1. ¿Imanötaq yachaq tikrantsik y imanötaq yanapamantsik?

JEHOVÄQA alläpa yachaqmi, y noqantsiktapis yachaq kanapaqmi yanapamantsik. Tsëmi Santiägu 1:5 textuqa nimantsik, yachënintsik pishiptinqa Jehoväta mañakunapaq, y pëqa qomäshunmi. Juknöpaqa yachaq tikrantsik, corregimanqantsikta chaskikurninmi. Tsëmi yanapamäshun mas amïgun tikranapaq y mana allikunaman mana ishkinapaq (Prov. 2:10-12). Y tsënö karqa manam Jehoväta kuyëta jaqishuntsu y mana wanushpa kawëtapis chaskishunmi (Jüd. 21).

2. ¿Imataq yanapamäshun Diosnintsik corregimanqantsikta valoranapaq?

² Jutsasapa karnin y tukïnöpa wätashqa karninmi, höraqa pipis corregimashqaqa piñakushwan. Peru ¿imataq yanapamäshun chaskikunapaq y Jehoväpa kuyakïnintanö rikänapaq? Imanö yanapamanqantsikta yarpanqantsikmi. Proverbius 3:11, 12 textum nimantsik Jehovä corregimanqantsiktaqa, mana kaqpaq mana churanapaq y kuyamarnintsik corregikämanqantsikta cuentachö katsinapaq. Awmi, ¡alli kanantsikta munarmi Jehoväqa corregimantsik! (leyi Hebrëus 12:5-11). Jehoväqa alleqmi reqimantsik, tsëmi imanö corregimänapaq kaqtaqa musyan. Tsëmi kananqa rikärishun: kikintsikta imanö corregikunapaq kaqta, teytakuna wamrankunata imanö corregiyänampaq  kaqta, congregacionchö imanö corregimanqantsikta y corregimanqantsikta mana cäsukïqa alläpa sufrimientuman chätsikunqanta.

3. ¿Imanötaq teytakuna wamrankunata yachatsiyanman kikinkuna corregikïta yachakuyänampaq? Juk igualatsikïwan willakaramï.

³ Kikintsikta corregikïta puëdirninqa, mana alli portakunqantsikta y mana alli pensënintsikkunatapis corregitam puëdishun. Peru manam tsëta yachëkarllanatsu yurintsik. Pensarishun juk wamra biciclëtata manejëta imanö yachakunqanman. Puntataqa teytanran tsarapan, y yachakunqanmannömi ichikpa ichikpa tsarapan hasta kikinllana ëwëta puëdinqanyaq, y mana ishkinampaq kaqta tantiyarirnam dejarin kikinllana manejanampaq. Jina tsënöllam teytankuna pacienciawan Jehoväpita yachatsiyaptinqa, wamrankunaqa yachaq tikrayanqa y kikinkuna corregikïta yachakuyanqa (Efes. 6:4).

4, 5. (1) ¿Imanirtaq poqu cristiänu tikranapaqqa kikintsikta corregikïta yachanantsik precisan? (2) ¿Imanirtaq imachöpis pantarirqa gelanäkurinantsiktsu?

⁴ Tsënöllam pasakun mayorna këkar Jehoväpita yachakoqkunawampis. Kikinkunata corregikïta ichikta puëdirpis, manaran poqu cristiänuraqtsu kayan. Peru Jehoväpita yachakurnin pensayanqankunata cambiarnin y Jesusnö këta procurarninmi poqu cristiänu tikrayanqa (Efes. 4:23, 24). Y poqu cristiänu tikrayänampaqqa alläpam precisan kikinkunata corregikïta yachayänan, porqui tsëraqmi, ‘Dios chikinqan rurëkunata y mana alli munëkunata’ melanäyanqa, y “alli juiciuwan, alli kaqta rurar y llapan shonquwan Diosta sirwirnin” kawayanqa (Tïtu 2:12).

⁵ Peru llapantsikmi jutsasapa kantsik (Ecl. 7:20). Y imallachöpis pantarinqantsikqa manam corregikïta mana puëdinqantsiktatsu rikätsikun. Proverbius 24:16 textum kënö nin: “Alli kaq nunaqa qanchis kuti ishkirirpis sharkurinqam”. Tsëtaqa lograntsik Diosnintsik kallpanwan yanapamashqam (leyi Filipensis 4:13). Jina tsë kallpan yanapamashqam peqata tsarëta yachantsik o kikintsikta corregikïta puëdintsik.

