1, 2. Apostol Pablu pasanqankunaqa, ¿imanirtan kanan witsan creikoqkunata rikaqkunata yanapanman?

 APOSTOL Pabluqa alläpam wawqi paninkunata kuyaq, tsëmi pëkunata yanapananrëkur imëkata ruraq (Hëch. 20:31). Tsëchi alläpa kuyayarqan. Këllaman yarpärishun: Pabluta manana rikäyänampaq kaqta Ëfesu markachö creikoqkunata rikaqkuna musyarirqa, ‘alläpa waqarmi qallëkuyarqan’ (Hëch. 20:37). Tsënöllam, kanan witsan creikoqkunata rikaqkunapis, wawqi paninkunata kuyayan y yanapayänanrëkur imëkata rurayan (Filip. 2:16, 17). Peru imëkata rurayänanqa, höraqa manam fäciltsu. ¿Imata rurayanqantan yanapanman?

² Imëka rurëyoq creikoqkunata rikaqkunaqa, allim Pablupita yachakuyanman (1 Cor. 11:1). Pëqa, manam imëka rurëta puëdeq nunatsu karqan; llapan nunakunanö pantaq karmi, alli kaqta ruranampaqqa alliraq kallpachakoq (Rom. 7:18-20). Imëka mana allikunapa pasarpis, manam qelanäkurirqantsu ni manam llakishqallaqa kakurqantsu. Pablu ruranqannö rurarqa, creikoqkunata rikaqkunaqa imëkapa pasarpis kushishqam Jehoväta sirwir sïguiyanqa. ¿Imanötan tsëtaqa rurayanman?

3. ¿Imakunapitataq këchö parlashun y imatataq yachakushun?

³ Këchömi, imakunata rurayänan fäcil mana kanqanta chuskuta yachakurishun: 1) imëka rurëyoq karpis Diospita yachatsikuyänampaq kallpachakuyänan, 2) wawqi paninkunata kuyëpa tratayänan, 3) imachöpis pantayanqampita mana qelanäkuriyänan y 4) wakinkuna pantayanqanta aguantayänan. Tsëkunachö apostol Pablu imakunata ruranqanta y tsëpita creikoqkunata rikaqkuna imata yachakuyanqantam rikäshun.

4. Creikoqkunata rikaqkunapaqqa, ¿imanirtan Diospita yachatsikuychö punta puntachö këqa fäciltsu kanman?

⁴ ¿Imanirtan tsëta rurayänanqa fäciltsu kanman? Diospita yachatsikuychö punta puntachö karpis, imëka rurëkunayoq masmi kayan. Wakin wakinllata rikärishun. Höraqa, semänachö kaq reuniontam dirigiyan o Bibliapita yachakunapaq librupitam yachatsikayämun. Jina juknöpapis o discursukunawampis yachatsikuyanmi. Y creikoqkunata rikaqkunata yanapaqkunata yachatsiyänampaqmi tiempunkunata patsätsiyan y wawqi panikunatam kushishqa yanapayan (1 Pëd. 5:2). Creikoqkunata rikaqkuna wakin wawqikunaqa, Jehoväta adoranapaqmi Diospita Yachatsikuna Wayikunata rurarirnin o Betel wayikunatanö juk wayikunata rurarnin yanapakuyan. Peru llapan wawqi panikunanömi, creikoqkunata rikaqkunaqa Diospita yachatsikuyta mas puntaman churayan (Mat. 28:19, 20).

5. ¿Imanirtan apostol Pabluqa Diospita yachatsikuyta mas puntaman churarqan?

