1. Reunionkunaman tsëllaraq shamoqkunataqa, ¿imatan masqa gustan? (Rikäri fötuta).

 KËLLAMAN PENSARISHUN: juk nunam warminwan reunionman ëwayan. Tsëchö wawqi panikuna kushishqa chaskiyanqanta rikar y kikinkunapurapis rasumpa kuyanakuyanqanta rikarmi alläpa espantakuyan. Y wayinman kutikarnam, warmi kaqqa qowanta o runanta kënö nin: “Jehoväpa testïgunkunaqa yachanëpaqmi kayan”.

2. ¿Imanirtan wakinkunaqa Jehovä Diosnintsikta sirwita dejayashqa?

² Jehoväpa testïgunkuna rasumpa kuyanakuyanqanqa alläpa shumaqmi. Peru tsënö karpis, jutsasapam kayan (1 Juan 1:8). Tsëmi pëkunata mas reqinqantsikmannö imachöpis pantayanqankunata maslla rikäshun (Rom. 3:23). Peru wakinkunaqa jutsasapa karnin pantayanqankunata rikarmi, hasta Jehovä Diosnintsikta sirwita dejayashqa.

3. ¿Imanö kayanqampitataq rasumpa cristiänukunaqa reqishqa kayan? (Juan 13:34, 35).

³ Jesuspa qateqninkunataqa, ¿imanö kayanqampitataq  reqiyänan karqan? Kuyakoq kayanqampitam y manam imatapis mana pantayanqampitatsu (leyi Juan 13:34, 35). Jesusqa manam, “tsënömi qamkuna musyayanki qatimaqnïkuna kayanqëkita” nirqantsu. Tsëpa rantinqa, “tsënömi llapankuna musyayanqa qatimaqnïkuna kayanqëkita” nirqanmi. Tsëwanmi Jesusqa cläru entienditsikurqan qateqninkunapis y wakin nunakunapis Diosnintsikpa sirweqninkunataqa kuyakoq kayanqampita reqiyänampaq kaqta.

4. Mana Testïgu kaqkunaqa, ¿imataraq tapukuyan?

⁴ Mana Testïgu kaqkunaqa, capazchi kënö tapukuyan: “¿Imanirtan rasumpa cristiänukunaqa kuyakoq kayanqampita reqishqa kayan? Qateqninkunata kuyarnin, ¿imatataq Jesus rurarqan? ¿Y imanötan Jesusnö kuyakoq kashwan?”. Testïguna karpis, tsënö tapukunqantsikqa allim kanman. Tsëmi yanapamäshun wakinkuna pantayaptimpis kuyakoq kanantsikpaq (Efes. 5:2).

5. Juan 15:12 y 13 textuchöqa, ¿imanö kuyakuypaqtan Jesus parlëkarqan?

⁵ Jesusqa nirqan qateqninkuna kuyanakuyanqanqa, imawampis mana igualanqantam (leyi Juan 15:12, 13). Pëqa kënömi mandakurqan: “Qamkunata kuyanqänölla qamkunapis jukniki juknikikuna kuyanakuyanki”. Tsënö nirqa, ¿imanö kuyakuypaqtan parlëkarqan? Cristiänu mayinkunarëkur wanurpis wanuriyänampaqmi. b

6. ¿Imanötan Diospa Palabranqa kuyakoq kanantsikpaq yachatsimantsik?

⁶ Teyta Diospa Palabranqa kuyakoq  kanantsikpaqmi yachatsimantsik. Wakinkunataqa Teyta Diospa Palabran kënö ninqanmi gustan: “Teyta Diosqa kuyakuymi” (1 Juan 4:8); “qamkuna kuyakuyanqëkinömi nuna mayikikunatapis kuyayänëki” (Mat. 22:39); “kuyakoq nunaqa, wakinkunata perdonanampaqmi imëpis listu këkan” (1 Pëd. 4:8) y “kuyakuyqa manam imëpis ushakantsu” (1 Cor. 13:8). Kë versïculukunaqa, kuyakoq kanantsikpaq y kuyakuyta yachakunantsikpaqmi yanapamantsik.

