1. Revelacion libruchö ninqannö, ¿imatataq Satanas ruran Diospa sirweqninkunata?

 DIOSPA Gobiernun ciëluchö gobernëkanqantana y Patsaman Satanas jitamushqa kanqantam, Revelacion libru rikätsikun (Rev. 12:1-9). Tsëmi ciëluchö kawaq kaqkunaqa kushishqa këkäyan, peru Patsachö kawaq kaqkunaqa mas problëmayoqmi kantsik. ¿Imanirtan tsëta nintsik? Jehoväta Patsachö sirweqkunata cöleranchö Satanas imëka mana allikunata ruraptinmi (Rev. 12:12, 15, 17).

2. ¿Imatan yanapamäshun alli tsarakunapaq?

² ¿Imanötan tsarakushwan Satanas imëka mana allikunata ruramashqa? (Rev. 13:10). Tsëpaqqa, shamoq tiempuchö imakuna pasakunampaq kaqta yarpanqantsikmi yanapamäshun. Revelacion libruchöqa, bendicionkunata chaskinapaq kaqkunapitam apostol Juanqa wakimpita parlan. Jukqa, Diospa chikeqninkuna ushakätsishqa kayänampaq kaqmi. Imanö kayanqanta y imachö ushayänampaq kaqta Revelacion libru willakunqanta rikärishun.

3. ¿Ima igualatsikuykunapaqtan Revelacion libruchö parlan?

³ Revelacion librupa punta kaq versïculun ninqannöpis, “suëñïninchönö” rikanqankunatam apostol Juan qellqarqan (Rev. 1:1). Diospa chikeqninkunataqa mantsanëpaq chukaru animalkunatawanmi igualatsin. Jukqa, ‘lamarpita yarqëkämoq juk mantsanëpaq chukaru animalmi’ karqan. Tsë animalqa, ‘chunka waqrayoq y qanchis peqayoqmi’ karqan (Rev. 13:1). Qepantanam Patsapita ‘juk mantsanëpaq chukaru animal’ witsëkämurqan. Tsëqa, “juk mantsanëpaq jatun culebranömi parlar qallëkurqan” y ‘ciëlupita patsamanmi ninata’ urätsirqan (Rev. 13:11-13). Tsëpitanam, ‘qanchis peqayoq y chunka waqrayoq chipapaq puka mantsanëpaq  chukaru animalta’ rikarqan y jananchönam, jukwan jukwan kakoq warmi tëkarqan. Tsë mantsanëpaq chukaru animalkunaqa, Jehoväpa y Gobiernumpa contran mëtsika watakunapa kashqa kayanqantam rikätsikun. Tsëmi, tsë animalkuna pikunata rikätsikunqanta musyanantsik (Rev. 17:1, 3).

4, 5. ¿Imanötan Daniel 7:15 a 17 ninqan Revelacion libruchö igualatsikuykunata entiendinapaq yanapamantsik?

⁴ Diosta chikeqkuna pikuna kayanqanta manaraq averiguar, mantsanëpaq chukaru animalkuna y jukwan jukwan kakoq warmi imata rikätsikunqanta yachakurishun. Tsëtaqa, Bibliachö ninqanllawanmi entiendishun. Revelacion libruchö yurinqan igualatsikuykunaqa, Bibliapa juk librunkunachöpis yurinmi. Këllata rikärishun: Diospa willakoqnin Danielmi ‘lamarpita mantsanëpaq […] chusku jatusaq animalkuna yarqëkämoqta’ suëñïninchö rikarqan (Dan. 7:1-3). Y kikin Danielmi entienditsikun tsë jatusaq animalkunaqa chusku nacionkunata o gobiernukunata rikätsikunqanta (leyi Daniel 7:15-17). Këmi entienditsikun Revelacion libruchö mantsanëpaq chukaru animalkunapis gobiernukunata rikätsikunqanta.

