1. Jehoväta sirweqkunaqa, ¿ima mana allikunapatan pasantsik?

¿IMA mana allipapis pasëkantsikku? Itsa mëqan wawqi panintsikkunallapis llakitsimarquntsik (Sant. 3:2). O itsa Jehoväpa testïgun kashqa estudiaq mayintsik o trabajaq mayintsikkuna noqantsikpita burlakuyan (1 Pëd. 4:3, 4). Y itsa reunionkunaman ëwanantsikta o Diospita yachatsikunantsikta mëqan familiantsikllapis michëkämantsik (Mat. 10:35, 36). Tsëkuna alläpa llakitsimashqaqa itsapis qelanäkurishwan. Peru yarpäshun, ima mana allikunapa pasëkashqapis, Jehoväqa tsëkunata alli altsanapaq o tsëkunapa pasarnin alli tsarakunapaqmi yanapamäshun.

2. Romänus 15:4 ninqannöpis, ¿imanötan Bibliata leyinqantsik yanapamäshun?

² Jehoväqa, wakin nunakuna imëka mana allikunapa pasayanqantam Palabran Bibliaman qellqatsishqa pëkunapita yachakunapaq. Tsënö kanqampaqmi Bibliachö Romänus 15:4 (leyi) ninqanta apostol Pablu qellqarqan. Tsë nunakuna pasayanqanta leyinqantsikmi, alläpa mana llakikunapaq y Jehoväman confiakunapaq yanapamäshun. Peru tsëpaqqa, manam Bibliallatatsu leyinantsik. Sinöqa, leyinqantsikmannömi imatapis ruranantsik y shonquntsikman chänantam jaqinantsik. Ima problëmapa pasarpis, imata ruranapaq kaqta musyanapaqqa, këkunata ruranqantsikmi yanapamäshun: 1) Diosman mañakunqantsik, 2) tsëchö këkaq cuenta kanqantsik, 3) leyinqantsikman pensanqantsik y 4) yachakunqantsiknö ruranapaq kallpachakunqantsikmi.  Këchömi yachakushun tsëkunata imanö ruranapaq kaqta. * Tsëpitanam, tsëkunata rurarnin rey Davidpita y apostol Pablupita yachakushun.

3. Bibliata leyir manaraq qallarqa, ¿imatatan rurashwan y imanir?

³ 1) Diosmanmi mañakunantsik. Bibliata leyir manaraq qallarmi, shumaq yachakunapaq Jehovä yanapamänapaq mañakunantsik. Këllaman pensarishun, ima problëmatapis altsanapaq consëjuta ashirqa, Palabran Bibliachö tsë consëjuta tarinapaq mañakushun (Filip. 4:6, 7; Sant. 1:5).

4. Bibliata leyinqantsik höraqa, ¿imatatan ruranantsik?

⁴ 2) Tsëchö këkaq cuentam kanantsik. Imapis pasakuykanqanmannö pensëqa Jehoväpa qarëninmi. Pipaqpis willakunqanta Bibliachö leyirqa, tsëchö këkaqnö y pëpa rantin noqantsik këkanqantsikman pensashun. Rikëkanqanta rikaqnö kashun y tsë höra imanö kanqannö noqantsikpis kashun.

5. ¿Ima ninantan leyinqantsikman pensëqa, y imatan tsëta ruranapaqqa yanapamäshun?

⁵ 3) Leyinqantsikmanmi pensanantsik. Shumaq yachakunapaqqa, leyinqantsikman pensanapaqmi tiempuntsikta patsätsinantsik. Tsëqa imata leyikanqantsikta alli entiendinapaqmi yanapamäshun. Leyinqantsikman mana pensarlla Bibliata leyishqaqa, tikakunata o adöbikunata juk läduman pelëkoq cuentam kanman. Peru Bibliachö leyinqantsikman shumaq pensëqa, tsë tikakunawan wayita perqaq cuentam kanman. Kë tapukuykunam, leyinqantsikman shumaq pensanapaq yanapamäshun: “Mana allikunapa pasanqanta altsanampaqqa, ¿imatatan kë nuna rurarqan? ¿Imanötan Jehovä yanaparqan? Yachakunqäqa, ¿imanötan yanapamanqa mana allipa pasëkanqächö alli tsarakunäpaq?”.

6. ¿Imanirtan yachakunqantsikmannö kawanantsik?