6. ¿Imatataq rurashwan Diospa Palabranta yachakï gustamänapaq? (Rikäri kë yachatsikïpa qallananchö këkaq fötukunata).

⁶ Jina kikintsikta corregikïta yachanapaqqa Diosnintsikmanmi mañakunantsik, Palabran Bibliatam estudianantsik y yachakunqantsikmanmi alleq pensanantsik. Peru Bibliata estudiëta mana gustarqa ama gelanäkuritsu. Tsëpa rantinqa Jehoväman mañakï, pëmi yanapashunki Palabranta yachakïta munanëkipaq (1 Pëd. 2:2). Diosman mañakï Palabranta estudianëkipaq kallpata qoshunëkipaq y mañakurirna yachakïta qallë. Itsa wallka wallkalla yachakur qallankiman. Tsënö ruraptikim yachakïqa gustarishunki, fäcil-lla parecishunki, y yachakunqëkikunamampis kushishqam pensarinki (1 Tim. 4:15).

7. ¿Ima maspaqtaq yanapamantsik kikintsikta corregikïta yachanqantsikqa? Juk pasakunqanwan willakaramï.

⁷ Jina kikintsikta corregikïta yachanqantsikqa yanapamantsik Diospa markanchö maslla yanapakïta munanqantsikta cumplinapaqmi. Juk cristiänuta pasanqanta rikärishun. Pëqa manam kushishqanatsu sientikurqan Diospita yachatsikurnin, tsëmi alläpa yarpachakurqan. Tsënam precursor regular këta pensarirqan. Y tsëta logranampaqqa precursor këpaq parlaq publicacionkunatam leyirqan y Diosmanmi mañakurqan. Tsëmi yanaparqan Jehoväwan  mas amïgu kanampaq. Puëdinqan killakunam precursor auxiliar karqan. Y alleqmi kallpachakurqan precursor regular këta logranqanyaq.

8-10. (1) ¿Imaraq teytakunata yanapanqa wamrankunata Jehovä munanqannö yachatsiyänampaq? (2) ¿Imatataq teytakuna Noëpita yachakïta puëdiyan?

⁸ Teytakunam carguyoq kayan wamrankunata “Jehovä munanqannö alli portakuyänampaq” yachatsiyänampaq (Efes. 6:4). Peru kë tiempuchö tsëta rurananqa manam fäciltsu (2 Tim. 3:1-5). Wamrakunaqa manam musyayantsu ima rurëkuna alli o mana alli kanqanta. Tsëmi teytankuna shumaq corregirnin yachatsiyänantaraq wanayan (Rom. 2:14, 15). Juk yachaq nunam nin, “alli portakuyänampaq yachatsiyë” ninqan palabrakunaqa griëgu idiömachö shumaq winayänampaq y poqurkur responsabli kayänampaq yachatsi kanqanta.

⁹ Teytankuna kuyëpa corregiyaptinqa, wamrakunaqa segürum sientikuyan. Tsëmi alleq entienditsiyänan wakin wakinchö decidita puëdirpis, llapanta decidiyänampaq derëchuyoq mana kayanqanta y rurayanqankuna alliman o mana alliman chätsinampaq kaqta. Tsëmi teytakunaqa wamrankunata shumaq yachatsiyänampaqqa Jehovä yanapananta permitiyänan. Nunakunaqa kikinkuna pensayanqanmannö y costumbrinkunamannömi wamrakunata yachatsi imanö kanqanta niyan. Peru cristiänu teytakuna Jehoväta cäsukurqa, manam wamrakunata wätana imanö kanqanta tapukur këkäyanqatsu ni nunakuna niyanqanta creiyanqatsu.

¹⁰ Noëman pensarishun. Pëqa manam imëpis arcata rurashqatsu karqan, tsëmi imanö ruranampaq Jehovä ninqanman chipyëpa confiakurqan y cäsukurqan (Gen. 6:22). ¿Y alliku yarqurqan? Awmi, tsë arcachömi familianwan salvakuyarqan. Jina Jehovä mandanqanman confiakunqanmi yanaparqan alli teyta kanampaq. Tsë tiempuchöqa wamrankunata Jehovä munanqannö yachatsiqa manam fäciltsu karqan. Peru pëqa alleqmi yachatsirqan y alli ejemplutam qorqan (Gen. 6:5).

11. ¿Imatataq teytakuna lograyanqa Jehoväta cäsukurninqa?