⁵ Revelacion libruchö igualatsikuykunapita masllata parlarishun. Këchömi, tsëkunapaq Biblia imata entienditsikunqanta yachakushun. Puntataqa, tsë mantsanëpaq chukaru animalkuna pikunata rikätsikunqantam yachakushun. Tsëpitanam, tsë animalkunata ima pasanqanta rikäshun. Y ushanapaqnam, imakunata yachakunqantsikta rikäshun.

6. ¿Pitan Revelacion 13:1 a 4 ninqanchö qanchis peqayoq mantsanëpaq chukaru animal?

⁶ ¿Imatataq qanchis peqayoq mantsanëpaq chukaru animal rikätsikun? (Leyi Revelacion 13:1-4). Bibliachöqa leopardu niraq kanqanta, chakinkuna ösupanö kanqanta y shimin leonpanö kanqanta y chunka waqrayoq kanqantam nin. Daniel librupa 7 kaq capïtulunchöqa, jukläya jukläya chusku animalkunapaqmi parlan. Peru Revelacion libruchöqa tsë chuskun animalkunam jukllëllaman tikrariyan. Tsë mantsanëpaq chukaru animalqa, manam entëru Patsachö juk gobiernullatatsu rikätsikun. Revelacion libruchöqa “llapan kastakunata, markakunata, idiömakunata y nacionkunata makinchö” katsinqantam nin. Tsëmi autoridäninqa juk nacionpa autoridäninnöllatsu (Rev. 13:7). Tsëmi tsë mantsanëpaq chukaru animalqa, qallanampita patsë nunakunata gobernashqa gobiernukunata rikätsikun (Ecl. 8:9). *

7. Mantsanëpaq chukaru animalpa qanchis peqankunaqa, ¿pikunatataq rikätsikun?

⁷ ¿Imatataq qanchis peqayoq kanqanqa rikätsikun? Revelacion librupa 17 kaq capïtulunchömi tsëta entienditsikun. Tsëchömi, 13 kaq capïtuluchö mantsanëpaq chukaru animalpa imäginnin ima ninan kanqanta entienditsikun. Revelacion 17:10 textuchömi kënö nin: “Qanchis reykunam kan: pitsqam ishkiyashqa, jukqa këkanmi, y jukqa manam chämushqaraqtsu, peru chäramurqa, wallka tiempullapam kanqa”. Nunakunata gobernanampaq Satanas utilizanqan gobiernukunapitaqa, alläpa puëdeq kashqa kayaptinmi, qanchis gobiernukuna ‘peqakunawan’ o umakunawan igualan. Tsë gobiernukunaqa Diosta sirweqkunatam sufritsiyashqa. Apostol Juan kawanqan witsampaqqa, pitsqanam gobernashqa kayarqan. Tsëkunaqa Egiptu, Asiria, Babilonia, Medopersia y Greciam kayarqan. Joqta kaqqa, Römam karqan y suëñïninchönö rikanqankunata Juan qellqanqan witsanmi gobernëkarqan. ¿Pitan qanchis kaq peqa o gobiernuqa kanan karqan?

8. ¿Pikunataq kayan mantsanëpaq chukaru animalpa qanchis kaq peqan?

 ⁸ Daniel libruchö Dios willatsikunqanmi mantsanëpaq chukaru animalpa qanchis kaq peqan pï kanqanta entiendinapaq yanapamantsik. ¿Mëqan alläpa puëdeq nacionkunatan kë ushanan junaqkunachö, juk parlakuychöqa, “Señorpa junaqninchö” gobernëkäyashqa? (Rev. 1:10). Pëkunaqa, llapan gobiernukunapita mas puëdeq Reinu Unïduwan Estädus Unïdus nacionkunam kayan. Tsëmi, Revelacion 13:1 a 4 textuchö mantsanëpaq chukaru animalpa qanchis kaq peqan.

9. ‘Achkaspanö ishkë waqrayoq’ mantsanëpaq chukaru animalqa, ¿pitataq rikätsikun?

