1, 2. (1) ¿Imanötaq Jehoväqa nunakunawan unëpita patsë parlashqa? (2) ¿Imatataq kë yachatsikïchö yachakushun?

JEHOVÄTAQA alläpam gustan noqantsikwan parlë. Porqui munanmi imanö kanqanta y imata pensanqanta musyanantsikta. Tsëmi unë witsanchöqa sirweqninkunata parlapänampaqqa profëtakunata, angelkunata y Tsurin Jesusta utilizarqan (Amos 3:7; Gäl. 3:19; Rev. 1:1). Y kananqa Palabran Bibliawanmi parlapämantsik.

² Jinamampis, kë patsachö Jesus këkaptinmi Jehoväqa kima kuti parlaparqan. Tsëmi kë yachatsikïchö yachakushun parlanqankunapita imata yachakunqantsikta y yanapamänata munarqa imata ruranapaq kaqta.

3. Marcus 1:9-11 textu ninqannöpis, ¿imatataq Jehoväqa nirqan Jesus bautizakuriptin y ima nitataq munëkarqan?

³ (Leyi Marcus 1:9-11). Puntataqa Jehoväqa Tsurinta ciëlupita parlaparqan bautizakunqan junaqmi. Kënömi nirqan: “Qammi Tsurï kanki, kuyë Tsurï; qampitam alläpa kushikü”. Jehovä tsënö ninqanta wiyarirqa Jesusqa alläpachi kushikurqan, porqui kuyanqanta y pëman alläpa confiakunqantam rikätsirqan. Tsëmi kananqa Jehovä kënö ninqankunapita yachakurishun: Jesus tsurin kanqanta, kuyanqanta y pëpita kushikunqanta.

4. “Qammi Tsurï kanki” nir Jesusta Jehovä ninqanqa, ¿imatataq rikätsikun?

⁴ “Qammi Tsurï kanki”. Ciëluchö këkarnimpis Jesusqa Jehoväpa tsurinmi karqan. Tsëmi “qammi Tsurï kanki” nirninqa, rikätsikïkarqan juk mushoq carguta Jesus chaskinampaq  kaqta. Tsëmi bautizakunqan junaqqa, santu espïrituwan akrashqa karqan ciëluta kutirirnin Rey y Mandakoq Kaq Sacerdöti kanampaq (Lüc. 1:31-33; Heb. 1:8, 9; 2:17). Tsëmi Jesus bautizakuriptin Jehovä kënö nirqan: “Qammi Tsurï kanki” (Lüc. 3:22).

5. Jehoväpitaqa, ¿imatataq yachakuntsik?

⁵ ‘Qammi kuyë Tsurï kanki’. Jehoväqa kuyanqantam Jesusta rikätsirqan y tsënömi animarqan. Noqantsikpis tsënöllam wakinkunata kuyanqantsikta rikätsikunantsik (Juan 5:20). Wakinkuna kuyamanqantsikta rikätsimashqa y allikunata ruranqantsikpita felicitämashqaqa alläpam kushikuntsik. Tsënöllam cristiänu mayintsikkuna y familiantsikkunapis kuyanqantsikta y animanantsikta wanayan. Tsëta rurarqa Jehoväman mas confiakuyänampaq y mana jaqipa sirwir sïguiyänampaqmi yanapashun. Jina masqa teytakunam wamrankunata animayänan, felicitäyänan y kuyayanqanta rikätsiyänan. Tsënö rurarqa wamrankuna Jehoväman mas confiakuyänampaqmi yanapayanqa.

6. ¿Imanirtaq noqantsikpis Jesusman confiakushwan?

⁶ “Qampitam alläpa kushikü”. Jehovä tsënö nirninqa, mandanqankunata Jesus cumplinampaq kaqtam següru këkarqan. Jehoväpis Tsurinman confiakïkaptinqa, ¿manatsuraq noqantsikpis, änimanqantsikkunata Jesus cumplimunampaq kaqman confiakushwan? (2 Cor. 1:20). Jesus imanö kanqanman yarpachakunqantsikmi, pëpita mas yachakïta munanapaq y ruranqannölla ruranapaq yanapamantsik. Jina Jehoväpis confiakunmi sirweqninkuna Jesuspita yachakurnin sïguiyänampaq kaqman (1 Pëd. 2:21).

