1, 2. (1) ¿Ima niyantaq wakin teytakuna wamrankuna bautizakïta munayaptin? (2) ¿Imanirtaq bautizakoqpaq kaqkunataqa, “¿Jehovällatana sirwinëkipaq änirqunkinaku?” nir tapuyan? (Rikäri kë yachatsikïpa qallananchö këkaq fötuta).

MARÏAQA bautizakoqkunapaq discursutam wiyëkan, y tsëpitanam wakin bautizakoqpaq kaqkunawan sharkurnin discursanti tapunqanta sinchipa contestarin. Y tsëpitanam bautizakurin.

² Teytankunaqa alläpam kushikuyan Jehoväta sirwinampaq decidinqampita. Peru tsë junaq manaraq chaptinqa, mamäninqa kënö nirmi yarpachakurqan: “Wamrallaraqmi, ¿entiendintsuraq imanir bautizakunampaq kaqta? ¿Manatsuraq mas alli kanman ichik shuyärinan?”. Mëtsikaq teytakunam tsënö yarpachakuyan wamrankuna bautizakïta munayaptin (Ecl. 5:5). Tsënö yarpachakuyanqanqa allim, porqui bautizakïqa manam lluta  costumbrillatsu (rikäri “ ¿Sirwinëkipaq Jehoväta änirqunkinaku?” neq recuadruta).

3, 4. (1) ¿Ima nirqantaq Pëdru bautizakï alläpa precisanqanta rikätsikunampaq? (2) ¿Imanirtaq bautizakïtaqa igualatsishwan Noë ruranqan arcatawan?

³ Noë arcata ruranqampaq parlarninmi apostol Pëdruqa kënö nirqan: “Tsënö kaqllam bautizakïpis qamkunata kanan salvëkäyäshunki” (leyi 1 Pëdru 3:20, 21). Noëqa arcata ruranqanwanmi rikätsikurqan Jehovällatana sirwinampaq decidishqa kanqanta. Jehovämanmi chipyëpa confiakurqan y mandanqankunatam cäsukurqan. Tsënöpam Apäkï Tamyachö familianwan salvakuyarqan.

⁴ Arcata rikarninqa nunakunaqa clärum musyayarqan Noëqa Jehoväman confiakunqanta. Jina tsënöllam pitapis bautizakoqta rikarninqa, wakinkuna musyayan, Jesus wanunqanman markäkurnin Jehovällatana sirwinampaq änikushqa kanqanta. Llapan bautizakushqa cristiänukunam Jehoväta cäsukuyan y mandanqanta rurayan. Tsëmi Apäkï Tamyachö Noëta salvanqannölla, mana alli nunakunata ushakätsinqan witsampis cäsukoq kaq bautizädu cristiänukunataqa Jehovä salvanqa (Mar. 13:10; Rev. 7:9, 10). Tsëmi Jehovällatana sirwiyänampaq änikuyänan y bautizakuyänanqa alläpa precisan. Pipis bautizakïta ardëpa demoraq kaqqa vïdantam peligruman churëkan.

5. ¿Ima tapukïkunatataq kë yachatsikïchö contestashun?

⁵ Rikanqantsiknömi, bautizakïqa alläpa precisan. Tsëmi kë tapukïkunata  contestanantsik: “¿Ima nintaq Bibliaqa bautizakï asuntupaq? Bautizakïta munarqa, ¿imatataq ruranantsik? Wamrantsikta o jukkunata Bibliapita yachatsirqa, ¿imanirtaq entienditsinantsik bautizakïqa alläpa precisanqanta?”.

6, 7. (1) ¿Imanirtaq nunakunaqa Bautizakoq Juan kaqta ëwayaq bautizanampaq? (2) ¿Pï bautizakunqantaq alläpa jukläya karqan?

⁶ Bautismupaq Biblia parlarqa, puntataqa parlan bautizakoq Juan nunakunata bautizanqampaqmi (Mat. 3:1-6). Bautizanampaq Juan kaqta ëwaq nunakunaqa Ley ninqanta mana cäsukuyanqampita arrepentikuyanqantam rikätsikuyaq. Peru Jesusqa, manam Leyta mana cäsunqampita arrepentikurtsu bautizakurqan (Mat. 3:13-17). Porqui pëqa jutsannaqmi karqa (1 Pëd. 2:22). Tsëpa rantinqa, Diospa munëninta ruranampaq listu këkanqanta rikätsikurmi bautizakurqan (Heb. 10:7).

