallpachakushwan?

²¹ Yachakurinqantsiknömi, Jehovä Diosnintsikqa kamamarquntsik wakinkunata yanaparnin kushishqa kanantsikpaq. Alläpam kushikuntsik wawqi panintsikkunata yanaparnin y yanapanqantsikpita agradecikamashqa. Peru mana agradecikamashqapis, alli kaqta ruranqantsikpitam kushikunantsik. Pitapis yanaparqa, 2 Crönicas 25:9 ninqantam yarpänantsik. Kënömi nin: “Jehovä Diosqa tsëpitapis masta tarinëkipaqmi yanapashuynikita puëdin”. Jehovä Diosnintsiknö alli yanapakoqqa, ¡manam pipis kantsu! Pë yanapamanqantsikpitaqa alläpam kushikuntsik. Tsëmi Jehovä Diosnintsik alli kanqannö jukkunata yanapanantsikpaq kallpachakur sïguinantsik.