1, 2. ¿Ima mana allikunapatan Jehoväpa mëtsika testïgunkuna pasayan?

APOSTOL Pabluqa Timoteutam nirqan, Diosta sirwinqanchö llapanta alli cumplinampaq y noqantsiktapis tsëllatam nimantsik (2 Tim. 4:5). Llapantsikmi apostol Pablu consejakunqannö ruranapaq kallpachakuntsik, tsënö kaptimpis, manam fäciltsu. Mëtsikaq wawqi panintsikkunam Diospita yachatsikuyänampaqqa valientiraq kayänan (2 Tim. 4:2). Diospita yachatsikunantsikta mana munaq o chipyëpa michäkoq nacionkunallaman pensarishun. Tsëchö täraq wawqi panintsikkunaqa, Diospita yachatsikuyaptin carcelayänampaq kaqta musyarpis yachatsikuykäyanllam.

² Jehoväta sirweqkunaqa imëka problëmakunapam pasayan, y tsëkunaqa qelanäratsinmanmi. Mëtsikaqmi, familiankunata manteniyänanllapaq mëtsika hörakuna trabajayan. Jehoväta sirwiyanqanchöqa mastam rurëta munayan, peru semäna ushëkunapaqqa utishqam këkäyan. Wakinnam Jehoväta sirwiyanqanchö wallkallata rurayan, mana kachakaq qeshyayoq kar o edäna karnin. Y wakinqa, manam wayinkunallapitapis yarquyta puëdiyantsu. Wakinnam, imapaqpis mana sirwiyanqanta mana pensayänampaq cada junaq kallpachakuyan. Orienti Mediupa juk nacionninchö täraq Mary * jutiyoq panim kënö nin: “Imapaqpis mana sirwinqäta mana pensanäpaq cada junaq kallpachakunqämi, alläpa llakitsiman y manam imata ruranäpaqpis gänasnï kantsu. Tsëmi Diospita yachatsikoq mana ëwarnin alläpa llakikü”.

3. ¿Imapitatan këchö yachakushun?

³ Ima problëmapa pasashqapis, tsëkunachö alli tsarakunapaq, y puëdinqantsikmannö pëta sirwirnin sïguinapaqmi  Jehoväqa yanapamäshun. Këchömi yachakushun, Jehovä imanö yanapamanqantsikta. Peru puntataqa, imëka problëmakunapa pasëkäyaptimpis, Pabluta y Timoteuta imanö yanapanqanta rikärishun.

4. ¿Ima mana allikunapatan apostol Pablu pasarqan?

⁴ Pabluqa imëka mana allikunapam pasarqan. Pëqa mas yanapayänanta necesitarqan maqayaptin, rumiwan tsampiyaptin y carcelayaptinmi (2 Cor. 11:23-25). Höra höra imapaqpis mana välinqanta mana pensanampaq kallpachakunqanta willakuytaqa manam penqakurqantsu (Rom. 7:18, 19, 24). Jina cuerpunchö imëka kasha cuenta sufritseqninta Diosnintsik jipirinampaqmi kutin kutin mañakurqan (2 Cor. 12:7, 8).

5. Mana allipa pasëkarpis, ¿imatatan apostol Pabluqa rurarqan?

⁵ Imëkapa pasëkaptimpis, yachatsikurnin sïguinampaqmi Jehoväqa apostol Pabluta yanaparqan. Pablu imëkata ruranqanman pensarishun. Pëqa, Röma nacion wayinchö carcelarëkarpis, judïukunapa mandaqninkunata y itsa gobiernupa guardiankunatapis Diospita yachatsirqan (Hëch. 28:17; Filip. 4:21, 22). Jina Römata gobernaqpa guardiankunata y llapan watukaqninkunatapis yachatsirqanmi (Hëch. 28:30, 31; Filip. 1:13). Y tsë watakunallachömi, tsë witsan y kanan witsan cristiänukunata alläpa yanapaq cartakunata qellqanampaq Dios yanaparqan. Y pë, alli tsarakunqampitam, Röma nacionchö këkaq cristiänukuna kallpata tsariyarqan ‘Diospa palabrampita mana mantsakushpa parlar’ sïguiyänampaq (Filip. 1:14). Masta rurëta munarpis, puëdinqanmannö ruranampaqmi kallpachakurqan. Y prësurëkanqan Diospita më tsëchö yachatsikuyänampaq yanapakushqa kanqantam nirqan (Filip. 1:12).

