Pani Säram * kënö willakun: “Hörataqa manam ima munanqäta musyätsu y alläpam mantsakö. Tsënö karninmi, feyu geniuyoqkunawan y qayapäkoq nunakunawanqa juntakuyta munätsu. Peru yachanëpaq y humildi nunakunawanqa kushishqam kä. Tsënö nunakunawanqa, mana mantsakushpam imanö këkanqäta y yarpachakuynïkunata parlakuyä”.

Pani Sära ninqannöpis, yachanëpaq karqa alli nunam kashun, tsënö nunakunatam Jehoväqa kuyan. Palabranchömi kënö nimantsik: “Yachanëpaq këta [...] röpatanö vistikuyë” (Col. 3:12). ¿Imatan yachanëpaq këqa? ¿Imanötan Jesusqa yachanëpaq karqan? Tsëqa, ¿imanötan kushishqa kanapaq yanapamantsik?

Yachanëpaq nunakunaqa manam rastsu piñakuyan. Tsënö nunakunaqa, mana allikunapa pasarpis kuyëpa y ankupëllapam nunakunata parlapäyan.

Yachanëpaq nunaqa yamë y kushishqam kawakun. Griëguchö “yachanëpaq” nirqa, chukaru cawalluta manshuyätsiyanqampaqmi parlayaq. Juk manshu cawalluqa manam llutatsu mëpapis ëwan. Tsënöllam noqantsikwampis pasakun, “geniuntsikta” alli tsararqa wakinkunatam shumaq tratashun.

Jutsayoqna yurishqa karnin y raslla piñakoq nunakunawan kawarmi, hörataqa yachanëpaq këqa fäciltsu (Rom. 7:19). Yachanëpaq kanapaqqa alliran kallpachakunantsik, tsënö kanapaqmi Jehovä Diosnintsik yanapamäshun (Gäl. 5:22, 23). Yachanëpaq kanapaqqa, ¿imanirtan kallpachakunantsik?

Wakinkunawan yachanëpaq kashun. Panintsik Sära ninqannöpis, yachanëpaq nunakunawan juntakurninqa kushishqam kantsik (2 Cor. 10:1). Jesusqa yachanëpaq y alli nunam karqan, tsënö kaptinmi wamrakunapis pëmanqa witiyaq (Mar. 10:13-16).

Yachanëpaq karqa llapantsikmi alli kawakushun. Tsënö karninqa, manam rastsu  piñakushun (Prov. 16:32). Tsëmi yanapamäshun piñashqalla mana kakunapaq y kuyanqantsik nunakunata mana llakitsinapaqpis.

Imëka rurëyoq këkarnimpis Jesusqa yachanëpaqmi karqan. Tsë witsan nunakuna llakishqa kayaptinmi, pillapis yanapariyänanta wanayarqan. Tsëchi Jesusqa kënö nirnin pëkunata yanaparqan: “Noqaman shayämï, [...] noqaqa yachanëpaq geniuyoq y qollmi shonqum kä” (Mat. 11:28, 29).

¿Imanötan Jesusnölla yachanëpaq nuna kashwan? Puntataqa, Bibliata leyirmi yachakushun Jesus nunakunata imanö tratanqampita. Tsëpitanam mana allikunapa pasarpis, Jesusnö yachanëpaq kanapaq kallpachakunantsik (1 Pëd. 2:21). ¿Imatan Jesusta yanaparqan yachanëpaq kanampaq?

Jesusqa humildim karqan. Kikinmi nirqan, yachanëpaq geniuyoq y humildi kanqanta (Mat. 11:29). Bibliachömi nin, yachanëpaq geniuyoq karninqa humildi kanantsikpaq kaqta (Efes. 4:1-3). ¿Imanirtan tsëta nintsik?

Humildi karninqa, manam allish tukushuntsu ni rastsu piñakushun. “Mëtsikata mikurpis mana teqñaq y vïnuta upyakur kakoq” niyaptin, ¿ima nirqantan Jesusqa? Tsënö niyaptinmi, “alli kaqta ruranqankunachömi juk nuna yachëyoq kanqanqa rikakun” nirqan (Mat. 11:19).

Pillapis imanö wätashqa y imanö winashqa kanqantsikpita mana allita parlaptinqa, mana piñakushllapam yachëllapa parlapänantsik. Juk nacionpita creikoqkunata rikaq wawqi Pëdrum kënö nin: “Pillapis noqapaq mana allita parlaptinqa, tsëkunachö Jesus imata ruranampaq kaqmanmi pensä”. Y kënöpis ninmi: “Mana allish tukunäpaqmi yachakurqö”.

Nunakuna imanö kayanqantam Jesusqa musyaq. Jesuspa qateqninkuna alli rurëta munarpis, jutsata ruraq karninmi hörataqa mana allita rurayaq. Tsëqa pasakurqan Jesus wanukunan paqas llakikur këkaptin Pëdru, Santiägu y Juan punukarnin mana yanapayanqanchömi. Tsëmi Jesus kënö nirqan: “Nunaqa alli kaqtam rurëta munan, peru jutsasapa ëtsanqa dëbilmi” (Mat. 26:40, 41). Qateqninkuna jutsata ruraq kayanqanta musyarninmi, Jesusqa pëkunawan piñakurqantsu.