⁶ 4) Yachakunqantsikmannö ruranapaqmi kallpachakunantsik. Jesusmi nirqan yachakunqantsikmannö mana rurashqaqa, arëna jananchö wayita ruraq nunanö kanqantsikta. Y imëkata rurarnin trabajashqa kaptimpis, ruranqanqa manam sirwinqatsu. ¿Imanir? Tamyaptin yaku shamurqa, tsë wayitam apakunqa (Mat. 7:24-27). Tsë cuentallam kanqa Diosman mañakushqa, tsëchö këkaqnö kashqa y leyinqantsikman pensashqa. Peru yachakunqantsikmannö mana rurashqaqa, manam imapaqpis sirwinqatsu. Ima problëmapis kaptin o chikir sufritsimarnintsik qallëkuyaptinqa, manam tsarakushuntsu. Peru estudiashqa y yachakunqantsikmannö rurashqaqa, imatapis allim patsätsishun, yamëmi kawakushun y Diosmampis masmi markäkushun o yärakushun (Is. 48:17, 18). Kananqa rey Davidpaq Bibliachö willakunqanta leyirnin, tsë chusku consëjukuna ninqannölla yachakurishun.

7. ¿Bibliachö pipaq willakunqantatan yachakushun?

⁷ ¿Confiakunqëki amïguyki o mëqan familiëkillapis llakitsishurqunkiku? Tsënö kaptinqa, rey Davidpa tsurin Absalonpita yachakunqëkim yanapashunki. Pëmi papäninta traicionarqan y pëpa rantin rey këta munarqan (2 Sam. 15:5-14, 31; 18:6-14).

8. ¿Imatatan rurashwan Jehovä yanapamänapaq?

⁸ 1) Diosmanmi mañakunantsik. Bibliachö Davidpaq manaraq willakunqanta  leyirnin, puntataqa pipis llakitsimanqantsikpita imanö këkanqantsikta Jehoväta willashun (Sal. 6:6-9). Y tsëpitaqa, tsë problëmata altsanapaq consëjukunata tarinantsikpaq, pëta mañakushun.

9. Davidpaqwan Absalonpaq Bibliachö willakunqanta wallkallachö willakaramuy.

⁹ 2) Tsëchö këkaq cuentam kanantsik. Davidpaq Bibliachö willakunqanta leyirnin, tsëchö këkaqnö y pë imanö këkanqanta rikëkaqnö kashun. Tsurin Absalonqa atska watakunapam pëta kuyayänampaq nunakunata kuyaq tukurqan (2 Sam. 15:7). Y alli tiempu kanqantana pensarmi, entëru Israel nacionpa musyapakoqkunata mandarqan, nunakuna reynintanö chaskiyänampaq. Papänin Davidpa amïgun y consejaqnin Ahitofeltam, pëpa yanapaqninna kanampaq äniratsirqan. Tsëpitanam pëna rey kanqanta nirqan, y itsa tsë witsampaq qeshyëkaq papänin Davidta, ashïkatsir wanutsita munarqan (Sal. 41:1-9). Tsëta musyarirmi Davidqa Jerusalenpita ëwakurqan. Tsëpitanam Absalonpa y Davidpa soldädunkuna pelyayarqan. Absalonpa soldädunkunatam venciyarqan y kikintapis wanutsiyarqanmi.

10. ¿Imatatan rey Davidqa itsapis ruranman karqan?

¹⁰ Kananqa tsëta musyarir, David imanö llakikunqanman pensarishun. Absalontaqa kuyaqmi y Ahitofelmanmi confiakoq. Tsënö kaptimpis, ishkanmi traicionayarqan. Alläpam llakitsiyarqan y wanutsitapis munayarqanmi. Itsa wakin amïgunkunapis Absalonta yanapayänampaq kaqta pensarnin Davidqa pëkunamampis confiakunmannatsu karqan. Itsa mantsakarnin juk nacionman japallan ëwakunman karqan, o ima rurëtapis mana puëdir entregakuykunman karqan. Peru pëqa manam tsëtatsu rurarqan, tsëpa rantinqa allim tsarakurqan. ¿Imanötan tsëtaqa rurarqan?

11. Juk kutichö mana allipa pasarnin, ¿imatatan rey David rurarqan?

¹¹ 3) Leyinqantsikmanmi pensanantsik. ¿Imatatan kë willakuypita yachakuntsik? Itsa kënö tapukushwan: “¿Imata ruranqantan Davidta yanaparqan?”. Manam mantsakartsu imatapis mana rurarqantsu, ni imatapis llutallaqa rurarqantsu. Tsëpa rantinqa Jehovämanmi yanapëkunampaq mañakurqan. Y amïgunkunatapis yanapëkuyänampaqmi mañakurqan. Y imatapis patsätsirqa rasllam ruraq. Alläpa llakishqa këkarpis, manam cölerakurqantsu ni wakinkunaman manana confiakurqantsu. Jehoväman y amïgunkunamanqa confiakuykarqanllam.

