1. ¿Imatatan qateqninkunata Jesus yachatsirqan y pëkunaqa imatatan rurayarqan? (Jana qaranchö këkaq dibüjuta rikäri).

PATSACHÖ kanqan witsanqa, Jesusqa Diospita kushishqam yachatsikoq y qateqninkunapis tsënölla yachatsikuyänantam munan (Juan 4:35, 36). Qateqninkunawan Jesus kanqan witsanqa, pëkunaqa kushishqam Diospita yachatsikuyaq (Lüc. 10:1, 5-11, 17). Peru Jesusta wanuratsiyaptinqa, qelanäkuriyarqanmi (Juan 16:32). Kawarirkamurninqa, Diospita yachatsikur sïguiyänampaqmi Jesusqa pëkunata nirqan. Y ciëluchöna këkaptinqa, qateqninkunaqa kushishqam yachatsikurnin sïguiyarqan, tsëmi chikeqninkunaqa kënö niyarqan: “Entëru Jerusalenmanmi yachatsikïnikikunata chäratsiyarqunki” (Hëch. 5:28).

2. ¿Imanötan Jehoväqa pëpita yachatsikuyanqanta bendicishqa?

² Punta cristiänukuna Diospita yachatsikuyänampaqqa, Jesusmi dirigirqan, y Jehovä bendiciptinmi pëkuna yachatsikuyanqanta mëtsikaq wiyakuyarqan. Këllata yarpärishun, 33 wata Pentecostes fiestachömi, tres milnö nunakuna bautizakuyarqan (Hëch. 2:41). Y Jesuspa qateqninkunaqa mas mirarmi sïguiyarqan (Hëch. 6:7). Peru ushanan junaqkunachö mëtsikaq nunakuna, Diospita yachatsikuyanqanta wiyakuyänampaq kaqtam Jesusqa willakurqan (Juan 14:12; Hëch. 1:8).

3, 4. (1) ¿Imanirtan wakin sitiukunachöqa Diospita yachatsikuyqa fäciltsu kanman? (2) ¿Imatatan këchö yachakushun?

³ Llapantsikmi Diospita kushishqa yachatsikunapaqqa kallpachakuntsik. Wakin sitiukunachöqa, mëtsika nunakuna estudiëta munayaptinmi tsënö yachatsikuyqa fäcil-lla. Tsëmi wawqi panikunaqa, Bibliapita yachatsiyänampaq wakin nunakunata shuyäriyänampaq niyan. Peru wakin sitiukunachö,  nunakunata wayinkunachö mana tariyaptin, y Bibliapita yachakuyta mana munaqnö kayaptinmi, Diospita kushishqa yachatsikur sïguiyänampaqqa fäciltsu.

⁴ Täranqantsik markachö Diospita yachatsikuy fäcil mana kaptinqa, imakunata ruranapaq këchö yachakunqantsikmi yanapamäshun. Mas nunakunawan parlayänampaq wawqi panintsikkuna imata rurayanqanta, y nunakuna wiyamënintsikta mana munayaptimpis, imanir Diospita kushishqalla yachatsikur sïguinapaq kaqtam yachakushun.

5. Jehoväpa wakin testïgunkunaqa, ¿imakunapatan Diospita yachatsikuyanqanchö pasayan?

⁵ Jehoväpa testïgunkunapaqqa, mas watakuna pasanqannömi, nunakunata wayinkunachö tariyänanqa mas difïcil. Wakinqa, mëtsika pïsukunayoq wayikunachö y mana yëkatsikuyanqan sitiukunachömi täräyan. Tsë wayikunachö y sitiukunachöqa, täpaqkunam kayan. Y tsëchö täraqkuna pipis watukanampaq kaqta pëkunata mana niyaptinqa, manam pitapis yëkatsiyantsu. Wakin sitiukunachöqa, wawqi panintsikkunaqa wayin wayinmi ëwayan, tsënö kaptimpis wallkaqllatam tariyan. Wakin wawqi panintsikkunanam wallqaqlla täraq markakunachö yachatsikuyan. Itsa tsë sitiukunachöqa, karutaraq wayikunaman ëwayan, y chärirninqa pitapis tariyantsu. Tsë sitiukunachö tärarninqa, ¿imatatan rurashwan mana qelanäkurinapaq y mas nunakunawan parlanapaq?

6. ¿Imachötan Diospita yachatsikuyqa pescäduta tsariwan igualan?

⁶ Jesusqa pescäduta tsariwanmi, Diospita yachatsikuyta igualatsirqan (Mar. 1:17). Pescäduta tsareq nuna atska junaqkunapa pescäduta mana tsarirpis, manam qelanäkurintsu. Tsëpa rantinqa, juk hörakunachö, juk sitiukunachö y juknöpam tsarita tïran. Diospita yachatsikurninqa, noqantsikpis tsënöllam rurashwan.

