USHANAN junaqkunachö juk alli cosëchata qateqninkuna ëlluyänampaq kaqtam Jesusqa willakurqan (Mat. 9:37; 24:14). Tsënö niqanqa Ucrania nacionpa Transcarpatia markanchömi alläpa shumaq cumplikëkan. Cercallachö këkaq kima taksha markakunachömi 50 congregacionkuna kan y 5.400 masmi publicadorkunaqa kayan. * Awmi, tsë kiman markakunachöqa cada chusku nunakunapitam, juk Jehoväpa testïgunkuna kayan.

¿Imanötaq tsë ëwëchö nunakuna kayan? Vasile jutiyoq wawqim kënö nin: “Këchö nunakunaqa Bibliata respetayanmi, alli kaq rurëtam precisaqpa churayan, familiakunapis juknölla y imachöpis unïdum kayan”. Jina, “llapan yachatsikunqantsikwan mana acuerdu karpis, Bibliata leyirapushqaqa shumaqmi wiyakuyan” ninmi.

Atska publicador kayaptinmi wakin congregacionkunachönötsu yachatsikuyänampaq atska kan. Juk congregacionchömi 134 publicadorkuna kayan y yachatsikuyänampaqqa 50 wayikunallam kan. ¿Imatataq tsënö cäsuchöqa rurayan?

Atska wawqikunam mas yachatsikoqkunata necesitäyanqan sitiukunaman yanapakoq ëwayan. 90 watayoqna Ionash jutiyoq wawqin këta nin: “Congregacionnï yachatsikunan markakunachöqa, cada publicador yachatsikunampaqmi ishkë wayikunalla kan. Kananqa päranqä sitiukunallachönam yachatsikur purï, peru manaraq alläpa qeshyapäkurninqa, 160 kilömetruchö këkaq karu sitiukunatam hungaru idiömachö yachatsikoq ëwaq kä”. Tsë sitiukunaman publicadorkuna yachatsikoq ëwayänampaqqa manam fäciltsu. Jina Ionash wawqiqa këtam nin: “Trenwan ëwanä kaptinmi cuatru de la mañänalla shärikoq kä. Y nïkurmi tren kutimunqanyaq, hasta las seis de la tardiyaq yachatsikoq kä, y tsënöqa semänachö ishkë o kima kutim ruraq kä”. ¿Allipaqtsuraq kashqa tsë wawqi tsënö ruranqan? Kikinmi kënö nin: “Tsënö yachatsikur purinqäqa alläpam kushitsimaq. Y karu markachö täraq juk familiatam Bibliapita yachatsir yanaparqä”.

Cläru, manam tsë congregacionkunachö llapan publicadorkunatsu karuta yachatsikoq viajëta puëdiyan. Peru tsënö kaptimpis llapankunam hasta mayorkunapismi, täräyanqa ëwëkunachö llapan nunakunata yachatsita procurayan. Tsënöpam tsë kiman markakunachö täraq nunakunapita pullan 2017 wata Jesus Wanunqanta Yarpëman ëwayarqan. Awmi, mëchö tsëchö këkarpis, ‘Señorpa rurëninchö atska rurëyoqmi’ këkantsik (1 Cor. 15:58).