Apostol Pablu imanö kanqantaqa manam pipis alleqllaqa musyantsu, porqui manam tariyashqatsu imanö kanqanta rikätsikoq unë dibüjukunata. Tsëmi publicacionnïkunachöqa Pabluqa dibujashqalla yarqamun.

Peru Pablu imanö kanqanta parlaq documentukuna kanmi. 150 watachö qellqakashqa Hechos de Pablo y Tecla nishqan librum nirqan, Pabluqa, “ichiklla nuna, qala peqa, wiksu chanka, fuerti, sëjasapa y senqasapa” kanqanta. Tsë libru ninqanta cuentaman churëkurmi 1902 wata 1 de marzu Täpakoq revista willakurqan Pablu imanö kanqanta.

Juk diccionarium nin Hechos de Pablo y Tecla nishqan libru willakunqankunaqa rasun kaqlla kanqanta (The Oxford Dictionary of the Christian Church [edición de 1997]). Tsë witsankunachöqa tsë libruqa alläpa respetashqa y confiakïpaqmi karqan, y griëgu idiömachöqa 80 copiakunam kaq, y juk idiömakunachöpis kaqmi. Tsëmi publicacionnïkunachöqa unë librukuna ninqanta cuentaman churëkur Pabluta dibujayarqö.

Tsënö kaptimpis, Pablu imanö kanqanta musyanantsikpa rantinqa, imakunata ruranqanta musyanantsikmi masqa precisan. Diospita yachatsikuptinmi Pablupaq wakin nunakunaqa kënö nir rimayaq: “Rikëninqa mana niraqllam y parlakïninqa manam ni imapaqpis sirwintsu” (2 Cor. 10:10). Peru manam qonqanantsiktsu, qateqnin kanampaqqa kikin Jesus invitanqanta y juk nacionkunaman yachatsikïta chätsinqanta (Hëch. 9:3-5, 15; 22:6-8). Jina pensanantsikmi, Dios mandaptin qellqanqan librukuna alläpa yanapamanqantsiktapis.

Pabluqa manam qellqarqantsu imanö kanqanta, ni manam gälakurqantsu manaraq cristiänu karnin ruranqankunapita (Hëch. 26:4, 5; Filip. 3:4-6). Tsëpa rantinqa kënömi nirqan: “Apostolkunapitaqa noqam mas mana precisaq kaq kä, y manam apostolnö reqishqa kanäpaqnötsu kä” (1 Cor. 15:9). Jina kënöpis nirqanmi: “Porqui noqatam, llapan santu nunakunapitapis mas mana precisaq kaqta, tsë alläpa alli këninta rikätsimarqan, tsënöpa Cristupa mana tantiyëpaq imëkayoq kënimpita alli willakïkunata juk nacion nunakunata willanäpaq” (Efes. 3:8). Kikin imanö kanqampitapis tsënö ninqanmi masqa precisan.