Ushakë junaqchö ishkan gobiernukuna chikinakuyan
Ushakë junaqchö ishkan gobiernukuna chikinakuyan Këchö wakin willakuykunaqa rikätsikun kaq tiempullachö pasakunqantam. Kë llapanqa rikätsikun ushakë tiempuchöna kawanqantsiktam (Dan. 12:4).
Biblia: Rev. 11:7; 12:13, 17; 13:1-8, 12.
Willakuy: Nunakunaqa “mantsanëpaq chukaru animal” munanqannömi kawayashqa. Ushanan junaqchömi qanchis kaq peqanta ishkitsiyan, y kachakäriptinnam ‘entëru patsachö’ nunakuna qatiyan. Tsënömi Diabluqa ‘warmipa quedaq kaq mirënimpa contran guërrata ruranqa’.
Cumplikan: Apäkï tamya pasashqanchöran, Jehoväta chikeq gobiernukunaqa yuriyarqan. Mëtsika watakuna pasarishqanchönam, Punta kaq Jatun Guërrachö Gran Bretäñawan Estädus Unïdus nacionkuna yanapanakuyarqan. Diabluqa, kë ushakë tiempuchöqa tukuynöpam Diospa sirweqninkunata qatikachashqa.
Biblia: Dan. 11:25-45.
Willakuy: Mas puëdeq këtam uma läduchö gobiernuwan ura läduchö gobiernuqa ashiyanqa.
Cumplikan: Alemaniaqa guërrata rurarqan Gran Bretäña y Estädus Unïduswanmi. 1945 watam Union Soviëticawan yanapaqnin gobiernukunaqa uma läduchö gobiernu karqan. Y 1991 watanam Union Soviëticaqa ushakarqan, tsëpitanam Rusiawan yanapaqnin gobiernukunaqa uma läduchö gobiernu tikrarqan.
Biblia: Is. 61:1; Mal. 3:1; Lüc. 4:18.
Willakuy: Diospa Gobiernun manaraq patsakaptinmi, Jehoväqa “willakoqninta” mandarqan. Tsë willakoqqa alli shonquyoq nunakunatam Diospita yachatsinan karqan.
Cumplikan: 1870 watapitam, Charles Russellwan yanapaqnin wawqikunaqa, Biblia yachatsikunqankunata yachakur qallayan. 1880 wata witsanmi, yachakuyarqan Diospita yachatsikuyänampaq. Y “1.000 mas yachatsikoqkunata mañakuyan” y “Yachatsikuyänanmpaq akrashqakuna” neq yachatsikuykunatam rurayaq.
Biblia: Mat. 13:24-30, 36-43.
Willakuy: Juk nuna trïgu murukunqan chakraman, chikeqnin nuna ëwëkur trïgu janaman mana alli qorata murun. Mana alli qoraqa trïgutam limpu tsapakurkun. Cosëcha witsannam mana alli qorata dejëkur trïguta ëlluyan.
Cumplikan: 1870 watapitaraqmi Diosta sirweqkunaqa cristiänu tukoqkunapita jukläya kayanqanqa rikakurqan. Ushakë junaqkunaran Teyta Diosqa sirweqninkunata akranan karqan.
Biblia: Dan. 2:31-33, 41-43.
Willakuy: Fiërrupita y kuwashqa mitupita chakiqa, tukuy niraq fiërrupita rurashqa nunapa chakinmi.
Cumplikan: Gran Bretäñawan Estädus Unïdus mandayanqan nunakunatam kuwashqa mituqa rikätsikun. Y tsë chaki fiërrupita kaptinmi, gobiernukunaqa ima rurëtapis puëdiyanqatsu contran churakaq nunakunawan.
Biblia: Mat. 13:30; 24:14, 45; 28:19, 20.
Willakuy: “Trïguta” ëllur “wayïman” churakuyan, y ‘alli juiciuyoq y markäkïpaq sirwipakoqtam’ churayan “wayinchö sirwipakoqkunata” rikänampaq. Diospa ‘Gobiernumpita alli willakïkunaqa entëru patsamanmi’ chänan karqan.
