1, 2. ¿Imanötan juk nunapa vïdanqa mas alliyärin bautizakuriptin?

 PÏ NUNAPIS bautizakurqa, Jehoväpa familiannam tikrarin. Y tsëqa, ¡alläpa kushikuypaqmi! Jehoväpa familian tikrashqakunaqa Davidnömi sientikuyan. Davidmi kënö nirqan: “Patiuykichö kawanampaq akranqëki nunaqa, kushishqam kawakun” (Sal. 65:4).

² ¿Imanö nunatataq patiunman Jehovä chaskin? Punta kaq yachatsikuychö yachakunqantsiknömi, amïgun këta munaqkunallata (Sant. 4:8). Pï nunapis Jehovällatana sirwinampaq änikuptin y bautizakuptinqa, tsë nunawanmi alli amïgu tikrarin. Tsënö nunakunatam kënö nin: “Tsëta rurar probayämaptikiqa, [...] bendiciyashqëki[m], y manam imëkikunapis faltanqatsu” (Mal. 3:10; Jer. 17:7, 8).

3. Diosnintsikllata sirwinapaq änikushqa y bautizakushqa kaqkunaqa, ¿imatataq cumplinantsik? (Eclesiastes 5:4, 5).

³ Bautizakurirqa, tsëran Jehoväta sirwir qallëkuntsik. Tsëmi llapantsikpis, tentacionkunapa pasar o ima problëmakunapa pasarpis, Diosnintsikta äninqantsiknö imëpis kawanantsik (leyi Eclesiastes 5:4, 5). Tsënöllam Jesus ruranqankunata ruranantsik y mandakunqankunata cäsukunantsik (Mat. 28:19, 20; 1 Pëd. 2:21). Tsëpaqmi këchö yachakunqantsik yanapamäshun.

PROBLËMAPA Y TENTACIONPA PASARPIS JESUSPA QATEQNIN KËTA DEJËTSU

4. Jesuspa qateqninkunaqa, ¿imanötan ‘sufrimientu qeruta’ apaq cuenta kawantsik? (Lücas 9:23).

⁴ Ama pensëtsu bautizakurinqëkipitaqa imëpis kushishqallana kawakunëkipaq kaqta. Jesusqa clärum nirqan qateqninkunaqa ‘sufrimientu qeruta cada junaq’ apaq cuenta kawayänampaq  kaqta (leyi Lücas 9:23). Tsënö nirqa, ¿imëpis sufrirllana kawakuyänampaq kaqtaku nikarqan? Manam. Tsëpa rantinqa nikarqan, bendicionkunata chaskirpis, höra höraqa sufriyänampaq kaqta o alläpa sufrimientukunapa pasayänampaq kaqtam (2 Tim. 3:12).

5. Diospa Gobiernunta puntaman churayaptinqa, ¿ima bendicionkunata chaskiyänampaq kaqtataq Jesus nirqan?

⁵ ¿Jehoväta sirwiptikiku familiëki chikishunki? O ¿Diospa Gobiernunta puntaman churarku kuyanqëki cösaskunata o imëkatapis dejarqunki? (Mat. 6:33). Tsëta rurashqa karqa, ama yarpachakuytsu. Tsë llapanta ruranqëkikunatam Jehoväqa rikëkämun (Heb. 6:10). Y capazchi Jesus änikunqankuna cumplikaqta rikarqunkina. Pëmi kënö nirqan: “Noqam qamkunata nï, qatimaqnï kanqanrëkur y alli noticiakunarëkur wayinta, wawqinkunata, paninkunata, papäninta, mamäninta, wamrankunata o chakrankunata dejashqa kaqqa, imëkata rurar sufritsiyaptimpis kanan witsanchömi cien kuti masta chaskinqa, wayikunata, wawqikunata, panikunata, mamakunata, wamrakunata y chakrakunata, y shamoq tiempuchönam imëyaqpis kawëta tarinqa” (Mar. 10:29, 30). Imëkata ruranqëkipitapis, ¿manaku chaskinqëki bendicionkunaqa masraq kashqa? (Sal. 37:4).

