1, 2. Bibliata estudiëkaq nuna bautizakunampaqqa, ¿pikunatan yanapayanman?

FIYI nacionchö täraq Amy jutiyoq panim kënö nirqan: “Bibliapita mas yachakunqämannömi kushikoq kä. Diospita rasumpa kaqta yachakuykanqäta musyarpis, manam imachöpis cambiaqtsu kä. Nana turikunawan juntu kanqämi, vïdächö cambianäpaq y bautizakunäpaq yanapamarqan”. Amy pasanqampitaqa yachakuntsik, Bibliata estudiëkaqkuna cambiayänampaq y bautizakuyänampaqqa, congregacionchö llapantsik yanapakuyta puëdinqantsiktam.

² Congregacionchö mas alli kanapaqqa llapantsikmi yanapanakuyta puëdintsik (Efes. 4:16). Vanuatu markachö täraq Leilani jutiyoq precursöram kënö nin: “Markächömi kënö niyan: ‘Juk wamra jatunyar alli nuna kanampaqqa, marka mayinkunapis yanapakuyänanmi’. Tsënöllam Bibliapita estudiëkaqkuna Jehoväta sirwita munayänampaqqa, congregacionchö llapan wawqi panikunam yanapakuyänan”. Juk wamra winarkur alli nuna kanampaqqa familiankuna, amïgunkuna y profesorninkunam shumaq yachatsiyänan. Tsënöllam congregacionchö wawqi panikunapis, Bibliata estudiëkaq bautizakunampaqqa shumaq parlapäyan, yanapayan y rurëninkunawan yachatsiyan (Prov. 15:22).

3. ¿Imatatan yachakuntsik Äna, Dani y Leilani niyanqampita?

³ Pitapis Bibliata estudiatsirninqa, ¿imanirtan juk wawqi panikunapis yanapamänantsikta dejanantsik? Moldavia nacionchö precursöra especial Äna jutiyoq panintsikmi kënö nin: “Bibliata estudiëkaqqa, imëkachö yanapayänantam wanan. Peru yachëkätseqninqa manam llapanchötsu yanapëta puëdinqa”. Tsë nacionllachö Dani jutiyoq precursor especialmi  kënö nin: “Höraqa Bibliapita yachëkätsinqä nunakunatam, juk wawqi panikuna imallatapis shonqunman chäreqta niriyan. Y noqaqa manam tsëman pensarqällapistsu”. Wakinkuna yanapamänantsik imanir alli kanqampaq parlarmi, Leilani kënö nin: “Kuyëllapa yanapayanqanta rikarmi, Bibliapita yachakuykaqqa rikanqa, Jehoväpa sirweqninkuna kanqantsikta” (Juan 13:35).

4. ¿Imatatan këchö yachakushun?

⁴ Peru itsa kënö tapukushwan: “Bibliata estudiëkaqta noqa mana yachëkätsirqa, ¿imanötan pëta yanapäman?”. Pillapis juk nunata Bibliapita estudiatsinampaq yanaqänapaq y Bibliata estudiëkaq reunionkunaman shamur qallëkuptin, imanö yanapakunapaq kaqtam këchöqa yachakushun. Y creikoqkunata rikaqkunapis, Bibliapita estudiëkaq bautizakunampaq imanö yanapayänampaq kaqtam yachakushun.

5. Juk nunata Bibliapita yachatseq yanaqänapaq pipis nimashqaqa, ¿imatatan yarpänantsik?

⁵ Pitapis Bibliapita estudiatsirninqa, yachatseqnin kaqmi Diospa Palabrampita entienditsinan. Juk nunata Bibliapita estudiatseq yanaqänapaq nimashqaqa, pëta yanapanapaq tsëchö këkanqantsikta yarpäshun (Ecl. 4:9, 10). Tsëqa, ¿imatatan ruranantsik alli yanapakunapaqqa?

