1, 2. ¿Imarëkurtan Revelacion librupita yachakushwan?

 ¿IMËLLAQA pipa fötunkunatapis rikaparqunkiku? Itsa mana reqinqëkikunata mëtsikaqta rikarqëki. Peru tsënö këkaptiki, juk fötuchö qam këkanqëkita rikärinki. Imë y mëchö tomakuyanqëkiman itsapis yarpar qallëkunki. Jina tsë fötuchö pikuna këkäyanqantapis rikankim. Tsë fötuqa, tsëpin ima pasakunqantam yarpäratsishunki.

² Revelacion libruqa tsë fötu cuentam. Tsënöqa nintsik, puntataqa, tsë libru noqantsikpaq qellqakashqa kaptinmi. Qallanan kaq versïculuchömi kënö nin: “Ichikllachöna pasanampaq kaqkunata sirweqninkunata rikätsinanrëkur Dios musyatsinqanta Jesucristu revelar musyatsikunqan” (Rev. 1:1). Tsëmi tsë libruqa, manam llapan nunakunapaqtsu qellqakarqan, sinöqa noqantsikpaq, Diosta sirweqkunapaq. Tsëmi kanan witsankuna cumplikëkanqampitaqa espantakuntsiktsu.

3, 4. Revelacion libruchö ninqannö, ¿imëtan tsëchö qellqarëkaqkuna cumplikanqa, y tsëta musyanqantsikqa imanötan yanapamashwan?

³ Jina fötu cuenta kanqantaqa nintsik, tsë libruchö qellqarëkaq Dios willatsikunqankuna kanan witsan cumplikänan kaptinmi. Tsë tiempupaq parlarmi, apostol Juanqa kënö nirqan: “Santu espïritupa yanapakïninwanmi Señorpa junaqninchö rikakurirqä” (Rev. 1:10). Apostol Juanqa, Jesus shamunqanchöna 96 watachömi tsëta qellqarqan. Tsë witsampaqqa, ‘Señorpa junaqnin’ chämunampaqqa, mëtsika watakunaran pishirqan (Mat. 25:14, 19; Lüc. 19:12). Peru Bibliachö qellqarëkanqanqa, Rey këman Jesus chäriptin 1914 watachö tsë junaq qallashqa kanqantam rikätsikun. Tsë watapitam,  Revelacion libruchö Diospa sirweqninkunapaq willakuykuna cumplikar qallëkurqan. Tsëmi, ‘Señorpa junaqninchöna’ kawëkantsik.

⁴ Tsë witsanchö kawëkashqam, Revelacion 1:3 textuchö Diosnintsik kuyamarnintsik qellqatsinqanta wiyakunantsik. Tsëchömi kënö nin: “Kushishqam sientikun Diospa kë musyatsikïninchö këkaq palabrakunata sinchipa leyeq kaq y tsëta wiyaq kaqkuna y tsëchö qellqashqa këkaqkunata cäsukoqkuna, porqui dispunishqa tiempuqa këllachönam këkan”. Awmi, ‘tsëchö qellqashqa këkaqkunataqa’ sinchipam leyinantsik, wiyanantsik y cäsukunantsik. ¿Mëqantan tsë wiyakunantsikpaq wakin palabrakunaqa kayan?

5. ¿Imanötan Revelacion libruqa rikätsimantsik adoranqantsikta Jehovä chaskinqanta següru kanapaq?