⁵ ¿Imatataq apostol Pablupita yachakuyta puëdiyanman? Pablu alli yachatsikoq imanir kanqantaqa, Filipensis 1:10 textuchömi nin. Tsëchömi kënö consejakurqan: “Mas precisaq cösaskunapita segurakuyänëkipaq”. Kikimpis consejakunqannöllam rurarqan. Tsëmi Diospita yachatsikunampaq carguta chaskirqan y tsëtam, wanukunqanyaq mas puntaman churarqan. Tsëmi, “nunakuna juntaräyanqanchö y wayin wayin” Diospita yachatsikurqan (Hëch. 20:20). Pëqa, puëdinqanmannömi Diospita yachatsikoq y manam juk hörakunallachötsu o semänachö juk kutillatsu. Këllata yarpärishun: Atenas markachö yanaqinkunata shuyaranqanyaqmi, tsëchö reqishqa nunakunata alli noticiakunapita yachatsirqan y tsëta ruranqampitam wakinkunaqa creikur qallëkuyarqan (Hëch. 17:16, 17, 34). Posadakunqan wayichö prësurëkarpis, pëman ëwaq nunakunatam Diospita parlaparqan (Hëch. 28:16-24; Filip. 1:13, 14).

6. ¿Imanötan apostol Pabluqa wakin wawqikunata yachatsirqan mas alli yanapakuyänampaq?

⁶ Pabluqa, allim tiempunta provechaq. Wakintam invitaq Diospita yachatsikurnin yanaqäyänampaq. Congregacionkunata watukaq y Diospita yachatsikoq ëwanqanchömi, puntata Juan Marcusta aparqan y yapë kaqchönam Timoteuta aparqan (Hëch. 12:25; 16:1-4). Congregacionkunata alli rikäyänampaq, wawqi paninkunata cuidayänampaq y alli yachatsiyänampaqmi pëkunata yachatsirqan (1 Cor. 4:17).

7. Efesius 6:14 y 15 ninqanchö Pablu consejakunqantaqa, ¿imanötan creikoqkunata rikaqkuna wiyakuyanman?

⁷ ¿Imatataq creikoqkunata rikaqkuna Pablupita yachakuyta puëdiyan? Pëkunapis mëtsëchömi Diospita yachatsikuytaqa puëdiyan, y manam wayin wayinllatsu (leyi Efesius 6:14, 15). Këkunallaman pensarishun: itsa rantipakoq ëwarnin o trabajaq mayinkunata  Diospita yachatsiyanman. O Diospita Yachatsikuna Wayikunata rurëchö yanapakuykarqa, tsëchö vecïnukunata o materialkunata apamoqkunatam parlapäriyanman. Y Pablu ruranqannömi, yachatsikuykarpis wakin wawqikunata o creikoqkunata rikaqkunata yanapaqkunata, mas yanapakuyänampaq yachatsiyanman.

8. Höraqa, ¿imatataq creikoqkunata rikaqkunapita juk wawqi ruranan?

⁸ Creikoqkunata rikaqkuna o congregacionta watukaqkunaqa, manam congregacionchö imëka rurëkunarëkurtsu, Diospita yachatsikuytaqa juk läduman churariyanman. Tsënö mana pasakunampaqmi, juk rurëkunata rurayänampaqqa änikuyanmantsu. Itsa tsë asuntupaq mañakurirqa, cargunkunata cumpliyänampaq mas puntachö kanampaq kaqkunata juk läduman churayänampaq kaqta cuentata qokuriyanman. Y tsëkunaqa, itsa familiankunawan Diospita cada semäna yachakuyänampaq kaq, Diospita yachatsikuyänampaq kaq o wamrankuna Diospita imanö yachatsikuyänampaq yachatsiyänampaq kaq kanman. Wakinkunapaqqa, imachöpis yanapakuyänampaq niyaptinqa, manam fäciltsu “manam puëdishaqtsu” niyänanqa, peru mas puntachö kanampaq kaqkunata alli cumplita munayanqanta Jehovä entiendinqantam yarpäyänan.