6. Juk nunata Bibliata estudiatsinampaq pillatapis yanaqarqa, ¿imanötan Proverbius 20:18 ninqannö rurashwan?

⁶ Alli preparakushun. Puntataqa Bibliapita estudiëkätseqta tsë nuna imanö kanqanta tapupärishun (leyi Proverbius 20:18). Tsë estudianti imakunapa pasëkanqanta, imapita yachëkätsinqanta y imata yachatsita munanqanta tapupärishun. Imata ninapaq o mana ninapaq y imata ruranapaq o mana ruranapaq kaqtapis tapushwanmi. Y bautizakuyta munanampaq imanö yanapëta puëdinapaq kaqtapis tapushwanmi. Estudiëkätseqnin wawqi o paniqa, manam tsë nunapaq llapantatsu willamäshun, tsëmi willamanqantsikllaman pensanantsik. Yoy jutiyoq misionëra panim, Bibliata estudiëkaq nunapita yanaqaqninta parlapan. Kënömi nin: “Tsëta ruranqämi yanapaman, yanaqämaqnï estudiëkaq nunaman yarpachakunampaq y imata ninampaq kaqman pensanampaq”.

7. Pitapis yanaqarqa, ¿imanirtan alli preparakunantsik?

⁷ Bibliapita estudiatseq pillatapis yanaqarqa, puntallapitanam preparakushwan yachatsinampaq kaqta (Esd. 7:10). Kima kaq pärrafuchö Dani wawqipaq parlanqantsikmi, kënö nin: “Yanaqämaqnï alli preparakunqampitaqa alläpam kushikü. Tsënöpam yachatsikuyaptï alli parlakaramun”. Pitapis yanaqarnin tsënö rurashqaqa, Bibliata estudiëkaq rikanqa alli preparakunqantsikta. Pitapis yanaqarnin  yachatsikunantsikpaq kaqta alli mana estudiarnimpis, imapita parlanqantaqa musyanantsikmi.

8. Bibliata estudiatsirnin qallanapaqqa, ¿imatan yanapamäshun Jehoväman shumaq mañakunapaq?

⁸ Pitapis Bibliapita estudiatsirqa, manam Jehoväman mañakuyta qonqanantsiktsu. Tsëmi imata mañakunapaq puntallapitana pensanantsik (Sal. 141:2). Japon nacionpita Hanae panintsikmi, Bibliapita yachatseqninta yanaqar ëwaq pani mañakunqankunata kananyaq yarpan. Kënömi nin: “Jehoväta alläpa kuyanqanqa clärum këkarqan, noqapis pënömi këta munarqä. Y Jehoväta mañakunqanchö jutïta parlaqta wiyarmi, kuyayämanqanta rikarqä”.

9. Santiägu 1:19 ninqannö, pitapis Bibliapita estudiatseq yanaqarqa, ¿imanötan alli yanapakushwan?

⁹ Bibliapita estudiëkätseqta yanapashun. Nigeria nacionchö Omamuyovbi jutiyoq precursöra especialmi kënö nin: “Bibliapita estudiatsikushqa alli yanaqämaqnintsikqa, yachatsikunqantsiktam shumaq wiyëkan. Jina yachatsikuykashqa parlarqa, manam alläpatatsu parlan. Tsënöqa ruran yanaqakoqlla kanqanta yarparninmi”. Tsëqa, ¿imëtan parlakushwan y imatatan nishwan? (Prov. 25:11). Yachatsikuykaq wawqita o panita y yachakuykaq nunata shumaq wiyashun (leyi Santiägu 1:19). Tsëta rurashqallam imallachöpis yanapakuyta puëdishun. Tsënö kaptimpis, alläpa mana parlanapaq, yachatsikuykaq wawqita o panita mana pantatsinapaq y juk asuntukunapita mana parlanapaqmi cuidakunantsik. Peru yachakuykanqantsik mas clärulla entiendikänampaqmi, wallkallata parlakur imallatapis nirishwan o tapupärishwan. Höraqa itsa pitapis yanaqarnin alläpa mana yanapakunqantsikta pensashwan. Tsënö kaptimpis, alli parlakaramunqanta nirnin y tsë nunaman yarpachakunqantsikta rikätsikurninqa, estudiar sïguinampaqmi yanapashun.