7. ¿Imanirtan Satanasqa nunakunata yanapëta puëdintsu juknölla kayänampaq y kuyanakuyänampaq?

⁷ Mëtsikaq nunakunam kënö tapukuyan: “¿Imanötan musyäman mëqan religion alli kaq kanqanta? Llapankunapis rasumpa kaqta yachatsikuyanqantam niyan, peru Diospitaqa jukläya jukläyatam yachatsikuyan”. Satanasqa mëtsika mana alli religionkunatam yuritsimushqa, tsëmi nunakunata pantatsin. Peru pëqa manam mëtsë nacion nunakunata yanapëta puëdintsu juknölla kayänampaq ni kuyanakuyänampaq. Tsëtaqa Jehovä Diosnintsikllam kuyakoq karnin rurëta puëdin. Poderninwan pë yanapaptin y bendiciptinllam nunakunaqa rasumpa kuyanakuyta puëdiyan (1 Juan 4:7). Tsëchi Jesusqa nirqan, rasumpa qateqninkunaqa kuyakoq kayanqampita reqishqa kayänampaq kaqta.

8, 9. Jehoväpa testïgunkunata kuyakoq kayanqanta rikarnin, ¿ima niyantan wakin nunakuna?

⁸ Jesus ninqannömi, rasumpa cristiänukunataqa nunakuna reqiyashqa kuyakoq kayanqampita. Këllaman pensarishun: Ian jutiyoq wawqim yarpan wayin amänunchö asamblëaman ëwanqanta. Tsë estadiumanqa pasaq killakunallaran pukllayanqanta rikaq ëwashqa karqan. Kënömi willakun: “Kë kutichöqa alläpa jukläyam karqan. Testïgukunaqa yachanëpaq y alli vistishqam kayarqan, y wamrankunapis allim portakuyarqan. Peru masqa kushikurqä kushishqa y yamë kayanqanta rikarmi. Tsënö kawakuytam noqapis munarqä. Manam imata yachatsikayämunqantaqa yarpätsu, peru Testïgukuna imanö portakuyanqantaqa kananyaqmi yarparëkä”. c Testïgukuna tsënö portakuyanqantaqa rikarqan kuyakoq kayaptinmi. Wawqi panintsikkunata kuyarninmi, llapankunawan alli kantsik y respetantsik.

⁹ John jutiyoq wawqipis tsënömi willakun. Pëqa reunionman invitayaptinmi ëwarqan y tsëchömi rikarqan Testïgukuna alläpa kuyakoq kayanqanta y shumaq portakuyanqanta. Kënömi nin: “Kuyakoq kayanqanta rikarmi, cuentata qokurqä rasumpa kaq religion kayanqanta”. d Rasumpa kaqchöqa, mëtsikaq nunakunam niyan Jehoväpa testïgunkunaqa rasumpa kaq religion kayanqanta.

10. ¿Imëtan masqa kuyakoq kanqantsikta rikätsikushwan? (Rikäri nötata).

¹⁰ Qallananchö ninqantsiknöpis, wawqi panintsikkunaqa jutsasapam kayan. Tsëmi rurayanqankunawan o parlayanqankunawan höraqa ofendiramäshun (Sant. 3:2). e Tsë hörakunachömi kuyakoq kanqantsikta rikätsikunantsik.  ¿Imaraq yanapamäshun ofendikämashqapis kuyakoqlla këkänapaq? Jesus ruranqanta rikärishun (Juan 13:15).

11. ¿Imanö kayanqantataq Santiäguwan Juanqa rikätsikuyarqan? (Rikäri dibüjukunata).