9. Imëka rurëyoq këkäyaptinqa, ¿imata rurayänantan creikoqkunata rikaqkunapaqqa fäciltsu kanman?

⁹ ¿Imanirtan tsëta rurayänanqa fäciltsu kanman? Ushanan junaqkunachöna kawashqam, Jehoväta sirweqkunaqa imëka mana allikunapa pasantsik. Tsëmi llapantsikpis, shumaq parlapämänata, yanapamänata y shoqamänata wanantsik. Höraqa, mana alli rurëkunaman mana chäyänampaqmi yanapayänanta wakinkunaqa wanayan (1 Tes. 5:14). Peru creikoqkunata rikaqkunaqa, manam llapan problëmantsikchötsu yanapamënintsikta puëdiyan. Tsënö kaptimpis, llapan sirweqninkunata shumaq parlapäyänanta y cuidayänantam Jehoväqa shuyaran. Imëka rurëyoq këkarninqa, ¿mëpitataq tiemputa jorqayanman wawqi paninkunata yanapayänampaq?

10. 1 Tesalonicensis 2:7 ninqannö, ¿imanötan apostol Pabluqa wawqi paninkunata tratarqan?

¹⁰ ¿Imatataq apostol Pablupita yachakuyta puëdiyanman? Pëqa, wawqi panikunata allita rurëkäyanqampita shumaq parlapänampaq y kallpachakur sïguiyänampaqmi, imëpis parlapëta procuraq. Creikoqkunata rikaqkunapis, Pablunöllam wawqi panikunata kuyëpa tratayan (leyi 1 Tesalonicensis 2:7). Pë y Jehovä kuyayanqantam Pabluqa wawqi paninkunata rikätsirqan (2 Cor. 2:4; Efes. 2:4, 5). Pëqa, amïgunkunatanömi rikaq y pëkunawan juntu kanampaqmi tiempunta patsätseq. Imakunata mantsanqampita y imakunachö pishipanqampita willarmi, pëkunaman confiakunqanta rikätsikoq (2 Cor. 7:5; 1 Tim. 1:15). Pëqa, manam problëmankunamantsu yarparäkurqan, tsëpa rantinqa, wawqi paninkunata yanapanampaqmi kallpachakoq.

11. ¿Imanirtan creikoq mayinkunata Pablu consejaq?

¹¹ Höraqa, creikoq mayinkunatam apostol Pabluqa consejarqan. Peru tsëtaqa manam cölerakurtsu rurarqan. Pëkunaman yarpachakur y  mana allichö ushayänanta mana munarmi yanapanampaq kallpachakoq. Fäcil-lla entiendiyänampaqnö consejanampaqmi kallpachakoq y consejakunqannölla rurëkäyanqantam musyëta procuraq. Këllaman pensarishun: Corintu markachö cristiänukunaman cartakurqa, clärum consejarqan. Peru tsëpitaqa, cartakunqanchö consejakunqanta imanö rurëkäyanqanta musyanampaqmi, pëkunaman Tïtuta mandarqan. Consejanqannölla rurëkäyanqanta musyarirqa, ¡alläpam kushikurqan! (2 Cor. 7:6, 7).

12. ¿Imatataq creikoqkunata rikaqkunaqa rurayänan wawqi panikuna mana qelanäkuriyänampaq?

¹² ¿Imatataq creikoqkunata rikaqkuna Pablupita yachakuyta puëdiyan? Pënöllam wawqi paninkunawan parlayänampaq tiempunkunata patsätsiyänan. Y tsëtaqa juknöpa rurayan, reunionkunaman tempränu chärir wawqi panikunawan parlakurmi. Höraqa, juk ishkë minütukunallapaqmi kanman juk wawqita shumaq parlapäriyänampaq y kuyayanqanta niyänampaq (Rom. 1:12; Efes. 5:16). Pablunö ruraq creikoqkunata rikaqkunaqa, Bibliachö ninqanwanmi wawqi paninkunata shumaq parlapäriyan y Jehovä kuyanqanta rikätsiyan. Jina pëkunawan seguïdu parlarnin y allita rurayanqampita felicitarmi, kuyayanqanta rikätsiyan. Y pitapis consejanan kaptinqa, Diospa Palabran ninqanwanmi creikoqkunata rikaqqa consejanan. Imapaq cläru parlarpis, consejëkanqan wawqipaq o panipaq yarpachakurmi, kuyëpa parlapan (Gäl. 6:1).