10. Imapapis pasanqantsikta willanqantsikqa, ¿imanötan Bibliata estudiëkaqta yanapanman?

¹⁰ Imakunapa pasanqantsikta willarishun. Allinö kaptinqa itsa Bibliapita imanö yachakunqantsikta, mana allikunapa pasanqantsikta y vïdantsikchö Jehovä imanö yanapamanqantsikta Bibliapita estudiëkaqta willarishwan (Sal. 78:4, 7). Itsa tsëta wiyanqanqa Bibliata estudiëkaqta yanapanqa. Y tsëqa, Jehoväman mas markäkunampaq o yärakunampaq, bautizakunampaq cambiukunata ruranampaq y ima problëmapa pasarpis alli tsarakunampaqmi yanapanqa (1 Pëd. 5:9). Bibliata estudianqan witsan ima yanapanqanta yarparmi, Brasil nacionpita precursor regular wawqi Gabriel kënö nin: “Imakunapa pasayanqanta wawqikuna willayämanqanqa, imapa pasëkanqantsikta Jehovä musyëkanqantam cläru rikätsimarqan. Pëkuna alli tsarakushqa kayaptinqa, noqapis tsarakuyta puëdinäpaq kaqtam rikätsimarqan”.

11, 12. ¿Imanirtan reunionkunaman shamoq estudiantikunata kushishqa chaskishwan?

¹¹ Bibliata estudiëkaq nuna mas yachakunampaq y bautizakunampaqqa, reunionkunamanmi seguïdu ëwanan y tsëchömi yachakunan (Heb. 10:24, 25). Itsa yachatseqnin invitaptin, Bibliata estudiëkaq nunaqa reunionkunaman shamur qallëkunman. Tsëqa yapëpis kutikamunampaqmi nishwan. ¿Imanötan tsëtaqa rurashwan?

¹² Bibliata estudiëkaqta kushishqa chaskishun (Rom. 15:7). Tsënö chaskishqaqa, itsa yapëpis kutimuyta munanqa. Kushi kushi saludashun y wakin wawqi panikunata reqitsishun. Peru ama mëtsikaqqa wakpa këpa parlapäshuntsu. Ama wakinkuna atiendiyänampaq kaqta pensashuntsu. Itsa Bibliapita yachatseqninqa chämushqaraqtsu, o imata rurarpis ocupädu këkanman. Imata nimanqantsikta shumaq wiyashun y pëpaq yarpachakunqantsikta rikätsishun. ¿Imanötan tsëqa pëta yanapanman? Tsënö rurayanqan wawqintsik Dimitrita imanö yanapanqanta rikärishun. Pëqa qepa watakunallataraqmi bautizakushqa, y kananqa yanapakun creikoqkunata rikaqkunata yanaparmi. Reunionkunaman ëwar qallanqanta yarparmi, kënö nin: “Alläpa mantsakurmi Diospita Yachatsikuyänan Wayipa punkunllachö quedakurqä. Juk wawqim rikäramarqan y shumaq parlapämarmi yëkaratsimarqan. Saludayämaqnï atskaq shamoqta rikarmi kushikurqä. Tsënöqa manam mëchöpis chaskiyämashqatsu karqan”.

13. Imanö portakunqantsikqa, ¿imanötan Bibliata estudiëkaqta yanapanman?

¹³ Alli portakushun. Imanö portakunqantsikmi Bibliapita estudiëkaqta yanapanqa, rasumpa kaq religionta tarishqa kanqanta rikänampaq (Mat. 5:16). Moldavia nacionpita Vitäli jutiyoq precursor regularmi, kënö nin: “Congregacionchö wawqi panikuna imanö kayanqanta, imanö pensayanqanta y imanö portakuyanqanta rikarmi, Jehoväpa testïgunkuna rasumpa kaq religion kayanqanta rikarqä”.

