1, 2. (1) ¿Imatatan juk yachaq nuna librunchö qellqarqan? (2) ¿Imatatan këchö yachakushun?

KANAN WITSANQA mëtsikaq nunakunam Jesusman creiyan, peru manam yachatsikunqantaqa cäsukuyantsu (2 Tim. 4:3, 4). Juk yachaq nunam juk libruta qellqanqanchö kënö nirqan: “Sitsun Jesus ninqannölla kanan witsankuna juk nuna Jesus jutiyoq ninman [...], ¿unë witsan nunakunanöllatsuraq chaskishwantsu karqan? [...] Awmi”.

² Jesus kawanqan witsanqa, mëtsikaq nunakunam yachatsikunqanta y milagrukunata ruranqanta rikäyarqan. Peru manam pëmanqa creikuyarqantsu. ¿Imanir? Punta kaqchömi imanir chikiyanqanta chuskuta yachakurqantsik. Y kananmi chusku masta yachakushun. Jina yachakushunmi Jesuspa qateqninkunata kanan witsan, imanir mana chaskiyanqanta. Y mana qelanänapaq ima yanapamänapaq kaqtapis.

3. ¿Imanirtan wakin nunakunaqa Jesusta chaskiyarqantsu?

³ Jesusqa Patsachö këkar tukuyläya nunakunatam reqirqan. Kapoqyoq y autoridäkunawanmi mikurqan. Peru imannaq y waktsakunawampis parlarqanmi, y llakiparqanmi “jutsasapa” nir reqiyanqan nunakunatapis. Wakin orgullösu nunakunaqa Jesus ruranqantam mana allipa rikäyaq. Tsëmi qateqninkunata kënö tapuyarqan: “¿Imanirtaq qamkunaqa impuestu cobrakoqkunawan y jutsasapakunawan mikuyanki y upuyanki?”. Tsënam Jesus kënö nirqan: “Sänu këkaqkunaqa manam doctorta wanayantsu, peru qeshyëkaqkunam sïqa. Manam alli kaqta ruraqkunata qayaqtsu shamurqö,  sinöqa arrepentikuyänampaq jutsasapakunata qayaqmi” (Lüc. 5:29-32).

4. Diospa willakoqnin Isaïas ninqannöpis, ¿imatatan unë witsan judïukunaqa musyayanmanna karqan?

⁴ ¿Imatatan Bibliachö nin? Diospa Akrashqan Patsaman manaraq shamuptinmi, Diospa willakoqnin Isaïas nunakuna mana chaskiyänampaq kaqta qellqarqan. “Pëtaqa nunakuna mana kaqpaq churarmi chaskiyarqantsu [...]. Manam pipis rikëta munarqantsu. Pëtaqa chikirmi pipis cäsurqantsu” (Is. 53:3). Këchö Dios willatsikunqannöpis, pëpa akrashqantaqa manam pipis rikëta munarqantsu. Tsëmi unë witsan judïukunaqa, Jesusta mana chaskiyänampaq kaqta musyayanmanna karqan.

5. ¿Imanötan Jesuspa qateqninkunata wakin nunakunaqa rikäyan?

⁵ ¿Kanan witsampis tsënöku pasakun? Awmi. Mëtsikaq pushakoq religiösukunam Bibliapa contran portakuykäyaptimpis, mas kapoqyoq kaqkunata, markankunachö mas yachaqkunata o reqishqa kaqkunatam kushishqa chaskiyan. Tsë pushakoq religiösukunaqa Diosta kushishqa sirwiyaptin, y alli portakuyaptimpis Jehoväpa sirweqninkunataqa kë munduchö mana reqishqa kayaptinmi despreciayan. Apostol Pablu ninqannöpis Diosqa despreciashqa kaqkunatam akrarqan (1 Cor. 1:26-29). Peru Jehoväpaqqa llapan sirweqninkunam alläpa väliyan.