⁵ Revelacion librupa qallanan capïtulumpitam, congregacionkunachö imakuna pasakuykanqanta Jesus rikätsikun (Rev. 1:12-16, 20; 2:1). Asia Menorchö qanchis congregacionkunaman willatsikunqanmi tsëta rikätsikun. Tsëchömi, adorayanqanta Jehovä chaskinampaq imata rurayänampaq punta kaq cristiänukunata consejarqan. Y tsë consëjukunaqa, Diosta kanan witsan sirweqkunatapis yanapanmi. ¿Imatataq këqa yachatsimantsik? Diosta sirwinqantsikchö imanö këkanqantsikta Dirigimaqnintsik Jesucristu cläru musyanqantam. Pëqa dirigimantsik, cuidamantsik y llapan rurëkanqantsiktam musyëkan. Jehoväpa rikëninchö alli kanantsikpaq imata ruranapaq kaqtam musyan. Qateqnin kaq pärrafukunachömi, pë consejakunqampita wakinta yachakushun y tsëkunata wiyakunapaq imata ruranapaq kaqta rikäshun.

6. (1) Revelacion 2:3 y 4 ninqannö, ¿imatataq Ëfesu markachö cristiänukunaqa rurëkäyarqantsu? (2) ¿Imatataq tsëpita noqantsik yachakuntsik?

⁶ (Leyi Revelacion 2:3, 4). Qallananchönö Jehoväta kuyarnin sïguishun. Ëfesu markachö këkaq cristiänukunaman willatsikunqanqa, alli tsarakuyanqanta y imëkapa pasëkarpis Jehoväta sirwiyanqantam nin. Tsënö kaptimpis, Jehoväta kuyayanqanqa manam qallananchönötsu karqan. Adorayanqanta chaskinanta munarqa, yapëmi Jehoväta mas kuyayänampaq kallpachakuyänan karqan. Kanan witsampis manam tsarakurninllatsu sïguinantsik, sinöqa, imarëkur tsarakunqantsiktam rikänantsik. Jehoväqa, imatapis imanir ruranqantsiktam rikan y manam imata ruranqantsikkunallatatsu. Pëqa imanir imatapis ruranqantsiktam cuentaman churan. Kuyarnin y agradecikurnin adoranantsiktam munan (Prov. 16:2; Mar. 12:29, 30).

7. (1) Revelacion 3:1 a 3 ninqannö, ¿Sardis markachö cristiänukuna imachö mana alli këkäyanqantataq Jesus rikarqan? (2) ¿Imatataq noqantsikqa ruranantsik?

⁷ (Leyi Revelacion 3:1-3). Riyaqlla y mäkoq mäkoqlla kë. Sardis markachö këkaq cristiänukunaqa juk asuntuchömi mana alli këkäyarqan. Pëkunaqa, manam qallananchönötsu Jehoväta sirwikäyarqan. Tsëmi Jesusqa riyakuyänampaq nirqan. Tsë consëjutaqa noqantsikpis wiyakunantsikmi. Awmi, ruranqantsikkunata Jehovä mana qonqanqantaqa musyantsikmi (Heb. 6:10). Tsënö kaptimpis, Diosta unë witsankuna sirwishqana kanqantsikta pensarqa, manam kallpachakuyta dejarishwantsu. Itsa kananqa, “Señorpa rurëninchö” munanqantsiknö yanapakuyta puëdintsiknatsu. Tsënö karpis, imëka mana allikunapa ushënin chämunqanyaqmi, mäkoq mäkoqlla këkänantsik (1 Cor. 15:58; Mat. 24:13; Mar. 13:33).

8. Laodicëa markachö këkaq cristiänukunata Jesus ninqampitaqa, ¿imatataq yachakuntsik? (Revelacion 3:15-17).

 ⁸ (Leyi Revelacion 3:15-17). Jehoväta llapan shonquntsikwan kushishqa adorashun. Laodicëa markachö cristiänukunaman willatsikunqanchöqa, juk asuntuchö mana alli këkäyanqantam rikätsikurqan. Jehoväta adorayanqanchöqa, manam “ni alalaq ni achachaq” kayarqantsu, juk parlakuychöqa, qelanëkarllam Jehoväta adorëkäyarqan. Tsëmi Jesusqa, ankupëpaq o llakipëpaq këkäyanqanta nirqan. Tsëmi Jehoväta gänas gänaslla sirwiyänampaq y adorayänampaq yapë kallpachakuyänan karqan (Rev. 3:19). ¿Imatataq këpita yachakuntsik? Jehoväta unënö kushishqa manana sirwirqa, Diospita yachatsikunqantsikkunata mas kuyanapaqmi kallpachakunantsik (Rev. 3:18). Mas alli kawakuyta munarqa, ama Jehoväta sirwinqantsikta juk läduman churarishuntsu.

