1. ¿Imanirtaq wakin cristiänukunapaqqa fäciltsu Bibliapita yachakï?

KANAN witsanqa familiantsikkunata manteninapaqqa manam fäciltsu qellëta tarinan. Y mëtsikaq cristiänu mayintsikkunam familiankunata manteniyänampaq alläpa trabajayan. Wakinnam trabäjunkunaman ëwayänampaqqa, atska hörakuna viajayan. Tsëmi wakinkunaqa alläpa trabajarnin Bibliapita yachakuyänampaq gänasninkuna kannatsu.

2. ¿Imë höra yachakunëkipaqtaq qamqa tiempïkita rakinki?

² Bibliata y publicacionkunata alli yachakunapaqqa tiempuntsiktam rakinantsik. Porqui Jehoväwan amïgu kanapaq y mana wanushpa kawakïta chaskinapaqqa tsëtam ruranantsik (1 Tim. 4:15, 16). Wakin wawqikuna y panikunaqa tempränullam yachakuyänampaq shärikuyan. Porqui tsë hörakunam mas tranquïlu sientikuyan yachakuyänampaq. Wakinnam junaq ushë yachakuyan, porqui pëkunapaqqa tsë höram mas alli yachakuyanqanman pensayänampaq.

3, 4. ¿Ima cambiukunatataq publicacionkunachö rurayämushqa y imanir?

³ Rikanqantsiknömi, yachakunapaqqa llapantsikpis tiempuntsikta rakinantsik. Peru itsa pensantsik leyinapaqqa mëtsika publicacionkuna kanqanta y llapanta leyinapaqqa tiempuntsik mana kanampaq kaqta. Peru wakinkunaqa puëdiyashqam llapanta leyita. Jehoväpa Testïgunkunata Pushaqkunaqa musyayanmi, llapan publicacionkunata leyi wakimpaq fäcil mana kanqanta. Tsëmi papelchö yarqamoq publicacionkunata y Internetchö yachatsikïkunata mas wallkallatana jorqayämunampaq decidiyashqa.

⁴ Kananqa mananam jorqayämunnatsu Anuario de los testigos de Jehová nishqan libruta. Peru tsë libruchö yarqamoq experienciakunaqa Internetchö këkaq jw.org^® päginantsikchö  y cada killa yarqamoq JW Broadcasting^® nishqan canalchömi yarqamun. Jina nunakunata yachatsinapaq Täpakoq y ¡Despertad! revistakunaqa, watachö kimallanam yarqamun. Kë cambiukunataqa manam juk rurënintsikkunapaq tiempuntsik mas kanampaqtsu rurayämushqa, sinöqa “mas precisaq” rurënintsikkunapita segurakunapaqmi (Filip. 1:10). Tsëmi kananqa yachakushun tsë mas precisaq rurënintsikkuna ima kanqanta y Bibliata leyirnin imanö mas alli provechanapaq kaqta.

5, 6. ¿Ima mastataq yachakunantsik?

⁵ Cada junaqmi Diospa palabranta leyinapaq tiempuntsikta rakinantsik, porqui tsëmi mas precisaq rurënintsikqa. Kananqa cada semäna congregacionchö Bibliapita leyinapaqqa mas wallkallanam. Tsënöpa leyinqantsikkunaman mas pensanapaq y mas yachatsikïkunata ashinapaq. Jina manam reunionchö yachakunapaq kaptinllatsu Bibliata leyinantsik, sinöqa shonquntsikman chänampaq y Dioswan mas amïgu kanapaqmi (Sal. 19:14).

⁶ ¿Ima mastataq yachakunantsik? Yachakunapaq kaq Täpakoq revistata, congregacionchö estudiëkanqantsik libruta y Cristiänunö Kawakunapaq y Yachatsikunapaq reunionchö yarqamoq progrämatam. Jinamampis cada yarqamoq Täpakoq revistata y quechuachö ¡Despertad! kaptinqa leyinantsikmi.

7. Internetchö y JW Broadcasting nishqan canalchö yarqamoq llapan yachatsikïkunata leyita y rikëta mana puëdirninqa, ¿llakikushuntsuraq? Willakaramï.

⁷ Itsa pipis kënö tapukunman: “¿Internetchö y JW Broadcasting nishqan canalchö yarqamoq llapan yachatsikïkunawanqa imatataq rurashaq?”. Këman pensarishun. Tukï cläsi frütayoq chakrachö këkarninqa manam llapan frütatatsu mikïta puëdishun, sinöqa wakinllatam mikunapaq akrashun. Tsënöllam Internetchö llapan yarqamoq yachatsikïkunata rikëta y leyita puëdinkitsu. Peru puëdinqantsikkunataqa leyishun y rikäshun. Kananqa rikärishun, yachakï ima kanqanta y yachakunqantsikkunata imanö mas provechanapaq kaqta.