¹¹ Teytakunaqa Noënömi Jehoväta cäsukuyänan; Palabranchö consëjukunata cäsukurnin y markanwan jorqamunqan yanapakïkunata provecharnin. Teytankuna alleq yachatsiyaptinqa, wamrakunaqa poqurkurnin alläpam agradecikuyanqa. Juk wawqim kënö nirqan: “Poqu cristiänu kanäpaq teytäkuna alleq yachatsiyämänampaq kallpachakuyanqampitaqa alläpam agradecikü”. Peru höraqa, teytankuna alli yachëkätsiyaptimpis wamrankunaqa Jehoväta sirwita jaqiriyanmi. Peru alleq yachatsishqa  karqa manam alläpaqa llakikuyänantsu, porqui rurëninkunataqa cumpliyashqanam. Jina confiakuyänanmi, imë höra karpis Jehoväta yapë sirwiyänampaq kaqta.

12, 13. (1) Wamrankunata congregacionpita qarquriyaptinqa, ¿imanötaq teytakunaqa Jehoväta cäsukuyanqanta rikätsikuyan? (2) Teyta kaqkuna cäsukuyanqan, ¿imanötaq juk familiata yanaparqan?

¹² Jehovä mandakunqanta teytakuna cäsukuyänanqa mas sasa tikrarin wamrankunata congregacionpita qarquriyaptinmi. Juk panita pasanqanta rikärishun. Pëpa warmi wamrantam congregacionpita qarquriyarqan y wayimpitam ëwakurqan. Wamranwan y willkanwan juntu këta munarmi, publicacionkunachö tsëpaq parlaq yachatsikïkunata ashirqan. Peru qowanmi kuyëpa entienditsirqan wamrankunapita carguyoqna manana kayanqanta, Jehoväta cäsukuyänan precisanqanta y Jehovä corregikanqanman mëtikïqa mana alli kanqanta.

¹³ Tsëpita watakuna pasariptinmi wamranqa yapë congregacionman kutirirqan. Mamanmi kënö nin: “Kananqa llapan junaqkunam qayaman y mensäjitam mandaman. Y Diosta cäsukushqa kayanqäpitam alläpa respetayäman. Allim kawakuyä”. Wamrëki congregacionpita qarqushqa kaptinqa, ¿Jehovämantsuraq chipyëpa confiakunki o kikikimantsuraq? (Prov. 3:5, 6). Yarpänantsikmi Jehoväqa alleq musyarnin y kuyamarnintsik corregikämanqantsikta. ¿Manaku kuyamarnintsik y wamrëkitapis kuyarnin kuyë Tsurinta kachamurqan? (leyi 2 Pëdru 3:9). Tsëmi, wamrëkita kuyarnin Jehovä corregikanqanman confiakunëki y cäsukunan fäcil mana kaptimpis mandakunqankunata wiyakunëki. Jehovä correginanta jaqi, y ama mëtikïtsu.

14. ¿Imanötaq yanapamantsik markäkïpaq mayoralwan Jehovä yachatsimanqantsik?

¹⁴ Jehoväqa änimarquntsik cuidamänapaq, yachatsimänapaq y mana allikunapita tsapämänapaqmi. Y tsëtaqa tukïnöpam ruran. Këllaman pensarishun, Jesustam churashqa congregacionta cuidanampaq, y Jesusnam ‘markäkïpaq mayuralta’ churashqa Jehoväpita yachatsimänapaq (Lüc. 12:42). Kë mayuralqa tukïnöpam yachatsimantsik y hasta corregimantsik. Itsa juk discursuta wiyarir, juk publicacionta leyirirnin mana alli pensëkanqantsikta y rurëkanqantsikta jaqirquntsik. Y tsënö rurarqa Jehovä corregimänatam pemitirquntsik (Prov. 2:1-5).

15, 16. (1) ¿Imatataq ruranantsik anciänukunapa yanapakïninkunata provechanapaq? (2) ¿Imanö nunataq kashwan anciänukuna cargunkunata shumaq cumpliyänampaq?

¹⁵ Jina Jesusqa anciänukunatam nombrashqa congregacionta cuidayänampaq. Bibliaqa pëkunapaq nin noqantsikpaq juk qarë kayanqantam (Efes. 4:8, 11-13). ¿Imatataq ruranantsik pëkunapa yanapakïninkunata provechanapaq? Diosman markäkuyanqanta y alli ejemplunkunatam qatinantsik, y consejamanqantsiktam cäsukunantsik (leyi Hebrëus 13:7, 17). Anciänukunaqa Jehoväwan alli amïgu kanantsiktam munayan. Tsëmi reunionkunaman faltashqa o Diospita yachatsikïta qelanashqaqa raslla yanapamënintsikta procurayan. Willanqantsiktam shumaq wiyamäshun y tsëpitanam Bibliawan shumaq animamäshun y consejamäshun. ¿Qamqa anciänukunata rikanki kuyamarnintsik Jehovä churamunqantanöku?