14. Bibliata estudiëkaqkuna yachakur sïguiyänampaqqa, ¿imanötan Bibliapita yachakunqantsikmannö kawanqantsik yanapanman?

¹⁴ Bibliata estudiëkaq nuna bautizakuyta munarqa, yachakuykanqanmannömi kawanan. Peru tsëta rurananqa manam fäciltsu kanqa. Tsënö kaptimpis, Bibliapita yachakunqantsikmannö kawanqantsik yanapamanqantsikta rikarqa, noqantsiknöllam kawëta munanqa (1 Cor. 11:1). 8 kaq pärrafuchö panintsik Hanaepaq parlanqantsikta yarpärishun. Pëmi këta yarpan: “Turi nanakunataqa yachakuyanqanmannö kawaqtam rikaq kä. Pëkunata rikarmi wakinkunata shumaq parlapänäpaq, perdonanäpaq y kuyanäpaq yachakurqä. Pëkunaqa  wakinkunapaq imëpis allitam parlayaq. Tsëmi noqapis pëkunanö këta munarqä”.

15. Proverbius 27:17 ninqannöpis, ¿imanirtan reunionkunaman shamoq estudiantikunapa amïgunkuna tikrashwan?

¹⁵ Bibliata estudiëkaqkunapa amïgun kashun. Reunionkunaman cada shamuptin imanö këkanqanta tapushun (Filip. 2:4). Vïdampaq alläpa mana tapuparlla familianchö, trabäjunchö y Bibliapita yachakuykanqanchö imanö këkanqanta tapurishun. Y imachöpis alliyanqampita kushikunqantsiktam nirishwan. Tsënömi Bibliata estudiëkaqkunapa amïgun tikrashun y bautizakuyänampaq yanapashun (leyi Proverbius 27:17). Näqa parlanqantsik Hanae paniqa kananqa precursöra regularnam. Pëmi reunionkunaman ëwar qallanqampaq kënö willakun: “Congregacionchö kaqkunawan amïgu tikrarmi, reunionkunamanqa faltëta munaqtsu kä. Congregacionchö yanasäkunawanmi kushishqa kaq kä. Tsëmi yanapamarqan Jehoväta mana sirweqkunawan yanasa manana kanäpaq. Jehoväwan mas amïgu këta munar y turi nanakunawan mas juntu këta munarmi bautizakurirqä”.

16. Wawqi panikunawan kushishqa kanampaq, ¿imanö mastan Bibliata estudiëkaqkunata yanapashwan?

¹⁶ Bibliata estudiëkaq mas yachakunqanmannö, wawqi panikunata familiantanö rikänampaq yanapashun. Imachöpis pëkunaman yarpanqantsikta rikäyätsun (Heb. 13:2). Moldavia nacionchö yanapakoq wawqi Denismi, Bibliata estudianqan witsampaq këta yarpan: “Wawqi panikunaqa atska kutim warmïtawan noqata imallatapis rurayänäpaq invitayämaq. Pëkunata Jehovä imanö yanapashqa kanqanta wiyëqa yanapayämaqmi. Tsëmi Jehovällatana sirwita munayarqä y kushishqa kawakuyänäpaq kaqta rikäyarqä”. Bibliata estudiëkaqta Diospita yachatsikuyta puëdinqantana niriyaptinqa, noqantsikwan Diospita yachatsikoq ëwanampaq nirishun. Brasil nacionpita wawqi Diëgum, yachatsikur qallanqampaq yarparnin kënö nin: “Mëtsikaq wawqikunam Diospita yachatsikoq ëwayänäpaq niyämaq. Tsënöpam pëkunata mas reqirqä, y Jehoväwan Jesuspa amïgun këman charqä”.