9. Pergamu y Tiatïra markakunachö këkaq cristiänukunata Jesus ninqanta cuentaman churëkur, ¿imapitataq cuidakunantsik?

⁹ Diospa contran këkaqkuna yachatsikuyanqantaqa ama wiyashuntsu. Rakikar kayaptin y llutankunata yachatsikuyaptinmi, Pergamu markachö këkaq cristiänukunata Jesus cläru consejarqan (Rev. 2:14-16). Peru Tiatïra markachö këkaq cristiänukunataqa, ‘Satanaspa pakaraq yachatsikïninkunata’ mana wiyashqa kayanqampitam felicitarqan y Diospita mas yachakurnin sïguiyänampaqmi nirqan (Rev. 2:24-26). Diospita yachakuyanqanchö alli patsakashqa mana këkaq cristiänukunam, mana alli yachatsikuykunaman creir qallëkuyarqan, tsëmi arrepentikuyänan karqan. Tsënöllam noqantsikpis, Diospa contran këkaq yachatsikuykunata ni wiyashwanllapistsu. Itsa Diospa contran tikrashqakunaqa, ‘llapan shonqunkunawan Diosta sirweq tukuyanman’, peru ‘rurëninkunachöqa tsëta manam rikätsikuyantsu’ (2 Tim. 3:5). Diospa Palabranta alli estudianapaq kallpachakushqaqa, mas fäcilmi musyashun mana alli yachatsikuykuna imakuna kayanqanta (2 Tim. 3:14-17; Jüd. 3, 4).

10. Pergamuchö y Tiatïrachö këkaq cristiänukunata Jesus consejanqampitaqa, ¿ima mastataq yachakuntsik?

¹⁰ Ama rakcha o qanra rurëkunata rurashuntsu ni wakinkuna rurayaptin upälla kakushuntsu. Jina Pergamuchö y Tiatïrachö këkaq cristiänukunaqa, manam rakcha o qanra ruraqkunata imatapis niyaqtsu, tsëmi  Jesusqa pëkunata consejarqan (Rev. 2:14, 20). Këmi rikätsimantsik, Jehoväta mëtsika watapana sirwikashqa o atska cargukunayoq kashqapis, rakcha rurëkunaman ishkishqaqa, Jehovä mana wiyaräkunampaq kaqta (1 Sam. 15:22; 1 Pëd. 2:16). Kë munduchö mana alli rurëkunata alli rurëkunatanö rikäyaptimpis, Jehoväqa mandakunqankunata respetanatam shuyaran (Efes. 6:11-13).

11. ¿Imatataq këyaq yachakurquntsik? (“ Yachakunapaq kaqkuna” neqtapis rikäri).

¹¹ ¿Imatataq këyaq yachakurquntsik? Adoranqantsikta Jehovä chaskikanqantam segurakunantsik. Imatapis mana alli kaqta rurëkashqaqa, jinan höra tsë rurëta dejashun (Rev. 2:5, 16; 3:3, 16). ¿Ima mastataq willatsinqan congregacionkunata Jesus consejarqan? Rikärishun.

12. ¿Imatataq yachakuntsik Esmirnachö y Filadelfiachö këkaq cristiänukunata Jesus willatsinqampita? (Revelacion 2:10).