⁹ Mantsanëpaq chukaru animalpa qanchis kaq peqan, juk parlakuychöqa, Reinu Unïduwan Estädus Unïdus imata rurëkäyanqantam, Revelacion librupa 13 kaq capïtulunchö willakun. Pëkunataqa, mantsanëpaq juk chukaru animaltawan igualatsirmi kënö nin: “Achkaspanömi ishkë waqrankuna kapurqan, peru juk mantsanëpaq jatun culebranömi parlar qallëkurqan”. Tsë mantsanëpaq chukaru animalqa, ‘jatun señalkunatam ruran, hasta llapan nunakunapa rikëninkunachömi ciëlupita patsaman ninata urätsin’ (Rev. 13:11-15). Y Revelacion librupa 16 y 19 kaq capïtulunkunachömi, mantsanëpaq chukaru animal ‘Diospa willakoqnin tukoq’ kanqanta nin (Rev. 16:13; 19:20). Reinu Unïduwan Estädus Unïdus rurayanqampaq parlarmi, Danielpis kënö nirqan: “Imëkatapis pasëpam ushakätsinqa” (Dan. 8:19, 23, 24). Y tsëmi Ishkë kaq Jatun Guërrachö pasakurqan. Tsë guërrata ushakätsinqan bomba atömica niyanqanta ishkëta pashtatsiyanqantaqa, Reinu Unïduchö y Estädus Unïduschö cientïficukunam rurayarqan. Tsëta rurayanqanwanmi alläpa puëdeq Reinu Unïduwan Estädus Unïdusqa, ‘ciëlupita patsaman ninata urätsiyämurqan’.

10. ‘Mantsanëpaq chukaru animalpa imäginninqa’, ¿imatataq rikätsikun? (Revelacion 13:14, 15; 17:8, 11).

¹⁰ Kananqa, qateqnin kaq chukaru animalpita parlarishun. Tsëqa, qanchis peqayoq mantsanëpaq chukaru animalnömi, peru puka chipapaq colormi. Revelacion libruchöqa, ‘mantsanëpaq chukaru animalpa imäginnin’ nirmi qayan y ‘puwaq kaq rey’ kanqantam nin (leyi Revelacion 13:14, 15; 17:3, 8, 11). * Tsë reypaqqa yurinqanta, tsëpita illaririnqanta y tsëpita yapë yurinqantam Revelacion libruchö nin. Tsëqa, Organizacion de las Naciönes Unïdas niyanqanwan ima pasanqantam cläru rikätsikun. Qallananllachöqa, Sociedad de Naciönes nirmi jutin churayarqan. Tsëpitanam, Ishkë kaq Jatun Guërrachö ushakärirqan. Y tiempuwannam, Organizacion de las Naciönes Unïdas neq jutiyoq yurimurqan.

11. ¿Imatataq tsë mantsanëpaq chukaru animalkuna rurayanqa y imanirtan mantsashwantsu?

¹¹ Imëkata niyanqanwanmi, Jehoväpa y sirweqninkunapa contran churakäyänampaq nunakunata inkitayanqa. Juk parlakuychöqa, entëru Patsachö llapan reykunatam “Llapanta Puëdeq Diospa jatun junaqninchö” Armagedon guërraman ëlluyanqa (Rev. 16:13, 14, 16). Peru manam imatapis mantsashwantsu. Diosnintsik Jehoväqa, tsë gobiernukunata yanapaqkunapitam jinan höra salvamäshun (Ezeq. 38:21-23).

12. ¿Imatan tsë mantsanëpaq chukaru animalkunata pasanqa?