7. ¿Imatan pasakunman juk hörakunachö Diospita yachatsikushqaqa?

⁷ Juk hörakuna yachatsikushun. Wayinkunachö kayänan hörakuna Diospita yachatsikoq yarqushqaqa, mas nunakunawanmi parlashun. Nunakunaqa, imë höra karpis wayinkunamanmi kutiyanqa. Mëtsikaq wawqi panikunam, tardikunapa o paqaskunapa mas nunakunata tariyan. Jina nunakunapaqa, tsë höram mas tiempunkuna kayäpun parlakuyänampaq. O creikoqkunata rikaq wawqi Davidnöpis rurashwanmi. Juk rätu yachatsikuykarmi, mana kichapuyanqan wayikunaman yanaqinwan kutiyan. Pëmi kënö nin: “Tsë wayikunaman qayakoq yapë kutiyaptï mëtsikaq nunakunata tariyanqäpitam alläpa kushikuyä”. *

8. ¿Imanötan Eclesiastes 11:6 ninqanta Diospita yachatsikunqantsikchö yarpashwan?

⁸ Kanan yachakuykanqantsikpaq Bibliachö ninqanqa, mana qelanäkurinapaqmi yarpätsimantsik (leyi Eclesiastes 11:6, TNM). Qepa pärrafuchö parlanqantsik wawqi Davidqa, manam qelanäkurirqantsu. Atska kutinqanchöran, pillatapis wayinchö tarirqan. Bibliapita yachakuyta munaq nunatam tarirqan y tsë nunam kënö nirqan: “Këchöqa puwaq watanam tärä y kananraqmi Jehoväpa testïgunkuna watukayäman”. Davidmi kënö nin: “Juk hörakunachö kutirqa, Diospita yachakuyta munaq nunakunatam tarirqö”.

9. ¿Imatatan wawqi panintsikkuna rurayan wayinkunachö mana tariyanqan nunakunata yachatsiyänampaq?

 ⁹ Juk lädukunachö yachatsikushun. Wakin wawqi panikunaqa juk lädukunachömi yachatsikuyan wayinkunachö mana tariyanqan nunakunata yachatsiyänampaq. Këllaman pensarishun: mëtsika pïsukunayoq wayikunachö yachatsikuyta mana puëdirmi, wakinkunaqa tsë cällikunachö carrïtukunawan yachatsikuyan. Tsëta rurarmi, mëtsika pïsukunayoq wayikunachö täraq nunakunata Diospita yachatsiyashqa. Mëtsikaq wawqi panikunam parquikunachö, rantikuyanqan sitiukunachö, y negociukunata rurayanqankunachö wiyakuyta munaq nunakunata tariyashqa. Bolivia nacionchö congregacionkunata watukarnin yanapakoq wawqi Floiranmi kënö nin: “La üna de la tardipita tres de la tardiyaq mercädukunachö y tiendakunachö rantikoqkuna ichik mas jamariyaptinmi, pëkunata watukaq ëwayä. Wiyakuyta munaq nunakunatam tariyä, y Bibliata estudiatsirnimpis qallayämi”.

10. ¿Imatatan rurashwan llapan nunakunata yachatsinapaqqa?

¹⁰ Juknöpa yachatsikushun. Itsa yachatsikunqantsik sitiuchö nunakunata kutin kutin parlapëta procurarquntsik. Juk hörakunachö ëwashqa karpis, itsa mana tarirquntsiktsu. Tsëqa, ¿ima maskunatatan rurashwan pëkunata yachatsinantsikpaq? Katarïna jutiyoq panintsikmi kënö nin: “Wayinkunachö mana tarinqä nunakunapaqmi cartan qellqä, y tsëchömi imapita parlapëta munanqäta nï”. ¿Imatatan këpita yachakuntsik? Imëkanöpam täranqantsik  sitiukunachö nunakunata yachatsita procuranantsik.

11. ¿Imanirtan wakinkunaqa yachatsikunqantsikta wiyakuyta munayantsu?

¹¹ Wakin nunakunaqa manam yachatsikunqantsikta wiyakuyta munayantsu. Diospita y Bibliapita yachakuyanqanqa imachöpis mana yanapanampaq kaqtam niyan. Itsa imëka sufrimientukunata rikar Diosman creiyantsu y pushakoq religiösukunata lluta kawakoqta rikar Bibliapita yachakuyta munayantsu. Wakinkunanam trabäjunkunaman, familiankunaman o imëka problëmankunaman alläpa yarpachakurnin, Biblia yanapanampaq kaqta pensayantsu. ¿Imanötan kushishqalla yachatsikurnin sïguishwan yachatsikunqantsikta nunakuna mana kaqpaq churëkäyaptinqa?