8. (1) ¿Imanötaq Täpakoq revistantsikta preparakunantsik? (2) ¿Tsëta ruranqantsikqa imanötaq yanapamantsik?

⁸ Yachakïqa manam janan janan leyillatsu ni tapukïkunapa respuestankunata markëllatsu. Sinöqa imatapis leyirninqa yachakïta munarninmi shumaq leyinantsik. Rikärishun yachakï imanö kanqanta Täpakoq revistantsikta preparakurnin. Puntataqa, këpitam yachakushun neqtam leyinantsik. Tsëqa yachatsikïpa qallananchömi këkaq. Tsëpitaqa leyinantsik tïtulunta, subtïtulunta y yachakunqantsikta yarpänapaq neq tapukïkunatam. Tsëpitana llapan yachatsikïta despaciu leyishun y cada pärrafu imapita yachatsikunqanta alleq rikäshun, tsëqa pärrafukunapa qallanankunachömi këkan. Jina leyinqantsik hörapis rikänantsikmi, yachatsikïpa tïtulunwan y subtïtulukunawan cada pärrafukuna imanö igualanqanta. Jina mana entiendinqantsik palabrakunata y mëqanta mas yachakïta munanqantsiktam escribinantsik.

9. (1) Täpakoq revistantsikta yachakurninqa, ¿imanirtaq llapan textukunata leyinantsik? (2) Josuë 1:8 ninqannö, ¿imatataq masqa ruranantsik textukunata leyirirqa?

⁹ Congregacionchö Täpakoq revistata yachakunqantsikmi Bibliata mas entiendinapaq yanapamäshun. Tsëmi tsë revistachö  këkaq llapan textukunata alleq entiendita procuranantsik, masqa leyinapaq neq textukunatam. Jina textukunapa mëqan palabrakuna, pärrafukunachö imata alli cläru entienditsikunqantam rikänantsik. Jinamampis tsë leyinqantsik textukunamanmi alleq pensanantsik y kawënintsikchömi yachakunqantsikmannö kawëta procuranantsik (leyi Josuë 1:8 *).

10. Hebrëus 5:14 textu ninqannö, ¿imanirtaq teytakunaqa wamrankunata yachatsiyänan Bibliapita mas entiendiyänampaq y publicacionkunachö mas yachatsikïkunata ashiyänampaq?

¹⁰ Kananqa Familiachö Diosta Adoranantsik Hörachö imata ruranapaq kaqta rikärishun. Cada semäna yachakuyanqanchö wamrankuna shumaq gustu kayänantam teytakunaqa munayan. Tsëmi cada semäna yachakuyänampaq kaqtaqa listullatana katsiyänan. Peru manam cada semänatsu JW Broadcasting nishqan canalta rikäyänan, actuacionkunata o demostracionkunata rurayänan. O Noëpa arcanta o jukkunata rurayänan. Tsëkunata rurëtaqa puëdiyanmi, peru masqa wamrankunatam yachatsiyänan Diospa Palabranta alli estudiëta. Jina wamrakunaqa yachakuyänanmi reunionkunapaq preparakïta o escuëlachö tapuyanqankunapita o ima pasakunqampita publicacionkunachö ashita (leyi Hebrëus 5:14). Teyta kaqkuna wamrankunata tsënö yachatsirninqa reunionkunachö y asamblëakunachöpis mas atentu wiyakuyänampaqmi yanapayanqa. Porqui manam llapan yachatsikïkunachötsu videukunata churayan. Ëka höra yachakuyänëkipaq kaqtaqa wamrëkikuna ëka watayoq y imanö kayanqampitam patsätsiyänëki.

11. ¿Imanirtaq noqantsikwan Bibliapita yachakïkaqkunata alleq estudiayänampaq yachatsinantsik?

¹¹ Jina noqantsikwan yachakïkaqkunapis, Bibliapita imanö yachakïtam musyayänan. Qallananllachöqa allim reunionkunapaq y yachakïkanqantsik libruchö këkaq tapukïkunapa respuestankunata marcayänampaq yachatsinantsik. Peru yachatsinantsikmi publicacionkunachö yachatsikïkunata kikinkuna imanö ashiyänampaq kaqta. Tsëmi yanapanqan ima problëmapa pasarpis wawqikunata o panikunata raslla manaraq tapur, publicacionkunachö yanapakïkunata kikinkuna ashiyänampaq.

12. ¿Imanirtaq yachakïta munantsik?

