Tsë paqas pasakunqankunapitam Kamamaqnintsik Diospita mas yachakuyta munarqä. Peru tsë paqas ima pasakunqanta manaraq willayarniki, wamra kanqä witsan pasanqäkunarëkur jukläya imanir pensanqäta y Diospita yachakuyta imanir munanqäta willariyashqëki.

1937 watam Francia nacionchö mïnakuna këkanqan Guesnain markachö yurikurqä. Papänïqa carbon rumikunata jorqayanqan mïnachömi trabajarqan. Pëqa alli trabajaq kanäpaq y imëpis alli kaqta ruranäpaqmi yachatsimarqan. Mïnachö wakin yanaqinkuna fëyukunachö trabajaqta rikarmi yanapëta procuraq. Tsëmi juk grüpu nunakunachö kaq y huelgakunaman ëwaq. Teytäqa alläpam cölerakoq markächö sacerdötikuna mana alli ruraqta rikarnin. Mëtsikaq y imëka jananchö kawëkarnimpis, mikuyänanllapaq tareq mïnachö trabajaqkunatam qellëta y mikuyta mañakuyaq. Tsënö kayanqanta melanarmi, religionpita ni Diospita imatapis yachatsimarqantsu.

Mas jatunyarninmi, mana alli rurëkunata mas chikeq kä. Franciachö täraq forastërukunata  mana allipa rikaqkunatam chikeq kä. Juk nacionpita nunakunapa wamrakunawan pelöta jetëmi gustamaq. Mamänïqa Polonia nacionpitam. Tsëmi tukuyläya nunakuna igualpa rikänakuyänanta, y yamë kawakuyänanta munaq kä.

1957 watam ejercituman apayämarqan. Tsënöpam qallananchö willayanqaq Argeliapa jirkankunachö tsë paqas këkarqä. “¡Diosllä, yanapëkamë!” nirinqäpitam, tuna ashnuwan tinkurirqä y manam chikiyämaqnïkunapita soldädutsu karqan. Tsëpin pasamanqampita y guërrachö pasamanqampitam kënö tapukur qallëkurqä. ¿Imanirtan këchö këkantsik? ¿Noqantsikpaq Dios yarpachakuntsuraq? ¿Imëllapis yamë kawakushuntsuraq?

Tsëpitanam ejercituchö permïsuta mañakurir, teytäkunapa wayinchö këkarnin Jehoväpa juk Testïgunta reqirirqä. Pëmi La Sainte Bible, jutiyoq Bibliata qaramarqan. Tsëqa frances idiömaman catölicukuna traduciyanqan Bibliam karqan. Argeliaman kutirirmi, leyir qallëkurqä. Revelacion 21:3, 4 ninqanman pensarmi qallëkurqä, tsëchömi kënö nin: “Diospa carpa wayinmi nunakunawan këkan [...]. Y nawinkunapitam llapan weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu”. * Tsënö neqtaqa manam imëpis leyishqatsu karqä. Tsë witsankunapaqqa manam Diospita ni Bibliapita imata musyarqätsu.

1959 wata ejercitupita yarqurinqällachömi, Francois jutiyoq wawqita reqirirqä. Pëqa Diospa jutin Jehovä kanqanta y Bibliapitam imëkata yachatsimarqan (Sal. 83:18). Y imëka mana allikunata Jehovä ushakätsinampaq, Patsa juk Shumaq Huertaman tikranampaq y Revelacion 21:3, 4 cumplikänampaq kaqtam yachatsimarqan.

Tsëkunata yachatsimanqanqa alläpa shumaqmi karqan, shonqüyaqmi chärirqan. Peru sacerdötikunawan cölerakurmi, Bibliachö këkanqanta mana yachatsikuyanqampita denunciëta munarqä. Tsëchömi rikarqä teytanölla pensëkanqäta, y imapis raslla o saslla altsakärinanta munanqäta.

Wawqi Francois y wakin Testïgukuna yanapayämaptinmi, mana alli geniüta mas controlarqä. Pëkunam yachatsiyämarqan Diosta sirweqkunaqa, nunakunapaq mana rimayanqanta, sinöqa Diospa Gobiernumpita yachatsiyanqanta. Jesuspis tsëtam rurarqan y qateqninkuna tsëta rurayänampaqmi mandakurqan (Mat. 24:14; Lüc. 4:43). Jina imata creiyaptimpis, nunakunata kuyëpa y respëtuwan parlapänäpaqmi yachakurqä. Bibliachöqa kënömi nin: “Señorpa sirweqninqa manam pleytukïta wanantsu, sinöqa llapankunawan kuyakoq këta” (2 Tim. 2:24).