6. 2 Corintius 12:9 y 10 ninqannöpis, ¿pitan Pabluta yanaparqan Diospita yachatsikurnin sïguinampaq?

⁶ Pabluqa musyarqanmi Dios yanapaptinlla imëkata pëpaq rurëkanqanta. Tsëmi nirqan, ‘pishipaq këchö’ Diospa podernin mas rikakunqanta (leyi 2 Corintius 12:9, 10). Poderninwan Jehovä yanapaptinmi, Pabluqa, chikir sufrikätsiyaptin, prësurëkarnin, y mas problëmakunayoq  këkarnimpis Diospita yachatsikurnin sïguirqan.

7. ¿Imakunapatan Timoteu pasarqan mandayanqankunata cumplinampaq?

⁷ Jövin Timoteupis poderninwan Dios yanapaptinmi yachatsikurqan. Juk markakunata yachatsikoq ëwaptinmi Pabluta yanaqarqan. Y juk kutikunachöqa, wakin congregacionkunata yanaparnin watukanampaqmi Pablu mandarqan (1 Cor. 4:17). Itsa Timoteuqa pensarqan, tsëkunata rurëta mana puëdinampaq kaqta. Itsa tsërëkur Pabluqa kënö nirqan: “Ama imëpis jaqitsu pipis jövin kënikita despreciananta” (1 Tim. 4:12). Manam tsëllatsu, tsë witsankunapaqqa, Timoteuqa qeshyapäkurqanmi (1 Tim. 5:23). Timoteuqa musyarqanmi, wawqi paninkunata yanapanampaq y Diospita yachatsikur sïguinampaq, poderninwan Jehovä yanapanampaq kaqta (2 Tim. 1:7).

8. Kanan witsanqa, ¿imakunawantan Jehoväqa yanapamantsik?

⁸ Kanan witsampis Jehoväqa, ‘nunakunapa kallpampita mas puëdeq kallpawanmi’, sirwir sïguinapaq yanapamantsik (2 Cor. 4:7). Jehoväqa kallpayoq kanapaq y pëllata sirwinapaqmi, kë chuskunwan yanapamäshun: Diosta mañakuywan, Bibliawan, wawqi panintsikkunawan y Diospita yachatsikunqantsikwan.

9. ¿Imanötan Diosman mañakunqantsik yanapamantsik?

⁹ Diosman mañakuy. Apostol Pablum, Efesius 6:18 ninqanchö, imë hörapis mañakur këkänapaq yarpätsimarqantsik. Imëpis mañakushqaqa, Diosqa yanapamäshunmi. Bolivia nacionchö täraq wawqintsik Jonniem, problëmakunapa pasaptin Jehovä imanö yanapanqanta rikarqan. Päpänin, mamänin y warminshi alläpa grävi qeshyakurkuyänaq, tsëshi cuidananqa fäciltsu kanaq. Mamantash wanupakunaq y unëtaraqshi papäninwan warminqa alliyäyänaq. Jonniem kënö nin: “Dios imachö yanapamänampaq kaqta mañakunqämi, alläpa llakikunqä höra yanapamashqa”. Jehovämi yanaparqan alli tsarakunampaq. Tsë nacionllapita creikoqkunata rikaqkunapita wawqi Ronaldpis, maman canceryoq kanqantam musyarirqan y killallatash mamanqa wanurinaq. ¿Imatan yanaparqan Diosta sirwir sïguinampaq? Pëmi kënö nin: “Jehoväta mañakurqa, shonqüchö llapan kanqantam pëta willä. Imanö këkanqäta kikï mana musyaptïpis, Jehoväqa musyanmi”. Itsa höraqa alläpa llakikur o yarpachakur, ima nitapis musyantsiktsu, peru Jehoväqa, ima nita mana musyashqapis, pëta mañakunantsiktam munan (Rom. 8:26, 27).