Cumplikan: 1919 watachömi alli juiciuyoq sirwipakoqta churayarqan. Tsë watapitam Bibliapita Yachakoqkunaqa mas yachatsikuyänan karqan. Kanan witsampis Jehoväpa testïgunkunaqa mëtsika nacionkunachömi yachatsikuyan y nunakuna parlayanqanmannö yachatsiyänampaqmi kallpachakuyan.
Biblia: Dan. 12:11; Rev. 13:11, 14, 15.
Willakuy: Ishkë waqrayoq chukaru animalmi “mantsanëpaq chukaru animalpaq juk imäginta rurayäpunampaq” yanapakurqan y kawatsirqan.
Cumplikan: Gran Bretäñawan Estädus Unïdus puëdeq nacionkunam, atska nacionkuna juntakäyänampaq yanapakuyarqan. Tiempuwannam uma läduchö gobiernuqa tsë grüpuwan juntakarqan, tsëqa karqan 1926 a 1933 watayaqllam. Atska nacionkuna juntakäyanqan grüputam nunakunaqa alabayarqan, tsënöllam yamë këta asheq nacionkunatapis (ONU) alabayan.
Biblia: Dan. 8:23, 24.
Willakuy: Juk mantsëpaq chiki mandakoqmi “imëkatapis pasëpa ushakätsinqa”.
Cumplikan: Gran Bretäñawan Estädus Unïdus puëdeq nacionkunaqa imëka mana allikunatam rurayashqa. Tsëtaqa musyantsik, Ishkë kaq Jatun Guërrachö Estädus Unïdus nacion, yanapaqnin nacionkunapa chikeqninkunata ushakätsinqanchömi.
Biblia: Dan. 11:31; Rev. 17:3, 7-11.
Willakuy: “Puka mantsanëpaq” chunka waqrayoq chukaru animalqa uchkupita yarqaramurmi, puëdeq kaq puwaq mandakoq tikrarqan. Tsë mandakoqpaqmi Danielqa “Teyta Dios melanashqan kaqtam templuman churanqa” nir willakurqan.
Cumplikan: Ishkë kaq Jatun Guërrachömi, atska nacionkuna juntakäyanqan grüputaqa pillapis cäsurqantsu. Y guërra ushariptinnam yamë këta asheq nacionkuna (ONU) yuririptin, Diospa rantin alabayarqan. Pëkunam mana alli religionkunata ushakätsiyanqa.
Biblia: 1 Tes. 5:3; Rev. 17:16.
Willakuy: Nacionkunam “yamënam y segürunam kantsik” niyanqa, tsëpitanam ‘chunka waqrayoq mantsanëpaq chukaru animalqa, jukwan jukwan kakoq warmita’ ushakätsinqa. Tsëpitanam kikinkunapis ushakäyanqa.
Cumplikan: Yamënam y segürunam kantsik nikäyaptinmi, yamë këta asheq nacionkuna (ONU) mana alli religionkunata ushakätsiyanqa. Tsënömi llakikuy tiempu qallarinqa. Y tsë llakikuy tiempuqa ushakë junaqchömi ushakanqa.
Biblia: Ezeq. 38:11, 14-17; Mat. 24:31.
Willakuy: Diospa sirweqninkunata Gog ushakätsita munan. Tsëpitanam angelkuna “akrashqankunata” juntayan.
Cumplikan: Uma läduchö gobiernuwan yanapaqnin gobiernukunam, Diospa sirweqninkunata ushakätsita munayanqa. Tsëpita ichik tiempullatam ciëluman ëwaq wawqi panikunaqa ciëluman apashqa kayanqa.
Biblia: Ezeq. 38:18-23; Dan. 2:34, 35, 44, 45; Rev. 6:2; 16:14, 16; 17:14; 19:20.
Willakuy: “Yulaq” cawallu montaraqqa, Gogtawan yanapaqninkunatam “vencir” ushakätsinqa. “Mantsanëpaq chukaru animalmi”, “rawraq nina qochaman” jitashqa kanqa y imëka fiërrupita rurashqa nunam ushakanqa.
Cumplikan: Diospa Gobiernunchö Jesus rey karmi, Jehoväpa sirweqninkunata yanapanqa. Diabluta y llapan yanapaqnin nunakunataqa ushakätsinqa 144.000 akrashqakunawan y angelkunawanmi.