1. ¿Imatataq cada nuna decidinan?

 KANAN witsanqa, Jehoväpa gobiernunman qaqäyänampaq kaqta, o Diosta chikeq Satanasman qaqäyänampaq kaqtam nunakuna akrayänan. Mëqantapis akrayanqampitam, mana wanushpa kawayänampaq kaqta o wanuyänampaq kaqta rikätsikunqa (Mat. 25:31-33, 46). ‘Alläpa jatun sufrimientu’ witsanqa, Jehoväta sirweqkunam salvakunapaq marcata chaskishun (Rev. 7:14; Ezeq. 9:4, 6). Y mantsanëpaq chukaru animalpa marcanta chaskeqkunaqa, ushakäyanqam (Rev. 14:9-11).

2. (1) ¿Imata ruranapaqtan Hebrëus 10:35 a 39 textuchö nin? (2) ¿Imanötan Revelacion libruchö ninqan yanapamantsik?

² (Leyi Hebrëus 10:35-39). Diospa Gobiernunchö yanapakunëkipaq kaqta decidishqana karqa, allitam rurarqunki. Itsachi wakinkunapis tsëta decidiyänampaq yanapëta munanki. Revelacion libruchö ninqanmi tsëta ruranëkipaq yanapashunki. Tsë libruchöqa, Jehoväta sirweqkunata ima pasanampaq kaqta, y kë Patsachö Gobiernun patsakänampaq yanapakoqkuna ima bendicionkunata chaskiyänampaq kaqtam willakun. Tsëkunapita parlanqanta yachakunqantsikqa, Jehoväta mas sirwir sïguinapaqmi yanapamäshun. Jina tsë librupita yachakunqantsikwanqa, wakin nunakunatam alli kaqta akrayänampaq yanapëta puëdishun.

3. ¿Ima tapukuykunapitataq këchö yachakushun?

³ Këchöqa, kë tapukuykunapitam yachakushun: ¿imatataq chaskiyanqa Diospa Gobiernunchö yanapakoqkunaqa? y Revelacion libruchö ninqannö, ¿imatan chipapaq puka color mantsanëpaq chukaru animalta yanapaqkunata pasanqa?

4. ¿Pikunatataq ciëluchö Jesuswan këkaqta apostol Juan rikarqan?

⁴ Apostol Juanqa, Jehoväpa Gobiernunchö yanapakoqkuna ishkë grüpu nunakunatam rikan. Pëkunaqa mana wanushpa kawakuyta y mëtsika bendicionkunatam chaskiyan. Punta kaq grüpuchöqa, 144.000 nunakunam kayan (Rev. 7:4). Pëkunaqa ciëlutam ëwayanqa Jesuswan juntu Patsata gobernayämunampaq (Rev. 5:9, 10; 14:3, 4). Apostol Juanmi, imëka Sion jirkachönö Jesuswan ciëluchö shëkäyaqta rikarqan (Rev. 14:1).

5. Patsallachöraq këkaq ciëlupaq akrashqakunawanqa, ¿imatan ichikllachöna pasanqa?

⁵ Apostolkuna kawayanqampita hasta kanan witsanyaqmi, 144.000 grüpu nunakunapita kayänampaq mëtsika waranqa nunakunata Dios akrashqa (Lüc. 12:32; Rom. 8:17). Peru Juanqa, ushanan junaqkunachö tsë grüpupita Patsachö wallkaqlla quedayänampaq kaqtam rikarqan. Alläpa jatun sufrimientu manaraq qallaptinmi, ciëluta ëwayänampaq kaq cristiänukunaqa sellashqa kayanqa, juk parlakuychöqa, rikënimpaq alli kayanqantam Jehoväqa ninqa (Rev. 7:2, 3; 12:17). Tsëpitanam, alläpa jatun sufrimientu qallëkamuptin, tsë 144.000 nunakunapita Patsallachöraq këkaqkuna, ciëluman apashqa kayanqa. Tsëchömi, ciëluchöna këkaqkunawan Diospa Gobiernunchö Jesuswan juntu gobernayämunqa (Mat. 24:31; Rev. 5:9, 10).

6, 7. (1) ¿Pikunatataq Juan rikan y imatataq pëkunapita musyantsik? (2) ¿Imanirtan Patsallachöraq këkaq ciëlupaq akrashqakuna y Patsachö kawayänampaq kaq “mëtsikaq nunakuna” Revelacion librupa 7 kaq capïtulumpita yachakuyanman?