7. Mateu 17:1-5 textu ninqannöpis, ¿imëtaq masqa Jehovä ciëlupita parlarqan y ima nirqantaq?

⁷ (Leyi Mateu 17:1-5). Jirkachö Pëdruwan, Santiäguwan y Juanwan Jesus këkäyaptinmi ishkë kaq kutichöqa ciëlupita Jehovä parlanqan wiyakärirqan. Tsë jirkachömi Jesuspa qaqllan intinöraq chipaparqan, y janan kaq röpankunapis aktsinöran chipaparqan. Y ishkaq nunakunam Jesuswan parlëkäyarqan, pëkunaqa Moiseswan Elïasmi kayarqan. Tsëchömi Jesus wanunampaq kaqta y kawarimunampaq kaqta parlëkäyarqan. Kiman apostolninkunata punï nitïkaptimpis tsënö chipapëkaqta rikëkurmi chipyëpa riyariyarqan o rikchariyarqan (Lüc. 9:29-32). Tsëpitanam, pukutë yuririr pëkunata tsapar qallëkurqan. Y Jesus bautizakunqan junaqnöllam tsë kutichöpis, Diosqa rikätsikurqan Tsurinta kuyanqanta y pëpita kushikunqanta. Kënömi nirqan: “Këmi Tsurï, kuyë Tsurï, pëpitam alläpa kushikü. Pëta wiyayë”.

8. Visionchö rikäyanqanqa, ¿imanötaq Jesusta y discïpulunkunata yanaparqan?

⁸ Diospa Gobiernunchö mandakoq karnin imanö kanampaq kaqtam tsë visionchöqa rikärirqan. Tsëqa alläpachi Jesusta yanaparqan alli tsarakunampaq, porqui feyupa sufritsirninmi wanutsiyänan karqan. Jinamampis discïpulunkuna Diosman mas confiakuyänampaq, pruëbakunapa pasayanqan höra alli tsarakuyänampaq y Diospita yachatsikur sïguiyänampaqmi yanaparqan. Y tsëpita 30 watanö pasariptinnam apostol Pëdru tsë rikäyanqan visionpita parlarqan, tsëmi rikätsikun alleq cläru yarpanqanta (2 Pëd. 1:16-18).

9. ¿Imatataq Jesusqa discïpulunkunata consejarqan?

⁹ “Pëta wiyayë”. Jehovä tsënö nirninqa clärum rikätsikurqan, Tsurinta wiyanantsikta y cäsukunantsikta munanqanta. Kë patsachö kanqan witsanqa Jesusqa imëkatam yachatsikurqan, y tsëkunatam cuentachö katsinantsik. Por ejemplu discïpulunkunatam yachatsirqan Diospa Gobiernumpita imanö yachatsikuyänampaq kaqta y kutin kutinmi yarpätsirqan mäkoq mäkoqlla këkäyänampaq (Mat. 24:42; 28:19, 20). Jinamampis, mas kallpachakuyänampaq y mana qelanäriyänampaqmi animarqan (Lüc. 13:24). Jina nirqanmi, jukninkuna y jukninkuna kuyanakur sïguiyänampaq, unïdu kayanampaq y mandanqankunata cäsukuyänampaq (Juan 15:10, 12, 13). Jesuspa consëjunkunaqa tsë tiempuchö discïpulunkunata alläpam yanaparqan y kanampis tsënöllam yanapamantsik.

10, 11. ¿Imanötaq rikätsikuntsik Jesusta wiyakunqantsikta?