Unë imanö kanqäta cambiarirmi, 1959 wata Jehoväpa testïgun kanäpaq juk junaq kaq asamblëachö bautizakurirqä. Tsëchömi Angele jutiyoq juk shumaq panita reqirirqä. Congregacionninmanmi watukaq ëwaq kä y 1960 watachömi casakuriyarqä. Pëqa alläpa alli y yachanëpaq warmim, Jehoväpa qarënin cuentam (Prov. 19:14).

Watakuna pasanqanmannömi, Diosta unëpana sirweq wawqikunapita imëkata yachakurqö. Jukqa ima carguta chaskirpis, alli ruranëkipaqqa humildim kanëki. Y Proverbius 15:22 ninqanchö consëjutam wiyakunëki, tsëchömi kënö nin: “Käyitsikuqkunata tapukïkur ruraptinqa llapanpis allim kanqa”.

Bibliachö tsënö ninqantaqa, 1964 watachömi mas alliraq entiendirqä. Tsë watachömi congregacionkunata watukaq kanäpaq churayämarqan. Tsëmi Diosta mas sirwiyänampaq wawqi panikunata yanaparqä. Peru 27 watayoqllaraq karmi, höraqa pantaq kä. Tsënö kaptimpis, pantanqäkunapitam yachakurqä. Y masqa unëpana Diosta sirweq wawqikunapitam yachakurqä.

Tsënö yanapayämanqampitam jukta yarpä. Paris markachö congregacionkunata watukar qallanqächömi, unëpana Diosta sirweq wawqi parlariyänäpaq nimarqan. Y noqaqa änirirqämi. Pëmi kënö tapumarqan:

“Louis, juk doctor juk wayiman charqa, ¿pikunatatan watukan?”.

Noqanam, “qeshyëkaqkunatam” nirqä.

“Awmi” nimarqanmi, tsëpitanam kënö nimarqan: “Peru Diosta sirwirnin alli yanapakuykaqllawan parlanqëkitam rikarqö. Congregacionchöqa, mëtsikaqmi Jehoväta sirwirnin tsëllaraq qallashqa o mantsakoq kayan. O wakinkunaqa llakinashqa këkäyan. Pëkunawan parlanqëki o wayinkunaman mikoq ëwanqëkiqa maschi yanapanman”.

¡Tsë kuyashqa wawqiqa rasun kaqllatam nimarqan! Jehoväta sirweqkunata kuyanqampitaqa imëkatam yachakurqä. Penqakurpis jinan höram nimanqannö rurar qallëkurqä. Alläpam kushikü tsënö wawqikuna kayanqampita.

1969 y 1973 watakunachöqa Parischö këkaq, Colombes markachömi atska nacionkunapaq asamblëa rurakarqan. Tsë asamblëaman ëwaqkunapaq Mikuyta Ruraqkunata rikänäpaqmi churayämarqan. 1973 watachöqa, 60 milpaqnömi pitsqa junaqpa nunakunapaq mikuynin rurayarqä. Mantsakashqam këkarqä. Peru imapis alli yarqunampaqqa, Proverbius 15:22 ninqantam yarparqä. Tsëchömi tapukuykur imatapis rurashqaqa alli yarqunqanta nin. Mikuykunapita musyaq, Diosta unëpana sirweq wawqikunatam ashirqä. Carnicërukuna, murukuyta yachaq, cocinakoq y rantipakuyta yachaq  wawqi panikunatam ashirqä. Llapäkunam yanapakuyarqä tsë mëtsikaq nunakunata pachan qarayänäpaq.

1973 watachönam, Franciachö këkaq Betelman warmïtawan invitayämarqan. Imachö trabajanäpaq churayämanqanqa manam fäciltsu karqan. 1970 watapita hasta 1993 watayaq Diospita yachatsikunantsikta michäkoq Camerun nacionmanmi, publicacionkunata imëkanöpa apatsinä karqan. Yapëmi alläpa yarpachakurnin qallëkurqä. Franciachö Diospita yachatsikunqantsikta rikaq wawqim, alläpa yarpachakushqa këkanqäta rikämar. Kënö nimarqan: “Camerunchö këkaq wawqi panintsikkunaqa, Diospitam alläpa yachakuyta munayan. ¡Publicacionninkuna apatsishun!”.