⁶ Ciëlupaq akrashqa 144.000 nunakunata ciëluchöna këkaqta rikärirmi, Juanqa “ni pï nunapis yupëta mana puëdinqan” ‘mëtsikaq nunakunata’ rikan (Rev. 7:9, 10). ¿Pikunatan pëkunaqa kayan? Juanmi kënö nirqan: “Këkunaqa alläpa jatun sufrimientukunapita yarqamushqa kaqkunam kayan, y Achkaspa yawarninchömi largu röpankunata taqshayashqa y yulaqyätsiyashqa” (Rev. 7:14). Alläpa jatun sufrimientupita kawëkarnin pasaq tsë ‘mëtsikaq nunakunaqa’, Patsachömi kawayanqa y mëtsika bendicionkunatam chaskiyanqa (Sal. 37:9-11, 27-29; Prov. 2:21, 22; Rev. 7:16, 17).

⁷ Ciëluta ëwanapaq kashqa o Patsachö kawanapaq kashqapis, llapantsikmi Revelacion librupa 7 kaq capïtulunchö ninqannö kawëkaq cuenta rikäkunantsik. Diosta sirweq tsë ishkan grüpu nunakunapaqqa, ¡alläpa kushikuypaq tiempum kanqa! Jehoväpa Gobiernunchö yanapakunapaq decidinqantsikpitam alläpa kushishqa kashun. Alläpa jatun sufrimientupaqqa, ¿ima mastataq Revelacion libruchö nin? (Mat. 24:21).

8. ¿Imanötan alläpa jatun sufrimientu qallanqa, y imatataq mëtsika nunakuna rurayanqa?

⁸ Qepa kaqchö yachakunqantsiknömi, entëru Patsachö llapan mana alli religionkunata rikätsikoq Alläpa Puëdeq Babiloniata, ichikllachöna gobiernukuna ushakäratsiyanqa (Rev. 17:16, 17). Tsëta rurayanqanwanmi, alläpa jatun sufrimientu qallëkunqa. ¿Tsëta rikartsuraq nunakunaqa Jehoväta adorar qallëkuyanqa? Manam. Tsëpa rantinqa, Revelacion librupa 6 kaq capïtulunchö jirkakunatawan igualatsinqan gobiernukunata y negociukunatam, Jehoväta mana sirweqkunaqa tsapäyänampaq mañakuyanqa. Gobiernumpa contran tsë nunakuna churakäyaptinmi, Jehoväqa chikeqninkunatanö rikanqa (Lüc. 11:23; Rev. 6:15-17).

9. ¿Imanirtan alläpa jatun sufrimientu witsan Jehoväpa sirweqninkuna jukläya kayanqanta pïmëpis rikäyanqa y imatan tsërëkur pasakunqa?

 ⁹ Awmi, tsë alläpa jatun sufrimientu witsan Jehoväta mana dejëpa sirweqkuna jukläya kayanqantaqa, pïmëmi rikäyanqa. Pëkunallam Jehoväta sirwir sïguiyanqa y ‘mantsanëpaq chukaru animalman’ manam qaqäyanqatsu, juk parlakuychöqa, gobiernukunaman (Rev. 13:14-17). Tsënö kayanqanta rikarmi, Jehoväpa contranchö këkaqkunaqa alläpa cölerakuyanqa. Tsëmi Diospa sirweqninkunata entëru Patsachö ushakätsiyänampaq, juk grüpu nacionkuna churapakäyanqa. Tsëpaq parlarmi, Diosta sirweqkunata Magogpita Gog ushakätsita munanqampaq Bibliachö willakun (Ezeq. 38:14-16).

10. Revelacion 19:19 a 21 ninqannöpis, ¿imatataq Jehovä ruranqa sirweqninkunata ushakätsir qallëkuyaptin?

¹⁰ ¿Imatataq Jehovä ruranqa sirweqninkunata ushakätsir qallëkuyaptin? Kikinmi, ‘pasëpam piñakurkushaq’ nin (Ezeq. 38:18, 21-23). Tsëpita ima pasanampaq kaqtam, Revelacion librupa 19 kaq capïtulunchö willakun. Sirweqninkunata defendinampaq y chikeqninkunata ushakätsinampaqmi, wamranta Jehovä mandanqa. Y Jesusqa, Magogpita Gogwan pelyanampaqmi, ciëluchö tröpakunawan urämunqa, juk parlakuychöqa, angelkunawan y 144.000 akrashqakunawanmi (Rev. 17:14; 19:11-15). Tsë guërrachöqa, Jehoväpa contranchö këkaq llapan nunakunam ushakäyanqa (leyi Revelacion 19:19-21).