6. ¿Imatatan Jesus Mateu 11:25, 26 textuchö nirqan, y imanötan noqantsikpis pënölla rurashwan?

⁶ ¿Imatan yanapashunki mana qelanäkurinëkipaq? (Leyi Mateu 11:25, 26). Diospa sirweqninkunapaq nunakuna parlayanqanta ama cäsuytsu. Voluntäninta rurayänampaq humildi kaqkunata Jehovä akranqanta yarpë (Sal. 138:6). Y despreciashqa nunakunawan Jehovä imëkata lograshqa kanqanman yarpäri.

7. ¿Imanirtan Jesusqa fariseukunata ishkë qaqlla nirqan, y pëkunaqa imatatan niyarqan?

⁷ Mana mantsakushpam Jesusqa, kawanqan witsan pushakoq religiösukunata mana alli rurayanqanta rikätsirqan. Këllaman pensarishun, fariseukunatam teytankunata cuidayänampa rantin makinkunata paqakuyänampaq o awikuyänampaq mas yarpachakuyanqampitam ishkë qaqllakuna nirqan (Mat. 15:1-11). Jesus ninqampita qateqninkuna mantsakarmi pëta kënö niyarqan: “¿Cuentata qokurqunkiku ninqëkita wiyëkurnin fariseukuna ofendikuyanqanta?”. Jesusnam kënö nirqan: “Ciëluchö këkaq Teytä mana plantanqan kaq plantaqa, llupishqam kanqa. Jaqiriyë, wisku pushakoqkunam pëkunaqa kayan. Tsëmi, sitsun juk wisku juk wiskuta pushanqa, ishkanmi uchkuman jeqakurkuyanqa” (Mat. 15:12-14; nöta). Pushakoq religiösukuna cölerakuyaptimpis, Jesusqa rasumpa kaqta parlarmi sïguirqan.

8. ¿Imanötan Jesusqa llapan religionkunachö yachatsikuyanqanta Dios mana chaskinqanta rikätsikurqan?

⁸ Jesusqa mana allita yachatsikuyanqantapis clärum rikätsikurqan. Pëqa manam llapan religionkunachö yachatsikuyanqanta, Dios chaskinqantatsu nirqan. Tsëpa rantinqa ushakëman chätsikoq anchu nänipa, mëtsikaq ëwayänampaq kaqta y kawëman chätsikoq llanu nänipa wallkaqlla ëwayänampaq kaqtam nirqan (Mat. 7:13, 14). Wakinkuna Diosta sirweq tukuyänampaq kaqtapis nirqanmi, tsëmi kënö nirqan: “Mäkoq mäkoqlla kayë Diospa willakoqnin tukoqkunapita, porqui pëkunaqa üshanö vistishqam qamkunaman shayämun, peru rurimpaqa mallaqashqa atoqnömi kayan.  Rurëninkunapitam pëkunataqa reqiyanki” (Mat. 7:15-20).

9. ¿Imakunapaqtan Jesusqa nirqan mana allita yachatsikuykäyanqanta?

⁹ ¿Imatatan Bibliachö nin? Bibliachö qellqarëkaq Dios juk willatsikunqanchömi, Diospa Akrashqan Jehoväpa templunta alläpa kuyanampaq kaqta nirqan (Sal. 69:9; Juan 2:14-17). Tsënö kuyarmi templuchö mana alli yachatsikuyanqanta y mana alli rurayanqanta cläru nirqan. Këllata yarpärishun, fariseukunaqa alma mana wanunqantam niyaq. Peru Jesusqa wanushqakuna punuykaq cuenta këkäyanqantam nirqan (Juan 11:11). Saduceukunaqa manam wanushqakuna kawayämunampaq kaqman creiyaqtsu. Peru Jesusqa amïgun Läzarutam kawaritsimurqan (Juan 11:43, 44; Hëch. 23:8). Fariseukunaqa Diosrëkur y destinashqana kaptin, imapis pasakunqantam niyaq. Peru Jesusqa Diosta sirwiyänampaq o mana sirwiyänampaq, nunakuna akrëta puëdiyanqantam yachatsikurqan (Mat. 11:28).

