1. ¿Imapitataq teytakunaqa següru këta munayan wamrankuna bautizakïta munayaptin?

BLOSSOM BRANDT panim kënö willakun: “Atska killakunapam teytäkunata nirqä bautizakïta munanqäta y pëkunaqa atska kutim entienditsiyämarqan bautizakï imapaq kanqanta. Tsëta alleq entiendinätam munayarqan. Y 1934 wata 31 de diciembri killam bautizakurirqä”. Kanan witsan cristiänu teytakunapis wamrankunatam yanapëta munayan alleq decidiyänampaq. Bautizakuyänanta pasapakätsiqa mana allim (Sant. 4:17). Peru tsënö kaptimpis teytakunaqa kënömi tapukuyan: “¿Bautizakurirqa Jesus mandakunqanta cumplita puëdinqatsuraq?”. Tsëtam següru këta munayan manaraq bautizakuptin.

2. (1) ¿Imatataq rikäyashqa congregacionkunata watukakoqkuna? (2) ¿Imapitataq kë yachatsikïchö yachakushun?

² Congregacionkunata watukaqkunam rikäyashqa, wakin jövinkunaqa Testïgupa wamran këkar y 20 watayoqna këkarpis manaraq bautizakuyanqanta. Tsënö jövinkunapitaqa wakinqa reunionkunaman ëwayan, yachatsikoqmi  yarquyan, y hasta Testïgu kayanqantam niyan. Peru ¿imanir-raq bautizakuyantsu? Wakinkunataqa teytankunam niyashqa maslla shuyäriyänampaq. ¿Imanir-raq tsënö niyan? Kë yachatsikïchömi teytakuna imaman yarpachakuyanqampita chuskullata rikärishun.

3. ¿Imatataq Blossompa teytankunaqa musyëta munayarqan?

³ Blossompa teytankunaqa segürakïtam munayarqan bautizakï asuntuta wamran alleq entiendinampaq y rasumpa musyar decidinampaq edäninchöna kanqanta. ¿Imanötaq teytakuna musyayanman wamrankuna bautizakuyänampaq listuna këkäyanqanta?

4. ¿Imanötaq teytakunata yanapan Mateu 28:19 y 20 textuchö Jesus mandakunqan?

⁴ (Leyi Mateu 28:19, 20). Pasaq kaq yachatsikïchö rikanqantsiknöpis, Bibliaqa manam nintsu bautizakuyänampaqqa ëka watayoqraq kayänanta. Peru tsënö kaptimpis Mateu 28:19 textu ninqanmanmi teytakunaqa alleq pensayänan. Tsëchöqa, “qatimaqnïkuna tikrayänampaq” yachatsiyë ninmi. Tsënö nirqa, Jesuspa qateqninkuna tikrayänanta munarnin yachatsipaqmi parlëkan. Y llapan versïculuta leyirqa entiendintsik, Jesuspa qateqninqa pëpita alleq yachakunqanta y cäsukoq kanqantam. Tsëmi teytakunaqa, llullullaraq kayanqampita wamrankunata yachatsiyänan bautizakï asuntuta alleq entiendiyänampaq y Jesuspa qateqnin tikrayänampaq. Awmi, juk llullu wamraqa manam bautizakïta puëdintsu, peru Bibliaqa nin hasta wamrakunapis Bibliapa yachatsikïninkunata entiendita puëdiyanqantam.

5, 6. (1) Timoteupita Bibliachö leyirninqa, ¿imanir bautizakunqantataq cuentata qokuntsik? (2) ¿Imatataq teytakunaqa cuentachö katsiyanman wamrankunata shumaq yanapayänampaq?

⁵ Timoteuqa jövinllaraq kanqampitam Jehoväta sirwita decidirqan. Apostol Pablum nirqan Timoteuqa llullullaraq kanqampita Diospa Palabranta yachakushqa kanqanta. Pëtaqa mamanwan awilanmi yachatsiyarqan, porqui teytanqa manam Jehoväta sirweq nunatsu karqan. Tsënö yachatsiyashqa kayaptinmi Jehoväman alleq markäkurqan (2 Tim. 1:5; 3:14, 15). Y 20 watayoq këkarqa, listunam këkarqan congregacionchö precisaq cargukunata chaskinampaq (Hëch. 16:1-3).

⁶ Musyanqantsiknöpis wamrakunaqa manam llapantsu igual kayan. Wakinkunaqa imëka mayor nunakunanömi pensayan, y hasta Jehoväta sirwiyänampaqmi decidiyan. Peru wakinkunaqa despaciuran poquyan. Tsëmi teytakunaqa wamrankunata exigiyantsu raslla bautizakuyänampaq. Tsëpa rantinqa yachakïta puëdiyanqanmannömi shumaq yachatsita procurayan. Teytakunaqa alläpam kushikuyan Proverbius 27:11 * (leyi) textu ninqanta wamrankuna wiyakuyaptin. Y manam qonqayänantsu Jesuspa qateqnin kayänampaq wamrankunata yanapëta. Y tsëman pensarmi teytakunaqa kënö tapukuyänan: “¿Wamräqa alleqnaku musyan Jehovällatana imanir sirwinampaq y bautizakunampaq kaqta?”.

