1, 2. ¿Imanirtan höraqa Bibliapa wakin consëjunkunaman mas yarpachakurnin qallëkuntsik?

 DIOSTA sirweq juk ollquwan warmi casakuyanqan junaqqa, alli y shumaq vistishqam këkäyan y pëkunata juk discursuchö Bibliawan consejaq wawqitam shumaq wiyayan. Pëkunaqa, tsë consëjukuna ima ninqantaqa allim musyayan. Tsënö karpis, casakuyanqan junaqpitaqa ishkannam tsë consëjukuna niyanqannö kawakuyänampaq kallpachakuyanqa.

² Tsënöllam pasakun wamrakuna wätëwampis. Itsa casädu këkaqkunaqa, wamrakunata imanö wätëpaq reunionkunachö yachatsikuyanqanta wiyayashqa. Peru kikinkunapa wamrankuna yuririptinqa, tsë consëjukunamanqa masnam yarparäyan. ¡Imëka rurëyoqmi kayanqa! Kawënintsikchö imapis cambiariptinqa, Bibliapa consëjunkunataqa juknöpanam rikar qallëkuntsik. Tsëmi, unë witsan Israel nacionpa reyninkuna rurayanqannölla, Diosta kanan witsan sirweqkunapis Bibliata “waran waran” leyinantsik y leyinqantsikman yarpachakunantsik (Deut. 17:19).

3. ¿Imatataq këchö yachakushun?

³ Teytakuna, qamkunaqa imawampis mana igualaq rurëyoqmi kayanki, wamrëkikunatam Jehoväpita yachatsiyanki. Peru Jehoväta llapan shonqunkunawan kuyayänampaqmi yachatsiyanki y manam pë imanö kanqanta musyayänanllapaqtsu. ¿Imanötan tsëta lograyanki? Këchömi, yanapayäshunëkipaq Bibliachö këkaq chusku consëjukunapita yachakurishun (2 Tim. 3:16). Jina Bibliachö këkaq consëjukuna ninqannölla  rurar teytakuna alli yarqapakuyanqampitapis yachakushunmi.

4. ¿Ima consëjutan teytakunata yanapanman Jehoväta wamrankuna llapan shonqunwan kuyayänampaq? (Santiägu 1:5).

⁴ Juk: Jehovä yanapayäshunëkipaq mañakuyë. Jehoväta wamrëkikuna kuyayänampaqqa yachaqmi kayänëki. Tsëqa yachaqta tikrëkatsiyäshunëkipaq Jehoväta mañakuyë (leyi Santiägu 1:5). Jehovänöqa manam pipis consejakuntsu. Tsënöqa imëkarëkurmi nintsik. Jukqa, wakin teytakunapitapis teyta kë imanö kanqantam alli musyan (Sal. 36:9). Y jukqa, Bibliachö këkaq consëjunkuna imëpis yanapamashqam (Is. 48:17).

5. (1) Diosta sirweq teytakunata yanapayänampaqqa, ¿imatataq Jehoväta sirweqkunata dirigeqkuna rurayämushqa? (2) Amorim familiapaq parlaq videupitaqa, ¿imatataq yachakurqunki wamrëkikunata imanö wätanëkipaq?

⁵ Jehoväqa palabran Bibliawan y sirweqninkunata dirigeqkuna rurayämunqan publicacionkunawanmi, wamrankunata pëta kuyëta yachatsiyänampaq teyta kaqkunata yanapan (Mat. 24:45). Wakin alli consëjukunataqa, ¡Despertad! revistachö atska watakunapa “Ayuda para las familias” neqchö mëtsika consëjukuna yarqamunqanchömi tariyanqa. Kananqa jw.org päginachöpis, tsë revistakunachö parlanqanqa këkanmi. Jina tsë päginallachömi, wamrankunata imanö wätayänampaq Jehovä consejakunqankunata tapupäyanqan videukunachö y imakunapa pasayanqanta willakuyanqan videukunachö tariyanqa (Prov. 2:4-6). *

6. ¿Imatataq juk wawqiwan warmin niyan Jehoväta sirweqkunata dirigeqkuna imëkata rurayanqanwan teytakunata yanapayanqampita?