¹¹ Jesusqa musyarqanmi qateqninkunaqa imëkachöpis pantaq kayanqanta. Tsëmi Jehovä Diospa rikëninchö alli kayänanta munar kuyëllapa corregirqan. Juk kutim, apostol Santiäguwan Juanqa Jesus gobernaptin derëcha y izquierda lädunman jamakuyta munar, mamäninta mandayarqan tsë asuntupaq Jesusta parlapänampaq (Mat. 20:20, 21). Santiäguwan Juanqa orgullösu kar y kikinkunallaman pensarmi tsëta mañakuyarqan (Prov. 16:18).

12. ¿Imanötan musyantsik wakin apostolkunapis mana alli portakushqa kayanqanta?

¹² Manam Santiäguwan Juanllatsu mana alli portakuyarqan. Wakin apostolkunapis mana allim portakuyarqan. Diospa Palabranchömi kënö nin: “Tsëta musyëkurnam chunka qateqninkunaqa tsë ishkan wawqipaq alläpa cölerakuyarqan” (Mat. 20:24). Wakin apostolkunaqa capazchi alläpa cölerarnin Santiägutawan Juanta kënö niyarqan: “Qamkunaqa, ¿pikunatan kayanki tsë carguta mañakuyänëkipaq?  Noqakunapis Jesuswanqa trabajayarqömi. Qamkunanöllam Jesuspa derëcha y izquierda lädunman jamakuyta munayä”. Apostolkunaqa cölerakurmi tsë kutichöqa kuyakoq kayanqantapis qonqëkuyarqan.

13. Apostolkuna mana alli portakuykäyaptimpis, ¿imanötan Jesusqa tratarqan? (Mateu 20:25-28).

¹³ Tsënö portakuyaptin, ¿ima nirqantan Jesus? Manam cölerakurqantsu y manam nirqantsu pëkunapa rantin mas humildi, mas kuyakoq y mas alli apostolkunata ashinampaq kaqta. Tsëpa rantinqa, alli shonquyoq kayanqanta musyarmi pacienciawan yanaparqan (leyi Mateu 20:25-28). Apostolninkuna mëtsika kuti pantëkäyaptimpis, Jesusqa pëkunata valorarmi kuyëllapa tratarqan (Mar. 9:34; Lüc. 22:24).

14. Jesuspa apostolninkunaqa, ¿imanö nunakunawantan winashqa kayarqan?

¹⁴ Jesusqa apostolninkuna imanö nunakunawan winashqa kayanqantam cuentachö katsirqan (Juan 2:24, 25). Tsë witsankunaqa, mandakoq religiösukunaqa imëkayoq këta y autoridäyoq këtam mas precisaqpaq churayaq (Mat. 23:6; rikäri Biblia de estudiuchö Mateu 23:6 textuchö yureq Asientos del frente en la sinagoga neq videuta). Judïu religionchö mandakoqkunaqa, wakin nunakunapitapis mas alli kayanqantam pensayaq (Lüc. 18:9-12). f Jesusqa musyarqanmi tsë nunakuna pensayanqannölla apostolkunapis pensayanqanta (Prov. 19:11). Peru manam shuyararqantsu apostolninkuna imatapis allillata rurayänantaqa. Tsëpa rantinqa, alli shonquyoq kayanqanta musyarmi pacienciawan yanaparqan orgullösu kayanqanta y kikinkunallapaq imatapis munayanqanta dejayänampaq, humildi y kuyakoq këta yachakuyänampaq.

15. ¿Imatataq yachakuntsik Santiäguwan Juan rurayanqampita?

¹⁵ ¿Imatataq yachakuntsik Santiäguwan Juan rurayanqampita? Jesus gobernaptin izquierda kaq y derëcha kaq lädunman jamakuyänampaq mañakuyanqanqa manam allitsu karqan. Tsënöllam allitsu karqan wakin apostolkuna cölerakuyanqampis. Peru Jesusqa, 12 apostolninkunatam kuyëpa tratarqan. ¿Imatataq yachakuntsik? Kuyakoq kanqantsiktaqa rikätsikuntsik wakinkuna pantayaptin imanö sientikunqantsikwanmi. Tsëmi wakinkuna mana allikunata rurayaptinqa, kënö tapukunantsik: “¿Imanirtan mana allita ruranqampita alläpa cölerakü? ¿Mas kuyakoq kanätsuraq pishin? ¿Tsë wawqi o paniqa mana allipatsuraq pasëkan? ¿Manatsuraq mas alliqa kanqa ofendimashqa kaptimpis kuyëpa tratanä?”. Wakinkunata kuyëpa tratarninqa, rasumpa kaq cristiänu kanqantsiktam rikätsikushun.