Atska kutichömi Camerunwan tinkupuraq nacionkunaman viajarqä. Tsë nacionchö creikoqkunawan juntakänäpaq. Tsë valienti y alli juiciuyoq wawqikunam Camerunchö wawqi panikunapaq publicacionninkuna imanö chätsinäpaq kaqta niyämarnï yanapayämarqan. Imëkata rurayanqäpitam Jehoväqa bendiciyämarqan. Ishkë chunka watapanömi, tsëchö wawqintsikkunapaqqa Täpakoq revistankuna y Nuestro Servicio del Reino höjankuna ni imëpis pishirqantsu.

Reqinakur qallayanqäpitam Angele imanö kanqanta y Diosta sirwinqanchö imanö këkanqanta rikarqä. Y tsëkunataqa, casakuyanqächönam masqa rikarqä. Wakin wakinta willariyashqëki. Casakuyanqä junaqmi ishkäkuna juntu llapan puëdiyanqämannö Jehoväta sirwiyänäpaq, Diosta tsë paqas mañakunäpaq nimarqan, y Jehoväqa wiyayämarqanmi.

Jina warmï Angeleqa, Jehoväman mas confiakunäpaqmi yanapamashqa. Këllata willariyashqëki: congregacionkunata watukarnin këkäyaptïmi, 1973 wata Betelchö yanapakuyänäpaq invitarayämarqan. Peru noqaqa yarpachakurmi qallëkurqä. Tsënam Angeleqa Jehoväta sirwiyänäpaq änikushqa kayanqäta  yarpätsimarqan. Y tsërëkur Jehoväta sirweqkunata pushaqkuna niyanqanta rurayänäpaqmi yarpätsimarqan (Heb. 13:17). Manam ima nitapis puëdirqätsu. Tsëmi Betelta yanapakoq ëwayarqä. Kananyaqmi warmï alli pensëkur parlakunqan, alli tantiaq kanqan y Diosta sirwinqan casädu vïdakunachö kushishqa kayänäpaq y imatapis alli akrayänäpaq yanapakushqa.

Kanan witsan edäna karpis, warmï Angeleqa alläpa alli warmim y imëkachö yanapamarnïmi sïguin. Këta willariyashqëki: Diosta mas sirwinapaqqa atska escuëlakunam kan, peru ingles idiömallachömi yachatsikuyan. Tsëmi juk escuëlaman ëwayänäpaq Angelewan ingles idiömata mas yachakur qallëkuyarqä. Y tsëpaqqa 75 watayoqnöna këkarpis, tsë idiömata parlaq congregacionchömi yanapakur qallëkuyarqä. Francia Sucursalta Rikaqkunapita karninmi, tsë idiömata estudianäpaqqa tiemputa tareqllatsu kä. Peru ishkäkunam yanapanakuyarqä. Kananqa 80 watayoqnöna këkarpis, ingles y frances idiömachömi reunionkunapaq preparakuyä. Llapan puëdiyanqämannömi reunionkunachö y Diospita yachatsikurnin congregacionnïkunachö yanapakuyä. Jehoväqa, ingles idiömata yachakuyanqäpitam bendiciyämashqa.

2017 watachömi Angelewan Sucursalta Rikaqkunapaq y warminkunapaq escuëlaman ëwayarqä. Tsëqa Nueva Yorkpa Patterson markanchö Centro Educativo de la Watchtower nishqanchömi karqan.

Rasumpa kaqchöqa, Jehovällam imëka allikunata yachatsimantsik (Is. 30:20). Tsëmi pëta sirweqkunaqa, jövin o edäna karnimpis pëpita imëkata yachakuyan (Deut. 4:5-8). Jehoväta y pëta unëpana sirweq wawqi panikunata wiyakoq jövinkuna allita akrayanqantaqa y Diosta mana dejëpa sirwiyanqantam rikarqö. Proverbius 9:9 ninqannömi: “Yachëyuq nunata käyitsiptiki alli yachaqmi kanqa. Alli kawakuq nunata yachatsiptiki alläpa käyikuqmi kanqa”.

Höra höraqa 60 watanöna pasarishqa kaptimpis, Argeliapa jirkankunachö tsë mantsëpaq paqas pasakunqanmanmi yarpä. Manam alläpa kushishqa kawakunäpaq kaqmanqa, pensarqällapistu. Wakinkunapitaqa imëkatam yachakurqö. Angeletawan noqataqa kushishqa kawakuyänäpaqmi permitiyämashqa. Tsëmi Teytantsik Jehoväpita, pëta kuyaq y unëpana sirweq wawqi panikunapita yachakuyänäpaq listu këkäyä.