7. ¿Bautizakuyänampaqqa Biblia ninqanta llapantaraqku musyayänan? Wallakaramï.

⁷ Teytakunaqa rasumpam munayan wamrankuna alleq yachakuyänanta, porqui tsëmi yanapanqa Jehoväta sirwita decidiyänampaq. Tsëqa, ¿bautizakuyänampaqqa Bibliapita llapantaraqku musyayänan? Manam. Porqui llapan bautizakoqkunam yachakïtaqa sïguiyänanlla (leyi Colosensis 1:9, 10). Tsëqa, ¿imakunatataq musyayänan bautizakuyänampaq?

8, 9. ¿Imatataq yachakuntsik Pablupaq y prësukunata cuidaqpaq willakïkunapita?

⁸ Apostolkuna kawayanqan witsanchö kawashqa juk familiapaq parlarishun (Hëch. 16:25-33). 50 watam ishkë kaq kutichö apostol Pablu Filïpus markata viajarqan. Sïlaswan chäriyaptinmi, nunakunaqa mana kaqpita acusarnin carcelariyarqan. Y tsë paqasmi patsa fuertipa kuyuriptin carcelpa punkunkuna kichakäriyarqan. Prësukunata cuidaq guardiaqa, prësukuna escapashqa kayanqanta pensarninmi wanutsikurita munarqan. Peru Pablum michärirqan. Tsënam Pabluwan Sïlasqa pëta y familianta Jesuspita parlapäriyarqan. Tsëta entiendirirnam jinan höra bautizakuriyarqan. ¿Imatataq kë willakïpita yachakuntsik?

⁹ Prësukunata cuidaqqa Röma nunam karqan, y itsachi puntataqa soldädu kashqa karqan. Y Diospa palabrampitaqa manachi imatapis musyarqantsu. Tsëchi Diospita mas precisaq yachatsikïkunata yachakïta, Diosta sirwi imanö kanqanta y Jesus yachatsikunqankunata cäsukïta entienditaraq wanarqan. Y ichik tiempullachömi tsëkunata entiendirirqan y bautizakurirqan. Y bautizakurirqa yachakurninchi sïguirqan. Tsëqa, ¿imataraq teytakuna rurayanman, “Jehoväta kuyarmi bautizakïta munä” nirnin wamrankuna niyaptin? Tsëqa anciänukunata willanampaqmi niyanman, y pëkunanam rikäyanqa bautizakïta puëdinqanta o manaraq puëdinqanta. * Y bautizakurirqa, llapan bautizakoqkunanömi Jehoväpita yachakurnin sïguinan (Rom. 11:33, 34).

10, 11. (1) ¿Imatataq pensayan wakin teytakunaqa? (2) ¿Imatataq juk teytaqa mas precisaqpaq churanan?

¹⁰ Wakin teytakunaqa pensayan manaraq bautizakurnin wamrankuna imallatapis estudiayänan y alli trabäjuyoq kayänan precisanqantam. Tsënö pensayanqanqa itsa allinö kanman, peru ¿yanapanqatsuraq wamrankuna rasumpa kushishqa kayänampaq? ¿Tsëtatsuraq Biblia yachatsikun? ¿Vïdankunachö imata rurayänantataq Jehovä munan? (leyi Eclesiastes 12:1 *).

¹¹ Imëpis yarpänantsikmi Jehoväta mana sirweq nunakuna rurayanqankuna y kë munduchö imëka kaqkunapis Diospa contranchö këkäyanqanta (Sant. 4:7, 8; 1 Juan 2:15-17; 5:19). ¿Imaraq wamrakunata tsapanqa Satanaspa y Diosta mana cäsoq nunakunapa  pensëninkunapita? Diospa amïgun kayanqanmi. Teytakuna imëkayoq këta mas precisaqpaq churayaptinqa, wamrankunapis Jehoväwan amïgu këpita tsëkuna mas precisaq kanqantam pensayanqa. Y cristiänu teytakunaqa manam munayantsu Diosta mana cäsukoq nunakunanö wamrankuna imatapis decidiyänanta. Porqui rasumpa kushishqaqa kayanqa Jehoväwan amïgu karllam (leyi Salmus 1:2, 3 *).

12. ¿Imanirtaq wakin teytakunaqa wamrankunata niyan manaraq bautizakuyänampaq?

¹² Juk panim wamranta nirqan manaraq bautizakunampaq. Imanir tsënö ninqantam kënö willakun: “Jutsata rurariptin congregacionpita qarquriyänanta mantsarmi tsënö nirqä. Tsënö ninqätaqa alläpam penqakü”. Pënöllam wakin teytakunapis pensayan, Tsëmi bautizakuyänampaq poqushqa nuna kayänantaraq munayan (Gen. 8:21; Prov. 22:15). Itsa pensayan mana bautizädu kaptinqa congregacionpita qarqïta mana puëdiyänampaq kaqta. Peru tsënö pensarqa llutantam pensëkäyan (Sant. 1:22).

