1. ¿Imakunapataq apostolkuna kawayanqan witsan cristiänukuna pasëkäyarqan?

APOSTOL Pëdrum, “Pontuchö, Galaciachö, Capadociachö, Asiachö y Bitiniachö” këkaq forastëru cristiänukunaman 62 y 64 watakunachö cartakurqan (1 Pëd. 1:1). Kë cristiänukunaqa alläpa chikishqam këkäyarqan, tsëmi wanayarqan animariyänanta. Jinamampis alläpa peligrösu tiempuchömi kawëkäyarqan, porqui wallka watakunallanam pishirqan Jerusalenta ushakäratsiyänampaq. Tsëmi tsarakuyänanqa fäciltsu karqan. ¿Imaraq yanapanman karqan? (1 Pëd. 4:4, 7, 12).

2, 3. ¿Imanirtaq apostol Pëdruqa cristiänukunata consejarqan shumaq chaskinakuyänampaq? (Rikäri kë yachatsikïpa qallananchö këkaq dibüjuta).

² Apostol Pëdrum kënö nir consejarqan: “Mana ajayashpa jukniki juknikiwan alläpa alli nuna kayë” (1 Pëd. 4:9). “Alläpa alli nuna” neq palabrakunapaqqa griëgu idiömachöqa nin mana reqinqantsikkunata o forastërukunata wayintsikman shumaq chaskipaqmi. Pëdruqa, “jukniki juknikiwan” nirqanmi, juk parlakïchöqa reqinakuyanqankunatam shumaq chaskiyänan karqan. ¿Imanöraq kë consëjuqa yanapanman karqan?

 ³ Juk shonqulla kayänampaqmi yanapanman karqan. Pensarishun. Cristiänu mayintsik wayinman invitamashqa ëwanqantsiktaqa, ¿manaku kushishqa yarpantsik? Y invitarnimpis, ¿manaku kushikuntsik maslla reqinakurinqantsikpita? Awmi. Apostol Pëdru kawanqan tiempuchö cristiänukunaqa, tsë rurëtam wanayarqan juknölla kayänampaq. Porqui alläpa mana alli tiempuchömi kawëkäyarqan. Y kanampis tsënöllam kawëkantsik (2 Tim. 3:1).

4. ¿Ima tapukïkunatataq kë yachatsikïchö contestashun?

⁴ ¿Imëtaq shumaq chaskinakoq kanqantsikta rikätsikushwan? ¿Imanirtaq wakinkunata chaskita mana puëdinqantsikta pensashwan y imatataq ruranantsik? Y invitädu karqa, ¿imatataq cuentachö katsishwan?

5. ¿Imanötaq reunionkunachö rikätsikushwan shumaq chaskikoq kanqantsikta?

⁵ Reunionkunachö. Jehovämi reunionkunamanqa invitamantsik. Y wakinkunatapis pëllam invitamun. Tsëmi reunionkunaman shamoqkunataqa shumaq chaskinantsik (Rom. 15:7). Tsëllaraq shamoqkunatanäqa, imanö vistishqa o altsapäkushqa kayaptimpis shumaqmi chaskinantsik (Sant. 2:1-4). Japallankunata rikarninqa juntu jamakurinapaqmi nirishwan y textukunatapis ashirmi yanaparishwan. Tsënö yanapanqantsikpitaqa alläpam kushikuyanqa. Tsëta rurarqa, “imëpis alläpa alli nuna kayë” neq consëjutam wiyakïkäshun (Rom. 12:13).

6. ¿Pikunatataq masqa wayintsikman invitashwan?

⁶ Wayintsikman mikunapaq invitarnin. Unë witsan nunakunaqa wayinkunamanmi imëpis nunakunata invitayaq. Tsënö invitarninqa rikätsikuyaq tsë nunakunawan alli kawakïta y amïgu këta munayanqantam (Gen. 18:1-8; Juëc. 13:15; Lüc. 24:28-30). Y noqantsikqa, ¿pikunatataq masqa invitashwan? Congregacionnintsikpita cristiänu mayintsikkunatam. Pëkunawan alli kawakunantsik y alli amïgu kanantsikqa alläpam precisan. Porqui mana allikunapa pasarninqa pëkunawan yanapanakïtam wanashun. Tsëmi alläpa precisan pëkunawan imëpis juntu këta yachakänantsik. Tsëman pensarmi, Jehoväpa Testïgunkunata Pushaqkunaqa Estädus Unïdus Betelchö Täpakoq revistata yachakuyänan höratam, 2011 watachö 6:45 de la tardipita 6:15 de la tardiman patsäratsiyarqan. Tsënöpam Betelchö trabajaqkunaqa mas tempränu ushaptin jukninkuna jukninkuna juntakärita puëdiyarqan. Jina wakin sucursalkunachöpis tsënöllam rurayashqa. Y kananqa mas unïdum këkäyan.