12. ¿Imanötan Filipensis 2:4 ninqannö Diospita yachatsikurnin rurashwan?

¹² Nunakunapaq yarpachakushun. Qallananchö wiyakuyta mana munaq nunakunam, tsëpitaqa pëkunaman yarpachakunqantsikta rikar wiyakuyta munayan (leyi Filipensis 2:4). Qanchis kaq pärrafuchö parlanqantsikpaq wawqi Davidmi kënö nin: “Yachatsikunqäta wiyakuyta mana munayanqanta niyämaptinmi, Bibliäkunatawan publicacionnïkunata malëtäkunaman winarkur, imanir tsënö pensayanqanta tapuyä”. Nunakunaqa musyariyanmi pëkunapaq pillapis yarpachakuptinqa. Itsa ima ninqantsiktapis qonqariyanqa, peru pëkunapaq yarpachakunqantsiktaqa manam. Parlapänantsikta mana dejamashqapis, imanö portakunqantsikwan y imanö tratanqantsikwanmi pëkunaman yarpachakunqantsikta rikätsikushwan.

13. ¿Imatatan rurashwan yachatsikunqantsikta nunakuna mas wiyakuyta munayänampaq?

¹³ Jina nunakunaman yarpachakunqantsiktaqa rikätsikuntsik, yachakuyta munayänampaqnö y Diospita yachatsinqantsik imachö yanapanampaq kaqta rikätsirmi. Këllaman pensarishun: ¿imallapis rikätsikunku tsë nuna wamrakunayoq kanqanta? Itsa teyta kaqkunaqa, wamrankunata imanö wätayänampaq, o familianchö mas kushishqa kawakuyänampaq Bibliachö consejakunqanta wiyakuyta munayanqa. Y juk punkuta mëtsika lläviyoqta rikarqa, ¿imapitatan tsë wayiyoqta parlapashwan? Suwakoqkuna kayanqampita y següru manana kawakunqantsikpita parlapärirmi, tsëkuna chipyëpa ushakänampaq kaqta Bibliawan entiendiratsishwan. Imanö kaptimpis, nunakuna wiyamashqaqa, Bibliachö ninqan pëkunata yanapëta puëdinampaq kaqta  entienditsishun. Chunka kaq pärrafuchö parlanqantsikpaq pani Katarïnam kënö nin: “Diospita yachakunqä imanö yanapamanqanmanmi yarpä”. Tsëta yarparmi cläru parlakun y nunakunapis tsëtam rikäyan.

14. Proverbius 27:17 ninqannöpis, ¿imanötan yanapamantsik yachatsikoq japallantsik mana ëwanqantsik?

¹⁴ Wakin wawqi panintsikkunapita yachakushun. Punta cristiänukuna kawayanqan witsanmi, nunakunata Diospita imanö yachatsinqannölla, Timoteu yachatsikunampaq kaqta apostol Pablu nirqan. Y tsënölla wakinkunapis rurayänampaq yanapanampaqmi nirqan (1 Cor. 4:17). Timoteunöllam Diosta unëpana sirweq wawqi panintsikkunapita yachakuyta puëdintsik (leyi Proverbius 27:17). Shawn jutiyoq wawqintsik imata ruranqanta rikärishun. Pëqa precursormi karqan y religionninkunawan kushishqa këkaq nunakunatam Diospita yachatsirqan. ¿Imatan yanaparqan mana qelanäkurinampaq? Pëmi kënö willakun: “Höra hörallam japallä yachatsikoq kä. Juk wayichö yachatsikurir juk wayiman ëwayanqäyaqqa, mas alli imanö yachatsikuyänäpaq kaqta parlarmi ëwayaq kayä. Juk nunawan imapita imanö parlayanqätam yarpäyaq kayä, y tsënölla pensaq nunata tarirnin, imanö parlapäyänäpaq kaqtam parlayaq kayä”.

15. ¿Imanirtan yachatsikoq manaraq ëwarnin Diosman mañakunantsik?

¹⁵ Yanapamänapaq Jehoväta mañakushun. Diospita yachatsikoq manaraq ëwarnin, yanapamänapaq Jehoväta mañakushun. Poderninwan mana yanapamashqaqa manam ima rurëtapis puëdishwantsu (Sal. 127:1; Lüc. 11:13). Jehoväta mañakurqa, imachö yanapamänapaq kaqta mañakushun. Itsa mañakushwan alli shonquyoq y wiyakuyta munaq nunata tarinapaq. Tsëpitaqa llapan puëdinqantsik nunakunata Diospita yachatsishun.