10. Hebrëus 4:12 ninqannöpis, ¿imanirtan Bibliata leyishwan y leyinqantsikman yarpachakushwan?

¹⁰ Biblia. Apostol Pablunöpis, Bibliata leyirninmi, kallpata tarintsik y alläpaqa llakikuntsiknatsu (Rom. 15:4). Bibliata leyishqa y leyinqantsikman yarpachakushqaqa, Jehoväqa imapa pasëkanqantsikchö imanö yanapëkämanqantsiktam rikätsimantsik (leyi Hebrëus 4:12). Këpa kaq pärrafuchö parlanqantsik wawqi Ronaldmi kënö nin: “Unëpitana Bibliata cada paqas leyinqäpitam kushikü. Jehovä imanö kanqanman y sirweqninkunata imanö tratanqanmanmi pensä. Tsëmi yapë kallpayoq kanäpaq yanapaman”.

11. ¿Imanötan llakishqa këkaq panita Bibliata leyinqan yanaparqan?

¹¹ Bibliata leyinqantsikman pensanqantsikqa yanapamäshun, problëmantsikkunata Jehovä rikanqannö rikänapaqmi. Juk viudayashqa panintsikta ima pasanqanta  rikärishun. Job libruta leyinqan yanapanampaq kaqtam, creikoqkunata rikaqkunapita juk wawqi nirqan. Y leyir qallëkurqa, Job imanö pensanqampitam rimar qallëkurqan. Y kënömi neq: “Job, ¿peru imanötan tsëtaqa pensanki?”. Tsëmi kikimpis Jobnölla pensëkanqanta cuentata qokurirqan. Tsëmi yanaparqan, qowan wanunqampita llakikurnimpis, tsarakurnin sïguinampaq.

12. ¿Imanötan Jehoväqa wawqi panintsikkunawan yanapamantsik?

¹² Wawqi panintsikkuna. Jehoväqa wawqi panintsikkunawampis yanapamantsikmi. Yanapanakuyänampaq wawqi paninkunata rikëta munanqanta nirmi Pablu qellqarqan (Rom. 1:11, 12). Ishkë kaq pärrafuchö parlanqantsik pani Maryqa, juk cristiänukunawan juntu këmi gustan. Pëmi kënö nin: “Jehoväqa, imapa pasëkanqäta mana musyaq turi nanakunawanmi yanapamashqa. Shumaqmi parlapäyämarqan y cartakunatam mandayämarqan. Tsë hörakunaqa, tsëtam necesitëkarqä. Noqa pasanqäpa pasashqa nanakunawan parlëpis yanapamashqam. Y creikoqkunata rikaqkunaqa, congregacionchö yanapakunqätam rikätsiyäman”.

13. ¿Imanötan juknintsik juknintsik reunionnintsikkunachö yanapanakushwan?

¹³ Wawqi panikunawanqa yanapanakuntsik reunionkunachö karninmi. Y tsëkunachöqa, kuyanqantsik y imëkapita agradecikunqantsiktam nita puëdintsik. Juk kutim, reunion manaraq qallaptin, creikoqkunata rikaqkunapita Piter jutiyoq wawqi, mana Testïgu qowayoq panita kënö nirqan: “Këchö këkanqëkiqa llapätam alläpa yanapayäman. Joqta wamrëkikunaqa, shumaq vistishqa y reunionkunachö parlakuyänampaq yanapanqëkipitam imëpis listu këkäyan”. Alläpa agradecikurnin y nawinkunachö weqin juntam kënö nirqan: “Kananqa tsëta wiyëtam alläpa munëkarqä”.

14. ¿Imanötan Diospita yachatsikunqantsikqa yanapamashwan?

¹⁴ Diospita yachatsikunqantsik. Wiyamashqa o mana wiyamashqapis, Diospita yachatsikunqantsikqa kushitsimantsikmi, y kallpayoq kanapaqmi yanapamantsik (Prov. 11:25). Stacy panintsikmi tsëta rikarqan. Juk familianta congregacionpita qarquriyaptinmi alläpa llakikurqan. “¿Ima masllatapis rurëta puëdinmantsuraq karqan tsë familiäta yanapanäpaq?” nirmi yarpachakurnin alläpa llakikoq. ¿Imatan yanaparqan llakishqalla mana kanampaq? Diospita yachatsikunqanmi. Yachatsikurninqa, tsë markachö këkaq nunakuna yanapëpaq kayanqanmanmi yarpachakoq. Pëmi kënö nin: “Tsë witsankunaqa, juk warmita Bibliapita yachatsinäpaqmi Jehovä permitimarqan. Y tsë warmi raslla yachakunqanmi alläpa yanapamarqan. Diospita yachatsikunqämi alli tsarakunäpaq yanapaman”.