7, 8. ¿Imanötaq shumaq chaskikoq kanqantsikta rikätsikushwan congregacionnintsikman discursaq shayämuptin?

⁷ Betelpita, congregacionkunata watukakoq o juk wawqikuna congregacionnintsikman discursaq shayämuptinqa shumaq chaskikoq kanqantsikta rikätsikushun (leyi 3 Juan 5-8). ¿Manatsuraq tsënö watukamashqaqa imallatapis mikurinapaq invitarishwan?

⁸ Estädus Unïduspita juk panim willakun, congregacioninman discursaq ëwaqkunata wayinkunaman qowanwan imëpis invitayanqanta. Jina ninmi, tsënö rurayanqanqa Diosta mas alli sirwiyänampaq imëpis yanapanqanta.

9, 10. (1) ¿Pikunataq posadatsinantsikta wanayan? (2) ¿Ichiklla y waktsalla wayiyoq kaqkunaqa posadatsita puëdishwanku? Willakaramï.

⁹ Atska junaqkunapa wayintsikchö posadatsirnin. Unë witsankunaqa mas  reqinakuyanqan nunakunatam wayinkunachö atska junaqkunapa posadatsiyaq (Job 31:32; Filem. 22). Kanampis posadatsikoq kanantsikqa alläpam precisan. ¿Pikunatataq posadaratsishwan? Congregacionta watukaqkunata, Diospita maslla yachakuyänampaq escuëlaman shamoqkunata, Diosta adoranantsik wayita rurar yanapakoqkunata y desgraciapa pasëkaq familiakunatam. Manam jatun wayiyoq kaqkunalla posadatsiyänantaqa shuyarashwantsu. Itsa pëkunaqa mëtsika kutina posadatsiyashqa. ¿Manatsuraq noqantsikpis wayintsik ichiklla o waktsalla kaptimpis posadëkatsishwan?

¹⁰ Corëa del Sur nishqan nacionchö täraq juk wawqim, kushishqa yarpan Diospita maslla yachakuyänampaq escuëlaman ëwaqkunata posadatsinqanta. Kënömi nin: “Tsëllaraq casakushqa kar y ichik wayillachö tärarmi posadatsitaqa mantsapakurqä. Peru wayïkunachö posadatsiqa alläpa shumaqmi karqan. Jehoväta juntu sirwirnin y yanapakuyänampaq mas kallpachakurnin casädu vïdankunachö kushishqa kayanqantam rikäyarqö”.

11. ¿Imanirtaq congregacionnintsikman ëwakamoqkunataqa shumaq chaskishwan?

¹¹ Congregacionnintsikman ëwakayämuptin. Itsa täranqantsik sitiuman täraq ëwakayämunman, o congregacionnintsikman yanapakoq shayämunman. Tsënö ëwakamoqkunaqa manam rasqa congregacionnintsikchö yachakäriyanqatsu, porqui mushoq costumbrita o juk idiömataran yachakuyänan. Pëkunata wayintsikman mikoq o mëllatapis yanaqämänapaq invitanqantsikmi yanapanqa maslla reqimänantsikpaq y yachakäyänampaq.

12. ¿Imataq rikätsimantsik pitapis invitanapaqqa alli allitaraq cocinapakï mana precisanqanta?

¹² Wayintsikman invitanapaqqa manam alli allitaraqtsu cocinapakunantsik (leyi Lücas 10:41, 42). Juk wawqim yarpan warminwan misionërunö yanapakïta qallayanqan witsanqa jövinlla kayanqanta y alläpa llakikuyanqanta. Kënömi willakun: “Juk tardim warmïqa alläpa llakishqa këkarqan, y manam ni imanö consolëtapis puëdirqätsu. Patsa ampirkuptinnam, Bibliata estudiëkaq juk warmi kima naranjanwan chäramurqan. Tsënam juk väsu yakun qararirnin, të yakuta y chocolätita prepararir invitayarqä. Noqakunaqa manam suajïli idiömata parlayarqätsu y pëpis manam idiömäkunata parlarqantsu. Peru tsëpita witsëpaqa tsë nacionchö wawqikunawan y panikunawanmi mas reqinakuyarqä y kushishqam sientikuyarqä”.