10. ¿Imanirtan mëtsikaq nunakuna yachatsikunqantsikta mana alli rikäyan?

¹⁰ ¿Kanan witsampis tsënöku pasakun? Awmi. Mëtsikaq nunakunam cölerakuyan Bibliachö ninqanwan, religionninkunachö mana allita yachatsikuykäyanqanta rikätsishqa. Pushakoq religiösukunaqa mana alli nunakunata infiernuchö Dios castiganqanta nirmi mantsakätsiyan. Kuyakoq Jehovä Diosta sirweqkunaqa, tsë yachatsikuyanqan mana alli kanqantam nintsik. Mëtsikaq religionkunam alma mana wanunqanta yachatsikuyan. Pëkuna yachatsikuyanqan rasumpa kaptinqa, manachi wanushqakuna kawariyämunanta shuyarashwantsu. Peru noqantsikqa Bibliachö tsënö mana ninqantam yachatsikuntsik. Mëtsika religionkunachömi noqantsikqa destinashqana kanqantsikta yachatsikuyan. Peru noqantsikqa Diosta sirwinantsikpaq, kikintsik akrakunapaq kaqtam yachatsikuntsik. Pushakoq religiösukunaqa, ¿ima niyantaq tsënö yachatsikushqa? Alläpam cölerakuyan.

11. Juan 8:45-47 textuchö Jesus ninqannöpis, ¿sirweqninkuna imata rurayänantatan Dios shuyaran?

 ¹¹ ¿Imatan yanapashunki mana qelanäkurinëkipaq? Diospita rasumpa kaqta yachakunqëkita kuyarqa, pë ninqantam wiyakunëki (leyi Juan 8:45-47). Ama Satanas ruranqannö, rasumpa kaq yachakunqëkita dejëtsu (Juan 8:44). Diosqa, sirweqninkuna Jesusnölla rurayänantam shuyaran. Tsëmi kënö nin: “Alläpa mana alli kaqta melanäyë; alli kaqman laqakäyë” (Rom. 12:9; Heb. 1:9).

12. ¿Imanirtan mëtsikaq judïukunaqa Jesusta Diospa Akrashqantanö chaskiyarqantsu?

¹² ¿Imanir mastan Jesus kawanqan witsan judïukunaqa pëta chaskiyarqantsu? Apostol Pablum kënö nirqan: “Noqantsikqa Cristu qeruchö wanunqantam willakuntsik; tsëqa judïukunapaqqa trompisatsikoq rumim” (1 Cor. 1:23). ¿Imanirtan pëkunapaqqa trompisatsikoq rumi cuenta karqan? Pëkunapaqqa suwakoqkuna y jutsata ruraqkuna qeruchö warkushqa kayänan kaptinmi. Tsëmi creiyarqantsu Diospa Akrashqan kanqantaqa (Deut. 21:22, 23).

13. Jesusta mana chaskeq judïukunaqa, ¿imatatan creita munayarqantsu?

¹³ Diospa Akrashqantanö Jesusta mana chaskeq judïukunaqa, jutsannaq kanqanta y mana kaqpita tumpëkäyanqanta manam creita munayarqantsu. Judïukunapa Cortinchö mandakoqkunaqa rasllam juntakäriyarqan y manam leykuna ninqannötsu juzgayarqan (Lüc. 22:54; Juan 18:24). Imapita acusëkäyanqanta mana shumaq musyapakurmi, kikin juezkuna Jesuspa contran parlaq mana rasumpa willakuykunata ashiyarqan. Imatapis mana tarirnam, mandakoq kaq sacerdöti Jesusta llutanta parlatsita procurarqan. Y tsëta ruranqanqa Leypa contranmi këkarqan (Mat. 26:59; Mar. 14:55-64). Y Jesus kawariramuptinnam, mana allita ruraq tsë juezkunaqa qateqninkuna Jesuspa ayanta paqaspa ëwëkur apakushqa kayanqanta nir  ulikuyänampaq o llullakuyänampaq; tsë täpaq soldädukunata mëtsika qellëta pagayänampaq äniyarqan (Mat. 28:11-15).