15. ¿Imatatan yachatsimantsik Mary ninqanqa?

¹⁵ Itsa imapaqpis pasëkanqantsikrëkur, Diospa kaqchö mas rurëta mana puëdinqantsikta pensashwan. Peru yarpäshun, llapan puëdinqantsikmannö rurashqaqa, Jehoväqa alläpam kushikunqa. Näqam panintsik Marypaq parlarqantsik, pëmi juk idiömata parlaq congregacionman ëwakushqa karqan, y tsëchöqa, alläpa mana yanapakunqantam pensaq. Pëmi kënö nin: “Diospita yachatsikurnin juk tiempupaqa wallkallatam parlakureq kä, juk versïculullatam leyireq kä o juk tratädullatam qarakoq kä”. Tsë idiömata parlaqkunanö mana yanapakunqantam pensaq. Peru tsëpitaqa, tsë idiömata parlëta mana yachaptimpis, juknöpa yanapakunampaq Jehovä yanapëkanqantam cuentata qokurqan. Pëmi  kënö nin: “Bibliachö këkaq yachatsikuykunaqa, entiendipaqnöllam kayan, y tsëkunam kawëninkunachö nunakuna cambiayänampaq yanapakun”.

16. Wayintsikpita yarquyta mana puëdishqaqa, ¿imatan yanapamäshun tsarakurnin sïguinapaq?

¹⁶ Wayipita yarquyta mana puëdirpis, Diospita yachatsikuyta munanqantsiktaqa Jehovä rikëkanmi. Itsa cuidamaqnintsikta o jampimaqnintsik doctorta yanapanapaq Jehoväqa yanapamäshun. Kanan ruranqantsikta unë ruranqantsiktawan igualatsishqaqa, alläpam llakikushun. Peru Jehovä imanö yanapëkämanqantsikta rikarqa, imapa pasarpis kushishqam tsarakushun.

17. Eclesiastes 11:6 ninqannöpis, ¿imanirtan yachatsikurnin sïguinantsik mana wiyamashqapis?

¹⁷ Manam musyantsiktsu parlapanqantsik nunakunapita, Jehoväpa sirweqnin mëqan tikranampaq kaqta (leyi Eclesiastes 11:6). Këman pensarishun: 80 watapitapis masyoqna Barbara jutiyoq panintsikmi, telëfunupa y cartapa yachatsikun. 2014 wata 1 de marzu La Atalaya revistatam juk sobriman winarkurqan, tsë revistapa tïtulunmi, “¿Qué ha hecho Dios por usted?” * nin. Mana musyashpam, Jehoväpa testïgun këta dejashqa juk nuna y warminman apatsirqan. Pëkunaqa, kutin kutinmi tsë revistata leyiyarqan. Ollqu kaqqa, pëta Jehovä parlapëkanqantanömi rikarqan. Ishkanmi reunionkunaman yapë ëwar qallëkuyarqan Y tiempuwanqa, 27 watakuna pasanqanchömi, yapë Jehoväpa testïgun këman kutiyarqan. Cartata qellqanqan tsëta lograshqa kanqanta musyarirqa, Barbaraqa alläpam kushikurqan.

18. ¿Imatatan ruranantsik kallpayoq kanantsikpaq Jehovä yanapamänapaqqa?

¹⁸ Yachakunqantsiknöpis, kallpayoq kanapaqqa, Jehoväqa imëkanöpam yanapamantsik. Tsëqa ama imëpis dejashuntsu Diosman mañakuyta, Bibliata leyita, wawqi panintsikkunawan juntu këta y Diospita yachatsikuyta. Tsëta rurarqa Jehovä yanapamënintsikta puëdinqanta y munanqantam rikätsikushun. Teytantsik Jehoväqa, “llapan nunakunatam rikëkan llapan shonqunwan pëman markäkuqkunata yanapananpaq” (2 Crön. 16:9).