6. Bautizakushqana këkarpis, ¿imanirtan jutsa rurëpitaqa cuidakunkiman?

⁶ Bautizakushqana kaptikipis, “jutsa ruraq” cuerpuykiqa mana allikunataraqmi rurëta munanqa, tsëmi alli tsarakunëki (1 Juan 2:16). Y yarpänëkim jutsa ruraqllaraq kanqëkita. Y tsëqa capazchi apostol Pablunö sientikunki. Pëmi kënö nirqan: “Shonqüchöqa Teyta Diospa leynimpitam alläpa kushikü, peru cuerpüchöqa, pensënïchö këkaq leywan tsaränakoq juk ley kanqantam cuentata qokü, y cuerpüchö këkaq jutsapa leyninmanmi prësutanö apaman” (Rom. 7:22, 23). Capazchi shonquykichö mana alli munëkuna yuriptinqa, mana alli sientikunki y qelanäkurita munanki. Peru tsë hörakunachömi, Jehovä Diosnintsikllatana sirwinëkipaq änikunqëkita yarpanqëki yanapashunki. Diosnintsikta äninqëkita yarparqa, tentacionkunapa pasarpis allim tsarakunki. ¿Imanirtan tsënö nintsik? Rikärishun.

7. ¿Imanötan Jehovällatana sirwinapaq änikunqantsik yanapamantsik Jehoväta sirwita mana dejanapaq?

⁷ Pï nunapis Jehovä Diosllatana sirwinampaq änikurqa, kikimpa munëninta mana ruranampaqnam decidïkan. Juk parlakuychöqa, Jehoväta kushitsinanrëkurmi imëka munanqankunata o hasta cuerpun munanqanta rurëta dejarin (Mat. 16:24). Tsëmi imëka tentacionkunapa pasarpis, “¿këtaku o waktaku rurä?” nirqa pensanantsiknatsu. Noqantsikqa clärum musyantsik Jehovä mandakunqankunata cäsukunantsikpaq kaqta. Jehovällatana sirwinapaq änikurqa, munënintsikkunata manana ruranapaq y Jehovällatana cäsukunapaqmi decidirqantsik. Tsëta rurarqa, imëka mana allikunapa pasarpis, Jobnömi Jehoväta dejashuntsu. Pëmi kënö nirqan: “Wanukunqäyaqmi Teyta Diostaqa dejashaqtsu” (Job 27:5).

8. Jehovällatana sirwinapaq änikunqantsikta yarpanqantsikqa, ¿imanötan yanapamantsik mana alli munëkunata vencinapaq?

⁸ Diosnintsikllata sirwinapaq änikunqantsikta yarpararqa, manam mana allikunata rurëta munanqantsikkunamanqa yarparäkushuntsu. Këllaman pensarishun: ¿allitsuraq kanman casäda warmita o casädu ollquta enamorëpa parlapanqantsik? ¡Manam! Tsëta manana ruranapaqmi Jehovällatana sirwinapaq änikunqantsik höra decidirqantsik. Qallananllapita mana alli munëkunata vencirqa,  manam imatapis o pitapis kuyakurkushuntsu ni dejanapaqpis sifrishuntsu. “Mana alli nunakunanöqa” manam portakunantsiktsu (Prov. 4:14, 15).

9. Diosnintsikllata sirwinantsikpaq änikunqantsikta yarpanqantsikqa, ¿imanötan yanapamantsik Diosnintsikpaq ruranqantsikkunata imëpis cumplinapaq?

⁹ ¿Y imataraq rurashwan llapan reunionnintsikkunaman ëwanantsikta mana permitimaqnintsik trabäjuchö trabajanapaq nimashqa? Tsëtaqa clärunam musyantsik. Tsënö trabäjuta manaraq änimashqam, puntallapitana decidirqantsik tsënö trabäjukunaman mana yëkunapaq. Tsënöpam Jehovä Diosnintsiktaqa mas fäcil-lla sirwita puëdishun. Jesusnömi Diospa kaqta puntaman churanantsik, y pënömi Diosnintsik mana gustanqankunataqa ruranantsiktsu y valientim kanantsik “manam” ninantsikpaq (Mat. 4:10; Juan 8:29).

10. ¿Imanötan Jehovä yanapamäshun bautizakurirpis Jesuspa qateqnin këta mana dejanapaq?

¹⁰ Problëmakunapa y tentacionkunapa pasarmi rikätsikushun Jesusta mana dejëpa qatikanqantsikta. Tsëta logranapaqqa, kikin Jehovämi yanapamäshun. Palabranchömi kënö nimantsik: “Teyta Diosqa confiakuypaqmi, y manam permitinqatsu aguantëta puëdiyanqëkipita masqa tentashqa kayänëkita, sinöqa tentacion chämuptinmi, tsëpita yarquyänëkipaq y aguantayänëkipaq yanapayäshunki” (1 Cor. 10:13).

¿IMATATAQ RURANKIMAN JESUSPA QATEQNIN KËTA MANA DEJANËKIPAQ?