11. Revelacion libruchö ninqannöpis, ¿imarëkurtan ciëluchö y Patsachöpis alläpa kushikuyanqa?

¹¹ Diosta chikeqkuna chipyëpa ushakashqa kayanqanta rikarqa, Diosta mana dejëpa sirweqkunaqa alläpachi kushikuyanqa. Y ciëluchöqa, manam Alläpa Puëdeq Babilonia ushakanqanllapitatsu alläpa kushikuyanqa (Rev. 19:1-3). Revelacion libruchö ninqannöpis, ‘Achkaspa casakïninrëkurmi’ masqa kushikuyanqa (Rev. 19:6-9).

12. ¿Imëtan Achkaspa casakuynin fiesta rurakanqa? (Revelacion 21:1, 2).

¹² ¿Imëtaq tsë casakuy fiestaqa kanqa? Armagedon guërra manaraq qallaptin ciëlupaq 144.000 akrashqakuna ciëluchöna llapan kayaptimpis, manam tsë höratsu Achkaspa casakuynin fiesta kanqa (leyi Revelacion 21:1, 2). Armagedon guërrachö Diospa llapan chikeqninkuna ushakäriyaptinmi, casakuy fiestaqa rurakanqa (Sal. 45:3, 4, 13-17).

13. ¿Imatan pasakun Achkas casakunqan junaq?

¹³ ¿Imatan pasakunqa Achkas casakunqan junaq? Casakuy fiestaqa rurakan juk ollquwan warmi casakuyaptinmi, y Achkas casakunqan junaqqa, Rey Jesucristuwan 144.000 akrashqakunam, casakoq cuenta kayan. Tsë casakuy fiestam rikätsikun, Jesuswan 144.000 akrashqakuna, Patsata Waranqa Watapa gobernar qallëkayämunampaq kaqta (Rev. 20:6).

14, 15. Revelacion librupa 21 kaq capïtulunchöqa, ¿imatawantaq 144.000 akrashqakunata igualatsin? (Jana qaranchö këkaq dibüjuta rikäri).

¹⁴ Revelacion librupa qateqnin 21 kaq capïtulunchömi, 144.000 akrashqakunata, ‘Mushoq Jerusalen’ jutiyoq alläpa shumaq markatawan igualatsin (Rev. 21:2, 9). Tsë markapaqa, “chunka ishkë cimientu rumikunam” kapun, y tsë rumikunachömi, “Achkaspa chunka ishkë apostolninkunapa chunka ishkë jutinkuna” këkan. Tsëta rikarchi apostol Juanqa espantakurqan. ¿Imanirtan tsëta nintsik? Pëpa jutimpis juk rumichömi qellqarëkarqan (Rev. 21:10-14; Efes. 2:20).

 ¹⁵ Tsë markaqa, manam ni ima markawampis igualantsu. Mas precisaq cällinqa, öru pürupitam karqan, chunka ishkë punkunkunanam, chunka ishkë perlaskuna kayarqan, markapa perqan y cimientunkunaqa, alläpa shumaq rumikunawan adornashqam këkarqan. Y tsë markapa anchun, largun y altunqa igual-llam medïdankuna karqan (Rev. 21:15-21). Peru Juanqa tsë markachö templu faltanqantam cuentata qokurin. Pëmi kënö willakun: “Y manam tsëchö templuta rikarqätsu, porqui Llapanta Puëdeq Jehovä Diosmi templun, jina Achkaspis. Y markaqa, manam intipa ni killapa aktsin aktsinanta wanantsu, porqui Diospa chipapäkïninmi aktsirqan, y chiwchinnam Achkas karqan” (Rev. 21:22, 23). Mushoq Jerusalenpita kaqkunaqa kikin Jehoväwanmi parlëta puëdiyanqa (Heb. 7:27; Rev. 22:3, 4). Tsëmi Revelacion libruchöqa, Jehoväwan Jesus tsë markapa templun kayanqanta nin.