14. Diospa akrashqanta, ¿ima nunatanö wanutsiyänampaq kaqtan qellqarëkarqanna?

¹⁴ ¿Imatatan Bibliachö nin? Diospa Akrashqam wanunampaq kaqta, mëtsikaq judïukuna mana wanunampaq kaqta shuyaräyaptimpis Bibliachö imata willakushqana kanqanta rikärishun. “Kikin salvakunanpa rantinmi jutsayuq nunanölla wanurqan. Nunakuna rëkur wanurmi pëkunata perdonanäpaq mañakamarqan” (Is. 53:12). Tsëmi jutsata ruraqtanö Jesusta wanutsiyanqanrëkur Diospa Akrashqantanö judïukuna mana chaskiyanqanqa allitsu karqan.

15. ¿Jehoväpa testïgunkunapaq ima niyanqanrëkurtan wakinkunaqa jukläyapa rikäyan?

¹⁵ ¿Kanan witsampis tsënöku pasakun? Awmi. Jehoväpa testïgunkunatapis Jesustanöllam mana kaqpita acusayashqa y condenayashqa. Unë pasanqankunata yarpärishun. 1930 a 1940 watakunam Estädus Unïdus nacionchö, Diosta librina adoranapaq Cortikunaman kutin kutin ëwarqantsik. Wakin juezkuna contrantsikchö këkäyanqanqa, clärum rikakarqan. Canadä nacionpa Quebec markanchömi, gobiernu y catölicu religion juntakäyarqan Diospita yachatsikunata michämänapaq. Diospa Gobiernumpita yachatsikuyanqanrëkurmi, mëtsikaq wawqi panikunata carcelayarqan. Alemaniachönam mëtsikaq jövin wawqi panikunata näzi gobiernu wanutsirqan. Y qepa watakunachönam, Bibliapita yachatsikuyanqanrëkur Rusiachö mëtsikaq wawqi panikunata condenayashqa y carcelayashqa. Y rüsu idiömachö Mushoq Patsachö Kawaqkunapaq Diospa Palabran neq Bibliachö Diospa jutin Jehovä yuriptinmi Bibliata mana utilizänapaq autoridäkuna niyashqa.

16. 1 Juan 4:1 ninqannöpis, ¿imanirtan creishwantsu Jehoväpa sirweqninkunapaq ulikuyanqanta o llullakuyanqantaqa?

¹⁶ ¿Imatan yanapashunki mana qelanäkurinëkipaq? Imapis imanö kanqanta alli musyë. Jirkapita yachatsikunqanchömi Jesusqa ulikurkur o llullakurkur imëka mana allikunata parlayänampaq kaqta nirqan (Mat. 5:11). Tsë llapantaqa Satanasmi yuritsin. Rasumpa kaqta kuyashqam chikimaqnintsikkuna, mana rasumpa kaqta parlayänampaq inkitan (Rev. 12:9, 10). Ama tsëkunata creitsu, ama permititsu mantsakätsiyäshunëkita ni markäkïnikita ni yärakuynikita ushakätsiyänanta (leyi 1 Juan 4:1).

17. Jesus manaraq wanuptin pasakunqanta rikaqkunaqa, ¿imatatan pensayanman karqan?

¹⁷ Wanutsiyänampaq tsariyanqan paqasmi, 12 apostolninkunapita juknin kaq traicionarqan. Juknin kaqnam kima kuti negarqan, y llapankuna dejariyarqan (Mat. 26:14-16, 47, 56, 75). Tsëkuna pasakunampaq kaqta nishqa kaptinmi, pëqa mantsakarqantsu (Juan 6:64; 13:21, 26, 38; 16:32). Tsëta rikarqa, itsa wakinkunaqa kënö pensayanman karqan: “Jesuspa apostolninkunapis tsëta rurayaptinqa, manam pëkunanö këta munätsu”.