⁶ Sirweqninkunata pushaqkunawan yanapanqampitam, mëtsikaq teytakuna Jehovä Diosta agradecikuyashqa. Joseph jutiyoq juk teytam kënö nin: “Kiman wamräkunata Diospita yachatsiqa manam fäciltsu. Warmïwan noqaqa, yanapëkayämänampaqmi Jehoväta imëpis mañakuyä. Y wanëkäyanqä höram, juk publicacion o juk videu yarqamushqa. Jehovä consejayämanqanmanmi imëpis confiakuyarqö”. Joseph y warminqa, tsë publicacionkuna y videukuna Jehoväpa amïgun  kayänampaq wamrankunata yanapëkäyanqantam rikäyashqa.

7. ¿Imanirtan teytakunaqa rurëninkunawan wamrankunata yachatsiyänampaq kallpachakuyänan? (Romänus 2:21).

⁷ Ishkë: rurayanqëkiwan yachatsiyë. Wamrakunaqa teytankuna ruranqantam rurayan. Peru këtam yarpänantsik, manam pipis mana pantaqqa kantsu (Rom. 3:23). Tsënö karpis, yachaq teytakunaqa, puëdiyanqanmannömi wamrankunata alli kaqta yachatsiyänampaq kallpachakuyan (leyi Romänus 2:21). Wamrakunapaq parlarmi juk teyta kënö nirqan: “Yakuta millwa shoqunqannömi, wamrakunaqa rikäyanqanta y wiyayanqanta rurayan”. Jina kënöpis ninmi: “Imatapis yachatsinqantsiknö mana ruraqta rikämashqaqa, nimashunmi”. Jehoväta wamrantsikkuna kuyayänanta munarqa, noqantsikmi puntata llapan shonquntsikwan kuyanantsik y tsëqa clärum rikakänan.

8, 9. ¿Imatataq Andrew y Emma niyanqampita yachakurqunki?

⁸ Jehoväta wamrankuna kuyayänampaqqa, teytakunaqa imëkatam rurëta puëdiyan. Bautizakushqana 17 watayoq Andrew jutiyoq jövin ima ninqanta rikärishun. Pëmi kënö nin: “Teytäkunaqa Diosman imëpis mañakuy alläpa alli kanqantam yachatsiyämashqa. Diosman mañakushqana kaptïpis, teytäqa llapan paqaskunam noqawan juntu Diosman mañakoq. Papänïwan mamänïqa imëpis kënömi niyämaq: ‘Jehovämanqa mëtsika kuti y imë hörapis mañakuyta puëdiyankim’. Tsëmi Diosman mañakuytaqa, ni imanöpa dejätsu. Kananqa Jehoväta kushishqam mañakü y kuyamaqnï teytätanömi rikä”. Jehoväta alläpa kuyayanqëkipitam wamrëkikunapis pëta kuyëta yachakuyanqa.

⁹ Kananqa Emma willakunqampita parlarishun. Mamäninta imëka jaqayoqta dejarirmi teytan ëwakurqan. Emmam këta yarpan: “Mëtsika kutim mamänï gananqan qellëqa wanayanqäkunapaq tinkoqtsu, peru sirweqninkunata Jehovä cuidanqanta y wanayanqanta procuranqantam imëpis niyämaq y imatapis decidinqanchömi tsëman creinqanta rikaq kä. Mamänïqa, rurëninkunawanmi yachatsiyämarqan”. ¿Imatataq këpita yachakuntsik? Problëmakunapa pasëkarnimpis, teytakunaqa rurëninkunawanmi wamrankunata yachatsita puëdiyan (Gäl. 6:9).

10. Israelïta teytakunaqa, ¿imëtan wamrankunawan parlayaq? (Deuteronomiu 6:6, 7).

¹⁰ Kima: wamrëkikunawan imëpis parlayë. Jehoväqa wamrankunawan llapan junaqkuna parlayänampaqmi israelïtakunata nirqan (leyi Deuteronomiu 6:6, 7). Patsa waranqampitam, wamrankunawan parlëta y Jehoväta kuyayänampaq yachatsita puëdiyaq. Këllaman pensarishun: ollqu kaq wamrakunaqa, mëtsika hörakunam murukurnin o cosëchata ëllurnin teytankunata yanapayaq. Warmi kaqkunanam, wayichö rurapakuykunawan mamäninkunata yanapayaq, jirarnin, awarnin o juk cösaskunata rurarnimpis. Tsëta juntu rurayanqanmi, imëkapita parlayänampaq yanapakoq. Jehovä kuyakoq kanqanman, familiankunata imanö cuidanqanman y maskunamanmi, yarpachakuyta puëdiyaq.