13. ¿Imanirtaq wayintsikman invitakoq kanantsik alläpa precisan?

¹³ ¿Pitapis wayintsikman chaskita mana puëdinqantsiktaku pensantsik? Tsënö pensarqa, imëyaqpis alli amïgukunawan shumaq karinantsikpaq kaqtachi perdikurirquntsik. Y wayintsikman invitakoq kanqantsikmi yanapamäshun japallantsik mana sientikunapaq. Peru ¿imanir-raq pensashwan pitapis invitëta mana puëdinqantsikta?

14. Cristiänu mayintsikta invitanapaq o invitamanqantsikta chaskikunapaq tiempuntsik mana kaptin y utishqa sientikurqa, ¿imatataq rurashwan?

¹⁴ Tiempuntsik mana kanqan y utishqa sientikunqantsik. Jehoväpa sirweqninkunaqa imëpis ocupädum kantsik. Tsëqa itsa pensashwan pitapis invitanapaqqa tiempuntsik mana kanqanta y utishqa sientikunqantsikta. Tsënö kaptinqa, ¿manatsuraq tiempuntsik kanampaq y utishqa mana sientikunapaq rurënintsikkunata shumaq  patsätsishwan? Tsënöpam invitakïta puëdishun y invitamashqapis chaskikushun. Porqui Bibliaqa nimantsik imëpis alli nuna kanapaqmi (Heb. 13:2). Alläpa mana precisaq rurëkunapaqqa mas wallka tiempullatanam rakinantsik. Wawqintsikkunawan y panintsikkunawan juntu karinantsikpaq tiempuntsikta rakiqa alläpam precisan.

15. ¿Imanir-raq invitakïta mantsapakushwan?

¹⁵ Mantsapakunqantsik. Wakintsikqa itsa invitakïtaqa mantsapakuntsik qellënintsik mana kaptin, wakinkunanö qarëta mana puëdinqantsikta pensarnin o alläpa mana parlakoq kashqa mana alli sientikuyänanta pensarnin. Peru tsërëkurqa manam invitakïta mantsanantsiktsu. Jina yarpänantsikmi alli y shumaq wayiyoqraq kanantsikqa mana precisanqanta, masqa precisan shumaq churapakushqa y limpiu kananmi.

16, 17. ¿Imaraq yanapamäshun posadatsikïta mana mantsapakunapaq?

¹⁶ Manam noqantsikllatsu invitäduyoq këtaqa mantsapakuntsik. Gran Bretäñapita juk anciänum willakun, invitäduyoq karnin alistakunan mantsapakïpaq kanqanta. Peru cafëta upuparnin y parlakurnin kariyanqanqa alläpa shumaq kanqantam nin. Invitäduntsikkuna alli sientikuyänanta procuranantsikqa alläpam precisan (Filip. 2:4). Mëtsikaqtam gustan vïdankunapita parlakurita. Y tsëta shumaq wiyarinapaqqa juntu karinqantsikmi yanapakun. Juk anciänunam kënö nin: “Congregacionpita wayïman shayämunqanqa, imanö kayanqanta maslla reqinäpaqmi yanapaman, y masqa Jehoväpita yachakur imanö qallayanqantam musyarï”. Invitäduntsikkuna shumaq sientikuyänanta procurarninqa alläpa shumaqmi pasarishun.

¹⁷ Diospita maslla yachakuyänampaq escuëlaman ëwaqkunata posadatseq juk precursöram kënö nin: “Qallananllachöqa wayï waktsalla kaptin y sillëtäkuna makwalla kaptinmi penqakoq kä. Peru tsë escuëlachö yachatsikoqpa warminmi kënö nimarqan: ‘Congregacionkunata watukayanqä semänakunaqa Jehoväta alläpa kuyaq cristiänu mayintsikkunapa wayinchö quedakuyanqämi mas shumaqqa. Imëkayoq mana kayaptimpis sencïllulla kawakuyanqan y Jehoväta kuyayanqanmi masqa kushitsiyäman’. Tsënö nimanqanqa yarpäratsimarqan, wamrallaraq këkaptï mamänï kënö nimanqantam: ‘Kuyanakï kaptinqa, juk plätu verdürallapis mishkinmi’” (Prov. 15:17). Rikanqantsiknöpis, masqa precisan invitäduntsikkunata kuyakïwan atiendinqantsikmi.