18. ¿Dios imata musyatsikunqankunatam cumplikarqan Jesus manaraq wanuptin?

¹⁸ ¿Imatatan Bibliachö nin? Jesus Patsaman shamunampaq atska watakuna pishikaptinmi, Jehoväqa Palabranchö musyatsikushqana karqan akrashqanta kima chunka pläta metalrëkur traicionayänampaq kaqta (Zac. 11:12, 13). Traicionaqninqa juknin kaq amïgunmi kanan karqan (Sal. 41:9). Zacarïaspis kënömi nirqan: “Üsha mitsiqta wanuratsiptïmi üshankuna  wakpa këpa ewkuyanqa” (Zac. 13:7). Alli shonquyoq nunakunaqa, pëman mas markäkuyänan o yärakuyänan karqan. Tsëpa rantinqa Dios musyatsikunqankuna cumplikaqta rikarmi, pëman mas markäkuyänan karqan.

19. ¿Imatatan alli shonquyoq nunakunaqa musyayan?

¹⁹ ¿Kanan witsampis tsënöku pasakun? Awmi. Jehoväpa reqishqa juk ishkë Testïgunkunam rakikäyashqa, pëpa contran churakäyashqa y wakinkunatapis pëkunanölla rurayänampaq inkitayashqa. Internetpa, televisionpa, radiupa y jukkunapam noqantsikpaq mana rasumpa kaqta willakuyashqa. Peru alli shonquyoq nunakunaqa manam tsëta creiyantsu. Tsëpa rantinqa, tsënö nunakuna yurinampaq Bibliachö willakushqana kanqantam yarpäyan (Mat. 24:24; 2 Pëd. 2:18-22).

20. Jehoväpita rakikäkureqkuna mana engañamänapaqqa, ¿imatan yanapamäshun? (2 Timoteu 4:4, 5).

²⁰ ¿Imatan yanapashunki mana qelanäkurinëkipaq? Diosman mas markäkunëkipaq Bibliata estudiarnin sïgui. Mana dejëpa mañakuy y ruranantsikpaq Jehovä nimanqantsikta rurarnin sïgui (leyi 2 Timoteu 4:4, 5). Diosman markäkur o yärakurqa, noqantsikpaq mana allita willakuyanqampita manam mantsakäshuntsu (Is. 28:16). Jehoväta, Palabranta y wawqi panintsikkunata kuyanqantsikmi Jehoväpita rakikäkurishqa kaqkuna mana engañamänapaq yanapamäshun.

21. ¿Nunakuna Diospita yachatsikushqa mana chaskimashqapis, imapitatan següru këkantsik?

²¹ Punta cristiänukuna kawayanqan witsanqa, mëtsikaqmi Jesusta wiyayarqantsu ni chaskiyarqantsu. Peru wakinqa Diospa akrashqantanömi chaskiyarqan. Y pëkunachöqa këkäyarqan Judïukunapa Precisaq Cortimpita juk juez y “mëtsikaq sacerdötikunam” (Hëch. 6:7; Mat. 27:57-60; Mar. 15:43). Tsënöllam kanan witsampis, mëtsikaq nunakuna Jesuspa qateqninkuna kayänampaq churapakäyashqa. Tsëtaqa rurayashqa Diospita rasumpa kaqta yachakuyanqanta kuyarninmi. Diospa Palabranmi kënö nin: “Leynikikunata kuyaqkunaqa kushishqam kawakuyan. Asïllaqa manam pipis pëkunata jutsata ruratsintsu” (Sal. 119:165).