11. Diosta sirweq teytakunaqa, ¿imëtan wamrankunawan parlëta puëdiyanman?

¹¹ Kanan witsankunaqa imëkapis cambiashqam. Mëtsika nacionkunachömi, teyta kaqkuna trabäjunkunachö kakuyaptin y wamrakuna escuëlachö kakuyaptin, juntuqa wallka tiempulla kayan. Tsëmi wamrankunawan juntu kayänampaq y pëkunawan parlayänampaq, tiempunkunata rakiyänan (Efes. 5:15, 16; Filip. 1:10). Llapan familia Diosta adorayanqan höram, juntu kayänampaq  yanapakun. Alexander jutiyoq juk wamram kënö nin: “Papänïqa, Diosta familiäwan juntu adorayänäpaqmi imëkata ruran. Y juntu kayänäpaq imapis michäkunantaqa manam permitintsu. Yachakur usharirninqa, parlakurninmi sïguiyä”.

12. ¿Imatataq teytakuna yarpäyänan familiachö Diosta adorayanqan höra?

¹² Diosta adorana hörachö wamrankuna kushishqa yachakuyänampaqqa, ¿imatataq teyta kaq ruranman? Itsa tsëpaqqa, Disfrute de la vida mushoq libruta juntu estudiayanman. Tsë libruta juntu estudiarqa, imëkapitam shumaq parlakuriyanki. Wamrëkikuna imanö këkäyanqanta y imapaq yarpachakuyanqanta willayäshunëkita munarqa, ama familiëkiwan Diosta adorana hörachö piñapäyëtsu. Y Bibliachö mana ninqannö imatapis parlayaptinqa, ama espantakuyëtsu. Tsëpa rantinqa, parlakayämunqampita agradecikuyë y yapëpis parlakayämunampaq niyë. Wamrëkikuna imata pensayanqanta y imanö këkäyanqanta niyäshuptikiqa, mas fäcilmi pëkunata yanapayanki.

13. ¿Imanö mastan Jehoväpita wamrankunata teytakuna yachatsiyanman?

¹³ Teytakuna, Jehoväpita wamrëkikunata yachatsiyänëkipaq cada junaq tiemputa rakiyë. Manam Bibliata estudiar-raqtsu kuyakoq Diosnintsikpitaqa parlapäyänëki. Lïsa jutiyoq mamam kënö nin: “Kamanqankunata rikarmi, Jehoväta mas reqiyänampaq wamräkunata yanapayaq kayä. Höraqa, allqükunata pukllaqta rikar asikuyaptinmi, Jehovä kushi kushilla kanqanta y nunakuna kushishqa kawakuyänanta munanqanta wamräkunata rikätsiyaq kayä”.

14. ¿Imanirtan teytakunaqa wamrankunata yanapayänan alli amïgukunata akrayänampaq? (Proverbius 13:20).

¹⁴ Chusku: wamrëkikunata yanapayë alli amïgukunayoq kayänampaq. Amïguntsikkuna allipaq o mana allipaq kayanqantam Bibliachöqa nin (leyi Proverbius 13:20). Teytakuna, ¿musyayankiku wamrëkikunapa amïgunkuna pikuna kayanqanta? ¿Reqiyankiku y imallatapis juntu rurayarqunkiku? ¿Imatataq rurayankiman Jehoväta kuyaqkunawan wamrëkikuna amïgu kayänampaq? (1 Cor. 15:33). Familiëkikunawan imatapis  rurarqa, Jehoväta kuyaq wawqi panikunata invitayë (Sal. 119:63).

15. ¿Imatataq teytakuna rurayanman wamrankuna alli amïgukunayoq kayänampaq?

