1. ¿Imanirtan Jesusqa Jehoväta mañakurqan qateqninkunata cuidëkunampaq?

PATSACHÖ kawanqan ultimu paqasmi, Jesusqa imëka mana allikunapa qateqninkuna pasayänampaq kaqman pensëkarqan. Pëkunata kuyarmi Satanaspita cuidëkunampaq Teytanta mañakurqan (Juan 17:14, 15). Pëqa musyarqanmi ciëluta kutikuptinqa, Satanasqa Jehoväta sirweqkunata imëka mana allikunata ruranampaq kaqta. Tsëmi cläru këkarqan Jehoväta sirweqkunaqa Pë tsapänanta wanayänampaq kaqta.

2. ¿Imanirtan següru këkantsik mañakunqantsikta Jehovä wiyamänapaq kaqta?

² Jehoväqa Jesusta kuyarmi mañakunqanta wiyarqan. Jehoväpa voluntäninta ruranapaq kallpachakushqaqa, pëqa noqantsiktapis kuyamäshunmi y yanapëkamänapaq y cuidëkamänapaq mañakushqapis wiyamäshunmi. Kuyakoq Teyta karmi pëqa imëpis cuidëkamäshun. Tsëta mana ruraptinqa, manachi Jehovä jutin kanmantsu.

3. ¿Imanirtan wanantsik o minishtintsik Jehovä cuidamänata?

³ Jehovä cuidamänataqa kananmi imëpitapis mas wanantsik. Ciëlupita Satanasta qarqayämushqa kaptinmi, alläpa cölerashqa këkan (Rev. 12:12). Tsëmi wakin nunakunata creitsishqa, chikir sufritsimashqaqa Diosta sirwirnin tsëta rurëkäyanqanta (Juan 16:2). Wakinnam, pëkunanö mana kashqa chikir sufritsimantsik. Imanö kaptimpis Biblia kënö niptinmi mana mantsantsiktsu: “Señorqa markäkïpaqmi, y pëmi sinchiyätsiyäshunki y Satanaspita tsapäyäshunki” (2 Tes. 3:3). Jehovä imanö cuidamanqantsikta ishkëllata yachakurishun.

4. Efesius 6:13 a 17 ninqannöpis, ¿imakunatatan cuidakunantsikpaq Jehoväpita chaskirquntsik?

⁴ Satanasqa mana allikunata ruramënintsiktam munan. Tsëmi Jehoväqa, imëka armakunawannö cuidakunapaq yanapamantsik (leyi Efesius 6:13-17). Tsë armakunata churakoq cuenta kashqallam, imëka mana allikunapita tsapäkushun. Kananqa yachakushun tsë armakuna imakuna kanqanta.

5. ¿Imatan rasumpa kaqta rikätsikoq wachaka y imanirtan churakunantsik?

⁵ Rasumpa kaqta wachakatanö tseqllëkikunachö wachakashqa. ¿Imatan tsëqa? Tsëqa, Diospa Palabranchö këkaq rasumpa kaq yachatsikuykunam. ¿Imanirtan churakushqa cuenta katsishwan? Ulikoqkunapa o llullakoqkunapa teytan Satanas kaptinmi (Juan 8:44). Mëtsika watakunapanam entëru Patsachö nunakunata engañarnin këkan (Rev. 12:9). Peru Bibliapita yachakunqantsikqa mana engañamänapaqmi yanapamantsik. Tsëtaqa, ¿imanötan wachaka cuentata churakushwan? Jehoväpita rasumpa kaqta yachakur, pëllata adorar y llapanchö alli portakurninmi (Juan 4:24; Efes. 4:25; Heb. 13:18).

6. ¿Imatan fiërrupita chalëcuqa y imanirtan churakushwan?