¹² Estudië mana gustashuptikiqa ama pensëtsu imëpis mana gustashunëkipaq kaqta. Wallka wallkallam yachakur qallëta puëdinki, tsëpitanam mas tiempupa yachakïta qallanki. Jinamampis imarëkur estudiëta munanqëkiman pensanëki. Dioswan mas amïgu kanapaqmi masqa yachakuntsik, peru nunakuna tapumanqantsikkunapa respuestanta tarinapaq o ima problëmapa pasëkarnimpis alli tsarakunapaqmi yachakuntsik.

13. (1) Escuëlachö estudiaq mayinkuna tapupäyaptin creinqankunapita parlakurinampaqqa, ¿imatataq juk jövin ruranman? (2) Creinqëkipita parlakunëkipaqqa, ¿imanötaq Colosensis 4:6 textu yanapashunki?

¹³ Jövin itsa escuëlachöqa llapan estudiaq mayikikuna, evolucionman o imëkapis kikinlla rurakashqa kanqan yachatsikïman creiyan. ¿Qamtaqa itsa gustashunkiman Biblia yachatsikunqampita parlakurita? Peru listutsu sientikunki imanö parlakunëkipaq kaqta. Tsëmi tsëpaq parlaq yachatsikïkunata publicacionkunachö ashinëki. Y tsëta ruranqëkim yanapashunki, llapantapis Jehovä kamashqa kanqanman mas confiakunëkipaq y creinqëkikunata mas alli entienditsikunëkipaq (Rom. 1:20; 1 Pëd. 3:15). Peru puntataqa tapukunëki estudiaq mayikikuna evolucionman imanir creiyanqanta, y tsëpitanam publicacionnintsikkuna ima ninqanta alli ashinëki. Tsëta rurarqa, creinqëkikunapita parlakuri difïcil mana kanqantam cuentata qokurinki. Jina evolucionmanqa wakinkuna creiyan respetayanqan nunakuna niyashqa kaptinllam. Tsëmi tapuyäshunqëkikunapa respuestanta taririrqa, rasumpa yachakïta munaqkunata shumaq contestëta puëdinki (leyi Colosensis 4:6).

14-16. (1) ¿Imataq yanapamäshun Bibliachö këkaq librukunata mas reqinapaq? (2) Amos libruta maslla entiendinapaqqa, ¿imataq yanapamäshun? (Rikäri “ Biblia parlanqan nunakunapita mas yachakushun” nishqan recuadruta).

¹⁴ Këllaman pensarishun. Itsa juk kaq semäna reunionchö Osëaspita hasta Malaquïasyaq, juk librupita yachakushwan. Y itsa tsë libru ima ninqanta alleqllaqa musyantsiktsu. Tsëqa tsë libru ima ninqantam maslla musyëta procuranantsik. ¿Imanötaq tsëta lograshwan? Rikärishun.

¹⁵ Puntataqa tsë libruta escribeq profëtapita imata musyanqantsiktam tapukunantsik: pï kanqanta, mëpita kanqanta y imata ruranqanta. Tsëmi yanapamäshun imanir ima palabrakunata y ima ejemplukunata utilizanqanta musyanapaq. Tsëmi tsë libruta leyinqantsik höra, escribeq nuna imanö kanqanta musyanapaqqa imanö parlanqanta rikäshun.

¹⁶ Tsëpitanam yachakïkanqantsik libru imë escribikanqanta ashinantsik. Tsëpaqqa yanapamäshun Traducción del Nuevo Mundo de las Santas Escrituras (con referencias) nishqan Bibliapa qallananchö këkaq, “Tabla de los libros de la Biblia” nishqan recuadrum. Jinamampis, Diospa Palabrampita yachakunapaq yanapakïkuna nishqan follëtupa 3 kaq yachatsikïninchö këkaq, Judäpa y Israelpa reyninkuna y profëtankuna nishqampitam yachakïta puëdintsik. Amospita Malaquïasyaq juk libruta estudiarninqa tsë tiempuchö nunakuna imanö kawashqa kayanqantam musyanantsik. Jina ima mana alli rurëkunata tsë profëta corregita munanqanta y pë kawanqan witsan pikuna kawayanqanta musyashun. Jinamampis masta musyanapaqqa Bibliachö këkaq wakin librukunatam  leyinantsik. Tsëmi profëta Amospa tiempunchö ima pasakunqanta alli musyanapaqqa, 2 Rëyes y 2 Crönicas librukunachö këkaq textukunata leyinantsik. Jina Osëas libruta leyinqantsikpis yanapamäshunmi, porqui Osëasqa itsa Amos kawanqan tiempuchö kawarqan. Tsëkunam yanapamäshun Amospa tiempunchö nunakuna imanö kawakuyanqanta musyanapaq (2 Rey. 14:25-28; 2 Crön. 26:1-15; Os. 1:1-11; Amos 1:1).