13. ¿Pantayanqankunata imanö rikäyänampaqtaq creikoqkunata rikaqkuna kallpachakuyänan?

¹³ ¿Imanirtan tsëta rurayänanqa fäciltsu kanman? Creikoqkunata rikaqkunaqa, llapan nunakunanömi pantaq kayan (Rom. 3:23). Höraqa, pantayanqankunata Dios rikanqannö rikäyänampaqmi kallpachakuyänan. Itsa wakinqa, pantayanqankunaman alläpa yarparäkuyanman o wakinna, pantayanqankunata pöcu cäsupaq churarnin, cambiëta mana wanayanqanta pensayanman.

14. Filipensis 4:13 ninqannöpis, ¿imanötan humildi kanqan Pabluta yanaparqan pantanqankunapita mana qelanäkurinampaq?

¹⁴ ¿Imatataq apostol Pablupita yachakuyta puëdiyanman? Pëqa, humildi karmi, pishipanqankunachö kikinlla alliyëta mana puëdinampaq kaqta nirqan. Dios yanapanantaraq wananqantam musyarqan. Cristiänu manaraq karqa, Diosta sirweqkunatam chikirnin qatikacharqan. Peru tiempuwanqa, mana allita rurashqa kanqantam nirqan, y imanö kanqanta y portakunqanta cambianampaq kallpachakurqan (1 Tim. 1:12-16). Y Jehovä yanapaptinmi, creikoqkunata rikaq kanqanchö kuyakoq, llakipäkoq y humildi karqan. Pantanqankunaman yarparnin llakikurpis, Jehovä perdonashqa kanqanman confiakunampaq y pantanqankunaman manana yarparäkunampaqmi churapakarqan (Rom. 7:21-25). Imachöpis pantanampaq kaqtaqa musyaqmi, tsënö  kaptimpis, mas alli nuna kanampaqmi kallpachakurqan y chaskinqan carguchö Jehovä yanapanampaq kaqmanmi confiakurqan (1 Cor. 9:27; leyi Filipensis 4:13).

15. Creikoqkunata rikaqqa, ¿imanötan pantanqankunata rikänan?

¹⁵ ¿Imatataq creikoqkunata rikaqkuna Pablupita yachakuyta puëdiyan? Pëkunataqa, manam mana pantaq kayanqampitatsu creikoqkunata rikaq kayänampaq churayashqa, tsënö karpis, pantayanqankunapita mana tsapakuyänampaq y alli nuna kayänampaq kallpachakuyänantam Jehoväqa shuyaran (Efes. 4:23, 24). Imachö pishipäyanqantam, Diospa Palabranta estudiarnin rikäyänan y cambiëta procurayänan. Tsëta rurayaptinqa, kushishqa kayänampaq y cargunkunata alli cumpliyänampaqmi Jehoväqa yanapanqa (Sant. 1:25).

16. ¿Imatan pasakunman wawqi panikuna pantayanqanllaman creikoqkunata rikaqkuna yarparäkuyaptinqa?

¹⁶ ¿Imanirtan tsëta rurayänanqa fäciltsu kanman? Itsa wawqi paninkunawan juntu trabajar imakunachö pantayanqanta creikoqkunata rikaqkuna cuentata qokuyanman. Itsa tsëkunata rikar y tsëkunallaman yarparäkurqa, llakikuyanman y mana allipa tratayanman o pëkunapaq parlar qallëkuyanman. Pabluqa, Satanas tsëta munanqantam creikoq mayinkunata nirqan (2 Cor. 2:10, 11).

17. ¿Imanötan wawqi paninkunata Pablu rikaq?

¹⁷ ¿Imatataq apostol Pablupita yachakuyta puëdiyanman? Pëqa, wawqi paninkunata allipa rikänampaqmi kallpachakoq. Y tsënöqa rikaq, manam pantayanqanta mana musyartsu, höraqa, tsë pantayanqankunam llakitseq. Tsënö karpis, pï pantashqa kanqanta y pï ardëpa rurashqa kanqantaqa cuentata qokoqmi. Wawqi paninkunatam kuyaq y imachö alli kayanqantam rikaq. Y mëqampaqpis allita ruranampaq fäcil mana kanqanta rikarqa, alli kaqman pensëkur tsëta rurëkanqanta y ichik yanaparkuyänanllata wananqantam musyaq.