11. ¿Imakunatataq rurankiman Jesuspa qateqnin imëpis kanëkipaq? (Rikäri fötukunata).

¹¹ Jesusqa llapan shonqunwanmi Jehoväta sirwirqan, y mañakunqanmi yanaparqan imëpis amïgun kanampaq (Lüc. 6:12). Bautizakurirnin Jesuspa qateqnin imëpis kanëkipaqqa  yanapashunki, Jehovä Diosnintsikpa amïgun kanëkipaq yanapashoqniki kaqkunata ruranqëkikunam. Tsëmi Bibliachöqa kënö nin: “Diospa kaqchö imanö këkanqantsikmannö mas alliyar sïguishun” (Filip. 3:16). Capazchi wiyarqunki wakin wawqi panikunaqa Diospa Gobiernumpita Yachatsikoqkunapaq Escuëlaman o juk markakunaman yachatsikoq ëwashqa kayanqanta. Y qamqa, ¿puëdinkimantsuraq pëkunanö rurëta? Rurëta puëdiptikiqa, allim kanman. Jehoväpa sirweqninkunaqa imëpis Diosnintsikpita maslla yachatsikuytam munantsik (Hëch. 16:9). Peru pëkunanö rurëta mana puëdirqa, ama mas mënus kanqëkita pensëtsu. Jehoväta sirwinqantsikchöqa imëkapitapis masqa välin, mana allikunapa pasarnin alli tsarakunqantsikmi (Mat. 10:22). Puëdinqëkimannö y yachanqëkimannö ruranqëkikunapitam Jehovä Diosnintsikqa alläpa kushikun. Tsëkunata rurarqa bautizakurirpis, Jesuspa qateqnin këtaqa manam dejankitsu (Sal. 26:1).

12, 13. ¿Imatataq rurankiman Diospa kaqkunata ruranëkipaq gänasniki mana kaptinqa? (1 Corintius 9:16, 17; leyiri “ ¿Imatataq ruranantsik cörrirnin sïguinapaq?” neq recuadruta).

¹² ¿Y imataraq rurankiman Diosnintsikman janan shonqullana mañakuykanqëkita cuentata qokur, o Bibliapita yachakurpis o yachatsikurpis janan shonqullana rurëkanqëkita cuentata qokurqa? Bautizakushqana kaptikipis tsëkuna pasashuptikiqa, ama pensëtsu Jehovä manana yanapashunqëkitaqa. Llapantsikpis jutsasapam kantsik, y höra höraqa mana allikunapam pasantsik. Diosnintsikpaq rurëkunata kushishqana mana rurarqa, apostol Pabluta pasanqanman pensë. Pëqa Jesus ruranqankunata ruranampaqmi kallpachakurqan, peru höra höraqa manam gänasnin karqantsu alli kaqta ruranampaq (leyi 1 Corintius 9:16, 17). Peru kënömi nirqan: “Mana  munëkar rurarpis, tsëta ruranäpaqmi carguta chaskirqö”. Juk parlakuychöqa Pablu nikarqan, Diospita yachatsikunampaq gänasnin mana kaptimpis, ruranampaq kallpachakuykanqantam.

¹³ Tsënöllam qampis, Diospa kaqkunata ruranëkipaq gänasniki mana kaptimpis dejarinëkitsu. Tsëpa rantinqa, gänasniki mana këkaptimpis rurarnin sïguinëkipaq kallpachakuy. Tsëkunata ruranqëkim tiempuwanqa yanapashunki gänas gänaslla ruranëkipaq. Bautizakurirnin Jesuspa qateqnin imëpis kanëkipaqqa yanapashunki, Diospa kaqkunata seguïdu ruranqëkim. Tsënö ruranqëkim, wakin wawqi panikunatapis yanaparinqa Diospa kaqta rurar sïguiyänampaq (1 Tes. 5:11).

‘IMANÖ KËKÄYANQËKITA ALLI RIKÄYË’

14. Diospa kaqchö imanö këkanqëkita musyanëkipaqqa, ¿imakunatataq rikänëki, y imanir? (2 Corintius 13:5).

¹⁴ Bautizakurirqa, imanö kawëkanqëkita y imakunata mas rurëkanqëkikunamanmi pensanëki (leyi 2 Corintius 13:5). Këllaman pensarishun: ¿llapan junaqkunaku Diosman mañakunki, Bibliata leyinki y estudianki? ¿Mana faltëpaku reunionkunaman ëwanki y seguïduku yachatsikoq yarqunki? Tsëkunata mas alli provechanëkipaq y kushishqa ruranëkipaqmi kallpachakunëki. Kënömi pensanëki: “¿Biblia yachatsikunqankunata jukkunata entienditsita puëdïku? ¿Kushishqaku Diospita yachatsikü? Diosman mañakurqa, ¿cläruku ima munanqätapis willä y pëman confiaküku? ¿Mana faltëpaku reunionkunaman ëwä? ¿Imatataq ruräman yachatsikäyämunqanta mas alli wiyakunäpaq y parlakunäpaq?”.