13. ¿Rasumpatsuraq Jehoväqa mana bautizädu këkarnin jutsata rurayanqampita cuentata mañanqatsu? Entienditsikaramï.

¹³ Alli poqurkur-raq wamrankuna bautizakuyänanta teytakuna munayanqanqa allim. Peru jutsata rurariptin bautizädu mana kanqanrëkur Jehovä cuentata mana mañanampaq kaqta pensëqa mana allim. Porqui ima rurëkuna alli kanqanta y mana alli kanqanta musyayanqampita patsëmi Jehovätaqa cuentata qoyanqa (leyi Santiägu 4:17). Tsëmi, “amaraq bautizakïtsu” niyänampa rantin, teytakunaqa ejemplunkunawan alleq yachatsiyänan. Llullumpitam yachatsiyänan Jehoväta kuyayänampaq y cäsukuyänampaq (Lüc. 6:40). Tsëmi wamrakunataqa yanapanqa jutsaman mana ishkiyänampaq y mandakunqankunata cäsukuyänampaq (Is. 35:8).

14. ¿Imanötaq anciänukuna teytakunata yanapayanman?

¹⁴ Anciänukunaqa, Diospa markanchö rurëkunapita wamrakunata parlaparninmi teytakunataqa yanapëta puëdiyan. Juk panim willakun joqta watayoq këkaptin, 15 minütukunapa wawqi Rüssell Diospa markanchö imanö yanapakunampaq kaqpita shumaq parlapärinqanta. Kë paniqa 70 watakunapitapis masmi precursöra karqan. Këmi rikätsimantsik pitapis shumaq parlapärinqantsikqa alläpa yanapakunqanta (Prov. 25:11). Jina anciänukunaqa teytakunatam wamrankunatawan niyanman salonchö rurëkunachö yanapakuyänampaq, y wamrakunatanam ima rurëmampis churayanman puëdiyanqanmannö yanapakuyänampaq.

15. ¿Imanötaq mana anciänu kaqkunaqa jövinkunata yanapayanman?

¹⁵ Y mana anciänu kaqkunaqa, ¿imanötaq yanapakushwan? Imata rurayanqantapis cuentachö katsirninmi. Itsa reunionchö shumaq parlakarayämushqa, discursayämushqa, ima tentacionchöpis alli tsarakuyashqa, o escuëlachö  Diospita shumaq yachatsikuyashqa. Tsëkunatam alkäbu këkänantsik felicitärinapaq. Reunion manaraq qallaptin o ushariptin jövinkunawan parlakurinapaqmi tiemputa rakinantsik. Tsënö ruranqantsikmi yanapanqa Diospa markanchö këkäyanqanta imëpis cuentachö katsiyänampaq (Sal. 35:18).

16, 17. (1) ¿Imanirtaq precisan wamrakuna bautizakuyänan? (2) ¿Imapitataq cristiänu teytakuna kushikïta puëdiyan? (Rikäri kë yachatsikïpa qallananchö këkaq fötuta).

¹⁶ Diosta sirweq teytakunapaqqa alläpam precisan wamrankunata Jehoväpita yachatsiyänan (Efes. 6:4; Sal. 127:3). Israelïtakunapa wamrankuna yuririrqa Diospa sirweqninllanam tikrariyaq. Peru cristiänu teytakunapa wamrankunaqa manam yuririrllatsu Diospa sirweqninman tikrariyan. Y Jehovä kuyëtaqa manam juk herenciatanötsu teytankunapita chaskiyan. Tsëmi teytakunaqa wamrankuna yuriyanqampita patsë alli yachatsiyänan Jesuspa qateqnin tikrayänampaq. Porqui Diosllatana sirwinampaq änikunqan, bautizakunqan y mana jaqipa sirwinqanmi yanapanqa jatun sufrimientu witsan salvakunampaq (Mat. 24:13).

¹⁷ Kë yachatsikïpa qallanan pärrafuchömi parlarqantsik Blossom Brandt panipaq. Bautizakïta munanqanta niriptinqa, teytankunaqa segurakïtam munayarqan bautizakunampaq listuna këkanqanta. Y alleq musyarnin decidïkanqanta musyarirqa manam bautizakunanta michäyarqantsu. Y bautizakunampaq juk junaq pishikaptin teytan ruranqantam pani Blossom kënö willakun: “Llapäkuna qonqurikuyänäpaq nirayämarmi, Jehoväman kënö nir mañakamurqan: ‘Sirwishunëkipaq wamrä decidinqantaqa alläpam kushikü’”. 60 watakuna pasariptimpis kë paniqa kënömi nirqan: “Tsë paqas teytä mañakamunqantaqa manam imëpis qonqashaqtsu”. Teytakuna, wamrëkikuna Jehoväpa sirweqnin tikrayaptin y bautizakuyaptinqa alläpachi kushikuyanki, tsëqa yanaparnin sïguiyë.