18. ¿Imatataq yachakuntsik Evodiatawan Sintiquita Pablu imanö yanapanqampita? (Filipensis 4:1-3).

¹⁸ Filïpus marka congregacionchö ishkaq panikunata imanö yanapanqanllata rikärishun (leyi Filipensis 4:1-3). Evodiawan Sintiquiqa, cöleratsinakushqa kartsun yanasanatsu kayarqan. Peru Pabluqa, manam mana allipatsu tratarqan ni manam pëkunapaq parlarqantsu. Tsëpa rantinqa, alli panikuna kayanqanman y Diosta mëtsika watapana sirwiyanqanmanmi masqa yarparqan. Musyarqanmi pëkunata Jehovä kuyanqanta. Tsënö rikarmi, amishtayänampaq ishkanta parlaparqan. Wawqi paninkunata allipa rikanqanmi, kushishqa kanampaq y tsë congregacionchö alli amïgukunayoq kanampaq yanaparqan.

19. (1) Wawqi panikunata allipa rikäyänampaqqa, ¿imatataq creikoqkunata rikaqkuna rurayanman? (2) ¿Imatataq yachakunki Diospita Yachatsikuna Wayita creikoqkunata rikaqkunapita juk wawqi fötuchö limpiapakuykanqampita?

¹⁹ ¿Imatataq creikoqkunata rikaqkuna Pablupita yachakuyta puëdiyan? Wawqi panikuna imachö alli kayanqanmanmi yarpäyänan.  Pantareq kayaptimpis, imachö alli kayanqampitaqa yachakuyta puëdiyanmi (Filip. 2:3). Awmi, höraqa mëqanllatapis corregiyankim. Peru Pablu ruranqannöpis, ama imata parlayanqanllaman o rurayanqanwan wakinta llakitsiyanqanllamanqa pensayëtsu. Masqa, Jehoväta kuyanqanman, pëta sirwir alli tsarakunqanman y alliyëta puëdinampaq kaqman pensayë. Wawqi panikunata allipa rikaq creikoqkunata rikaqkunaqa, congregacionchö llapankuna kuyanakuyänampaqmi yanapakuyan.

20. Apostol Pablupita yachakur sïguiyänampaqqa, ¿imatataq creikoqkunata rikaqkuna rurayanman?

²⁰ Pablupita yachakur sïguiyanqanqa, creikoqkunata rikaqkunata alläpam yanapanqa. Itsa tsëpaqqa, Índice de las publicaciones Watch Tower libruchö, “Pablo” neqta ashiriyankiman y tsëpitana, “ejemplo para los ancianos” neqta. Y tsëpita yachakuyanqëkimannö, kë tapukuyman pensayë: “Creikoqkunata rikaq kanqächö kushishqa yanapakur sïguinäpaqqa, ¿imanötan Pablupita yachakunqä yanapaman?”.

21. ¿Imatataq creikoqkunata rikaqkuna yarpäyänan?

²¹ Creikoqkunata rikaqkuna, yarpäyë, Jehoväqa rurënikikunachö alli kallpachakuyänëkita y pëta sirwir sïguiyänëkitam shuyaran (1 Cor. 4:2). Pëqa, rurëninchö Pablu kallpachakunqampita y sirwir sïguinqampitam kushikurqan. Jehoväqa, qamkuna rurayanqëkipitapis kushikunmi. Tsëmi, Hebrëus 6:10 textuchö kënö nin: “Diosqa manam mana alli kaqta ruraqtsu, qamkuna rurayanqëkikunata, y jutinta kuyarnin santu nunakunata sirwir kayanqëkita y sirwirnin sïguikäyanqëkita qonqarinampaqqa”.