⁷ Jesus yachatsikunqan witsampis, qateqninkunam nunakunata bautizayarqan (Juan 3:22; 4:1, 2). Jina tsë bautizakoqkunapis Leyta mana cäsukuyanqampita arrepentikuyanqantam rikätsikuyaq. Peru Jesus kawarimunqampita patsëqa, bautizakuyanqanqa mananam tsëtanatsu rikätsikoq.

8. (1) ¿Imata rurayänampaqtaq qateqninkunata Jesus mandarqan? (2) ¿Imanirtaq cristiänukunaqa bautizakuyänan?

⁸ Jesusqa 33 watachö kawariramurmi 500 nunakunata yuripurqan. Itsa tsë kutichö qateqninkunata kënö nir mandarqan: “Ëwayë y qatimaqnïkuna tikrayänampaq llapan nacionkunapita nunakunata yachatsiyë, Teytapa, Tsuripa y santu espïritupa jutinchö bautizatsirnin, y llapan mandayanqaqkunata wiyakuyänampaq yachatsirnin” (Mat. 28:19, 20; 1 Cor. 15:6). Tsë mandakïtaqa mëtsikaq ollqukuna, warmikuna y hasta wamrakunapis wiyayarqanchi. Jinamampis bautizakuyänan precisanqantam nirqan (Mat. 11:29, 30). Jesuspa qateqnin tikraqkunaqa alleqmi entiendiyarqan bautizakuyänan precisanqanta, y ardëpaqa manam pasapakätsiyarqantsu (Hëch. 2:41; 9:18; 16:14, 15, 32, 33). Diosta kushitsita munaqkunaqa, Diospa llapan munënin cumplikänampaqqa Jesus imanö yanapakunqantam reconociyänan. Y tsëran Diosqa chaskinqa bautizakuyanqanta.

9, 10. ¿Etiopïapita nunawan apostol Pabluqa bautizakuyänampaq demorayarqanku?

⁹ (Leyi Hëchus 8:35, 36). Etiopïa lädupita juk nuna ruranqanta rikärishun. Pëqa judïuman tikrashqa nunam karqan y Jerusalentam Dios adoraq ëwarqan. Y markanta kutikïkaptinnam Felïpita juk angel nirqan carrëtanman witirirnin Jesuspita parlapänampaq. Y kë nunaqa Felïpi parlapaptinmi Jesuspita alleq entiendirirqan, tsëmi Jehovä munanqanta rurëta munarnin bauticëkunampaq jinan höra mañakurirqan.

¹⁰ Kananqa cristiänukunata alläpa chikeq juk nunapaq parlarishun.  Judïu nunam karqan y Diosta kushitsitam procuraq. Peru judïukunataqa mana wiyakoq kayanqampitam Jehoväqa jaqishqana karqan. Peru kë nunaqa judïukunapa costumbrinkunatam alläpa välitseq. Peru juk kutim ciëlupita patsë Jesus parlapëkurqan, tsënam kë nunaqa Ananïas yanapananta jaqirqan, y rasllam bautizakurirqan (Hëch. 9:17, 18; Gäl. 1:14). Y tiempuwanqa kë nunataqa Pablu nishpam reqiyarqan. Rikärinqantsiknömi, Diospa munënin cumplikänampaq Jesus imanö yanapakunqanta entiendirirqa raslla bautizakurirqan (leyi Hëchus 22:12-16).

11. (1) ¿Imanirtaq Bibliata estudiaqkunaqa bautizakuyan? (2) ¿Imanirtaq kushikuntsik bautizakuyaqta rikarnin?

¹¹ Jina kanan witsan Bibliata mëtsika estudiaqkunawampis tsënöllam pasakun. Biblia rasumpa kaqta yachatsikunqanta entiendirirqa, Jehoväpa sirweqnin këta y bautizakïtam munayan. Tsëmi asamblëakunachöqa bautizakoqkunapaq juk discursu rurakan. Juk estudianti bautizakuptinqa alläpam kushikuntsik. Jina tsënöllam teytakunapis wamrankuna bautizakuyaptinqa alläpa kushikuyan. 2017 watachöqa 284 milpitapis masmi bautizakuyashqa (Hëch. 13:48). Pëkunaqa, bautizakï alläpa precisanqantam entiendiyarqan. Peru bautizakuyänampaqqa, ¿imakunatataq rurayarqan?

12. ¿Imakunatataq Bibliata estudiaq ruranan manaraq bautizakurnin?