16. Diospa Waranqa Wata Gobiernunchöqa, ¿ima bendicionkunatataq nunakuna chaskiyanqa?

¹⁶ Ciëlupaq akrashqakunaqa alläpam kushikuyan tsë markaman pensarnin. Peru Patsachö kawaqpaq kaq cristiänukunapis tsë markamanqa pensayanmanmi. Diospa Gobiernunchö Waranqa Watapa gobernayämunqanchöqa, Mushoq Jerusalenqa mëtsika bendicionkunatam Patsaman ramamunqa. Tsë bendicionkunataqa, ‘kawëta qokoq yakuyoq mayunö’ kanqantam Juanqa rikarqan, y tsë mayupa ishkan kuchunkunachömi ‘kawëta qokoq montikuna kayarqan’ y tsë montikunapa “raprankunaqa nacionkuna jampishqa kayänampaqmi karqan” (Rev. 22:1, 2). Tsë templuchö kawaq nunakunaqa tsë bendicionkunatam chaskiyanqa. Y wiyakoq kaqkunaqa, ichikllapa ichikllapam jutsannaq këman chäyanqa. Mananam nunakuna qeshyayanqanatsu, nanatsikuyanqanatsu ni llakikur waqayanqanatsu (Rev. 21:3-5).

17. Waranqa Watapa Jesus gobernamunqanchöqa, ¿pikunatan bendicionkunata chaskiyanqa? (Revelacion 20:11-13).

¹⁷ ¿Pikunataq tsë bendicionkunata chaskiyanqa? Puntataqa Armagedon guërrapita salvakoq mëtsikaq nunakuna y Shumaq Patsachö yureq wamrakunam. Jina tsë bendicionkunataqa, Revelacion librupa 20 kaq capïtulun ninqannö kawarimoq nunakunapis chaskiyanqam (leyi Revelacion 20:11-13). ¿Y pikunatan kawariyämunqa? Alli kaqta  ruraqkuna y mana alli kaqta ruraqkunam, juk parlakuychöqa, Jehoväta sirwikarnin wanoq kaqkuna y Jehoväpita mana yachakushqa kaq nunakunam (Hëch. 24:15; Juan 5:28, 29). Tsëqa ¿llapan wanushqa nunakunaku Waranqa Watapa Jesus gobernamunqanchö kawariyämunqa? Manam. Puëdikarnimpis Jehoväta sirwita mana munaq kaqkunaqa, manam kawariyämunqanatsu. Rurëninkunawanmi Shumaq Patsachö kawayänampaqnö mana kayanqanta rikätsikuyarqan (Mat. 25:46; 2 Tes. 1:9; Rev. 17:8; 20:15).

18. Jesus Waranqa Watapa gobernar ushariptinqa, ¿imanö këmantaq nunakuna chäyanqa?

¹⁸ Waranqa Watapa Jesus gobernanqan ushariptinqa, llapan nunakunanam jutsannaq këman chashqa kayanqa. Mananam ni pipis Adanpita chaskinqan jutsayoqqa kanqanatsu (Rom. 5:12). Mananam Adan jutsallakunqanrëkur chaskinqantsik maldicion kanqanatsu. Waranqa Watapa Jesuspa Gobiernun ushariptinqa, ni imachöpis mana pantaq y jutsannaqna karmi imëka kawarimoq cuenta kayanqa (Rev. 20:5).

19. ¿Imanirtaq ushanan kaq pruëbaqa kanqa?

¹⁹ Satanas imëkata rurëkaptimpis, Diosta mana dejëpa Jesus sirwinqantaqa musyantsikmi. Peru jutsannaq këman chashqa nunakunaqa, ¿Jesusnötsuraq Satanas tentaptin tsarakuyanqa? Waranqa wata ushariptin y Satanas prësurëkanqampita libri kariptinmi, cada nuna tsëta rikätsikunqa (Rev. 20:7). Tsë tiempuchö alli tsarakoqkunaqa mana wanushpanam kawakuyanqa y rasumpa libri këtam chaskiyanqa (Rom. 8:21). Peru mana cäsukoqkunaqa, Diabluwan demoniunkuna ushakäyanqannöllam ushakäyanqa (Rev. 20:8-10).

20. ¿Ima ninkitan Revelacion libruchö Diospa willakuyninkunata yarpärinqantsikpita?

²⁰ ¿Ima ninkitaq Revelacion libruchö Diospa willakuyninkunata yarpärinqantsikpita? ¿Diospa willakuyninkuna cumplikaqchö këkaqnöku rikäkunki? ¿Diosnintsikta adorayänampaqku wakinkunatapis yanapëta munanki? (Rev. 22:17). Shamoq tiempuchö pasakunampaq kaqkunata yachakurirqa, apostol Juannöchi alläpa kushishqa kënö nita munanki: “¡Tsënö katsun! Shamïkullë Señor Jesus” (Rev. 22:20).