¹⁶ Anciänukunapaqqa manam fäciltsu consejamänantsik. Këllaman pensarishun, Rey Davidqa jutsata rurarirqa manam willakurqantsu y Natan parlapänampaqqa  manachi fäciltsu karqan (2 Sam. 12:1-14). Jina tsënöllam Pablupaqpis fäciltsu karqan apostol Pëdruta consejanampaq (Gäl. 2:11-14). Tsënö kaptinqa, ¿imanö nunataq kankiman anciänukuna fäcil-lla consejayäshunëkipaq? Humildim kanëki, parlapäyäshunqëkitam shumaq wiyanëki y agradecikunëki. Pëkuna consejayäshuptikiqa, Diosnintsik kuyashurniki corregïkäshunqëkitanömi rikänëki. Tsëta rurarqa, anciänukunapa yanapakïninkunatam provechanki, y pëkunapis kushishqam cargunkunata cumpliyanqa.

17. ¿Imanötaq anciänukuna juk panita yanapayarqan?

¹⁷ Juk panim willakurqan mana allikunapa unë pasashqa karnin Jehoväta kuyanan fäcil mana kanqanta y alläpa llakishqalla kawakunqanta. Peru kënömi nin: “Anciänukunatam willarqä, y pëkunaqa manam qayapäyämarqantsu, sinöqa shumaqmi animayämarqan. Cada reunion ushariptinmi imanö këkanqäta tapuyämaq. Alläpa mana allikunapa pasashqa karmi Dios kuyamanqantaqa creirqänatsu. Peru Jehoväqa anciänukunata y cristiänu mayïkunatam imëpis utilizashqa kuyamanqanta rikätsimänampaq. Y imëpis mana jaqinäpaq yanapëkamänampaqmi Jehoväta rogakü”.

18, 19. ¿Imamantaq chäshun corregimanqantsikta mana cäsukurqa? Pasakunqanwan willakaramï.

¹⁸ Awmi, corregimanqantsikqa höraqa penqakïpaqmi kanman, peru mana cäsukurqa alläpa sufrimientumanmi chäshun (Heb. 12:11). Entiendirinapaq Cainta y rey Sedequïasta pasanqanta rikärishun. Wawqinta chikiptin y wanutsita munaptinmi, Jehoväqa Cainta kënö nir corregirqan: “¿Imanirtaq alläpa piñashqa këkanki, y imanirtaq cärëkipis tsëläya cambiarishqa? Alli kaqta ruraptikiqa, ¿manatsuraq alabashqa kankiman? Peru alli kaqta mana ruraptikiqa, jutsa rurëmi shuyarëkäshunki. Y jutsa dominashuptikiqa, ¿tsarakïta puëdinkitsuraq?” (Gen. 4:6, 7). Cainqa Jehovä correginqanta mana cäsukurninmi wawqinta wanuratsirqan. Y tsëpitam llapan vïdanchö alläpa sufrirqan (Gen. 4:11, 12). Jehoväta cäsukurqa Cainqa manam sufrinmantsu karqan.

¹⁹ Sedequïasqa mana alli y mantsallïshu reymi karqan. Y mana alli tiempuchömi Jerusalenchö gobernarqan. Profëta Jeremïasmi kutin kutin willarqan mana alli rurëkunata jaqinampaq, peru manam cäsukurqantsu. Y tsënöpam alläpa sufrirqan (Jer. 52:8-11). Rikanqantsiknömi, mana cäsukoq kanqantsikrëkur sufrinataqa, Jehoväqa munantsu (leyi Isaïas 48:17, 18 *).

20. ¿Imaraq pasanqa Jehovä correginqanta mana cäsukoqkunata y cäsukoq kaqkunaqa imanöraq kayanqa?

²⁰ Kanan witsampis mëtsikaq nunakunam Dios correginanta munayantsu. Peru ichikllachönam alläpa sufriyanqa (Prov. 1:24-31). Noqantsikqa Jehovä corregimanqantsikta cäsukushun y yachaq tikrashun. Proverbius 4:13 textum kënö nimantsik: “Corregir yachatsinqäta cäsukï; ama jaqitsu. Alleq cuidë, porqui tsëmi kawëniki”.