15, 16. ¿Imatataq yachakuntsik Robert-ta pasanqampita?

¹⁵ Tsënöllam imakunachö tsarakuyta mana puëdinqantsikta cuentata qokunantsik. Tsëta ruranantsik precisanqanta musyanapaq Robert jutiyoq wawqita pasanqampaq parlarishun. Pëqa 20 watayoq kanqan witsanqa juk ishkë junaqkunallam semänachö trabajaq. Peru juk junaqmi trabajayanqan warmi invitarqan wayinta ëwayänampaq y ishkankuna juk rätu kushishqa kariyänampaq. Robertqa manam jinan höratsu imanir ëwëta mana munanqanta nirqan, tsëpa rantinqa juk cösaskunallatam parlaparqan. Peru tsëpitaqa imanir ëwëta mana munanqantam cläru nirqan. Robertqa manam tsë tentacionman ishkirqantsu, y tsëqa allim karqan. Peru tsëpitaqa cuentatam qokurqan imanir ëwëta mana munanqanta jinan höra mana nishqa kanqanta. Kënömi nin: “Noqaqa manam puëdirqätsu Potifarpa warminta Josë ninqannö jinan höra  ‘manam’ nïta (Gen. 39:7-9). Y manam pensarqätsu ‘manam’ ninanqa noqapaq alläpa sasa o aja kanampaq kaqta. Peru tsë pasamanqanwanmi cuentata qokü Jehoväpita maslla yachakunä pishinqanta”.

¹⁶ Kananqa pensarishun tentacionkunapa pasanqëki höra “manam” nishqa kanqëkiman. Tsënö nishqa karpis, Robertnömi pensanëki tentacion höra imanö kanqëkiman. Kënö tapukuy: “¿Noqapaqqa alläpa sasaku o ajaku karqan jinan höra ‘manam’ ninä?”. Jinan höra “manam” nïta mana puëdishqa karqa, ama qelanäkuritsu. Tsëpa rantinqa, tsarakuyta mana puëdinqëkita cuentata qokunqëkipita kushikuy. Tsë asuntuta Jehoväta willë y Jehoväpita maslla yachakuy yapëchö tentacionkunapa pasarnin jinan höra “manam” ninëkipaq (Sal. 139:23, 24).

17. Robert-ta pasanqannöpis, ¿imanötan Jehoväpa jutinta respetanqantsikta o mana respetanqantsikta rikätsikushwan?

¹⁷ Peru Robert-ta pasanqanqa manam tsëllachötsu usharin. Robertmi kënö nin: “Invitamaptin ‘manam’ niriptïmi, pëqa kënö nirqan: ‘Kananqa rasumpa kaqtam musyarï’. Tsënam tapurqä imanir tsënö ninqanta. Y pënam Testïgu kashqa jövinpaq kënö nimarqan: ‘Tsë jövinmi nimarqan Testïgu jövinkunaqa, pipis mana rikaptinqa mana allikunata rurayanqanta, y imatapis munayanqankunata munatsiyaptinqa jutsa kaptimpis jinan höra rurariyanqanta’. Tsëshi tsë jövinta ninaq noqata pruëbaman churamänampaq. ¡Jehoväpa jutinta mana allichö mana quedatsinqäpitaqa alläpam kushikü!”.

18. Bautizakurirqa, ¿imata ruranëkipaqtan decidïdu këkanki? (Rikäri “ Kë ishkankunam yanapashunki” neq recuadruta).

¹⁸ Jehovällatana sirwinëkipaq änikur y bautizakurqa, imëkapa pasarpis Jehoväpa jutinta respetatsita munanqëkitam rikätsikunki. Y Jehoväqa ima problëmapa pasanqëkita o tentacionkunapa pasanqëkitapis rikëkämunmi. Musyanmi imëkapa pasarpis pëllata sirwinqëkita, y bendicishunkim. Y këpitam següru kanëki: Jehoväqa alli kaqta ruranëkipaqmi santu espïritunwan yanapashunki (Lüc. 11:11-13). Jehovä yanapashuptikiqa, bautizakuskirpis mana dejëpam Jesuspa qateqnin kanki.