¹⁰ Jesusmi kënö nirqan: “Pipis rasumpa kaqta cäsukoq kaqqa, ninqäkunatam wiyakun” (Juan 18:37). Jesus ninqankunataqa wiyakuntsik kë consëjuta cäsukurninmi: “Jukniki juknikikuna aguantanakurnin sïguiyë, y ofendinakurpis jukniki juknikikuna perdonanakuyë” (Col. 3:13; Lüc. 17:3, 4). Jinamampis Jesusta wiyanqantsiktaqa rikätsikuntsik alli tiempuchö y mana alli tiempuchöpis gänas gänaslla Diospita yachatsikurninmi (2 Tim. 4:2).

¹¹ Jina Jesusqa nirqanmi, “üshäkunaqa qayanqätam wiyayan” (Juan 10:27). Jesusta wiyanqantsiktaqa rikätsikuntsik manam nimanqantsikkunata wiyakurninllatsu, sinöqa mandamanqantsikkunata cäsukurninmi. Y manam permitinantsiktsu kawënintsikchö imëka yarpachakïkuna Diosta sirwinantsikta jaqitsimänata (Lüc. 21:34). Tsëpa rantinqa, problëmakunapa pasëkarnimpis Jesus ninqantam masqa  cäsukunantsik. Mëtsikaq wawqintsikkuna y panintsikkunam imëka problëmakunapa pasëkarpis alli tsarakïkäyan. Por ejemplu wakintaqa alläpa chikir imëkatam rurëkäyan, wakinqa alläpam waktsa kayan y desgraciakunapam pasayan. Peru tsëkunapa pasëkarpis Jehovätam mana jaqipa sirwikäyan. Tsëmi pëkunapaqqa Jesus kënö nin: “Mandakunqäkunata chaskikoq kaq y wiyakoq kaqmi, kuyamaq kaqqa. Y kuyamaq kaqtaqa Teytäpis kuyanqam” (Juan 14:21).

12. ¿Imanö mastaq Jesusta wiyakunqantsikta rikätsikuntsik?

¹² Jina Jesusta wiyakunqantsiktaqa rikätsikuntsik pushamänapaq churanqan nunakunata cäsukurninmi (Heb. 13:7, 17). Kë qepa watakunachöqa Jehoväpa markanqa imëka cambiukunatam rurayämushqa. Por ejemplu, juknöpa yachatsikunapaqmi mas yanapakïkunata jorqayämushqa. Jina pullan semänachö reunionnintsikkuna, salonkunata imanö ruranapaq, altsanapaq y cuidanapaqpis cambiashqam. Tsënö alli pensëkur y kuyëpa Diospa markan dirigimanqantsikpitaqa alläpam agradecikuntsik. Tsëmi següru këkänantsik markanwan Jehovä dirigimanqantsikta cäsukushqaqa bendicimänapaq kaqta.

13. ¿Imanötaq yanapamantsik Jesusta wiyakunqantsik?

¹³ Jesus yachatsikunqankunata cäsukunqantsikqa, alläpam yanapamantsik. Y kikinmi discïpulunkunata nirqan yachatsinqankuna alläpa yanapanampaq kaqta. Kënömi nirqan: “Ankash këtam qamkunapaq tariyanki. Porqui yügüqa manam nanatsikuntsu, y cargäqa ankashllam” (Mat. 11:28-30). Jina kë patsachö Jesus imakunata ruranqankunata Mateu, Marcus, Lücas y Juan libruchö Dios escribitsinqanmi, valienti y yachaq kanapaq yanapamantsik (Sal. 19:7; 23:3). Tsënö kanqantam Jesus kënö nirqan: “¡Kushishqaqa kayan Diospa palabranta wiyaqkuna y cäsukoqkunam!” (Lüc. 11:28).

14, 15. (1) Juan 12:27, 28 textu ninqannö, ¿imatataq Jehoväqa ciëlupita parlarqan? (2) Jehovä ninqanqa, ¿imanötaq Jesusta yanaparqan y kallpata qorqan?