12. ¿Imanötan Jehoväqa Davidta yanaparqan?

¹² ¿Imanötan Jehoväqa Davidta yanaparqan? Mana allikunapa pasanqampita ichik maslla yachakushqaqa, tsëkunachö alli tsarakunampaq Jehovä imanö yanapanqantam rikäshun (Sal. 3:1-8; tsë capïtulu manaraq qallaptin ima ninqanta rikäri). Jehoväqa David llapan patsätsinqanchömi bendicirqan y yanapayänampaq cuidaqnin amïgunkunatapis yanaparqanmi.

13. Pillapis llakitsimashqaqa, ¿imanötan David ruranqannölla ruranantsik? (Mateu 18:15-17).

¹³ 4) Yachakunqantsikmannö ruranapaqmi kallpachakunantsik. Kënö tapukushun: “¿Imanötan David ruranqannö ruräman?”. Puntataqa rasllam tsë problëmata altsëta procuranantsik. Pipis llakitsishushqa kaptin o itsa tsënöpa pasëkaptikiqa, Mateu librupa 18 kaq capïtulunchö Jesus consejakunqannö rurë (leyi Mateu 18:15-17). Peru cölerakur o llakikurqa, imata ruranapaqpis ama rasllaqa pensarishuntsu. Jehoväta mañakushun tranquïlu kanapaq y tsë problëmata altsanapaq. Ama amïguntsikkunapita desconfiashuntsu y yanapamänata jaqishun (Prov. 17:17). Y masqa  Palabranchö Jehovä consejamanqantsiknöllam ruranantsik (Prov. 3:5, 6).

14. 2 Timoteu 1:12 a 16 y 4:6 a 11, 17 a 22 ninqanta leyinqantsikqa, ¿imakunapa pasëkashqatan yanapamäshun?

¹⁴ ¿Jehoväta sirwinantsiktaku familiantsik michämantsik? O ¿Diosta sirwinantsikta michäkoq nacionchöku tärantsik? Tsënö kaptinqa, 2 Timoteu 1:12 a 16 y 4:6 a 11, 17 a 22 * ninqanta leyinqantsikmi yanapamäshun. Tsëtaqa carcelarëkarmi apostol Pablu qellqarqan.

15. ¿Imatatan Jehoväta mañakushwan?

¹⁵ 1) Diosmanmi mañakunantsik. Kë versïculukunata manaraq leyirnin imapa pasëkanqantsikta y imanö këkanqantsikta Jehoväta willashun. Tsëpitana mana allikunapa pasar Pablu ima ruranqampita yachakurnin, noqantsikta imanö yanapamänapaq kaqta Jehovä rikëkatsimänapaq mañakushun.

16. ¿Imapatan Pablu pasëkarqan?

¹⁶ 2) Tsëchö këkaq cuentam kanantsik. Apostol Pablu këkanqannö këkanqantsikta pensarishun. Pëqa Röma nacionchömi carcelarëkarqan. Puntatana carcelchö kashqa karnimpis, kananqa musyanmi wanutsiyänampaq kaqta. Wakin yanaqinkunam dejarishqa kayarqan y alläpa pishipashqam këkarqan (2 Tim. 1:15).

17. ¿Imataraq itsapis Pablu ruranman karqan?

¹⁷ Itsa Pabluqa kënö pensanman karqan: “Imatapis juknöpa rurashqa kaptïqa, itsa kanan höra carcelarëkämantsu karqan”. Itsa Asia provinciapita yanaqinkuna dejanqampita cölerashqa këkanman karqan y tsërëkur wakin amïgunkunamampis confiakunmannatsu karqan. Peru manam tsëtatsu rurarqan. ¿Imanirtan amïgunkunaman y Jehoväman confiakurnin sïguirqan?

18. Mana allikunapa pasarnin, ¿imanötan Pablu tsarakurqan?

¹⁸ 3) Leyinqantsikmanmi pensanantsik. Tapukushun: “¿Imata ruranqantan apostol Pabluta yanaparqan?”. Wanutsiyänampaqna kaqta musyëkarpis, Jehovätaqa alabëkarqanllam. Jina wakinkunatam imëkanöpa yanapëta procurarqan y Jehoväman mañakurninmi sïguirqan (2 Tim. 1:3). Wakinkuna jaqiyanqanman yarparäkunampa rantinmi, pëta yanaparnin sïguishqa amïgunkunata agradecikurqan. Y Diospa Palabranta estudiarmi sïguirqan (2 Tim. 3:16, 17; 4:13). Y tsëpitapis masqa, Jehoväwan Jesus kuyayanqanta, mana dejashqa kayanqanta y alli tsarakunqampita bendiciyänampaq kaqtam següru këkarqan.