Panintsik Marïaqa imatapis alli rurayänantam munaq, peru kananqa Jesusnö yachanëpaq kanampaqmi kallpachakun. Tsëtam kënö willakun: “Llapantsik jutsata ruraq kanqantsikmanmi yarparä, y Jehovä rikanqannö nuna mayïkunata rikänäpaqmi kallpachakü”. Pani Marïaqa Jesusnö nunakunata rikänampaqmi churapakarqan. Noqantsikpis pënölla rurarqa, manam rasllatsu wakinkunawan piñakushun.

Jesusqa Teytan yanapanampaq kaqtam musyaq. Kë Patsachö kanqan witsanqa, wanunqanyaqmi Jesustaqa mana alli tratayarqan. Tsëkunapa pasëkarpis, “alli kaqta rurar juzgaq Kaqpa makinchömi llapanta jaqirirqan” (1 Pëd. 2:23). Jesusqa musyarqanmi Teytan yanapanampaq kaqta y mana alli nunakunata tiempunchö ushakätsinampaq kaqtapis.

Mana alli tratamashqa piñakurninqa, mana allimanmi chashwan. Tsëmi Bibliachöqa kënö nin: “Nunapa piñakoq këninqa, manam Diospa rikëninchö alli kaqta rurëmantsu apakun” (Sant. 1:20). Jutsata ruraq karninmi raslla imatapis rurashwan o nishwan.

Alemania nacionpita pani Cathym pensaq mana respëtatsikuptinqa pillapis mana respetatsinampaq kaqta. Tsënö pensanqanchöqa yanaparqan Jehoväpita yachakurnin pëman markäkunqan o yärakunqanmi. Kënömi willakun: “Jehovä yanapamaptinmi kananqa kikïllamanqa yarparäkünatsu”. Pillapis mana alli tratamashqaqa, Jehovä Diosman Jesusnö markäkunqantsik o yärakunqantsikmi yanapamäshun.

Jesusmi nirqan, yachanëpaq nuna kashqaqa kushishqa kawakunapaq kaqta. Kënömi nirqan: “Kushishqam kayan yachanëpaq geniuyoq kaqkuna” (Mat. 5:5). Yachanëpaq kanqantsik, imachö yanapakunqanta rikärishun.

Casädu vïdachömi yanapakun. Australia nacionpita wawqi Robertum kënö willakun: “Warmïtam tukuyta nirnin llakitsirqä. Mana pensashpa lluta parlanqäpita llakikurpis parlashqanam karqä”.

Parlarninqa “llapantsikmi mëtsika kuti pantantsik”. Llutalla parlashqaqa majantsikwanmi llakitsinakur piñatsinakushwan (Sant. 3:2). Tsënö mana pasakunampaqqa, yachanëpaq kanqantsikmi yanapamäshun raslla mana piñakunapaq y shimintsikta tsaräkunapaq (Prov. 17:27).

Robertuqa raslla mana piñakoq kanampaqmi kallpachakurqan. Ima yanapanqantam kënö willakun: “Kananqa warmïtam shumaq parlapä y nimanqantam wiyä, y raslla mana piñakunäpaqmi kallpachakü. Tsëmi kananqa shumaq kawakuyä”.

Wakinkunawan alli kanapaqmi yanapakun. Raslla piñakushqaqa manam ni pï witipämäshuntsu. Peru yachanëpaq kashqaqa pï mëwampis yamëmi kawakushun (Efes. 4:2, 3). Pani Cathym kënö willakun: “Wakinkuna yachanëpaq mana kayaptimpis, llapankunawan alli y yachanëpaq këmi yanapamashqa”.

Yamë kanapaqmi yanapakun. Bibliachöqa nimantsik “rarapita shamoq yachëqa” yamë kawakunapaq yanapamanqantsiktam (Sant. 3:13, 17). Yachanëpaq nunaqa manam rastsu piñakun (Prov. 14:30). Wawqi Martinqa, yachanëpaq nuna kanampaqmi kallpachakushqa, tsëtam kënö willakun: “Kananqa raslla mana piñakurninmi yamë y kushishqana kawakü”.

Rasumpa kaqchöqa, yachanëpaq kanapaqqa alliran kallpachakunantsik. Tsëtam juk wawqi willakun: “Kanan witsankunapis, hörataqa piñakurmi wanuritapis munä”. Peru Jehoväqa, yachanëpaq nuna kanantsiktam munan (Is. 41:10; 1 Tim. 6:11). Yachanëpaq kanapaqqa Jehovämi yanapamäshun (1 Pëd. 5:10). Tsënam tiempu pasanqanmannö, “Cristupa qollmi shonqu këninta y alläpa alli kënin[pi]ta” Pablunö yachakushun (2 Cor. 10:1).