¹² ¿Imatan tsë mantsanëpaq chukaru animalkunata pasanqa? Revelacion 19:20 textuchömi kënö nin: “Mantsanëpaq chukaru animalmi tsarishqa karqan, y pëpa nöpanchö señalkunata ruraq, y tsë señalkunawan mantsanëpaq  chukaru animalpa marcanta chaskishqa kaqkunata y imäginninta adoraqkunata pantatseq Diospa willakoqnin tukoqmi pëwan juntu tsarishqa karqan. Ishkanmi kawëkarllaraq azufriwan rawraq nina qochaman weqapashqa kayarqan”. Gobernëkarllaran, Diosta chikeq gobiernukunaqa chipyëpa ushakäriyanqa.

13. ¿Imakunapataq pasantsik gobiernukunata mana yanapanqantsikrëkur?

¹³ ¿Imatataq yachakuntsik? Noqantsikqa, Diostam mana dejëpa sirwinantsik y Gobiernunchö yanapakunantsik (Juan 18:36). Tsëta ruranapaqqa, manam kë munduchö polïtica asuntukunaman mëtikushwantsu. Peru tsë gobiernukuna parlanqantsikwan y ruranqantsikwan pëkunata yanapanata munayaptinmi, tsëta rurëqa fäciltsu kanman. Pëkunata yanapayänampaq änikoqkunaqa, mantsanëpaq chukaru animalpa marcantam chaskiyan (Rev. 13:16, 17). Y tsë marcata chaskeqkunaqa, mananam Jehoväpa amïgunnatsu kayan y manam mana wanushpa kawëta puëdiyanqanatsu (Rev. 14:9, 10; 20:4). Tsëmi mana yanapashqa gobiernukuna imata ruramashqapis alli tsarakunantsik.

14. ¿Imata rikanqampitataq apostol Juan alläpa espantakun? (Revelacion 17:3-5).

¹⁴ Apostol Juanqa, mantsanëpaq juk chukaru animalpa jananchö juk warmi tëkaqta rikanqampita ‘alläpa espantakunqantam’ nin (Rev. 17:1, 2, 6). Tsë warmiqa, ‘jukwan jukwan kakoq warminömi’ y jutinqa ‘Alläpa Puëdeq Babiloniam’. Pëqa ,‘patsachö reykunawanmi’ ‘rakcha rurëkunata rurarqan’ (leyi Revelacion 17:3-5).

15, 16. ¿Imatan“Alläpa Puëdeq Babilonia” y imanötan tsëtaqa musyantsik?

¹⁵ ¿Imatan “Alläpa Puëdeq Babilonia”? Patsata gobernaqkunawan pununakuptinmi, tsë warmiqa Patsata gobernaqkunapitatsu kanman (Rev. 18:9). Mantsëpaq chukaru animalta montaranqanqa, tsë animalta controlëta procuranqantam rikätsikun y manam Satanaspa mundunchö negociukunatatsu rikätsikun. Tsënöqa nintsik, qateqnin kaq versïculukunachö pëkunapaq ‘patsachö negociantikuna’ nir Revelacion libruchö parlaptinmi (Rev. 18:11, 15, 16).

¹⁶ Bibliachöqa, Diosta adoranampa rantin imatapis adorëpaq parlarmi, jukwan jukwan o mana majanwan kakoq nunapaqnö parlan. Diosta pipis adoranqanta nikar, imatapis adoraptin o kë mundupa amïgun tikraptimpis tsënömi nin (1 Crön. 5:25; Sant. 4:4). Peru Diosta mana dejëpa sirweqpaqqa, imëka doncëlla warmi cuenta kanqantam nin (2 Cor. 11:2; Rev. 14:4). Unë Babilonia markachöqa, mëtsika mana alli religionkunam kaq. Tsëmi, Alläpa Puëdeq Babiloniaqa llapan mana alli kaq religionkunata rikätsikun (Rev. 17:5, 18; jw.org päginachö, “¿Qué es Babilonia la Grande?” neqta rikäri).

17. ¿Imatan Alläpa Puëdeq Babiloniata pasanqa?