16. Bibliata japallantsik estudianqantsikqa, ¿imanötan Diospita kushishqa yachatsikunapaq yanapamantsik?

¹⁶ Bibliata japallantsik estudianapaq tiemputa patsätsishun. Diospa Palabranmi kënö nin: “Tsënöpa Diospa alli, pëta kushitseq y chipyëpa alli munënin ima kanqanta kikikikuna rikäyänëkipaq” (Rom. 12:2). Diospita rasumpa kaqta yachakuykanqantsikta següru karninqa, mas clärum Diospitapis yachatsikushun. Katarïnam kënö nin: “Pasaq watakunachömi cuentata qokurirqä, Diosman mas markäkunäpaq Bibliapita mas yachakuyta necesitanqäta. Tsëmi maslla yachakurqä Dios Kamamaqnintsik kanqampaq, Biblia Diospa Palabran kanqampaq y kë Patsachö juk grüpu sirweqninkuna kanqampaq”. Bibliata japallan estudianqan Diosman markäkunampaq, y Diospita kushishqa yachatsikunampaq yanapanqantam Katarïna nin.

17. ¿Imanirtan Jesusqa Diospita yachatsikurnin kushishqa karqan?

¹⁷ Wakin nunakuna wiyëta mana munayaptimpis, Jesusqa kushishqam yachatsikurnin sïguirqan. ¿Imanirtan tsënö kushishqaqa yachatsikurqan? Nunakuna Diospita rasumpa kaqta yachakuyta necesitäyanqanta y pëkunata yanapëta munarmi tsënöqa karqan. Jina musyarqanmi qallananllachö wiyakuyta mana munaq nunakunapis, tsëpitaqa yachakuyta munayänampaq kaqta. Jesuspa familiampis mas watakuna pasanqanchöran pëpa qateqnin tikrayarqan. Patsachö kima wata pullan yachatsikunqanchöqa, manam ni mëqan wawqinkunapis pëpa qateqninman tikrayarqantsu (Juan 7:5). Peru kawariramunqanchöqa  pëkunapis creikurmi qallëkuyarqan (Hëch. 1:14).

18. ¿Imanirtan Diospita yachatsikurnin sïguintsik?

¹⁸ Diospita yachatsikunqantsikta pï wiyakunampaq kaqtaqa manam musyantsiktsu. Wakin nunakunaqa mas watakuna pasanqanchöran Bibliapita yachakuyta munayan. Hasta wiyamënintsikta mana munaqkunapis alli portakunqantsikta y kushishqalla kanqantsikta rikarnin, itsa tiempuwanqa ‘Diosta alabayanqa’ (1 Pëd. 2:12).

19. 1 Corintius 3:6 y 7 ninqannöpis, ¿imatatan yarpänantsik?

¹⁹ Diospita yachatsinqantsikkunata plantaq y regaq cuenta kashqapis, ‘Dios winatsir sïguinqantam’ yarpänantsik (leyi 1 Corintius 3:6, 7). Etiopïa nacionpita Getahun jutiyoq wawqim kënö nin: “Diospita manalla yachatsikuyanqan sitiuchömi, 20 wata masmi japallälla Jehoväpa testïgun karqä. Peru kananqa 14 nunakunanam Diospita yachatsikoq kayan. Warmï, kiman wamräkuna y 9 nunakunam bautizakuyashqana. Y reunionkunamampis treinta y dosnömi shayämun”. Getahunqa manam Diospita yachatsikuyta qelanärirqantsu. Tsëpa rantinqa, kikin Jehovä sirweqninkunata akranampaq kaqtam pacienciawan shuyararqan (Juan 6:44).

20. ¿Imanötan juk mïna juchuptin kawëkaq nunakunata ashinapaq yanapakoqkunanö kantsik?

²⁰ Jehoväpaqqa, llapan nunakunapa kawëninmi välin. Kushikuntsikmi, Tsurin Jesuswan tukuy nacionpita nunakunata, ushakë junaq manaraq chämuptin yachatsikunapaq nimanqantsikpita (Ageu 2:7). Diospita yachatsikurqa, juk mïna juchuptin, nunakuna salvakuyänampaq yanapakoqnömi kantsik. Tsë juchushqa mïnachö kawëkaq nunakunata wakinlla tariyaptimpis, llapankunam yanapakuyan. Tsënöllam Diospita yachatsikunqantsikchöpis pasakun, manam musyantsiktsu Satanaspa mundumpita ëkaq nunakuna salvashqa kayänampaq kaqta. Peru Jehoväqa, mëqantsikllawampis yanapëta puëdinmi. Bolivia nacionchö täraq wawqi Andrëasmi kënö nin: “Llapantsik yanapakushqam, pillapis Diospita rasumpa kaqta yachakunqa y bautizakunqa”. Tsëmi kallpachakunantsik Diospita kushishqa yachatsikunapaq. Tsëta rurashqaqa, Jehovämi bendicimäshun y mas kushishqam pëpita yachatsikushun.