⁶ Fiërrupita chalëcu. ¿Imatan tsëqa? Diospa llapan leyninkunam kayan. Y ¿imanirtan tsëta churakunantsik? Imanömi fiërrupita chalëcu juk soldädupa shonqunta tsapaq. Tsënöllam Diospa leyninqa, Diosta mana cäsukoq nunakunanö mana pensanantsikpaq shonquntsikta tsapan (Prov. 4:23). Jehoväqa llapan shonquntsikwan kuyanapaq y pëta sirwinapaqmi mandamantsik (Mat. 22:36, 37). Tsëmi Satanasqa, Jehovä chikinqan rurëkunata kuyatsimënintsikta munan (Sant. 4:4; 1 Juan 2:15, 16). Y tsëkunata rurar Jehoväta mana cäsukunantsikta mana lograrqa, imëka maskunatam ruranqa.

7. ¿Imanötan fiërrupita chalëcuta churakuntsik?

⁷ Fiërrupita chalëcu cuenta alli kaq rurëkunataqa churakuntsik, ima alli o mana alli kanqanta Jehovä nimanqantsikta wiyakurmi (Sal. 97:10). Itsa wakin nunakuna pensayanman, Jehovä mandamanqantsikkunaqa libri kanata mana permitimanqantsikta. Peru Jehovä mandamanqantsikkunata y leyninkunata mana wiyakurqa, alläpa lasanqanta nir pelyëkarnin fiërrupita chalëcunta, juk soldädu jipikureq cuentam kashun. ¿Manaku tsëta rurëqa upa kë kanman? Jehoväta kuyaqkunapaqqa, mandamientukunata wiyakuyqa manam michäkoq sasa cumplinannötsu. Sinöqa mana allikunapita tsapäkoqtanömi (1 Juan 5:3).

8. ¿Ima ninantan alli willakuykunata willakunapaq llanqikunata llanqikunqantsikqa?

⁸ Apostol Pabluqa, yamë këpita alli willakïkunata willakuyänëkipaq llanqikikuna llanqikuyë ninmi. Tsëqa rikätsikun Diospa Gobiernumpita yachatsikunapaq listu këkanqantsiktam. Wakinkunata Bibliapita yachatsirqa, kikintsikmi Diosman mas markäkuntsik o yärakuntsik. Jehoväta sirweqkuna entëru Patsachö yachatsikuyänampaq listu këkäyanqampitaqa kushikuntsikmi. Wakinqa trabäjunkunachö, escuëlankunachö, rantikuyänan sitiukunachö, wayin wayin, rantipakoq ëwarnin, mana Testïgu kaq familiankunata watukarnin, reqinakushqankunawan parlarnin y wayinkunapita yarquyta mana puëdirnimpis Diospitaqa yachatsikuykäyanllam. Mantsakurnin Diospita yachatsikuyta jaqirishqaqa, pelyëkarnin llanqinta jipikureq soldädu cuentam kashwan. Tsëta ruraptinqa manachi fäciltsu defendikunampaq kanman,  ni manachi tröpa mandaqninta cäsukuyta puëdinmantsu.

9. ¿Imanirtan Diosman markäkunqantsiktaqa jatun escüdutanö tsarashqa cuenta këkashwan?

⁹ Markäkïyoq kë jatun escüduqa, Jehoväman markäkunqantsik o yärakunqantsikmi. Llapan änimanqantsikkunata cumplimunampaq kaqmanmi confiakuntsik. ‘Diosman markäkunqantsikmi, Satanaspa rawrëkaq llapan flëchankunata upitsinqa’. Tsë escüduta tsarashqa cuenta kashqaqa, Diospa contran churakashqakuna yachatsikuyanqampita, contrantsikchö këkaqkuna burlakuyanqampita y noqantsikpaq mana allikunata parlayanqan qelanätsimänapaq kaqpitam tsapämäshun. Mana markäkushqa o yärakushqaqa, Jehovä chikinqankunata ruranapaq wakinkuna nimashqaqa, manam tsarakushuntsu. Peru imaman creinqantsikta trabäjuntsikchö o escuëlantsikchö defendishqaqa, imëka jatun escüdu cuenta Diosman markäkunqantsikmi yanapamäshun (1 Pëd. 3:15). Jehoväta alli sirwinantsikta michäkoq trabäjuchö alli pagamänantsikpaq kaqta mana chaskikushqaqa, Diosman markäkunqantsikmi jatun escüdu cuenta tsapëkämantsik (Heb. 13:5, 6). Y chikimarnintsik sufritsimanqantsikchö alli  tsarakushqapis, Diosman markäkunqantsikmi tsapëkämantsik (1 Tes. 2:2).