¹⁵ Tony jutiyoq wawqi imata ruranqanta rikärishun. Wamrankuna alli amïguyoq kayänampaq pëwan warmin imata rurayanqampaq parlarmi kënö nin: “Warmïwan noqaqa, mëtsika watakunapanam tukuy edä y costumbrikunayoq wawqi panïkunata wayïkunaman invitayä. Juntum mikuyä y Diosta Adorayänä hörachömi kushishqa yachakuyä. Tsëta rurarnin Jehoväta kuyaq y pëta kushishqa sirweq wawqi panikunata reqiyanqäpitaqa, alläpam kushikuyä. Y congregacionkunata watukaqkunata, misionërukunata y juk wawqi panikunatam wayïkunachö posadatsiyarqö. Tsë wawqi panikuna pasayanqanta willakuyanqan, kushishqa kayanqan y imëkata rurar Diosta sirwiyänampaq listu këkäyanqanta rikäyanqämi, Jehoväta mas kuyayänampaq wamräkunata yanapashqa”. Teytakuna, wamrëkikunata imëkanöpa yanapayë alli amïgukunayoq kayänampaq.

16. ¿Imatataq teytakuna yarpäyanman mëqan wamrampis Jehoväta manana sirwinampaq decidiptinqa?

¹⁶ ¿Mëläya kallpachakuykäyaptikipis Jehoväta sirwita manana munanqanta mëqan wamrëkikunapis niyäshuptikiqa? Ama kallpachakuyänëki pishishqa kanqanta pensayëtsu. Jehoväqa, llapan nunakuna y wamrëkikunapis pëta sirwiyänampaq o mana sirwiyänampaq kikinkuna akrakuyänampaqmi dejan. Jehoväta manana sirwinampaq wamrëki decidiptinqa, ama pensëtsu yapë ni imëpis manana sirwinampaq kaqtaqa. Teytampa wayimpita ëwakoq jövinpita parlar Jesus yachatsikunqanman yarpäyë (Lüc. 15:11-19, 22-24). Tsë jövinqa imëka mana allita rurarnimpis, arrepentikurqanmi. Peru qamqa itsapis kënö ninkiman: “Tsëqa juk cuentullam karqan. Kawë vïdachöqa manam tsënöqa pasakuntsu”. Peru Elie jutiyoq jövin pasanqanmi tsënö rasumpa pasakunqanta rikätsikun.

17. ¿Imanötan Elie jutiyoq jövinta pasanqan yanapashunki?

¹⁷ Teytankunapaq parlarmi, Elie jutiyoq  jövin kënö willakun: “Diosta y Palabran Bibliata kuyanäpaqmi imëkanöpa yanapayämarqan. Peru mas jövinyarkurqa, mana cäsukoqmi tikrakurirqä”. Elieqa Diospita yachakuykarpis, pakëllapam mana allikunata rurëkarqan y Diosta sirwir sïguinampaq teytankuna yanapayaptinqa, manam cäsukuyta munarqantsu. Teytankunapa wayimpitam ëwakurqan y llutam kawakur qallëkurqan. Tsënö karpis, höra höraqa juk amïguntam Bibliapita parlapaq. Eliem kënö willakun: “Amïgüta Jehoväpita parlaparqa, masmi Jehoväman pensaq kä. Teytäkuna alläpa kallpachakurnin Diospita yachatsiyämanqanqa, shonqüchömi këkarqan y ichikllapa ichikllapam tsëkunaman mas pensar qallëkurqä”. Mas tiempu pasariptinqa, Elieqa yapëmi Jehoväta sirwir qallëkurqan. * Teytankunaqa wamrallaraq kanqampita Jehoväta kuyanampaq yachatsiyanqampitaqa, ¡alläpachi kushikuyarqan! (2 Tim. 3:14, 15).

18. ¿Imanötan qamqa rikanki Jehoväta kuyayänampaq wamrankunata yachatsiyänampaq kallpachakoq teytakunata?

¹⁸ Teytakuna, Jehoväqa pëta kuyayänampaq wamrëkikunata yachatsiyänëkipaqmi churayäshurqunki (Sal. 78:4-6). Musyayämi rurënikikuna fäcil mana kanqanta. Tsëmi gänas gänaslla imëkata rurayanqëkipita felicitäyaq. Jehoväta wamrëkikuna kuyayänampaq y pë munanqannö wätayänëkipaq y consejayänëkipaq kallpachakurnin sïguiyë (Efes. 6:4). Tsëta rurayaptikiqa, yarpäyë, Teytantsik Jehoväqa alläpa kushishqam këkanqa.