¹² Esmirna y Filadelfia markachö këkaq cristiänukunata imata willatsinqanta rikärishun. Jesusqa, chikeqninkuna sufritsiyänanta mana mantsayänampaq y alli tsarakuyanqampita Jehovä bendicinampaq kaqtam nirqan (leyi Revelacion 2:10; 3:10). ¿Imatataq tsënö willatsinqampita yachakuntsik? Chikir sufritsimänataqa shuyaränantsikmi y tsëchö alli tsarakunapaqmi listu këkänantsik (Mat. 24:9, 13; 2 Cor. 12:10). ¿Imanirtan tsëtaqa cläru katsinantsik?

13, 14. Revelacion librupa 12 kaq capïtulunchö willakunqanqa, ¿imanirtan Diosta Patsachö sirweqkunapaqqa mana alli kashqa?

¹³ Diospa sirweqninkunata “Señorpa junaqninchö” chikir sufritsiyänampaq kaqtam Revelacion libruchö nin, juk parlakuychöqa, kanan witsankuna. 12 kaq capïtuluchöqa, Diospa Gobiernun gobernar qallëkuptin ‘ciëluchö guërra qallëkunqantam’ nin. Miguelmi, juk parlakuychöqa, Rey këman chashqa Jesuswan angelninkunam, Satanaspa y demoniunkunapa contran pelyayarqan (Rev. 12:7, 8). Diospa tsë chikeqninkunatam venciyarqan y Patsaman jitarkayämurqan, tsëchömi nunakunata sufrikätsiyan (Rev. 12:9, 12). Peru tsëkuna pasakunqanqa, ¿imanötan Diosta Patsachö sirweqkunapaqqa mana alli kashqa?

¹⁴ Qateqnin kaq versïculukunachömi, Satanas imata ruranqanta rikätsikun. Ciëluman kutita mana puëdirmi, ciëlupaq akrashqakunapa contran imëkata rurëkan. Pëkunam Diospa Gobiernumpita yachatsikuyan, y “Jesuspita musyatsikuyänampaqmi carguta chaskiyashqa” (Rev. 12:17; 2 Cor. 5:20; Efes. 6:19, 20). ¿Imanötan Dios tsëta willatsikunqanqa cumplikashqa?

15. Revelacion librupa 11 kaq capïtulun ninqanchöqa, ¿pikunatan ‘ishkan testïgukuna’ kayan y imataq pëkunata pasarqan?

 ¹⁵ Diospa Gobiernumpita yachatsikunqantsikta ciëlupaq akrashqa dirigeq wawqikunata sufritsiyänampaqmi, chikeqninkunata Satanas inkitarqan. Y pëkunachömi jatun cargukunayoq wawqikunapis këkäyarqan. Pëkunaqa, Revelacion libruchö ninqannöpis, wanutsiyanqan ‘ishkan testïgükunam’ * kayan (Rev. 11:3, 7-11). 1918 watachömi, puwaq wawqikunata mana kaqpita acusayarqan, y mëtsika watakuna carcelchö kayänampaqmi condenayarqan. Nunakunapa rikënimpaqqa, yachatsikur puriyanqanqa ushakärirqanmi.

16. ¿Ima mana pensayanqantan 1919 watachö pasakurqan, peru imatataq Satanasqa tsëpita patsë rurëkashqa?

¹⁶ Revelacion librupa 11 kaq capïtulunchöqa, tsë ‘ishkan testïgukuna’ ichik tiempullachö kawariyänampaq kaqtapis ninmi. Këqa, carcelayanqampita manaraqpis watatsämuptinmi pasakurqan. Ciëlupaq akrashqa tsë cristiänukunaqa, 1919 wata marzu killachömi yarqarayämurqan, y tiempuwanqa acusayanqan cargukunatapis jorqariyarqanmi. Tsë wawqikunaqa, jinan höram Diospa Gobiernumpita yachatsikuyänampaq yapë patsätsipakuyarqan. Peru Satanasqa, tsëpita patsëmi Diosta sirweqkunata chikir sufritsirnin sïguishqa (Rev. 12:15). Tsëmi llapantsikpis, alli tsarakunantsik y Diosman mas markäkunantsik o yärakunantsik (Rev. 13:10).