10. ¿Imatan salvacion cascu y imanirtan tsëta churakushwan?

¹⁰ Salvacion cascuqa, shamoq tiempupaq Jehovä änimanqantsikkunam. Tsëqa wanuypita salvamänapaq kaq y voluntäninta rurashqa bendicimänapaq kaqmi (1 Tes. 5:8; 1 Tim. 4:10; Tïtu 1:1, 2). Juk soldädupa umanta o peqanta juk cascu tsapanqannöllam, salvakunapaq kaqta shuyanqantsik tsapämantsik. ¿Imanö? Problëmakunallaman yarpachakunapa rantin, Dios änimanqantsikkunaman mas yarpachakunapaqmi yanapamantsik. ¿Imanötan salvacion cascuta churakoq cuenta kantsik? Jehovänö pensanapaq kallpachakurmi. Jukqa, imëka kapamanqantsikkunaman markäkunantsikpa rantin Diosman markäkunqantsikmi (Sal. 26:2; 104:34; 1 Tim. 6:17).

11. ¿Imatan santu espïritu qokunqan espäda y imanirtan utilizänantsik?

¹¹ Santu espïritu qomanqantsik espädaqa, Diospa Palabran Bibliam. Diospa Palabranqa, imachö engañëkämanqantsikta rikänapaq, mana allita yachatsikuyanqampita y mana alli costumbrikunapita libri kanapaqmi yanapamantsik (2 Cor. 10:4, 5; 2 Tim. 3:16, 17; Heb. 4:12). Japallantsik estudiar y Diosta sirweqkuna yachatsimashqam, Bibliata alli manejëta yachakuntsik (2 Tim. 2:15). Peru manam Jehoväpita chaskinqantsik armakunallatsu Satanaspitaqa tsapämantsik. Maspis kanraqmi.

12. ¿Ima mastatan wanantsik o minishtintsik y imanir?

¹² Pelyëta yachaq soldäduqa, juk tröpata ushakätsinampaq yanaqinkuna yanapayänanta wananqanta o minishtinqantam musyan. Tsënöllam Satanasta y demoniunkunata vencinapaqqa wawqi panintsikkunata wanantsik. Jehoväqa wawqi panintsikkunawanmi yanapamantsik (1 Pëd. 2:17).

13. Hebrëus 10:24 y 25 ninqannöpis, ¿imanötan reunionkunaman ëwanqantsikqa yanapamantsik?

¹³ Juknöpaqa wawqi panintsikkuna yanapamantsik reunionkunaman ëwashqam (leyi Hebrëus 10:24, 25). Höraqa llapantsikmi qelanärintsik. Peru reunionkunaman ëwarninqa kushishqam kantsik. Reunionkunachö wawqi panintsikkuna parlakayämunqan, Diospita imanö yachatsikunapaq yachatsikayämunqan y Bibliawan shumaq yachatsikayämunqanmi, Jehoväta sirwir sïguinapaq yanapamantsik. Jina reunionkuna manaraq qallaptin y ushariptin parlakunqantsikmi, alläpa yanapamantsik (1 Tes. 5:14). Reunionkunachö wakinkunatapis yanapëta puëdintsikmi y tsëta ruranqantsikqa kushitsimantsikmi (Hëch. 20:35; Rom. 1:11, 12). Peru reunionkunachöqa manam tsëllatatsu rurantsik. Sinöqa, Diospita mas alli yachatsikunapaqmi yachakuntsik. Jukqa, yachatsikunantsikpaq publicacionkunata y videukunata utilizänapaq alli yachakunqantsikmi. Tsëqa reunionnintsikkunapaq alli preparakushun, shumaq wiyakushun y yachakunqantsikmannölla rurashun. Tsëta rurashqaqa imëka guërraman ëwanampaq Cristu Jesuspa alläpa alli soldädunnömi kashun (2 Tim. 2:3).