17, 18. Maslla entiendinapaqqa, ¿imanötaq Bibliata leyinantsik? Ejemplukunawan willakaramï.

¹⁷ Mas yachakïta munarninmi Bibliataqa leyinantsik. Por ejemplu Zacarïas librupa 12 kaq capïtulunchö leyikashwan Mesïas wanunampaq kaq profecïata (Zac. 12:10). Y 12 kaq textuman chärirna, Natanpa familian Mesïaspaq alläpa waqayänampaq kaqta leyirishwan. Peru raslla leyir pasarinantsikpa rantinmi kënö tapukunantsik: “¿Imanirtaq Natanpa familianqa Mesïaspaq waqarqan? ¿Mëchötaq tsëpaq mas willakïta tarïman?”. Tsëpitanam mas yachakur qallanantsik. Y tsëta maslla entienditsikoq textuqa 2 Samuel 5:14 textum, tsëchömi nin, Natanqa Davidpa tsurin kanqanta. Y juk kaq textunam Lücas 3:31 textu, tsëchöqa nimantsik Jesuspa maman Marïaqa Natanpa kastampita kanqanta (Rikäri 2017 wata agostu killa Täpakoq revistapa 32 kaq päginanchö 4 kaq pärrafunta). ¡Tsëta musyëqa alläpa shumaqmi! Porqui Bibliachöqa leyishqanam karqantsik Jesusqa Davidpa kastampita yurinampaq kaqta (Mat. 22:42). Peru manam musyarqantsiktsu mëqan wamrampita kanampaq kaqtaqa, porqui Davidpa tsurinkunaqa 20 masmi kayarqan. Tsëkunata  musyanqantsikmi yanapamantsik, Natanpa familiankuna Jesuspaq waqayänampaq kaqta Zacarïas imanir ninqanta entiendinapaq.

¹⁸ Jina Lücas librupa punta kaq capïtulunchö angel Gabriel Marïata watukanqanchö imata ninqanman pensarishun. Angelqa kënömi nirqan: “Pëqa precisaqmi kanqa, y Llapampa Janampa Këkaqpa Tsurin nirmi reqishqa kanqa, y Jehovä Diosmi, teytan Davidpa gobernar täkunanta pëta qonqa, y Jacobpa mirëninkunatam Reynö imëyaqpis gobernanqa” (Lüc. 1:32, 33). Itsa tsëta leyirirqa “llapampa janampa këkaqpa tsurin” angel ninqanllaman masqa pensashwan. Peru angel Gabrielqa Jesus rey kanampaq kaqtapis nirqanmi. Tsëqa kënömi tapukunantsik: ¿Imataraq Marïaqa pensarqan Jesus rey kanampaq kaqta angel niriptin? ¿Herödispa rantin gobernanampaq kaqta o juk mandakoqpa rantin Israelchö mandakunampaq kaqtatsuraq pensarqan? ¿O mandakoqpa mamänin karnin mas respetashqa kanampaq kaqta y familiankuna gobernaqkunapa wayinchö kawayänampaq kaqtaku pensarqan? Bibliachöqa manam tarintsiktsu angelta Marïa tsënö tapunqantaqa, ni Jesuspa discïpulunkunanö Diospa Gobiernunchö juk carguta chaskinampaq mañakunqantapis (Mat. 20:20-23). Tsëmi rikätsimantsik Marïaqa alläpa humildi warmi kanqanta.

19, 20. Santiägu 1:22-25 y 4:8 textu ninqannö, ¿imarëkurtaq Bibliapita yachakushwan?

¹⁹ Jina Bibliapita y publicacionkunapitaqa yachakïta munantsik Dioswan mas amïgu këta munarmi. Jinamampis imanö nuna kanqantsikta cuentata qokunapaq y cambiukunata rurëta munarninmi Bibliapita yachakuntsik (leyi Santiägu 1:22-25; 4:8). Tsëmi Bibliapita cada yachakurqa, Jehoväta mañakunantsik santu espïritunwan yanapamänapaq. Jinamampis, yachakunqantsikkunata mas provechanapaq y pë munanqannö kawënintsikchö cambiukunata ruranapaqmi mañakunantsik.

²⁰ Salmus 1:2, 3 textum kënö nin: “Pëtaqa Jehoväpa leyninta leyïmi alläpa gustan, y paqasta junaqtam leyinqanman pensan [...]. Y llapan ruranqanmi allilla yarqunqa”. Llapantsikpis kë salmuta escribeq nunanömi këtam munantsik.