¿Imanirtan Boazpa familianqa nirqan Rutwan casakurqa kikimpa herencianta ‘ushakäratsinampaq’ kaqta? (Rut 4:1, 6).

Unë witsanqa, juk nuna tsurin manaraq kaptin wanukuptinqa, chakran pipaq quedanampaq kaqta y pëpa kastan manana kanampaq kaqtam yarpachakuyaq. Peru Moises qellqanqan Leychömi, tsë asuntu imanö kanampaq kaqtaqa cläru willakoq.

Juk nuna wanukuptin o alläpa waktsa karnin chakranta rantikuptinqa, wawqinmi o mas legïtimu familianmi rantita puëdeq. Tsënöpam tsë chakraqa tsë familiallachö quedaq (Lev. 25:23-28; Nüm. 27:8-11).

¿Tsëqa, ¿imatataq rurayaq wanushqa nunapa jutinta mana qonqayänampaq? Wawqinmi viudawan casakoq y punta yureq tsurinqa, wanushqa wawqimpa jutintam apaq y herenciantapis pëmi chaskeq. Ley ninqannö cuñädunwan casakoq viudaqa allim kawakoq (Deut. 25:5-7; Mat. 22:23-28). Tsë costumbrita qatirmi Rutpis casakurqan.

Kananqa Noemïman pensarishun. Pëqa Elimëlecwanmi casakurqan. Peru Elimëlec y ishkan wamrankuna wanuriyaptinqa, mananam Noemïta manteninampaq pïnimpis karqannatsu (Rut 1:1-5). Tsëmi Noemï Judäman chärirqa, Rut-ta nirqan chakrankunata rantikuyta munanqanta Elimëlecpa familian Boazta willanampaq (Rut 2:1, 19, 20; 3:1-4). Peru Boazqa musyarqanmi pëpa puntanman Elimëlecpa juk mas legïtimu familian kanqanta, y tsë nuna tsë chakrata rantinampaq derëchuyoq kanqanta (Rut 3:9, 12, 13). Tsë nunatam Bibliaqa, “amïgu” nir qayan.

Qallananllachöqa, tsë nunaqa chakrakunata rantita munarqanmi (Rut 4:1-4). Pëqa musyarqanmi atska qellëta pagakunampaq kaqta, tsënöllam musyarqan Noemïqa mayorna kanqanta y Elimëlecpa chakrankunawan quedakunampaq wamrayoq këta mana puëdinampaqna kaqta. Tsëmi atska qellëta pagakunan kaptimpis, Elimëlecpa chakrankunata rantinqanqa alli kanan karqan.

Peru tsë chakrakunata rantirqa, Rutwanmi casakunan karqan. Tsëta cuentata qokurirmi, kënö nirqan: “Manam rantita puëdïtsu. Rantirqa kikïpa herenciätam ushakäratsishaq” (Rut 4:5, 6). ¿Imanirtan rantita munarqannatsu?

Tsë nuna o juk mas legïtimu familian Rutwan casakuptin y Rutchö tsurin yuriptinqa, tsë wamram Elimëlecpa chakrankunata herenciatanö chaskinan karqan. Tsëqa, ¿imanötan tsë nunapa herenciantaqa ‘ushakäratsinman’ karqan? Bibliaqa manam tsëta willakuntsu, peru capaz këkunarëkur karqan:

• Juk, capazchi pensarqan Rutpa wamran Elimëlecpa chakrankunata herenciatanö chaskinan kaptin qellëninta perditsirllana rantinampaq kaqta.

• Ishkë, manachi Noemïtawan Rut-ta mantenita munarqantsu.

• Kima, Rutchö mas tsurinkuna yuriptinqa tsë tsurinkunatam kikimpa chakrankunata rakipunan karqan.

• Chusku, tsë nunapa mas tsurinkuna mana kaptinqa, Rutchö yureq tsurinllanam kikimpa chakranta y Elimëlecpa chakrantapis chaskinan karqan. Tsëmi tsë nunapa chakranqa, Elimëlecpa jutinllachöna quedarinan karqan. Tsëta musyarchi, tsë nunaqa Noemïta yanapëta munarqannatsu. Tsëpa rantinqa, Boaztam nirqan rantinampaq. Pëmi tsë nunapa qepanmanqa tsë chakrata rantinampaq derëchuyoq karqan. Peru Boazqa tsë wanushqa familiampa jutin ushakänanta mana munar y chakrankunapis pëpa jutinllachö kananta munarmi Rutwan casakurqan (Rut 4:10).

Rikärinqantsiknöpis, kë nunaqa kikinllaman yarparäkurchi jutinta ni herenciantapis perdita munarqantsu. Peru tsëta ruranqanqa manam yanaparqantsu, y hasta jutimpis qonqakärirqanmi. Y manam tsëllatsu, Boaz chaskinqantam perdirqan. Rutwan casakuptinqa Jesucristu yurinqan familiachömi jutin qellqarëkanman karqan. Rikärinqantsiknömi, tsë nunaqa wanëkaqkunata mana yanapanqampita mas alli kaq herenciata perdirqan (Mat. 1:5; Lüc. 3:23, 32).