¹² Bibliata estudiaqqa manaraq bautizakurninmi alleq musyanan Diosnintsik imanö kanqanta, munënin ima kanqanta y salvamänapaq imata ruramushqa kanqanta (1 Tim. 2:3-6). Jina Jehovämanmi confiakunan, chikinqan rurëkunatam jaqinan y mandakunqankunatam cäsukunan (Hëch. 3:19). Mana alli rurëkunata manaraq jaqirnin sirwiyänampaq änikuyanqantaqa Diosqa manam chaskintsu (1 Cor. 6:9, 10). Jina reunionkunamanmi ëwanan y seguïdum Diospita yachatsikoq yarqunan. Porqui Jesusqa nirqan qateqninkunaqa tsëta rurayänampaq kaqtam (Hëch. 1:8). Tsëkunata rurëkarnaqa, juk mañakïchö Jehovällatana sirwinampaq änikurirmi bautizakïta puëdin.

13. Bibliapita pitapis yachatsirqa, ¿imatataq yarparänantsik?

¹³ Wamrantsikkunata o jukkunatapis Bibliata yachatsirqa, imëpis yarpänantsikmi Jesuspa qateqnin kayänampaqqa bautizakuyänan precisanqanta. Tsëmi yanapamäshun bautizakuyänan imanir precisanqanta imë hörapis yarpätsinapaq. Diospa sirweqnin tikrayänantaqa alläpam munantsik.

14. ¿Imanirtaq Bibliapita yachakïkaqkunataqa bautizakuyänampaq pipis exiginmantsu?

¹⁴ Bibliapita yachakïkaqkunataqa manam pipis exiginantsu bautizakunampaq, porqui kikin Jehoväpis manam pitapis exigintsu (1 Juan 4:8). Tsëpa rantinqa, yachatseqninqa shumaqmi entienditsinan Jehoväpa amïgun këqa alläpa precisanqanta. Jehoväta kuyarnin y mandakunqankunata wiyakïta munarninmi bautizakunampaqqa kikin decidinan (2 Cor. 5:14, 15).

15, 16. (1) Bautizakuyänampaqqa, ¿ëka watayoqtaq kayänan? (2) Juk religionchö bautizakushqa karpis, ¿imanirtaq Jehoväpa testïgun kayänampaqqa yapëraq bautizakuyänan?

 ¹⁵ Bautizakuyänampaqqa, ¿ëka watayoqtaq kayänan? Manam edä kantsu. Porqui manam llapantsu poqu cristiänu këmanqa igual-lla chäyan. Mëtsikaqmi jövinlla bautizakuyashqa, y mayorna këkarpis Jehoväta sirwirninqa sïguikäyanllam. Wakinkunanam mayorna këkarnin Jehoväpita yachakuyashqa, y bautizakuyänan precisanqanta entiendirirmi bautizakuyashqa.

¹⁶ Jesuspa qateqnin këta munarqa juk religionkunachö bautizakushqa këkarpis yapëmi bautizakuyänan. Porqui Jehoväpaqqa välin rasumpa kaq yachatsikïkunata entiendirninraq bautizakuyanqanmi. Tsëtam cäsi 80 watayoqnöna këkaq juk warmi rurarqan. Pëqa atska religionkunachö bautizakushqa karmi, yachatseqninta tapurqan yapë bautizakunan precisanqanta o mana precisanqanta. Yachatseqnin paniqa Bibliawanmi shumaq entiendiratsirqan, y pëqa entiendirirmi yapë bautizakurirqan (leyi Hëchus 19:3-5).

17. Bautizakuyanqan junaqqa, ¿imamantaq pensayänan?

¹⁷ Bautizakuyanqan junaq kushishqa sientikurpis, bautizakoqkunaqa alleqmi pensayänan Diosta äniyanqanta imanö cumpliyänampaq kaqman. Porqui Jesuspa qateqninkunaqa mananam kikinkunapaqnatsu kawayan, “sinöqa pëkunarëkur wanushqa y sharkatsishqa” kaqpaqnam (2 Cor. 5:15; Mat. 16:24).

18. ¿Imapitaraq qateqnin kaq yachatsikïchö yachakushun?

¹⁸ Diospa sirweqnin kanapaqqa bautizakunantsik alläpa precisanqantam rikärirquntsik. Tsëchi qallanan kaq pärrafuchö parlanqantsik Marïapa mamäninqa yarpachakurqan. Qampis wamrayoq karqa itsa kënö tapukïkanki: “¿Wamräqa bautizakïta puëdinmannatsuraq? ¿Alleqku Jehoväpita musyan? ¿Sirwinampaq äniptinqa Jehovä chaskinqatsuraq? ¿Manaraq bautizakurtsuraq imallatapis estudiarinman alli trabäjuta tarinampaq? ¿Jutsatatsuraq rurarinqa?”. Kë tapukïkunatam qateqnin kaq yachatsikïchö contestashun. Jina rikäshunmi wamrankuna bautizakïta munayaptin teytakuna alläpa mana yarpachakuyänampaq kaqtapis.