16. ¿Imatataq Jesuspita yachakuntsik?

¹⁶ Apostolninkunata Jesus kuyëpa tratanqampitaqa yachakuntsik wawqintsikkunata y panintsikkunata imakunapa pasëkäyanqanta entiendita kallpachakunapaqmi (Prov. 20:5). Jesusqa musyarqanmi  shonqunkunachö imanö kayanqanta, peru noqantsikqa manam. Tsënö kaptimpis, wawqi panintsikkuna pantayaptinqa pacienciayoqmi kanantsik (Efes. 4:1, 2; 1 Pëd. 3:8). Tsëpaqqa yanapamäshun imanö kayanqanta musyanqantsikmi.

17. ¿Imatan pasakurqan congregacionkunata watukaq wawqi juk wawqita maslla reqiriptin?

¹⁷ Africa orientalchö congregacionkunata watukaq wawqim juk wawqita reqirqan y mana alli geniuyoq kanqantam pensarqan. ¿Tsënö kanqanta pensarku parlaparqannatsu? Kikinmi kënö willakun: “Mana parlapänäpa rantinmi, maslla reqita procurarqä”. Tsëmi musyarirqan imëka mana allikunapa pasashqa karnin mana alli geniuyoq kashqa kanqanta. Kënömi willakun: “Unë imanö kanqanta dejanampaq alläpa kallpachakushqa kanqanta y alli cristiänu kanqantana rikarmi alläpa espantakurqä. Y amïgum tikrariyarqä”. Wawqintsikkuna imakunapa pasashqa kayanqanta entiendirqa, mas fäcil-llam kuyëpa tratashun.

18. Juk wawqi o juk pani ofendimashqaqa, ¿imakunatataq tapukunantsik? (Proverbius 26:20).

¹⁸ Höraqa capazchi ofendimaqnintsikkunawan parlëta munashun. Peru manaraq parlarmi, kënö tapukunantsik: “¿Rasumpaku musyä imanir ofendimanqanta?” (Prov. 18:13). “¿Cuentata qokuntsuraq ofendimashqa kanqanta?” (Ecl. 7:20). “Y noqaqa, ¿imëllaqa pillatapis cuentata mana qokushpa ofendirqöku?” (Ecl. 7:21, 22). “Kë asuntuta altsëta munëkarpis, ¿tsë wawqiwan o paniwan parlarqa mas problëmamantsuraq chärishaq?” (leyi Proverbius 26:20). Kë tapukuykunaman alli pensarqa, capaz cuentata qokurishun tsë wawqiwan o paniwan parlanantsikpa rantin, kuyakoq karnin ofendimanqantsikta qonqëkunantsik mas alli kanqanta.

19. ¿Imata ruranapaqtan decidïdu këkantsik?

¹⁹ Jehoväpa testïgunkunaqa, Jesuspa qateqninkuna rasumpa kayanqantam kuyakoq karnin rikätsikuyan. Peru ¿imatataq cada ünu rurashwan? Wawqi panintsikkunatam imëkachö pantayaptimpis kuyanantsik. Tsëta rikarmi, wakin nunakunaqa rasumpa kaq religion kanqantsikta musyayanqa y noqantsikwan juntum kuyakoq Diosnintsikta adorëta munayanqa. Tsënö këkaptinqa, kuyakoq kënintsikwan rasumpa cristiänukuna kanqantsikta rikätsikushun.