¹⁷ ¿Imatan Alläpa Puëdeq Babiloniata pasanqa? Revelacion 17:16 y 17 textuchömi kënö nin: “Chunka waqrakuna y mantsanëpaq chukaru animalmi, jukwan jukwan kakoq warmita chikiyanqa y imannaqta y qalapächuta jaqiriyanqa, y ëtsantam mikukurkuyanqa y ninawanmi chipyëpa kayëkuyanqa. Porqui Diosmi kikin pensanqanta rurayänampaq shonqunkunaman pensëninta churarqan”. Awmi, Jehovämi nacionkunapa shonqunkunaman churanqa chipapaq puka color mantsanëpaq chukaru animalwan, juk parlakuychöqa, Naciönes Unïdas niyanqanwan, llapan mana alli religionkunata chipyëpa ushakätsiyänampaq (Rev. 18:21-24).

18. ¿Imatataq ruranantsik Alläpa Puëdeq Babiloniawan mana takukänapaq?

¹⁸ ¿Imatataq yachakuntsik? Diosnintsik munanqannö adorëkanqantsiktam segurakunantsik  (Sant. 1:27). Ama ni imëpis Alläpa Puëdeq Babiloniapa yachatsikuyninkunata, costumbrinkunata, fiestankunata, lluta portakuyanqanta y brujerïa cösaskunata rurashuntsu. Y nunakunata “pëpita yarqukuriyë” nir sïguishun. Tsëta rurayaptinqa, Diosqa manam Alläpa Puëdeq Babiloniapa jutsankunarëkur pëkunata castiganqatsu (Rev. 18:4).

19. ¿Pitan “nina color mantsanëpaq jatun culebra”?

¹⁹ Revelacion libruchöqa, ‘nina color mantsanëpaq jatun culebrapaqpis’ parlanmi (Rev. 12:3). Tsë mantsanëpaq jatun culebraqa, Jesuswan y angelninkunawanmi pelyan (Rev. 12:7-9). Jina, Diosta sirweqkunatam ushakätsita munan y polïticukunata rikätsikoq mantsanëpaq chukaru animalkunatam autoridänin qoshqa (Rev. 12:17; 13:4). ¿Pitan tsë mantsanëpaq jatun culebraqa? Pëqa ‘unë kaq culebra, Diablu y Satanasmi’ (Rev. 12:9; 20:2). Pëmi Jehoväta llapan chikeqkunata controlan.

20. ¿Imatan pasanqa mantsanëpaq jatun culebrata?

²⁰ ¿Imatan mantsanëpaq jatun culebrata pasanqa? Carcelchönö kanampaq wanwanyarëkaq uchkuman Satanasta juk angel jitarkunampaq kaqtam Revelacion 20:1 a 3 nin. Tsëchömi, waranqa watapa llawiranqa y tsëyaqqa, manam pitapis yapë engañanqatsu. Y tsëpitam, Satanaswan demoniunkunaqa “ninawan azufri qochaman” weqapashqa kayanqa. Tsëqa rikätsikun, chipyëpa ushakäyänampaq kaqtam (Rev. 20:10). ¡Imanö shumaqraq kawakushun Satanaswan demoniunkuna manana kayaptinqa!

21. ¿Imanirtan Revelacion libruchö leyinqantsikpita kushikuntsik?

²¹ ¿Manaku Revelacion libruchö këkaq igualatsikuykunata entiendinqantsikpita kushikuntsik? Manam Jehoväpa chikeqninkuna pikuna kayanqanllatatsu yachakurquntsik. Pëkunata ima pasanampaq kaqtapis rikarquntsikmi. Awmi, “kushishqam sientikun Diospa kë musyatsikïninchö këkaq palabrakunata sinchipa leyeq kaq y tsëta wiyaq kaqkuna” (Rev. 1:3). Peru Diosta chikeqkuna ushakäriyaptinqa, ¿ima bendicionkunatataq Diosta sirweqkuna chaskiyanqa? Tsëtam qateqnin kaqchö yachakurishun.