¹⁴ (Leyi Juan 12:27, 28). Juan escribinqan libruchönam willakun kima kaq kutichö ciëlupita Jehovä parlamunqanta.  Tsëqa karqan tsë kutillana Pascua fiestata celebranampaq Jerusalenchö Jesus këkaptinmi. Tsëchömi alläpa llakishqa këkanqanta nirir Diosman kënö mañakurqan: “Teyta, jutikita alläpa precisaqpaq churë”. Y Jehovänam ciëlupita kënö contestarqan: “Alläpa precisaqpaqmi churarqö, y yapëmi alläpa precisaqpaq churashaq”.

¹⁵ Jesusqa wanunqanyaqmi Jehovällata sirwinqanta rikätsikunan karqan, tsëmi alläpa yarpachakurqan. Porqui alläpa feyupa astarnin wanutsiyänampaq kaqtam musyarqan (Mat. 26:38). Peru Jesuspaqqa Teytampa jutin respetashqa kananmi masqa precisarqan. Porqui Diospa contranmi parlashqa nirmi acusayarqan. Y tsënö wanurnin Diospa jutinta penqakïchö quedatsitam alläpa mantsarqan. Peru jutinta precisaqpaq churanampaq kaqta Dios ninqanqa alläpachi yanaparqan y änimarqan wanunqanyaq alli tsarakunampaq. Itsa teytan ninqantaqa Jesuslla entiendishqa karqan, tsënö kaptimpis Jehoväqa Palabran Bibliachömi escribitsishqa noqantsikta yanapamänapaq (Juan 12:29, 30).

16. ¿Imanirtaq Jehoväpa jutinrëkur yarpachakushwan?

¹⁶ Itsa tumpamashqa o chikimaqnintsikkuna noqantsikpaq mana allita parlayaptin, Jehoväpa jutin mana allichö quedanampaq kaqta yarpachakuntsik. Peru manam tsërëkurqa yarpachakunantsiktsu.  Sinöqa Jesusta Jehovä ninqanmanmi yarpänantsik, tsëmi yanapamäshun alli sientikunapaq. Porqui Jehoväqa jutintam imëpis respetatsinqa. Y Satanaspa makinchö këkaq nunakuna sirweqninkunata sufritsiyanqanta chipyëpa ushakätsinampaqmi Gobiernunta utilizanqan (Sal. 94:22, 23; Is. 65:17). Segürum këkänantsik Dios kënö änikunqanta cumplikänampaq kaqta: “Imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filip. 4:6, 7).

17. Isaïas 30:21 textu ninqannö, ¿imanötaq kanan witsan Jehovä parlapämantsik?

¹⁷ Jehoväqa kanampis parlapämantsikmi (leyi Isaïas 30:21 *). Peru manam ciëlupitatsu parlapämantsik. Sinöqa Palabran Bibliawanmi parlapämantsik y yachatsimantsik. Jinamampis santu espïritunmi ‘markäkïpaq kaq mayuralta’ yanapan publicacionkunata, Internetchö videukunata y maskunata jorqayämunampaq (Lüc. 12:42). Jehoväqa mëtsika yanapakïkunatam qomantsik.

18. ¿Imanötaq Jehoväqa pëman mas confiakunapaq y valienti kanapaq yanapamantsik?

¹⁸ Kë patsachö Tsurin këkaptin Jehovä ninqanta ama imëpis qonqashuntsu. Jehoväqa llapantapis rikëkanmi y Satanaswan mana alli nunakuna sufritsimanqantsikkunata chipyëpa ushakätsinampaq kaqtam Palabranchö nimantsik, y tsëmanmi confiakunantsik. Y Jehovä nimanqantsikkunata wiyakurqa kanan y shamoq tiempuchö pruëbakunapa pasar alli tsarakunapaqmi yanapamäshun. Palabran Bibliachömi kënö yarpätsimantsik: “Qamkunapaqqa precisanmi tsarakuyänëki, tsënöpa Diospa munëninta rurarir, pë änikunqanta chaskiyänëkipaq” (Heb. 10:36).