14. ¿Pikuna mastan yanapamantsik?

¹⁴ Jina mëtsika millon angelkunam yanapamantsik. Juk angel-lla imëkata rurëta puëdinqanta musyarqa, pensarintsikku juk tröpa angelkuna imëkata rurëta puëdiyanqanta (Is. 37:36). Manam nunakuna ni demoniukunapis Jehoväpa tröpanwanqa igualëta puëdiyantsu. Juk asamblëachömi yachatsikayämurqan,  noqantsikta Jehovä yanapamashqaqa contrantsikchö këkaqkunapitapis mas kanqantsikta (Juëc. 6:16). Tsëtaqa trabajaq mayintsik, estudiaq mayintsik o mana Testïgü familiantsik imatapis nimashqa mana qelanäkurinapaq imëpis yarpäshun. Yarpäshun, manam japallantsiktsu këkantsik, Jehovämi dirigikämantsik.

15. Isaïas 54:15 y 17 ninqannöpis, ¿imanirtan Diosta sirweqkunataqa ni pipis upällatsimäshuntsu?

¹⁵ Satanaspa munëninta ruraq nunakunaqa imëkarëkurmi chikimantsik. Manam ni ima gobiernuta yanapantsiktsu ni guërrakunaman ëwantsiktsu. Diospa jutintam musyatsikuntsik, Gobiernunlla yamë kawakuyta apamunampaq kaqtam willakuntsik y mandakunqankunatam wiyakuntsik. Kë munduta gobernaq Satanas uli o llulla kanqanta y wanutsikoq kanqantam yachatsikuntsik (Juan 8:44). Y kë munduchö imëka mana allikuna ushakänampaq kaqtam willakuntsik. Satanas y sirweqninkunaqa, manam imanöpapis upällatsimäshuntsu. Tsëpa rantinqa imëkanöpam Jehoväta alabarnin sïguishun. Puëdeq karnimpis, Satanasqa manam entëru Patsachö nunakunata Diospa Gobiernumpita yachatsinata michämarquntsiktsu. Y tsëtaqa rurarquntsik Jehovä Dios cuidamashqallam (leyi Isaïas 54:15, 17).

16. ¿Imanötan Jehoväqa jatun sufrimientu witsan sirweqninkunata salvanqa?

¹⁶ ¿Imatan shamoq tiempuchö pasakunqa? Jatun sufrimientu witsanqa, Jehovä këtam ruramunqa: puntataqa, llapan mana alli religionkunata rikätsikoq alläpa puëdeq Babiloniata, Patsachö reykuna ushakätsiyaptinmi sirweqninkunata salvanqa (Rev. 17:16-18; 18:2, 4). Y tsëpitanam, Armagedon guërrachö Satanaspa llapan mundunta ushakätsir Jehoväqa sirweqninkunata salvanqa (Rev. 7:9, 10; 16:14, 16).

17. ¿Imanirtan Jehoväwan alli amïgu karnin sïguishwan?

¹⁷ Jehoväwan amïgu kashqaqa, Satanas imata ruramanqantsikpis manam imëyaqpis kanqantsu, rasumpa kaqchöqa kikintam Jehoväqa chipyëpa ushakätsinqa (Rom. 16:20). Tsëqa, Jehoväpita shamoq armakunata churakoq cuenta kashun y ama juk läduman churareq cuenta kashuntsu. Ama japallantsik tsarakuyta procurashuntsu, wawqi panintsikkunata yanapashun y Jehovä nimanqantsikkunata wiyakushun. Tsëta rurashqa kuyakoq Teytantsik yanapamänapaq y cuidamänapaq kaqtaqa segürum këkantsik (Is. 41:10).