17. Creikoqkunata rikaqkunaqa, ¿imanötan Bibliata estudiëkaqkunata yanapayanman?

¹⁷ Bibliata estudiëkaqkunapaq tiemputa rakiyë. Creikoqkunata rikaqkuna, Bibliata estudiëkaqkunata kuyayaptiki y pëkunapaq yarpachakuyaptikiqa, bautizakuyänampaqmi yanapayanki. Cada reunionchö juk rätullapis pëkunawan parlariyë. Pëkunaman yarpäyanqëkitaqa rikäyanqa, jutinkunata yarpäyaptiki y reunionkunachö parlakur qallëkayämuptin jutimpa qayayaptikim. ¿Manatsuraq tiempuykikunata patsätsiyankiman Bibliata estudiatsiyanqan  höra tsë wawqita o panita yanaqäriyänëkipaq? Tsënö rurayanqëkiqa Bibliata estudiëkaqkunata alläpam yanapanqa. Nigeria nacionpita Jackie jutiyoq precursöram kënö nin: “Bibliata mëtsikaq estudiëkaqkunam, yanaqëkämaq creikoqkunata rikaq kanqanta musyarirnin alläpa kushikuyan. Bibliata estudiëkaq juk nunam kënö nimarqan: ‘Pastornïqa manam tsëta imëpis ruranmantsu. Pëqa rïcu nunakunapa wayinllamanmi ëwan, y tsëpis pagayaptinraq’”. Tsë nunaqa, kananqa reunionkunamanmi ëwëkan.

18. Hëchus 20:28 ninqantaqa, ¿imanötan creikoqkunata rikaqkuna cumpliyanman?

¹⁸ Bibliapita estudiëkätseqkunata shumaq yachatsiyë y alli rurëkäyanqanta niyë. Creikoqkunata rikaqkuna, qamkunam wawqi panikunata Diospita alli yachatsikuyänampaq y nunakunata Bibliapita alli estudiatsiyänampaq yachatsiyänëki (leyi Hëchus 20:28). Qamkuna yanaqäyaptiki, tsë wawqi o pani tsë nunata Bibliapita estudiatsita mantsaptinqa qamkuna estudiatsiyë. Qepa kaq pärrafuchö pani Jackiepaq parlanqantsikmi, kënö nin: “Creikoqkunata rikaqkunaqa, Bibliata estudiekätsinqäkunapaqmi tapupäyäman. Y imachöpis imatapis rurëta mana puëdiptïqa, pëkunam shumaq consejarayäman”. Creikoqkunata rikaqkunaqa wawqi panikunatam shumaq yanapayänan, nunakunata Bibliapita estudiatsirnin mana qelanäyänampaq (1 Tes. 5:11). Jackieqa kënöpis ninmi: “Creikoqkunata rikaqkuna shumaq parlapäyämanqan y allita rurëkanqäta niyämanqanqa alläpam kushitsiman. Pëkuna parlapäyämanqanqa, achachanqan junaqchö alaq yakuta qarëkayämaq cuentam. Tsënö shumaq parlapäyämanqanqa, Bibliapita nunakunata estudiatsirnin kushishqa sïguinäpaqmi yanapaman” (Prov. 25:25).

19. ¿Imapitatan llapantsikpis kushikuyta puëdintsik?

¹⁹ Kanan witsankuna Bibliapita pita mana estudiatsirpis, Diospita mas yachakunampaqqa pillatapis yanaparishwanmi. Bibliapita yachatsikoq pitapis yanaqashqaqa, alläpa mana parlashllapam Bibliapita yachakuykaqta yanaparishwan. Reunionkunaman ëwaq Bibliata estudiëkaqkunapa amïgun këta procurashun y imanö portakunqantsikwan yanapashun. Y creikoqkunata rikaqkunaqa, Bibliata estudiëkaqkunawan parlakuriyänampaqmi tiemputa rakiyänan. Y Bibliapita yachëkätseqkunatam shumaq parlapäyänan y mas alli yachatsikoq kayänampaq yanapayänan. Pitapis Jehoväta kuyar sirwinampaq imanöllapis yanapanqantsikpita kushikunqantsikwanqa, manam imapis igualantsu.