19. ¿Imanötan Jehoväqa Pabluta yanaparqan?

¹⁹ Jehoväqa Pabluta willashqanam karqan, pëta sirwinqanrëkur chikir sufritsiyänampaq kaqta (Hëch. 21:11-13). ¿Imanötan Pabluta Jehovä yanaparqan? Mañakunqankunata contestar y kallpayoqta tikratsirmi (2 Tim. 4:17). Jina allim musyatsirqan äninqanta chaskinampaq kaqta, y amïgunkunawampis yanaparqanmi.

20. Romänus 8:38 y 39 ninqanchö Pablu confiakunqannö confiakunapaqqa, ¿imatatan ruranantsik?

²⁰ 4) Yachakunqantsikmannö ruranapaqmi kallpachakunantsik. Tapukushun: “¿Imanötan Pablu ruranqannölla ruräman?”. Apostol Pablutanöpis Jehoväta sirwinqantsikrëkur chikir sufritsimänataqa musyantsikmi (Mar. 10:29, 30). Imëka mana allikunachö alli tsarakunapaqqa, Jehovämanmi mañakunantsik y Bibliapita yachakurmi sïguinantsik. Ama qonqashuntsu, Jehoväta alabëqa mas punta puntachömi kanan. Jehovä mana imëpis jaqimänapaq y kuyamarnintsik sïguinantaqa manam  pipis michanqatsu (leyi Romänus 8:38, 39; Heb. 13:5, 6).

21. Mana allikunapa pasarnin alli tsarakuyänampaqqa, ¿imatan pani Ayäkota y Hectorta yanaparqan?

²¹ Ima mana allikunapa pasashqapis, Bibliachö willakunqan nunakunapita yachakunqantsikqa yanapamäshunmi. Këllaman pensarishun, Japon nacionpita Ayäko jutiyoq precursöra panitash, Diospa willakoqnin Jonaspita yachakunqan, mëtsika nunakuna kayanqanchö carrïtukunawan yachatsikur mana mantsakunampaq yanapanaq. Indonesia nacionpita Hector jövintanash, Bibliachö Rutpita yachakunqan yanapanaq, teytankuna Testïgu mana këkäyaptimpis, Jehoväpita mas yachakunampaq y pëta sirwinampaq.

22. ¿Imanötan Biblia willakunqan nunakunapaq videukunata rikar, wiyanapaq actuacionkunata wiyar y Pëkunapita yachakushun neq librupita maslla yachakushwan?

²² Unë nunakunapaq Bibliachö willakunqampita mas yachakunapaqqa, ¿mëchötan ashishwan? Videukunachö, wiyanapaq actuacionkunachö y Pëkunapita yachakushun neq libruchömi. Tsëchömi, unë nunakuna kawëkäyanqan cuentapaq willakun. Tsëkunata manaraq rikar, wiyar o leyirnin Jehoväta mañakushun yachakunqantsikkuna yanapamänantsikpaq. Tsë unë nuna noqantsik kanqantsikta pensashun, ruranqankunaman pensashun y tsë problëmakunachö tsarakunampaq Jehovä imanö yanapanqampita yachakushun. Y tsëpitana yachakunqantsiknö problëmantsikta altsashun. Y tsëpitaqa, yanapamanqantsikpita Jehoväta agradecikushun. Y wakinkunata shumaq parlapar y yanapar agradecikunqantsikta rikätsikushun.

23. Isaïas 41:10 y 13 ninqannöpis, ¿imatatan Jehovä änimantsik?

²³ Kë entëru munduta Satanas gobernaptinmi, mana allikunapa pasarqa, ima rurëtapis musyantsiktsu (2 Tim. 3:1). Peru manam yarpachakunantsiktsu ni mantsakänantsiktsu. Jehoväqa musyanmi imapa pasëkanqantsikta. Tsëkunachö imëka derëcha kaq makinwan yanapamänapaq kaqtam änimantsik (leyi Isaïas 41:10, 13). Jehovä yanapamänapaq kaqtaqa segürum këkantsik, y Bibliapita yachakunqantsikmi imapa pasanqantsikchöpis yanapamäshun.