18, 19. Wakinkunata wayintsikman invitanqantsikqa, ¿imanötaq yanapamantsik?

¹⁸ Imanö kayanqan mana gustamanqantsik. Juk cristiänu mayintsik imanö kanqan mana gustamashqa o piñatsimanqantsikta mana qonqarqa wayintsikman invitëtaqa itsa munashuntsu. Peru mana invitarninqa tsë cristiänu mayintsikta imëpis mana allillapam rikëkäshun.

¹⁹ Bibliaqa nin invitakoq kanqantsikqa llapankunawan y hasta chikimaqnintsikkunawampis alli kawakunapaq yanapamanqantsiktam (leyi Proverbius 25:21, 22 *). Invitarninqa ofendimanqantsikta mananam yarparäshunnatsu, y Jehovä rikanqannömi imakunachö alli kanqanta rikar qallëkushun y amïgum tikrashun (Juan 6:44). Peru ¿imanötaq musyashwan janan shonqulla mana invitëkanqantsikta? Tsëpaqqa Filipensis 2:3 textu  ninqannömi humildi kanantsik, y noqantsikpitapis mas precisaqpaqmi wakinkunata churanantsik. Rasumpa kaqchöqa, llapan cristiänu mayintsikkunam imallachöpis noqantsikpita mas alli kayan; itsa Jehoväman mas confiakuyan, problëmakunata mas aguantayan o mas valienti kayan. Imallachöpis noqantsikpita mas alli kayanqanta rikarninqa masmi kuyashun y fäcil-llam wayintsikmampis invitarishun.

20. Pipis invitamashqaqa, ¿imatataq ruranantsik y imanir?

²⁰ Invitädu karninqa, ¿imakunatataq cuentachö katsishwan? Jukqa, änikunqantsiktam cumplinantsik (Sal. 15:1, 4). Pipis invitamashqa ëwanapaq änishqana këkarninqa cumplinantsikmi, y manam imapis mana precisaq asunturëkurllaqa fallanantsiktsu. Porqui mana ëwarqa ardëllam afanakatsishun y gastakatsishun (Mat. 5:37). Wakinkunaqa, “shamushaqmi” nirirmi, mas allitanö rikarninqa juk lädupana ëwariyan. Tsëta rurarqa manam kuyakoqtsu ni respetakoqtsu kashwan. Invitamaqnintsik imallatapis qaramanqantsiktaqa kushishqam chaskikunantsik (Lüc. 10:7). Y rasumpa contra tiempu kaptin ëwëta mana puëdirqa, tiempuwanmi willarinantsik. Tsënöpam kuyakoq kanqantsikta rikätsishun y manam ardëllaqa shuyarätsishuntsu ni alistapakatsishuntsu.

21. Alli invitädu karninqa, ¿imatataq cuentachö katsinantsik?

²¹ Jina alläpam precisan costumbrinkunata cuentachö katsinantsik. Wakin markakunachöqa, mana willakurllam visitakoq chäriyan y wakin markakunachöqa puntataqa willakuyänanran. Y wakin markakunachöqa invitädukunataqa mas alli kaq mikïtam qarayan, y wakinchöqa imëpis mikuyanqanllatam invitayan. Wakin markakunachöqa, invitädukunaqa imallatapis aparkurmi chäyan, peru wakinchöqa jinëllam chäriyan. Y wakin markakunachönam invitayaptinqa, “ama afanakïtsu” niyänantaraq shuyaräyan, peru wakin markakunachöqa tsënö niyaptinqa mana agradecikoqtanömi rikäyan. Imanö costumbri kaptimpis invitamaqnintsikkuna imëpis alli sientikuyänantam procuranantsik.

22. ¿Imanirtaq alläpa precisan alli chaskikoq kanantsik?

²² Kananqa apostol Pëdru kënö ninqanmi maslla cumplikëkan: “Llapan imëkapa ushakëninqa këllachönam këkan” (1 Pëd. 4:7). Imëka mana allikunapam pasëkantsik, y tiempu mas peoranqanmannömi cristiänu mayintsikkunawan mas kuyanakunantsik precisanqa. Tsëmi, “jukniki juknikiwan alläpa alli nuna kayë” nir apostol Pëdru consejamanqantsikta wiyakunantsik (1 Pëd. 4:9). Cristiänu mayintsikkunata shumaq chaskiqa alläpa shumaqmi y tsë rurëqa imëpis precisëkanqallam.