17. Satanas ushakätsita munëkaptimpis, ¿pikunatan Diospa sirweqninkunata yanapayashqa?

¹⁷ Revelacion librupa 12 kaq capïtulunchömi, Diosta sirweqkunata yanapayänampaq kaqta nirqan. Patsam shiminta kichanan karqan y mayunöraq chikirnin sufritsiyanqantam tragakurkunan karqan (Rev. 12:16). Y tsëchö ninqannöllam pasakushqa. Höraqa, Satanaspa mundunchö kaqkunam, wakin juezkuna rurayanqannöpis, Diosta sirweqkunata yanapayashqa. Jehoväta sirweqkunaqa, libri yachatsikuyänampaqmi atska juiciukunata ganayashqa. Tsëmi permitiyanqanyaqqa, rurayänampaq Dios mandanqanchö puëdiyanqanmannö yanapakuyan (1 Cor. 16:9). Tsë rurëchöqa, ¿ima mastataq rurayänan?

18. Kë ushanan junaqkunachöqa, ¿ima rurëtataq mas puntaman churanantsik?

 ¹⁸ Jesusqa, kë Patsachö imëka mana allikunapa ushënin manaraq chämuptin, Diospa ‘Gobiernumpita alli willakïkunata entëru patsachö willakuyänampaq’ kaqtam nirqan (Mat. 24:14). Tsë rurëta cumpliyänampaqqa, juk angel, o juk grüpu angelkunam yanapayan. Revelacion libruchöqa, tsë angel imata ruranqampaq parlarmi kënö nin: “Mana ushakaq alli willakïkunatam katsirqan patsachö täraqkunata willanampaq, llapan nacionkunata, kastakunata, idiömakunata y markakunata” (Rev. 14:6).

19. Jehoväta kuyaqkunaqa, ¿ima mastataq willakuyanqa?

¹⁹ Peru Diosta sirweqkunaqa, manam Gobiernumpita alli noticiakunallatatsu willakuyan. Revelacion librupa 8 a 10 kaq capïtulunchömi, wakin angelkunapaq parlan, pëkunatapis yanapayänanmi. Tsë angelkunaqa Diospa Gobiernumpa contran këkaqkunata imëka mana allikuna pasanampaq kaqtam willakuyan. Tsëmi Jehoväpa testïgunkunaqa, imëka runtuwan y ninawan igualaq juiciuta willakuykarquntsik. Tsë willakuymi, Satanaspa mundunchö kaqkunata Dios imata ruranampaq kaqta rikätsikun (Rev. 8:7, 13). Imëka mana allikunapa ushakënin këllachöna kanqantam nunakunaqa musyayänan. Tsëta musyarllam Jehovä cölerakunqan junaqpita salvakuyanqa (Sof. 2:2, 3). Tsëta willakunqantsikpita llapan nunakuna mana kushikuyaptinmi, valienti kanantsik. Y jatun sufrimientu witsan willakunantsikpaq kaqqa, mas peormi kanqa (Rev. 16:21).

20. ¿Imatataq qateqnin ishkë kaq yachatsikuykunachö rikäshun?

²⁰ Kanan witsan cumplikëkaptinmi, Revelacion libruchö ‘qellqashqa këkaqkunataqa’ masraq wiyakunantsik (Rev. 1:3). Peru ¿imanötan chikir sufritsimanqantsikta aguantashwan y Diospita mana mantsakushpa yachatsikushwan? ¿Imataq valienti kanapaqqa yanapamäshun? Diosta chikeqkunapaq Revelacion libruchö ima ninqan y alli tsarakushqa shamoq tiempuchö mëtsika bendicionkunata chaskinapaq kaqta musyanqantsikmi. Tsëkunataqa, qateqnin ishkë kaq yachatsikuykunachömi rikäshun.